Etatelu 19
19
Elanyelu ka Sodoma la Ngomora
1Andjelo ahendi wakakumi la Sodoma la dikolo. Lota akadjashi lʼeotwelo ka Sodoma. Lamʼakandawaenyi, ndi akunela dia ntalungula. Ndi akakhusamela. 2Ku ndi akati ati: Akhumemi, dimi lambunyosengasenga nti: Nyuhangi lu luudu lami, dimi ukambi anyu, elo. Nyusuli ekulu, nyulali loko Kanyeto kʼolomo la pindju dia nkolamela lu lokendo lanyu. Keli vo wakûkaluya diui vati: Kema, tayuhutuya unya lu esese wʼusumba. 3Keli Lota akatekoya mbasengasenga, ku wakatshu lakandi, wakatoto lu luudu. Ndi akatshela dambu, akakatela ma diaha la edya, ku vo wakali. 4Ntundu vo watetama, apami tshe wa lʼusumba a Sodoma wakadingi luudu lako. Wudja wʼutundu wakamote laawo. 5Vo waketi Lota, wakawumbula vati: Apami wakotwe lu luudu laye lʼutshu one, landeʼewo na? Ututundjiyawo, keli teyani la wo. 6Lota akayi la suku, akatumbi utsha le wo. Ku ndi akadihi lukuki ekongokongo. 7Ndi akati ati: Nyu analingu, dimi lambunyosengasenga nti: Tanyutshaki dikambu dia kolo ne. 8Nyulungi, dimi leko la anʼami wʼamantu ahendi wahateyana lʼapami. Dimi lambunyosengasenga nti: Nyetawo dimi nyutundjiyawo lʼandja; nyuyatsheli uku alanganyu. Keli tanyutshelaki apami ane wakayi lu luudu lami nduku dikambu. 9Keli vo wakuhangwela vati: Mo la suku we! Wakatanela vati: Pami kene akayi ongendangenda, keli kakiane ndi ambuyadja umbadi. Kakiane, shu tayena la ye! Tayukutshela kolo kuleki kene kayutatshela. Vo wakatshindi Lota la wulu, ku wakasukana dia nkungula lukuki. 10Apami ako waki lu luudu wakatundja anya, wakotshiya Lota uya le wo lu luudu, wakadihi lukuki. 11Ku vo wakete apami waki la suku, wa tshitshe ndu wa waki, tutshungu tutu. Ku vo tshe wakaheko nyanga lukuki, keli vo kumbeya lene elo.
12Apami ako wakambula Lota vati: Wana weki la ye lane ntu? Akilu aye wʼapami, ana apami, ana amantu, la wane weli la ye lʼusumba, umo la wo uma lu dihuli ne. 13Mete, lundju lʼantu ane lambotekoya efula la ntundu ka Latuyalaka, diako mbakandatutumi dia ndjulanya usumba one. 14Lota akatumbi, akatusawula la akilu andi wʼapami wakambela anʼandi. Ndi akawatela ati: Nyuneli, nyumo uma lu dihuli ne, ne dia Latuyalaka utsha nanya usumba one. Keli vo wakonyola aui andi vati: Aui wa sawusawu mbatandi. 15La hyutshihutshi, andjelo wakatshutshiya Lota vati: Ose wadeye la anʼaye ahendi wʼamantu weli lane. Nyuneli esadi, nyutukuyuvo lʼelanyelu kʼusumba one. 16Keli Lota akatshimbatshimba. Andjelo wakakimela lʼanya, ndi la waadendi la anʼandi ahendi wʼamantu. Wakalombola, wakatumbi la wo, wakatatshika lʼandja wʼusumba,#19:16 2 Pet. 2:7. ne dia Latuyalaka akalangi mbahandja. 17Lamʼakawashili mbatundja uma lʼusumba, omotshi akawatela ati: Nyulawo, nyuyashimbeli. Tanyewoki lʼokongo anyu, ndu tanyemalaki lʼusui wa lʼukidi one. Nyulawo utsha lʼukungu nyutukuvo. 18Lota akakaluya diui ati: Ai! Khumadiondjo, aha osoku! 19Mete dimi ukambi aye, lakahumo lukulu lʼolo lu ashu aye, ne dia we ambotekoya mbukami ketshi dia nshimbela lumu lami. Haleyi ndawo utsha lʼukungu, elanyelu atukutumunda, ku dimi ntuvo. 20Enda, usumba omotshi one weli lasuki; vo weko tshitshe. Dimi nti: Ntushami leko mbayumuhanda, mbayumutshikala la lumu. 21Ondjelo akûkaluya diui ati: Kawo, dimi lambukukela ndu lu dikambu so. Okone dimi halulanya usumba ako wutshiye. 22Samanya, utushami leko. Dimi halutsha nduku dikambu tshikima we ambukuma leko. Wakole usumba ako lukumbu vati: Zoara (kitshimudi ati: Tshitshe).
