LUKA 23
23
1Oco onjango yosi ya katuka kuenje yo tuala ku Pilato. 2Va fetika oku u pindika, vati, Tua sanga undeti, wa tatamisa ofeka yetu, kuenje wa tutuiya oku feta elisimu ku Kaisare, hati, Ame Kristu, haime Soma. 3Oco Pilato wo pula hati, Vusoma ya va Yudea ale? Yesu wo kumbulula hati, Ove wa ci popia. 4Kuenje Pilato wa popia lovitunda vinene lowiñi hati, Ulume u sio sangele leko. 5Puãi va toñomala vali vati, O tutomainya omanu loku longisa vo Yudea yosi. Wa fetikila ko Galilea toke kulo.
6Eci Pilato a ci yeva, wa pula hati, Ulume u u Galilea ale? 7Oco, eci a limbuka okuti wa tiamela kuviali wa Herode, wo tuma kokuaye momo wa kala vo Yerusalãi oloneke viaco. 8Eci Herode a mola Yesu, wa sanjuka ca lua, omo osimbu a yonguile oku u mola, momo wo yevela ovina via lua, kuenje wa lavoka oku mola ocilimbu cimue ci lingiwa laye. 9Oco wo pula olondaka via lua, puãi Yesu ko kumbuluile cimue. 10Ovitunda vinene la vakuavisonehua haiko va kala, va lipilika loku u pindika. 11Oco Herode lasualali vaye vo fukilisa loku u fuanguila. Vo walisa onanga yi ñañala kuenje vo tiuwiya ku Pilato. 12Eteke liaco Herode la Pilato va linala pokati, momo ale va likuatelele ukuse.
13Oco Pilato wa pañinya ovitunda vinene lakulu kuenda omanu. 14Wa popia lavo hati, Wa neneli omunu u, hoti, O tatamisa ofeka. Ame ndo pulila kovaso ene lutate. Cilo ndu sapuili okuti kolondaka viosi wo pindiki lavio sia sangeleko eko. 15Ndaño Herode haico, momo wo tiuwiya kokuetu. Mopia siti, Ka lingile cimue ca sesamela okufa. 16Oco ndu tiapula kuenje ndu weca. 17Kua kala ocihandeleko cokuti kofesta yo Pascoa va kutuluila omanu omandekua yimue.
18Puãi va vilikiyila vosi pamosi, vati, Undeti wipa. Tu kutuluile Baraba. 19Baraba eye omandekua yimue ya imbiwile vokayike, omo ya linga usuanji vo Yerusalãi, kuenda ya ponda omunu. 20Kuenje Pilato wa popia lavo onjanja yavali, momo wa yongola oku eca Yesu. 21Omanu puãi va vilikiya vati, U valela kekulusu. U valela kekulusu. 22Onjanja yatatu wa popia lavo, hati, Momo nye? Caco cĩvĩ a linga nye? Sio sangele leko li sesamela okufa. Oco ndu tiapula ño kuenje ndu weca. 23Puãi va toñomãla, loku vilikiya lolukandi, vati, A valeliwe kekulusu. Kuenje olondaka viavo via yula. 24Oco Pilato wa teta onimbu, hati, Ndeci vu yongola ci lingiwe. 25Oco wa va kutuluila una wa imbilua vokayike usuanji lumondi, eye vo pinga. Puãi Yesu wo weca kocipango cavo.
26Kuenje eci va enda laye, va kuata umue Simono u Kurene, wa tunda kovapia Vo tuika ekulusu oku li ambata loku kuama Yesu. 27Owiñi wa lua womanu wo kuama Vowiñi mua kala akãi va lila ca lua loku sinumula. 28Puãi Yesu, oku pukukila kakãi, wa popia hati, Amãla va Yerusalãi, ko ka ndili ame, puãi lilili ene muẽle loku lila omãla vene. 29Momo ndu sapuili okuti kuiya oloneke eci va popia vati, Olosiũle ovio via sumũlũha, lovaimo ka a citile kuenda avele ka a nyamiwile. 30Eci viya, omanu va fetika oku popia lolomunda vati, Tu leñuhĩli, kuenda lovivulu vati, Tu tuviki 31Momo, nda va linga ovina evi luti u talala, va linga nye luti wa kukuta?
