Matie 6
6
Yezo aha azi na lo ti kangɔ ye bɛ̃ awa yɛlɛ
1Yezo apa ya: “Ĩ bata li ĩ na lingɔ anzɔ̃ yɛ mɛ ĩ ndoli na lo tɛ Nzapa. Ta ĩ li ni bo na se kɔdɛ mɛ ya, azi ahũ ĩ ma. Se ĩ li so ko, ta ĩ lua mbana gɛrɛ ĩ ka tɛ To ĩ mɛ ka yayu ma. 2“Wa na ngoi ko la mɔ hɛ̃ faranga hɛ̃ awa yɛlɛ ko, ta mɔ dɛrɛ kɔngɔ, ya lɛ azi asa tɛrɛ mɔ, nga ma se mɛ awa poroso ndoli na ni ka ya da sambela, nga ka ta lege ma. Ala ndoli so ya, azi agonda ani. Mbi pa hɛ̃ ĩ ti bɛta tɛnɛ ya, ala pia alua mbana gɛrɛ la wɛ. 3Kanda na ngoi ko la mɔ hɛ̃ tɛ mɔ faranga hɛ̃ awa yɛlɛ ko, li na se kɔdɛ mɛ ya, abɛ nga fɔ̃ mɔ mɛ so tɔ̃nda mɔ ko, ta lo hĩnga ma. 4Li so ya, ye ko la mɔ hɛ̃ ko, angbã na gbɛ mbingo, ko gbanda To mɔ mɛ ndohũ ye mɛ mɔ ndoli na gbɛ mbingo, ahɛ̃ mɔ mbana gɛrɛ mɔ.”
Yezo aha azi na lo ti sambela
(Luk. 11.2-4)
5Yezo apa ya: “Na ngoi ti sambela tɛ ĩ ko, ta ĩ du nga ma azi mɛ awa poroso ma. Ala ndoye tɛ la longɔ ndozu ka ya da sambela, nga na sangbi lege ya, ani sambela, wa azi ahũ ani. Mbi pa hɛ̃ ĩ ti bɛta tɛnɛ ya, ala pia alua mbana gɛrɛ la wɛ. 6Kanda na ngoi ko la mɔ ye tɛ mɔ sambelangɔ ko, ale bo mɔ kɔi mɔ li ka ya da tɛ mɔ ti langɔ, mɔ vĩ nyɔ ngise pɛ mɔ. Ko mɔ vɔrɔ To mɔ me so ndo ko, na ndo mɛ ta zo da ma. Wa gbanda To mɔ mɛ ndohũ ye mɛ mɔ ndoli na gbɛ mbingo, ahɛ̃ mɔ mbana gɛrɛ mɔ. 7“Na ngoi ti sambela tɛ ĩ ko, ta ĩ tɛnɛ tɛnɛ gbara gbara mɛ ta ndani da ma, nga ma apaganɔ ma. Ala ndoda bɛ la ya, se ani tɛnɛ tɛnɛ gbara gbara, wadila Nzapa ama ani. 8Ta ĩ manda la ma, uzu ti yɔngɔ ye ka ti To ĩ ko, lo pia lo hĩnga ye mɛ ĩ na gwɛ̃ ni wɛ. 9Wa ĩ ba se mɛ ale ĩ ndosambela na ni lo mɛ:
‘To e mɛ ka yayu,
Azi atɔndɔ bɛ ili mɔ mɛ santo ma ke!
10Mɔ ga bɛ mɔ lɛ gbia na ndo azi zu ma ke!
Azi ali bɛ ye ge tise na se bɛ mɔ,
Nga ma se mɛ andoli na ni ka yayu ma ke!
11Hɛ̃ e lá olo mɛ tɛ mɛ alengbi ti sĩngɔ ya e.
12Ka lɛ mɔ ndo siɔ ye tɛ e,
Nga ma se mɛ e ndoka na lɛ e ndo siɔ ye
Mɛ azi ndoli tɛrɛ e.
