Saint Jean 12
12
1Mono, name difala‐mbéo ambèl hi name Pâque, Jésus mi gui pou Béthanie, pou a Lazare, njoukou on ko̱ Jésus mi tome nè an wora houli. 2Da klime jou laka bèlaléou hi nè an ndourou; Marthe mi nding bakara hi kli, da Lazare ba njoukou an wora kli on ko̱ mi son laka jing Jésus. 3Mono, Marie mi bi bèla yombo nard hanguèl kilo mbéo ko̱ mbo̱rikè mi nyèta, da si kon toul bo̱ka Jésus ka lou jing pouran toulè, da bil voulou mi dèn mama ka fona yombo. 4Da Judas Iscariot, hana mbéo an wora njou‐séna bong nèli goune a Simon, kè on ko̱ ma jo̱lè, mi sa: 5Baïfèn da ouime tane jo̱l yombo aïn, ka jing mbo̱ri lou mane ténakè‐saï, da hi mbo̱ri on hi ba foïna njoukouli ya lé? 6Kè sa on tane ti ba baï ko̱ kème ji foïna njoukouli ta ya, da baï ko̱ kè ba njou‐riya da pèng ngou mbo̱ri ka ri fèn an bilkè. 7Mono, Jésus mi sa: Mo yèng nè an kème pèng yombo on bi baï name gora mi an pal. 8Baï ko̱ foïna njoukouli mi kaou jing oui guèbassoko, da ami, mè ma kaou jing oui guèbassoko ya.
9Ko̱ Juifli nyèta mi lala ko̱ kè makaou ndourou; kli gui tane ti ba baï ko̱na Jésus ka ho̱kè ya, da baï ndé ko̱na Lazare kéng, kè on ko̱ kème tome nè an wora houli jinguèl. 10Da loukou sacrificateurli mi bakèdakè jing hana an klime ndé i Lazare kéng; 11baï ko̱ Juifli nyèta mi yèng kli, da la bilaou a Jésus baï toulè.
12Da ko̱ pélé mi taka ro̱kè njoukouli on ko̱ mi gui baï name gnèna laka, da ko̱ klime la ba Jésus mi gui pou Jérusalem tou, 13kli bi ndo̱ko̱ di ndèng‐è da sé guè domboro ka wou toul jing nè, kli wan njaka guè siya: Hosanna!
Same kè on ko̱ mi gui ka ling a Nanjou,
ko̱ ba Nanjoukaou a Israël. 14Da Jésus mi ko̱ goune torofio da hé toulè, mahana ka on ko̱ mi dé:
15Mo ngou waou ya, goune waïn a Sion;
Mo ko̱, Nanjoukaou no ko̱ gui,
Ko̱ kaou toul goune torofio.
16Njou‐séna bong nèli mi tane ga tou fèn aïnli ka kome nguite ya, da ko̱ Jésus mi ya jonafèn nè tou, da mono on klime bi hang kli toul fèn aïnli ko̱ mi dé toulè, da ko̱ klime nding fèn aïnli hi nè.
17Da mono, njoukouli on ko̱ mi kaou jing nè ko̱ kème di Lazare an bil pal, da tome nè an wora houli, klime sa bongbaï toul fèn on. 18Baï on da rokè njoukouli on mi sé wou toul jing nè an domboro, baï ko̱ klime lala toul fèn‐to̱ko̱nakè on ko̱ kème nding. 19Da pharisienli mi sa jing hana: Oui ko̱, ko̱ ouime tane ga nding fèna ya; da mono, oui ko̱ njoukouli bon mi sé falè tou.
20Da Grec hanali mbéo mbéo makaou an wora njoukouli on ko̱ mi gui baï hiouna Ouone name gnèna laka. 21Mono, klime gui mona Philippe njou‐pou Bethsaïda an guèl Galilée, da oui nè: Njoï, na ji ko̱na Jésus. 22Philippe mi gui da sa bongkè hi André, da André kira Philippe mi doli ka sa hi Jésus.
23Da Jésus mi féré sa hi kli, ka sa: Name gui tou, baï an Goune a njoukou mi ya jonafèn. 24Babaï, babaï, mi mè sa hi oui, tokoré mèrèn mapa mi lé koukoula, da tane ga hou ya, kè na ho̱kè; da tokoré kème hou tou, kè lé lénakè nyèta. 25Da kè on ko̱ mi ji yana nè, kè ma bo̱lè, da kè on ko̱ mi jèk yana nè an koukoula aïn, kè ma pèng yana on baï yana kambèlè. 26Da tokoré njoukouna mi nding bakara hi mi, an kème gui fali; baï guèl on ko̱ mème kaou, yé njou‐bakara ni ma ndé kaou ndourou kéng. Tokoré njoukouna mi nding bakara hi mi, yé Baba fènè mi dik nè. 27Kassénaï laou ni mi hou mbi, da yé mè ma sa ba fèn lé? Baba sél mi guèfal, ka l’heure aïn. Da rokokè mono ko̱ mème gui ka l’heure aïn. 28Baba hi jonafèn ka ling‐o:
Da mono bounaka mi ba gui ka nonkala ka sa: Mè hi jonafèn hi nè tou, da mè ma kaïn hi jonafèn hi nè ba aféké.
