YOANO 7
7
1Kovaso yaco Yesu wa ñuala ñuala vo Galilea, ka yonguile oku ñuala ñuala vo Yudea omo va Yudea va sanda oku wipa. 2Oco ofesta yimue ya va Yudea, okuti ofesta yolosinge, ya kala ocipepi. 3Oco va manjaye va popia laye vati, Kulo tundako, kuende ko Yudea, oco olondonge viove vi mole ovilinga o kasi loku linga. 4Momo lomue o linga cimue vuyombeki nda o livela oku kũlĩhiwa. Nda o linga ovina ndevi, lilekisa koluali. 5Momo ndaño vamanjaye ka vo kolelele. 6Yesu wa popia lavo hati, Eteke liange ka lieyile handi, puãi eteke liene li kasi ño-o. 7Oluali ka lu tẽla oku u suvuki, ame puãi lu suvuka omo njimba uvangi okuti ovilinga vialuo via vĩha. 8Kuendi kofesta ene muẽle. Ame si endiko omo ola yange ka yeyile handi. 9Kuenje, eci a popia lavo ovina evi, eye wa siala vo Galilea.
10Puai, eci okuti vamanjaye va lamana ale kofesta, oco layevo wa enda, puãi haloku limolehisako te uyombeki. 11Kofesta, va Yudea va kala loku u vanjiliya, vati, O kasi pi? 12Kuenje pokati komanu pa kala oku u mumuila kua lua. Vamue va linga vati, Eye omunu muẽle wa sunguluka. Vakuavo puãi vati, Hacoko, o kasi loku lueyisa omanu. 13Haimo lumue, lomue wo vangula kovaso omanu, omo va kala lohele ya va Yudea.
14Puãi pokati la kati kofesta, Yesu wa iñila vonembele, kuenje wa longisa. 15Oco va Yudea va komoha vati, Undeti wa kũlĩha ndati ovisonehua, ka lilongisile pua? 16Oco Yesu wa va kumbulula, hati, Okulonga kuange hakuangeko te ku wa numa. 17Nda umue wa panga oku linga ocipango caye, eye o kũlĩha okulonga kuaco, nda hẽ kua Suku, ele nda ci popia ño ame muẽle. 18U o popia ño eye muẽle, o sanda ulamba waye, puãi u o sanda ulamba wu wo tuma eye wocili. Vokuaye ka muli uhembi. 19Mose hẽ, ka wihili ovihandeleko? Haimo lumue, lomue pokati kene o pokola kovihandeleko. Nye vu sandela oku njipa? 20Owiñi wa kumbulula vati, O vela kutue. Helie o sanda oku ku ipa? 21Yesu wa va kumbulula hati, Ocikomo cimosi lika nda linga kuenje vosi wa komohi. 22Mose wa wihi evamba, puãi Mose haeyeko wa li eca te vakukululu, haimo kesambata vu sevisa omunu. 23Oco, nda omunu o seviwa kesambata okuti ocihandeleko ca Mose ka ci samiwa, ci tava ndati oku nemela ame omo nda sakula etimba liosi liomunu kesambata? 24Ko ka tetuluili ño eci ci moleha, puãi tetululi lesunga.
25Oco va Yerusalãi vamue va popia vati, U, heyeko una va yongola oku ipa? 26Haimo yu, o popela kovaso omanu lutoi kuenje ka va popi laye cimue. Oco hẽ, asongui va limbuka nga okuti eye Kristu? 27Puãi u, tua kũlĩha oku a tunda. Eci Kristu eya, lomue o kũlĩha oku a tunda. 28Oco Yesu, eci a kala loku longisa vonembele, wa popia lolukandi, hati, Vu nji, kuenda wa kũlĩhi oku nda tunda. Puãi sieyile ño locipango cange. U wa numa eye wocili, ene puãi ka wo kũlihili. 29Ame ndo kũlĩha, momo nda tunda kokuaye, eye wa numa. 30Oco va seteka oku u kuata puãi lomue wa wimba eka, momo ola yaye ka yeyile handi. 31Puãi va lua pokati komanu vaco vo kolela, va pula vati, Eci Mesiya eya o linga ovilimbu via lua, okuti evi via linga omunu u vi sule?
32Va Fariseo va yeva ndomo owiñi wo mumuila ovina evi, kuenje ovitunda vinene la va Fariseo va tuma akuenje vovitunda oku u kuata. 33Oco Yesu wa linga hati, Ñasi handi kumue lene okasimbu kaño, oco noke ngenda ku-u wa numa. 34Vu sanda puãi ko sangi. Kuenje oko ñasi ko tẽla oku pitilako. 35Va Yudea va livangula pokati vati, Omunu u enda pi okuti ka tu u sangi? Enda nga ku va Yudea va sandokaila pokati ka va Helasi loku longisa va Helasi? 36Eci a popia hati, Vu sanda, puãi ko sangi, kuenda vali hati, Oko ñasi ko tẽla oku pitilako, ca lomboloka ndati?
37Keteke lia sulako liofesta, hailio eteke linene, Yesu wa talama, kuenje wa popia lolukandi hati, Umue nda o kasi lenyona, eye kokuange, a nyue. 38U o ñolela, vutima waye mu tunda olondui viovava omuenyo, ndeci ca popia ovisonehua. 39Puãi eci, wa ci popela Espiritu lina ava vo kolela va laika oku tambula. Momo Espiritu keyile handi, omo Yesu ka iñilile handi vulamba.
40Eci va yeva olondaka evi, oco omanu vamue va kalako, va popia vati, Ocili eye uprofeto waco. 41Vakuavo vati, Eye o Mesiya. Puãi vamue vati, Mesiya nga o tunda ko Galilea? 42Ocisonehua hẽ, ka ca popele citi, Mesiya ukuambuto ya Daviti, o tunda ko Beteleme, kimbo oko kua tungile Daviti? 43Oco owiñi wa litepa mekonda liaye. 44Vamue va yonguile oku u kuata, puãi lomue wo wimba eka.
45Akuenje va tumiwile va tiuka kovitunda vinene kuenda ku va Fariseo. Oco va pula akuenje veya, vati, Nye ka wo neneleli? 46Akuenje va kumbulula vati, Lomue omunu wa la popia ndomunu waco o-o. 47Oco va Fariseo va popia lavo vati, Lenevo wa lueyisiwi? 48Anga, umue pokati kovasongui wo tava, pamue umue pokati ka va Fariseo? 49Puãi owiñi u ka wa kũlĩhile ovihandeleko, wa siñaliwa. 50Nikodemo, una wa ile ale kokuaye, haiye ukuacisoko ca va Fariseo, wa popia lavo hati, 51Ovihandeleko vietu hẽ, vi pisa omunu osimbu ka vo yevele eye muẽle, loku kũlĩhisa eci a linga? 52Kuenje va kumbulula vati, Lovevo, u Galilea? Kũlĩhisa lutate kuenje o limbuka okuti ko Galilea ka ku tundi uprofeto. 53Va enda vosi, omunu konjo yaye, omunu konjo yaye.
હાલમાં પસંદ કરેલ:
YOANO 7: EMB63
Highlight
શેર કરો
નકલ કરો
Want to have your highlights saved across all your devices? Sign up or sign in
Umbundu Bible © United Bible Societies, 1963.
