YOANO 9
9
1Eci a vinjukako wa mola omunu wa citiwa omeke. 2Olondonge viaye vio pula viti, A Rambei, helie wa linga ekandu, omunu u, ale, ele olonjali viaye, okuti o citiwa omeke? 3Yesu wa kumbulula hati, Ka ci kasi okuti eye wa linga ekandu, pamue olonjali viaye, puãi wa citiwa omeke okuti, oco upange wa Suku u molehele kokuaye. 4Ca tu sesamela oku linga upange wu wa numa osimbu kuli utanya; eci uteke wiya, lomue o tẽla oku linga upange. 5Osimbu ñasi voluali, ame ndicinyi coluali. 6Oco, eci a popia ndoco, wa siyila posi, kuenje wa tama onata lovate. Wa laña vovaso omeke lonata yaco, 7kuenje wa popia laye hati, Kuende, ka puse vociva ca Siloma, ca lomboloka citi, Catumiwa. Oco wa ka pusile yu wa tiuka, o lete. 8Ava va lisungue laye, lava vo muile muile ale loku eya, va popia vati, Heyeko una wa tumayala loku eya? 9Vamue vati, Eye. Vakuavo vati, Heyeko, puãi wo setahala. Eye hati, Ame. 10Oco vo pula vati, Ovaso ove a letuluka ndati? 11Eye wa kumbulula hati, Omunu una wa tukuiwa Yesu wa tama onata, kuenje wa laña vovaso ange, yu wa popia lame hati, Kuende ko Siloma, ka puseko. Oco ndaile, nda ka pusile, kuenje nda letuluka. 12Vo pula vati, O kasi pi? Eye hati, Siko.
13Oco u wa kaile omeke vo tuala ku va Fariseo. 14Ca kala esambata eteke Yesu a tama onata yu a patulula ovaso aye. 15Va Fariseo vo pula vali ndomo a letuluka. Eye wa va kumbulula hati, Eye wa laña vovaso ange onata, kuenje nda pusa, yu ndete. 16Va Fariseo vamue va popia vati, Omunu waco ka tundile ku Suku, momo ka sumbila esambata. Puãi vakuavo vati, Omunu ukuakandu o linga ndati ovilimbu ndevi? Oco va lipatãla pokati kavo. 17Oco va popia vali lomeke, vati, Ove hẽ, u tukula ndati, omo a patulula ovaso ove? Yu wa linga hati, Uprofeto.
18Puãi va Yudea ka va kolelele okuti wa kaile omeke, yu wa letuluka, te eci va pañinya olonjali viu wa letuluka, 19kuenje va va pula vati, U hẽ, omõlene, u vu linga hoti, Wa citiwa omeke? Nda oco, wa letuluka ndati? 20Olonjali viaye via kumbulula viti, Tu ci okuti omõletu, kuenje wa citiwa omeke. 21Puãi ndeci a lete cilo, ka tu ci, ndaño u wa patulula ovaso aye, ka tu wi. U puli, o kasi lutunga, a ci lipopele eye muẽle. 22Olonjali viaye via ci popela omo via kala lohele ya va Yudea, momo va Yudea va likuminya ale vati, Nda umue o tava, hati, Eye Mesiya, o tundisua vosunangonga. 23Oco olonjali viaye via popela viti, O kasi lutunga, u puli.
24Oco va pañinya vali omunu wa kaile omeke, kuenje va popia laye vati, Sivaya Suku, momo tu ci okuti omunu waco ondingakandu. 25Eye wa kumbulula hati, Nda ondingakandu nda ndati, si ci, puãi eci nji ceci okuti, nda kaile omeke, cilo ndete. 26Oco vo pula vati, Wa ku linga nye? Wa patulula ndati ovaso ove? 27Eye wa va kumbulula hati, Ndopo eci ndo ci sapuili, kuenje ka wa ci yeveli. Nye vu yonguila oku ci yeva vali? Lenevo vu yongola oku linga olondonge viaye? 28Kuenje vo penya, vati, Ove vundonge yaye, etu puãi tulondonge via Mose. 29Tu ci okuti Suku wa popia la Mose, puãi omunu u, oku a tunda ka tuiko. 30Omunu waco wa va kumbulula hati, Avoyo, eci ocikomo! Ka wa kũlĩhili oko a tunda, haimo wa patulula ovaso ange. 31Tu ci okuti Suku ka yevi olondingakandu, puãi nda omunu o sumbila Suku, kuenje o linga ocipango caye, Suku u yeva. 32Tunde nunde ka ca la yevala okuti umue wa letulula ovaso omunu wa citiwa omeke. 33Omunu u, nda ka tundile ku Suku, nda ka tẽlele oku linga cimue. 34Vo kumbulula vati, Ove wa citilua ndeti vakandu, ove o tu longisa? Yu vo tundisa.
35Yesu wa yeva okuti vo tundisa, kuenje, oku u sanga, wo pula hati, Wa kolela Mõla a Suku? 36Eye wa kumbulula hati, A Ñala, eye elie okuti ndu kolela? 37Yesu wo sapuila hati, Wo mola, haeye o kasi loku popia love. 38Kuenje wa popia hati, A Ñala, ñolela, yu wo fendela. 39Yesu wa popia hati, Voluali ndeyililamo oku tetulula, okuti ava ka va lete va leta, lava va lete va linga olomeke. 40Va Fariseo vamue va kala laye va yeva ovina evi, kuenje vo pula vati, Letu le tulomeke? 41Yesu wa popia lavo hati, Nda wa kaile olomeke, nda ko kuete ongole. Puãi, omo vu linga hoti, Tu lete, oco ongole yene vu kasi ño-o layo.
હાલમાં પસંદ કરેલ:
YOANO 9: EMB63
Highlight
શેર કરો
નકલ કરો
Want to have your highlights saved across all your devices? Sign up or sign in
Umbundu Bible © United Bible Societies, 1963.