29Da mono rokè njoukouli on ko̱ mi kaou soko jing nè mi la bounaka aïn, kli sa, mbame ndou tou; da afékéli mi sa: Ange mi ko̱ sa baï hi nè.
30Jésus mi féré sa, ka sa: Bounaka on mi tane ga gui ba baï touli ya; da ba baï toul baï. 31Kassénaï walabaï an koukoula aïn mi gui tou, kassénaï mi wou zaworo a koukoula aïn tèn kala. 32Da mè, tokoré klime haka mi guè siya an koukoula, yé mè ma lang njoukouli bon gui moni. 33Da kè sa baï on ba baï to̱ko̱na mboro houl on ko̱ kè ma hou. 34Da ro̱kè njoukou aïnli mi féré sa hi nè: Na lala an bil takarata guingna ko̱ sa, Christ makaou kambèlè; baïfèn da mome sa: Yé Goune a njoukou ma haka guè siya lé? Goune a njoukou on ba guè lé? 35Mono, Jésus mi sa hi kli: Takanafèn ma pane an woro baï ba aféké gounfènakè on. Oui sé ko̱ takanafèn mi pane jing oui, baï an yilime mi tane si oui ya; baï kè on ko̱ mi sé ka yilime kè tane ga tou guèl on ko̱ kème sé ndourou ya. 36Ko̱ takanafèn mi pane jing oui, oui la bilaou a takanafèn ko̱ ouime tèn ba goundi a takanafèn.
Jésus sa baï on, da kème ourou ka mou monè jing kli.
37Da tongna ko̱ keme nding fèn‐to̱ko̱nakèli on nyèta an none kli, kli tane ga la bilaou‐è ya; 38baï baïnjaka a prophète Ésaïe mi tèn kala ka babaï, ko̱ kème sa:
Nanjou, guème ko̱ la bilaou tili baï bongbaï na lé?
Da guème ko̱ ko̱ bassane a Nanjou lé?
39Mono, baï on kli tane ma baï lana bilaou ya, baï ko̱ Ésaïe mi sa an guèl aféké:
40Kème foukourou none kli bi rou; da bati laou kli bi,
Baï an klime tane ko̱ ka none kli ya,
Da tane kèrè ka go̱ro̱ kli ya, baï an klime komo mboro kli, da mème haï kli.
41Esaïe mi sa baï on jinguèl, baï ko̱ kème ko̱ jonafèn nè tou, da sa bongbaï nè.
42Da tongna an zéng a zaworoli, njoukouli nyèta mi ndè la bilaou‐è; da kli tane ga sa bi kala ya, baï ngouna waou nona pharisienli, baï kli ma ni kli tèn kala an bil synagogue. 43Baï ko̱ klime sé hang jonafèn a njoukouli ta jonafèn a Ouone.
44Da Jésus mi bouka guè siya, ka sa: Kè on ko̱ mi la bilaou ni, kè tane ga la bilaou ni ya, da la bilaou ba a kè on ko̱ pi mi, 45da kè on ko̱ ko̱ mi, kè ko̱ kè on ko̱ mi pi mi. 46Mè gui ba takanfèn mona njou‐koukoulali, baï an njoukouna ko̱ mi la bilaou ni, mi tane bi an bil yilime ya. 47Da tokoré njoukouna mi la baïnjaka ni, da tane ga pèng ya, tane ti ba mè mi ko̱ wal baï hi nè ya, baï ko̱ mè tane ga gui baï wala baï hi njou‐koukoulali ya, da mème gui ba baï kouna njou‐koukoulali. 48Da kè on ko̱ pong mi, da tane ga la baïnjaka ni ya, da hana mbéo makaou ko̱ mi wal baï hi nè. Da baïnjaka on ko̱ mème sa hi nè jinguèl ma wal baï hi nè ka sèkèrè name. 49Baï ko̱ mè tane ga sa ka ba mboro ni fèni ya; da ba Baba fènè ko̱ mi pi mi, mi ko̱ hi bina baïnjaka on hi mi toul fèn aïn ko̱ dadaon an mème sa, da fèn on an mème sa mboura. 50Da mè toutou bina baïnjakè on ba yana kambèlè. Mono baï on ko̱ mème sa, mahana ka on ko̱ Baba fènè mi sa hi mi, da mè sa on.
હાલમાં પસંદ કરેલ:
Saint Jean 12: KBN1947
Highlight
શેર કરો
નકલ કરો
Want to have your highlights saved across all your devices? Sign up or sign in
Published by the British and Foreign Bible Society in 1947.