32Kuenje kua kala vali vakuavo vavali va ambatiwa ha va pondiwila kumue laye, ovo olondingaĩvi. 33Eci veya kusenge wa tukuiwa Ekõlokõlo oco vo valela kekulusu. Olondingaĩvi viaco va vi valela, yimue kondio yaye, yikuavo kepili. 34Kuenje Yesu wa popia hati, A Tate, va ecela, momo eci va kasi loku linga ka va ci. Va lianjela uwalo waye pokati kavo oku u limbaila ocela. 35Kuenje omanu va talama oku vanja, akulu puãi vo sevuisa vati, Wa popela vakuavo, a lipopele eye muẽle nda eye ombuavekua ya Suku, haeye Mesiya wa noliwa laye. 36Asualali lavovo vo fuanguila. Oku iya kokuaye va seteka oku u nyuisa ovindangele, 37vati, Nda ove Soma ya va Yudea, lipopela. 38Kilu liaye kua kala ocisonehua citi, U, Soma ya va Yudea.
39Yimue kolondingaĩvi via nyoñamisua, yo popia etonãi yiti, Haveko Mesiya? Lipopela ove muẽle, tu popelevo etu. 40Puãi ukuavo, oku u lemela, wa kumbulula hati, Anga, ku sumbi ndaño Suku, momo eye love eyambulo liene limosi? 41Puãi lietu liesunga, momo tua sanga eyambulo lia sesamela ovilinga vietu. Omunu u puãi ka lingile cimue cĩvi. 42Kuenje wa popia la Yesu hati, Eci wiñila vusoma wove, njivaluke. 43Yesu wo kumbulula hati, Hu sapuila ocili okuti etaili o kala kumue lame vofeka ya Suku.
44Eci ca soka ndola yepandu, kuenje kueya owelema kofeka yosi toke kola yecea. 45Ekumbi lia fa kuenda ongumbo yonembele ya toka pokati. 46Yesu wa vilikiya londaka yinene hati, A Tate, ñundika omuenyo wange povaka ove. Oco, eci a popia olondaka evi, wa tula omuenyo. 47Eci kesongo a mola ovina via lingiwa, wa tumbangiya Suku hati, Ocili omunu u, ukuesunga. 48Kuenje owiñi wosi wava va liongoluila oku tala, eci va mola ovina via lingiwa, va tiukila kolonjo viavo loku livetaveta polonete. 49Vosi vo kũlĩha, lakãi vo sindikila eci a tunda ko Galilea va talama kupãla oku tala ovina evi.
50Kua kala ulume umue, onduko yaye Yosefe, eye u Arimateya, imbo limue lia va Yudea, haeye wa tiama konjango yakulu. Omunu waco wa sunguluka, haeye ukuesunga. 51Eye ka tavele kongombo yavo, ndaño kovina va linga. Wa kala loku lavoka usoma wa Suku. 52Eye wa enda ku Pilato, kuenje wa pinga etimba lia Yesu. 53Kuenje, oku li tulula, wa li muña vonanga yovalatanya, kuenje wo langeka veleva lia sokotolua vesenje omo lomue wa la kapiwaino. 54Eteke liaco eteke lieliangiliyo lio Pascoa, ekumbi liaco hailio esambata li fetika. 55Kuenje akãi vana vo sindikila eci a tunda ko Galilea, va kuamako, kuenje va mola eleva, kuenda ndeci etimba liaye lia kapiwamo. 56Noke va tiukila, kuenje va pongiya ovihemba vioku sieketa kuenda onguendu.
Kuenje kesambata va puyuka ndocihandeleko.
હાલમાં પસંદ કરેલ:
LUKA 23: EMB63
Highlight
શેર કરો
નકલ કરો
Want to have your highlights saved across all your devices? Sign up or sign in
Umbundu Bible © United Bible Societies, 1963.