23Lamʼakawandi unya, Lota akakumi la Zoara. 24Latuyalaka akaloshiva Sodoma la Ngomora ekama wa tsho kame la dja uma lʼulungu. 25Ndi akalanya esumba ako,#19:25 Mat. 10:15; 11:23-24; Luk. 10:12; 17:29; 2 Pet. 2:6; Jud. 7. usui tshe, antu tshe wakadjashi loko ndu tumbatumba tshe dia la kete. 26Wadi a Lota#19:26 Luk. 17:32. akewo lʼokongo, akahilo ekundji ka leho. 27Abarahama akunela kʼolomo la pindju, akatshu lu dihuli diakandemadi la ntundu ka Latuyalaka. 28Ndi akedia ashu utsha la Sodoma la Ngomora la wedja eku tshe wa lʼukidi. Endi ku dinga diutumba uma la kete uku luwu la wuki mbalungula.
29Kuyanga mbakalanya Unyashungu esumba tshe wa lʼukidi, ndi akuhoka Abarahama. Diako mbakandahandja Lota ntundu ndi atalanya esumba wa lene akandadjashi.
30Lota akaseko uma la Zoara utsha lʼukungu. Ndi la anʼandi ahendi wʼamantu wakatudjase leko lu wuku a dive, ne dia wakuki woma dia ntshikala la Zoara. 31Ku onʼandi lʼenundu akatela kushendi ati: Shesu one aya usumbi, ku nduku pami lu wudja one kukuki mbeyana la su uku atuwutshaka lu kete tshe. 32Yaka, tonosha shesu wanu, keli kateyani la ndi, diuhu dia shesu diatukushisho. 33Vo wakanosha shewo wanu lʼutshu. Okone ona lʼenundu akoto le shi, akateyana la ndi. Shi kumbeya etena kakayetama onʼandi, kuyanga etena kakandeto. 34Ku wedi a pindju ona lʼenundu akatela kushendi ati: We henyi, dimi lakeyanyi la papa utshu wʼelo. Eso tonesha wanu ndu lʼutshu one, keli kutshu ndu we, kuteyani la ndi, diuhu dia shesu diatukushisho. 35Osoku ndu lʼutshu uku vo wakanosha shewo wanu. Okone ona kushi akatshu, akateyana la ndi. Ku shi kumbeya etena kakayetama onʼandi la kushi, kuyanga etena kakandeto. 36Osoku ku ana ahendi aku wa Lota wakatshu waemi la shewo. 37Ona lʼenundu akuti ona pami, akawole lukumbu ati: Moaba (kitshimudi ati: Uma le papa). Ndi keli lotshetshe lʼasi Moaba edja ndu elo. 38Ndu ona kushi akuti ona pami, akawole ati: Bene-Ami (kitshimudi ati: Onʼa wudja ami). Ndi keli lotshetshe lʼasi Amona edja ndu elo.
હાલમાં પસંદ કરેલ:
Etatelu 19: TLL
Highlight
શેર કરો
નકલ કરો
Want to have your highlights saved across all your devices? Sign up or sign in
La Bible en Otetela © Allianee Biblique de la Republique Democratique du Congo, 1991