13Ta mɔ ye ya Satana atara bɛ e ma,
Wa hã e ka gbɛ ti lo mɔ zi.
[Ta sanga ma, lɛngɔ gbia, na nguru, nga na ndima adu na lo tɛ mɔ buru na buru! Seni la.]’
14“Biani, se ĩ ka lɛ ĩ ndo siɔ ye mɛ afɔ̃ ĩ ali tɛrɛ ĩ ko, To ĩ mɛ ka yayu aka nga lɛ lo ndo siɔ ye tɛ ĩ. 15Kanda se ta ĩ ka lɛ ĩ ndo siɔ ye mɛ afɔ̃ ĩ ali tɛrɛ ĩ ma ko, ta To ĩ aka nga lɛ lo ndo siɔ ye tɛ ĩ bɛ gbɔ ma.”
Yezo aba azi na lo ti kɛngɔ tɛ so vɔrɔngɔ Nzapa
16Yezo apa ya: “Ngoi mɛ se ĩ kɛ̃ tɛngɔ ye so vɔrɔngɔ Nzapa ko, ta ĩ du na vundu nga ma awa poroso ma. Ala ndogbe lɛ la, so fangɔ na azi zu ya, ani kɛ̃ tɛngɔ ye so vɔrɔngɔ Nzapa. Mbi pa hɛ̃ ĩ ti bɛta tɛnɛ ya, ala pia alua mbana gɛrɛ la wɛ. 17Kanda na ngoi ko la mɔ kɛ̃ tɛ mɔ tɛngɔ ye so vɔrɔngɔ Nzapa ko, kpo lɛ mɔ, mɔ sua nga kwa li mɔ, 18ya ta azi ahĩnga ya, mɔ kɛ̃ tɛngɔ ye ma. Ko bo To mɔ kɔi mɛ so ndo ko, lo mɛ ta andohũ lo ma ko, lo hĩnga ya, mɔ kɛ̃ tɛngɔ ye. Ko gbanda To mɔ mɛ ndohũ ye mɛ mɔ ndoli na gbɛ mbingo, ahɛ̃ mɔ mbana gɛrɛ mɔ.”
Ale ĩ ndobo nwa tɛ ĩ ka yayu
(Luk. 12.33-34)
19Yezo apa ya: “Ta ĩ bo nwa ge tise na lo tɛ ĩ nvɛni ma. Ta sanga ma, ge tise ko, kangi na sɔ alengbi ti tɛngɔ ni, awa nzĩ alengbi nga ti kongɔ nyɔ da, nzĩngɔ ni. 20Kanda ale ĩ ndobo nwa tɛ ĩ ka yayu. Kai ko, ta kangi bere sɔ alengbi ti tɛngɔ ni ma, ta awa nzĩ alengbi nga ti kongɔ nyɔ da, nzĩngɔ ni ma. 21Ta sanga ma, ndo ko la ĩ ndokpã na nwa tɛ ĩ ko, ndo mɛ nga ĩ ndokpã bɛ ĩ da la.”
Lɛ zo adu nga ma mɔinda mɛ zo ndoba na ndo
(Luk. 11.34-36)
22Yezo apa ya: “Lɛ zo adu nga ma mɔinda mɛ zo ndoba na ndo. Se lɛ mɔ adu nzɔ̃ni ko, tɛrɛ mɔ kwɛ zu adu na ya vuru ndo. 23Wa se lɛ mɔ adu siɔni ko, tɛrɛ mɔ adu na ya mbingo. Wa se vuru ndo mɛ na ya tɛrɛ mɔ, adu bo mbingo kɔi ko, mbingo ni ati kpiti kpiti nvɛni!”
