Juɛl a pwɔdɛn tɛ Mak 4
4
1YECU Kitho cocɛn thul dwɔŋɛ ti ma laltɛn Eke tɛ jig mokɛ. Ma bɛnɛn Eke ti a coŋɛn a coŋɛn, aŋkɛ Eke kacɛn bumɛ ti, ɔci cocɛn bumɛ ji thul ji; makɛ cocɛn inyu thul dwɔŋɛ ti a coŋɛn. 2Ɔci ma laltɛn Eke tɛ juɛl nɛ tolɛn tɛ parabɔl, ɔci gɔkjɛn: 3Bɛdɛ tiŋdɛ: gwɔlɛ, minɛ atɛ wɔyɛ puk: 4ɔci puk dɛmdɛn pɔy ji, ɔci dirgɛ bɛnɛn puk amɛn dokɛ. 5Puk gɛk dɛmɛn pom tɛ, tɛra a diɛkɛn; ɔci yuldɛn nɛ peny: 6ɔci tɛ ɣoŋ toldɛ, puk amdɛ ɣoŋ; bɛkɛ aŋkɛ bawɛ, puk yhinɛ, tunɛ dokɛ. 7Puk gɛk dɛmɛn kuwɛ tɛ, yuldɛn, dakcɛn tɛ jangɛ, jidɛ bɛ. 8Puk makɛn dɛmɛn non a pwɔdɛn, ɔci jidɛn nɛ pwɔdɛn; puk witkɛn dwɔŋɛn a dwɔŋɛn, nyingɛ a coŋɛn a coŋɛn. 9Ɔci Yecu gɔkjɛn: Minɛ jiɛtkɛ ballɛ, akɛ tiŋɛn, dalɛ tiŋdɛ.
10Tɛ Yecu dultɛ makɛ coŋɛn, ma ballɛ Yecu ti yakɛn makɛ inyakɛn witkɛn ayo tocɛn Eke ti tɛ juɛl parabɔl. 11Ɔci Yecu gɔkjɛn eken ti: Ɣɛke aŋkɛ ɣorkɛn ti yowɛrtɛn wakɛ tarŋɛ Kɛn Juɔŋ a Tolɛn ti. Ɔci makɛ ciyɛ burɛ yowɛrnɛ tɛ parabɔl: 12aŋkɛ eken gɔrcɛn ɔci nhijɛn bɛ; ɔci tiŋɛn ɔci jithɛ bɛ; dalɛ eken yalɛn ɔci nɔjɛ wiektɛn ɔntɔ. 13Ɔci Eke gɔkjɛn eken ti: Parabɔl a nɛnɛ kwiyɛ ɣɛke? dalɛ parabɔl wakɛnda nhijɛn a ɔki? 14Minɛ wɔyɛ wakɛ, wɔyɛ juɛl. 15Puk wɔyɛn pɔy ji ballɛ ba makɛ gɔrcɛn juɛl, ɔci aca nɛntɛ Cetan bɛnɛ, ɔci juɛl ballɛ ma yumgɛn ti enyɛ eke ɔntɔ. 16Puk wɔyɛn pom tɛ ballɛ ba makɛ, tɛ eken tiŋɛn juɛl, aca nɛntɛ yumgɛn a nyɔnkɛ; 17ɔci juɛl tiinɛn bɛ, ɔci tɛ makɛ ban ji noŋdɛ yuubiɛ ɔci tɛ eken yanɛn tɛ juɛl, eken pɔɔdɛ ta juɛl. 18Ɔci makɛ pokɛn ballɛ ba puk wɔyɛn kuwɛ tɛ; 19nɛnɛ a makɛ noŋɛ tiŋɛn juɛl, ɔci eken nyingɛ juɔdɛn tɛ wakɛ ban ji, ɔci anɛ wakɛ dwɔccɛ ma, ɔci eken amdɛ ken tɛ wakɛ coŋɛn, aŋkɛ juɛl dalɛn, badɛ dokɛ. 20Ɔci puk wɔyɛn non a pwɔdɛn ballɛ ba makɛ gɔrcɛn juɛl, ɔci muŋɛn nɛ pwɔdɛn, tinɛn yumgɛn ti, ɔci atɛ makɛ pokɛn ti laltɛn tɛ iig nɛcu, akɛ ma tinɛn juɛl a coŋɛn.
