Jon 11
11
SOPENA 11.
1Na tajua motea na hisena Lasarusi morojo me Petani na vanuai Mere me mavinena Mata.
2(Inie Mere isei mojeje na vurai ta na rei Moli, momosi ra ena hina vuluna, na tuahana Lasarusi morojo.)
3Suria ra mavinena teravarisula me Iesu sura varaia na tuana morojo.
4Ihisa Iesu morohoe, moaso, Na rojo naa mosasori me na mate hina, maa sura halei Atua, sura na Matui Atua molavi na hale suria.
5Iesu momeje Mata me na mavinena me Lasarusi.
6Maa ihisa moroho suri na rojo sei Lasarusi, tomotoho na pohi morua me na vanua veae itoho.
7Tau moaso me ra uluo hina, Motahonai hije tolaho me Jutia rotea.
8Ra uluo hina teaso mea, Varese, esanovi ra Ju temeje na jihiho, oilahoae vahatea maa?
9Iesu moaso liliu, Ra matana maso te havulatea vana morua me na rani motea? Va te tajua molaho me na rani mosajovi suria moreni na rani hina ulu.
10Maa va te tajua molaho me na pohi mojovi, suria na rani mojoa mea.
11Ra sanu naa moaso: tau moaso mera, Na tuaja Lasarusi monavu; maa alaho sura vea moriorio.
12Natuha ra uluo hina teaso, Moli, va monavu movei tahonai.
13Maa Iesu moaso suri na sena mate: hire teninima moaso momarohi me na havu.
14Natuha Iesu moaso tataholo mera, Lasarusi momate.
15Aejieji suri amiu asatohoae sura otorohoroho meau; maa motahonai tovano mea.
16Natuha Tomas na Havo moaso mera uluo hina palaia, Motahonai tovanoae sura tomate valuia.
17Ihisa Iesu monumai moroho tejuria me na moru hina na pohi vate mine.
18Petani motaroroi me Jerusalem, taroroi na kilometer morua.
19Ra tari hira Ju temalua me Mata me Mere sura umararua suri na tuahamurua.
20Natuha Mata ihisa moroho Iesu momalua, molaho mopasuae; maa Mere tomosihe me na pea.
21Natuha Mata moaso me Iesu, Moli va oitoho nai na tuahau mosamate.
22Maa apinisi naanoi va oituha te sanu me Atua, Atua morahu nie ta meho.
23Iesu moaso mea, Na tuahamu motamataha pa.
24Mata moaso mea, Apinisi motamaraha pa me na tamaraha hina mate me na tahuna rani.
25Iesu moaso mea, Inau na Tamaraha, Inau na Mauri: isei morohoroho meau, va momate mine, momauri pa.
26Te tajua momauri morohoroho meau mosamate pa. Oirohoroho na sanu naa?
27Moaso mea, Io, Moli: arohoroho iniho na Kristo, na Matui Atua isei momalua me na ulu.
28Ihisa moaso paletuha, molaho, moore punu na mavi-nena Mere, moaso, Na Varese momalua mooreho.
29Morohoe, vahatea momaraha, monumai mea.
30Iesu mosapasu na vanua reji maa motoho me na vonae veae Mata mopasuae.
31Natuha ra Ju isei tetoho me na pea valuia, teumae, ihisa tereni Mere momaraha vahatea molaho, telaho tahuna, teaso, Molaho me na moru sura tahiae.
32Ihisa Mere momalua veae Iesu motoho, morenia, mojovi tasivo me ra ena, moaso mea, Moli, va oitoho naano na tuahau mosamate.
33Ihisa Iesu morenia motahi me ra Ju isei temalua valuia tetahi mono, mohutu tahajia, momamahanu.
34Moaso, Otojapovia veae? Teaso mea. Moli oinumai, oirenia.
35Iesu motahi.
36Natuha ra Ju teaso, momejeia tohova!
37Valura hire teaso, Na tajua naa isei movei na taha-pisi morioriova mopinisi na vei na tajua mosamate?
38Iesu mohutu vahatea maa, monumai me na moru. Inie na malo-ima, na malo motohohoro na vavana.
39Iesu moaso, Otolavituhe na malo. Mata na mavinena tajua tahamate, moaso mea, Moli, naano moponi oso: momate mine na pohi vate.
40Iesu moaso mea, Aaso meho mine, va oirohoroho meau oireni pa na halei Atua?
41Natuha telavituhe na malo: Iesu moriosahe, moaso, Tata, aaso tahonai meho suria oirohoau.
42Apinisi oirohoau tuitui: maa suri ra tajua tahaturitoho taitaliau aaso nie sura terohoroho oisulau.
43Ihisa moaso paletuha, moaso pati, Lasarusi, oiruhusivo.
44Na tahamate moruhusivo, moauri me ra ena me ra havena hira ruru hina moru, na pahona moauri hina ruru. Iesu moaso mera, Nuneia sura mopinisa laho.
45Ra tari hira Ju isei temalua me Mere tereni na sanu Iesu movera, terohoroho mea.
46Maa valura hira telaho me ra Varisi, tevaraira ra sanu Iesu movera.
47Natuha ra varese-prist me ra Varisi tehuhurahi hina vali, teaso, Tovei na sava? na tajua naa movei ra sanu uloulo ra tari.
48Va hije tojuria tana vea ra tajua vunuvunu terohoroho pa mea: ra tajua hi Romu tenumai pa, terahutuhe ra vanuaja me ra pilaja tanoho.
49Motea hire na hisena Kaiavasi, na moli-prist me na tauni natuha, moaso mera, Otopinisi sanu tipa.
50Otosaninima motahonai meja na tajua motea momate suri ra tanoho sura ra tanoho vunuvunu tesamate.
51Mosatapuna aso nie: maa suria mo-moli prist me na tauni natuha, moaso tala tau Iesu momate pa suri ra tanohoae.
52Mosamate suri ra tanoho natuha hasa maa movilehuhure ra matui Atua isei tevajaja.
53Tau na rani natuha tevali sura veimeteia.
54Suria Iesu mosalaho majaraha tau me na vuati hira Ju: maa molaho me na ureure motaroroi me na Tano Oru me na vanua na hisena Evraim, tomotohoae valui ra uluo hina.
55Na Hanihani hina Salehauli hira Ju motaroroi: ra tajua ra tari temaraha me ra vanua, tesahe me Jerusalem mine na Hanihani hina Salehauli sura tetapura vera tevoe.
56Natuha tetiro Iesu, tetapura aso ihisa teturitoho me na pea hina lotu hira Ju, Otoninima na sava, mosanumai me na Hanihani?
57Ra varese-prist me ra Varisi teaso hauhaua ya te tajua mopinisi motoho veae, mopisera sura telavia.
હાલમાં પસંદ કરેલ:
Jon 11: TLM9109
Highlight
શેર કરો
નકલ કરો
Want to have your highlights saved across all your devices? Sign up or sign in
This is a historic text maintained by the British and Foreign Bible Society.