Yezo alia azi na lo ti lingɔ kwa bɛ Nzapa
(Luk. 16.13; 12.22-31)
24Yezo apa ya: “Ta zo kɔi alengbi ti Iingɔ kwa hɛ̃ agbia se ma. Se lo li so ko, bɛ lo akɛ̃ kɔi, ko bɛ lo aye omɛ ndɛ̃, lo ma nyɔ kɔi, ko lo samana na omɛ ndɛ̃. Ta ĩ lengbi ti Iingɔ kwa hɛ̃ Nzapa, ko ĩ li nga kwa na lo ti luangɔ nwa ma.”
Ale ĩ ndokpã bɛ ĩ ndo Nzapa
25Yezo apa ya: “Na lo ni la mbi pa hɛ̃ ĩ ya, na lo ti du tɛ ĩ ko, ta bɛ ĩ asɔ na lo ti tɛ, nga na lo ti ye ti nyɔngɔ mɛ ĩ na gwɛ̃ ni ma. Na lo ti tɛrɛ ĩ ko, ta bɛ ĩ asɔ na lo ti bɔngɔ mɛ ĩ na gwɛ̃ ti yungɔ ma. Ta sanga ma, du tɛ zo adu ngbondoni aɔ tɛ, tɛrɛ zo adu nga ngbondoni aɔ bɔngɔ. Ta seni la ma? 26Ĩ ba ahũ ti lɛ ndozu hĩ. Ta ala ndolu tɛ ma, ta ala ndokɔ tɛ ma, ta ala ndobombi nga tɛ ka ya gɔ ma, ko To ĩ mɛ ka yayu ndokã la na tɛ! Singa na ahũ o singa na ĩ mɛ ĩ ɔ la ma! 27Ta zo kɔi so popo tɛ ĩ alengbi ti sangɔ mbanga bi na ndo bi tɛ lo na lo ti bɛ lo mɛ angbã ngbũ ma!
28“Ko nda mɛ ĩ ndokpã bɛ ĩ ngbũ na ndo lo ti yungɔ bɔngɔ nɛ? Ĩ ba se mɛ akasa pandara ti yaka ndoko na ni hĩ. Ta ala ndoli kwa ma, ta ala ndolɛkɛ nga bɔngɔ ya ani yu ma. 29Ko mbi pa hɛ̃ ĩ ya, bɛ nga gbia Salomɔ mɛ ndo na nwa sĩ ko, ta lo lua ndo bɔngɔ mɛ adɛ̃ alengbi na mbanga kasa pandara ko kɔi ma. 30Singa na asã mɛ da na lá olo, ko na ndã asa ni ya wá azɔ ko, Nzapa ndoli ya, ala du na nzere mɛ nzɔ̃ni, o singa na ĩ ma! Lo na yungɔ ĩ na bɔngɔ. Ĩ du azi mɛ ta ĩ ye lo tɛ lo kpa ma! 31Ta bɛ ĩ asɔ, ko ĩ pa ya: ‘Ye mɛ e na tɛngɔ nɛ? Ye mɛ e na nyɔngɔ nɛ? Bɔngɔ mɛ e na yungɔ nɛ?’ ma! 32Aye ni ko zu ko, adu apaganɔ la ndoli ni ngoi zu. Kanda tɛ ĩ ko, To ĩ mɛ ka yayu ahĩnga ya, ĩ na gwɛ̃ ti aye ni ko. 33Kanda ale ĩ kpã bɛ ĩ uzu na ndo lo Lɛngɔ Gbia tɛ Nzapa, ĩ́ li nga ye na seni, nga ma se mɛ lo ye, wadila Nzapa ahɛ̃ nga ĩ atanga aye mɛ ndɛ̃ zu. 34Ta bɛ ĩ asɔ na lo ti lá ti ndã ma, na lo mɛ ya, lá ti ndã na gangɔ nga na pɛnɔ tɛ lo nvɛni. Bi kɔi kɔi na pɛnɔ tɛ lo.”
હાલમાં પસંદ કરેલ:
Matie 6: NGB87
Highlight
શેર કરો
નકલ કરો
Want to have your highlights saved across all your devices? Sign up or sign in
Ngbandi New Testament © United Bible Societies, 1987.