21Yecu gɔkjɛn ma ti: Ma ɛcɛn lamba akɛ dwacɛn aŋgen pwɔnɛ ti, walɛ dwacɛ bilɛ pwɔnɛ ti, ɔci ŋapcɛn nyalɔ bɛ? 22Wakɛ tarŋɛ bawɛ, dalɛ wakɛ lelɛ burɛ wakɛnda; ɔci wakɛ naŋɛ ma liedɛ, oodɛ burɛ non a wɔkɛn. 23Kan minɛ jiɛtkɛ balkɛ, akɛ tiŋɛ, dalɛ tiŋdɛ. 24Wontɛ Yecu gɔkjɛn: Waŋ tiicɛ tɛ juɛl a tiŋnɛ; aginɛ i noŋɛ ma ti, nɛnɛ naŋkɛn ma i ti; ɔci wudɛ i ti. 25Minɛ wakɛ balkɛ, wakɛ wutɛ ɣonnɛn tɛ eke: ɔci minɛ wakɛ bawɛkɛ, wakɛ eke edɛ wakɛnda.
26Ɔci Eke gɔkjɛ: Kɛn Juɔŋ a Tolɛn ti ballɛ ba minɛ wɔyɛ puk; 27ɔci ninɛ tɛ wɛn ji, ɔci jɔŋɛ tɛ ɣoŋ ji, ɔci puk yuldɛ ɔci dwɔŋdɛ, nhijɛ eke a ɔki bɛ. 28Tɛra ɣukɛn wakɛ pokɛn; jiɛtkɛ jɔcɛn, 29wontɛ witkɛn bɛnɛ, wontɛ puk nyingɛ bɛnɛ. Tɛ puk yagɛn, ma mugɛ yhɛrɛ, dalɛ ɣoŋ a yhɛrtɛ puk bɛnɛ dokɛ.
30Ɔci Yecu gɔŋɛn: Kɛn Juɔŋ a Tolɛn ti ballɛ ba aginɛ? Ɔn lɛrtɔn a ɔki? Ɔn gɔktɔn tɛ parabɔl a ɔki? 31aŋkɛ leldɔn ma ti a ɔki? Ballɛ ba nyingɛ mactad, nyingɛ ciɛrtɛn bɛ, diɛrgɛn ta nyingɛ luɔm wakɛnda ɔci nyingɛ jangɛ wakɛnda; 32tɛ nyingɛ uljɛn tɛra ji, yulɛ ɔci dwɔŋdɛ nɛ tolɛn, jan a cata bwɔnɛ eke wakɛnda, kerkɛn bicɛn a bicɛn; ɔci dirgɛ cocɛn tibjɛ ti.
33Yecu gɔkjɛn tɛ parabɔl ba nɛnɛ a diɛkɛn bɛ; Eke lotɛ juɛl ɔŋ aŋkɛ ma tiŋɛn. 34Eke gɔkɛ juɛl a pokɛn bɛ: gɔkɛ tɛ parabɔl. Tɛ makɛ botɛn pokɛn Eke lotɛn juɛl wakɛnda.
35Tɛ ɣoŋ a nɛnɛ, tɛ ɣoŋ ɣocɛn Yecu gɔkjɛ ma ti: Dalɛ ikin otin kwɔca. 36Ɔci makɛ coŋɛn duldɛn, Yecu edɛ ma tɛ bum; ɔci buptɛn makɛn atɛ a ciɛlɔ. 37Ɔci jwɔm bɛnɛ nɛ tolɛn, ɔci piak (thul) pɔgdɛ nyalɔ, liepcɛn bum konɛ ti; aŋkɛ bum noŋɛ kwumɛ dokɛ. 38Yecu ballɛ bum ŋwoyɛ ti, wicɛn; ɔci Yecu tiiwɛn ma, ɔci gɔkjɛn Eke ti: We ɔn, I bwɔgɛ ikin jatin mokɛ? 39Ɔci Yecu tiiwɛn, ɔci ɣitɛ jwɔm ti; ɔci gɔkjɛn thul ti: Muundɛ, yɔdɛ. Aŋkɛ jwɔm daŋɛn, ɔci piak yɔdɛ a yɔnɛn. 40Wontɛ Yecu gɔkjɛn ma ti: Ɣɛke nhugdɛ lien ɣogɛ? Jithɛ min bɛ? 41Ɔci eken bwɔyɛ a konɛ bɛ, ɔci gɔkjɛ pokɛn: Eke nɛnɛ a minɛ? Jwɔm aŋkɛ jithɛ jig Eke, ɔci thul jithɛ jig Eke. Eke a Minɛ?
હાલમાં પસંદ કરેલ:
Juɛl a pwɔdɛn tɛ Mak 4: MFZ1947
Highlight
શેર કરો
નકલ કરો
Want to have your highlights saved across all your devices? Sign up or sign in
First published by British and Foreign Bible Society in 1947.
