Jon 1
1
SOPENA 1.
1Me na majiha na Leo tomotoho, na Leo tomotoho valui Atua, na Leo inie Atua.
2Tomotoho valui Atua me na majiha.
3Motai ra sanu vunuvunu; saite sanu movaere mosataia.
4Na Mauri tomotoho mea: na Mauri inie na Rani hi ra tajua.
5Na Rani motila mena pohitupu; na pohitupu mosapinisia.
6Na tajua na hisena Jon momalua, molavi numai na aso palapala hi Atua.
7Monumai sura vetiveti, sura vetiveti suri na Rani, sura ra tajua vunuvunu terohoroho mea suria.
8Inie mo-sa-Rani, maa na pilana varao na vetiveti suri na Rani.
9Na Rani natuha inie na Rani taharahu, movei ra tajua vunuvunu terani ihisa temalua majiha me na ulu.
10Me na esa tomotoho me na ulu; suria na ulu movaere, maa na ulu mosapinisia.
11Monumai me ra sipilana maa ra sipilana tevotoa.
12Maa me ra tajua vunuvunu isei telavia morahu na hauhaua sura hire ra matui Atua, me ra tajua taharohoroho mea.
13Na vatarae mosavea momalua, mosamalua suria na visihona tajua momejeia, mosamalua suria na tajua moaso, maa suria Atua momejeia.
14Tau na Leo motajua, motoho talija (Toreni na hale hina—na hale na tata morahu me matuna hasena) na lolona momalumu tohova, motaharahu tohova.
15Jon movetiveti suria, molalaa—ra leo tesipilana—Inie isei momalua tahuu temejeia jiviau, suria tomdtoho mine aitoho.
16Moraurau ra sipilana sanu tavere ta meja, io, na sanu tahonai me na tahuna sanu tahonai.
17Moses morahu na Leo Hauhaua, maa Iesu Kristo molavi numai na lolomalumu, na taharahu.
18Saite tajua moreni Atua reji; na Matuna motea hasa, isei motaroroi tuitui me na lolona Tamana, inie movea movavaha.
Na Vei Vavanao.
19Naanoi na vetiveti hi Jon me na rani ra Ju tesula ra prist me ra Livaita ta mea me Jerusalem sura tujjae inie isei.
20Motami, mosairia, moaso, Inau sa Kristo.
21Tetuhae, Iniho isei? Iniho Elija? Aue, moaso, Inau sa nie. Iniho na provet? Moaso liliu, Aue.
22Tau tetatuhae, Iniho isei? Oivaraija sura tolavi na asoliliu me ra tajua tesulaja. Oitapumu aso iniho isei?
23Inau, moaso,
Na rorona motea moaso pati me na Tano-Oru
Otovei tataholo na riona Moli pala na provet Isaias moaso mine.
24Ra tajua naano tenumaj me ra Varisi; tetuhae vahatea maa,
25Sura sava oipaptais va iniho sa Kristo, oi-sa-Elija, oi-saprovet?
26Jon moaso liliu, Aipaptais me na pei, maa Motea moturi me na vuati himiu isei otosapinisia;
27Inie molaho tahuu; maa inau asatahonai sura nune na visina ena.
28Ra sanu naa temalua me Petani vala pei vano Jortan veae Jon mopaptais.
29Inovi maa Jon moreni Iesu momalua ta mea, moaso, Natuha na Matui Atua, isei molavituhe ra veioso hina ulu.
30Aaso mine suria, Me na tahuu Motea monumai isei temejeia jiviau, suria tomotoho mine atoho.
31Asapinisia mine, maa amalua apaptais me na pei 0 sura vea movavaha me ra tajua hi Israel.
32Jon movetiveti paleeno mono, Mine areni na Talume mosumai me na masau pala na vutuhi, tomotoho mea.
33Asapinisia; maa inie isei mosulau sura paptais me na pei, inie moaso meau, Inie oreni pa na Talume mosumai mea, tomotoho mea, inie mopaptais me na Talume Tapu.
34Areni na sanu naa, avetiveti inie na Matui Atua.
35Vahatea maa, inovi maa, Jon moturitoho valui ra uluo hina morua, ihisa
36moreni Iesu molaholaho, moaso, Natuha na Matui Atua.
37Ra uluo hina morua terarohoe moaso na sanu naa, teralaho me na tahui Iesu.
38Tohotohotaiti lesu moilao, morenirarua teralaho tahuna. Oratiro na sava? moaso. Rapai, teraaso liliu (e me na loeja Varese) oitoho veae?
39Oranumai, orarenia, moaso liliu. Suria teravano, terareni na pea veae motoho, teratoho na rani natuha valuia. Na matana maso movate me na rave.
40Motea hirerua isei moroho na sanu Jon moaso, molaho tahui Iesu inie Antru na tuahai Saimon Piter.
41Vahatea motiro na tuahana Saimon, mopasuae moaso mea, Arapasu na Mesaias (me na loeja Kristo e na Tahatapu).
42Antru molavia me Iesu. Moriopeturi nie, moaso, Iniho Saimon, matui Jon, tejuriho pa Kevas (e Piter, me na loeja, na Malo).
43Inovi maa Iesu momeje na laho me Kalili. Mopasu Vilip, moaso mea, Oilaho tahuu.
44Vilip motajua hi Pejaita, na vanuai Antru me Piter.
45Vilip mopasu Nataniel, moaso mea, Topasuae isei Moses mouli suria me na leo hauhaua, ra Provet teuli suria mono. Inie Iesu hi Nasaret, na matui Josev.
46Nataniel moaso, Na sanu tahonai motea moruhusivo me Nasaret? Vilip moaso, Oinumai oirenia.
47Iesu moreni Nataniel mosumai mea, moaso, Na tajua taharahu hi Israel naa, saite sanu oso mea.
48Oipinisiau paleve? Nataniel moaso. Mine Vilip mooreho, Iesu moaso liliu, ihisa oitoho me na vavana peam, aireniho.
49Varese, Nataniel moaso, iniho na Matui Atua, iniho na Moli hi Israel.
50Oirohoroho meau, Iesu moaso, suria avaraiho areniho me na vavana peam? Oireni pa ra sanu uloulo jivia.
51Moaso mea, Aaso taharahu meho, Taupa oireni na tailahi movavaha, me ra enjel hi Atua tesahe, tesumai me na vosai Iesu.
હાલમાં પસંદ કરેલ:
Jon 1: TLM9109
Highlight
શેર કરો
નકલ કરો
Want to have your highlights saved across all your devices? Sign up or sign in
This is a historic text maintained by the British and Foreign Bible Society.
