Matius 2

Sé tou tulap sé tototi'en witi sendangan a méyé

1Si Yesus i nimatoumé witi Betlehem tana' Yudea, in toro niitu si kolano é si Herodes. Wéwéhan sé woopira tou tulap sé tototi'en sé witi sendangan a méyé, méikaayoma witi Yerusalem. 2Ni séra meligau wia sé tou witu, “Wisa si kolano né tou Yahudi si taré matoumé itii? Pahpaan niilek naimomé si tototi'en simerité witi sendangan si timuzu'mé ung kinatouan-Na wo ni kai niméyé i mémongkot wo sumigi' ni Sia.”

3Si kolano Herodes wo sé tou witi Yerusalem é mengompo' in timalingamé niitu. 4Niitumo pekiréwoknamé sé tonaas né walian wo sé tou tulap un Torat a meligau, “Si Mesias é matou wisa?”

5A séra mingkotla, “Witi Betlehem, witi tana' Yudea, pahpaan téntii u méipantik witu um pinantik ni nabi,

6 # Mi. 5:1 ‘Wo ni kamu in tou Betlehem witi tana' Yehuda,

um wanua tua'na niou én zéi'kan ung kumori-kori'

im wana am wanua tua'na witi Yehuda,

pahpaan im wia ni kamu é méyé si maéndo tonaas,

si matuméiz sé tou-Ku Israel.’ ”

7Kaitalingamé niitu, zéi'kan kata'uan né tou an tawahené ni Herodes sé tou tulap sé tototi'en itii, a mahtata'u lumé'o-lé'os sa ing kawisa an ileken néramé si tototi'en itii. 8A séra iatunama i mangé witi Betlehem, kuana, “Mangémo, wo mapenéro nioula lumé'o-lé'os si Koki' itii, wo sa Sia kinailekan niouomé, ituzu'mé wia ni aku wo ni aku toro mamongkot wo masumigi' wia ni Sia.”

9Kaitalingamé u méikuamé ni kolano itii, a séra mangé. Kumompo'mé, si tototi'en si pina'ilek néramé im witi sendangan é mahpuunamo im wia ni séra, a mento'la witu ung katoroan ni Koki' itii. 10I nimileka si tototi'en itii, ni séra én totoz mahpaa-paaz. 11A séra muntepla witu um walé, a milekla si Koki' itii karia si Maria si ina'-Na, a séra kumuruzla i mongkot wo mahsigi' ni Sia. Wukan nérala am pelélé'osan néra, an éndon néramé u mas, ung kamania wo u mur an iwéhé nérala wia ni Sia.#2:11 U sezingna un tatanemen mur ém pahwangunen lana mahwou tariis. U mur kenu kasii ém pemamangunen undam. 12Pahpaan witu un ipi, si Opo Empung nimapata'umo wia sé tou tulap sé tototi'en itii in tia'mo mawuri sumaup wia si Herodes, a séra mawurima witi tana' néra kimiita u lalan walina.

Si Yusuf wo sé sana awuna timingkas witi Mesir

13I sé tou tulap sé tototi'en timula'umomé un tampa itii, si malaekat ni Opo Empung nimapaipima wia si Yusuf, ang kumuama, “Tumoozomé, ipahwalima si Koki' itii karia ni ina'-Na wo tumingkasoma mangé witi Mesir. Mento'pé'la wana makaz ni Aku kumuama wia ni ko sa toromo mawurimé, pahpaan si Koki' itii ém pahpenéron ni Herodes im wunu'en.”

14Si Yusuf mawongkémé, im wengikan itii an ipahwalinama si Koki' itii wo si ina'-Na, timingkasa witi Mesir, 15#Hos. 11:1 a séra mento'la wana makaz si kolano Herodes nimaté. Péléng niana é nimamuali tanu u méikua ni Opo Empung mengiité si nabi in téntii,

“Si Oki'-Ku én tinawah-Ku i mondolé witi Mesir.”

Sé lowai witi Betlehem pahwunu'en

16I si kolano Herodes mata'ula i ni sia én tinowoanoma né tou tulap sé tototi'en itii, ni sia én totoz maupi'. An iatunama sé touna i mamunu' sé lowai witi Betlehem wo sé wana am wanua tua'na makaliklik witu. Sé lowai méipekiwunu'na é sé lowai zuana ta'un wo mawa'mé. Niitu é mengiit um pinahtata'unamé wia sé tou tulap sé tototi'en, i ni séra nimilek si tototi'en itii ing kataré-taré.

17Karia in téntu, nimalekepola u nuwu' ni Opo Empung mengiité si nabi Yeremia,

18 # Yer. 31:15 “Un amé' karia ung kérét i mahamé' un totoz makararaatén

ém pahtalingané im witi Rama.

Si Rahel#2:18 Rahel itii é ngaran ni mahayo ni Yakub, ni sia é méileweng witi Rama, zéi'kan zou' im witi Betlehem, woo 1800na ta'un puunala si Yesus [SM]. Im witu u rérékénan kenu, si Rahel én tanu sawel né ina' né tou Yahudi sé nimamé' pahpaan sé oki' néra é nimaté. Sé oki' ni Rahel én tanu sawel sé oki' né tou Israel, niitu én tumoro péléng sé suzu né tou Israel. i mahamé' wia sé oki'na

wo zéi'kan siapa si toro menou ni sia,

pahpaan sé oki'na é nimatémo.”

Si Yusuf wo sé sana awuna nimawurimé sumaup im witi Mesir

19I si Herodes nimatémoma, a si malaekat ni Opo Empung nimapailek un touna witu un ipi ni Yusuf, witi Mesir. 20Kuan ni malaekat itii, “Yusuf, tumoozomé wo ipahwalimoma si Koki' wo si ina'-Na i mawurima sumaup witi tana' Israel, pahpaan si tou mahwuwunu' si Koki' itii é nimatémoma.”

21A si Yusuf tumoozé, an ipahwalinama si Koki' wo si ina'-Na mawurima sumaup witi tana' Israel.

22Taan ing kinata'uanla ni Yusuf sa si Arkhelaus oki' ni Herodes si nimaéndola kolano witi Yudea simawela si ama'na, si Yusuf é maindé'kan i mawuri wana. Pahpaan witu un ipina, ni sia ém pinapata'uan ni Opo Empung, a sia mangé witi tana' Galilea. 23#Mrk. 1:24; Luk. 2:39; Yoh. 1:45 I ni séra mémoikaayoma witi Galilea, a séra mento'la witi wanua tua'na makangaran Nazaret. Niitu é nimamuali, wo malekepla u nuwu' ni Opo Empung mengiité sé nabi tumoro si Koki' itii: “Ni Sia éng kuan in tou Nazaret.”

હાલમાં પસંદ કરેલ:

Matius 2: LAITOM

Highlight

શેર કરો

નકલ કરો