Konesi 11
11
Petero a nyönyokökiŋdyo kanisa lo momora Yerusalema kulo kulya
1A luyökie se ko luŋasirik lo yubbo kulo lo gwon Yudaya kulu iŋge yiŋ adi ŋutu logon ’bayin a kase koti aje wuju kulyaet lo Ŋun.
2A nagon Petero aje tu Yerusalema nu, a Yudayaki logon a kayupok logon kulya adi Lwaka logon a kayupök agu ködyö tatawero kulo iŋge yuyuk lepeŋ adi, 3Do a si ’da a kömutöt i midijik ti Lwaka logon a ko tawero, a iŋge nyesu ko se i pirit na geleŋ. 4A Petero suluje nyönyokökiŋdyo lepeŋat Ŋo liŋ nagon aje kona, adi, 5Nan aje gwon i köji na Yaŋo i kwakwaddu, a nan gwe gwoso ŋuto lo rurudwe, a nan meddi nene ŋo a nagalaŋ gwoso boŋgo muket ’duruun kak ki yu. Ŋina boŋgo a leleyo goŋesi kanyit iŋwan a kölwene kak köyö nyona. 6A nan diŋe lukata nanyit ’bura, a iŋge meddya kijakwa logon ko mokosi iŋwan, ko gwuruŋin, ko ŋo lo gwögwöŋtu kak se ko kwen ti ki. 7A kirut nan yiŋge gworo luŋgu nan adi, Petero, ŋine ki, ’duŋge ko nyesi. 8Ama a nan waddi adi, Ti gwon sona pon Matat; kogwon nan a ko soŋro nene ŋo nagon abur kode a lut i kulya ti keri köyö i kutuk kwöŋ. 9A gworo köti iŋge kulya dao tomurek ki yu, adi, Do ti bulö luŋgu ŋo nagon Ŋun aje toke ’ya na adi nye a ŋo nagon abur. 10A kine kulya iŋge kona daŋin musala, a i ’dutet a ŋina ŋo liŋ köti nyököjine ki i ’diko. 11A i ŋinu diŋit gwak, a ŋutu musala logon sunyue Kaisaria yu kulo lo ’duröki i mede na mönuŋdye nan kata nu. 12A Mulökötyo Loke takiŋdye nan anyen nan moraddu ko lepeŋat ’bak renya. Kilo luoasirik buker köti a nyömöddu nan Kaisaria yu, a yi iŋge luŋö ko ŋilu ŋuto kadi.
13A lepeŋ nyönyökökiŋdye yi adi nye a meddya malaikatat gwogwo ’dan kanyit kadi logon takiŋdya nye adi, Soŋdi ŋutu Yaŋo i luŋgu na Simona logon köti luou a Petero. 14Nye mo jajamakin do kulyaesi logon mo lwöggu do se ko mede inot liŋ. 15A na suluje nan jambu ko se nu, a Mulökötyo Loke ’duki kase loki gwoso na ’dukiŋdye nye kayaŋ loki i suluet nu. 16#Kon 1.5A kirut a nan iŋge yeye kulyaet lo Matat logon nye a kulyari adi, Yoane köju batiddya ŋutu ko pioŋ, ama ta mo batisa ko Mulökötyo Loke. 17A ko ködyö Ŋun a ’dogga se jojo gwoso na ’doggi nye yi i diŋit na yubbi yi Yesu Kristo nu, nyena nan ködyö a ŋa logon bubulö teŋgu Ŋun?
18A na yiŋge momoret na kayupök lo gwon Yerusalema kulu kine kulya nu, a se gwe ’bak kulya na jajama, a pupurje Ŋun adi, Ko sona, Ŋun köti aje tiŋdu ŋutu logon ’bayin a Yudayaki kulo i löpuggö na töilyet anyen se gwon ko ru.
Kanisa na gwon Antlokia
19 #
Kon 8.1-4
Nyena a ŋutu logon a rekin i kulya ti sasanya nagon a ŋien i kulya ti Setepano kulo iŋge jölö tojo Poinike, ko Kuprio, se ko Antlokia, a se tine jamakiŋdya kulye ŋutu ŋilo kulyaet ake jamaki Yudayaki ka ’de. 20Ama kulye kase kata logon a ŋutu ti Kuprio ko ti Kurene logon a tu Antlokia a köti jamakiŋdye ŋutu logon ’bayin a Yudayaki kulo ŋilo kulyaet, a iŋge tokujö Loŋe Lo ’but lo Matat Yesu. 21A riŋit na Matat gwe ko lepeŋat, a ŋutu jore iŋge yubbö, a löpukuŋdye ko Matat ni.
22A kanisa na gwon Yerusalema na iŋge yiŋ kine kulya; a se soŋdi Barnaba Antlokia yu. 23a na ’durökiŋdye nye a meddi ’busan na Ŋun nu, a nye iŋge lyöŋön; a nye jujukiŋdye se liŋ anyen ’depakiŋdya go i yubbö na Matat ko töilyet kase liŋ. 24A Barnaba gwe a ŋuto lo ’but, lepeŋ a jore ko Mulökötyo Loke se ko yupet. A ŋutu jore iŋge morakiŋdya ko Matat.
25A kirut Barnaba iti Taruseu i ga ’yu na Saula. 26A na ryeji nye lepeŋ nu, a nye joŋgi lepeŋ Antlokia. A i kiŋa ’bukuluŋ a se liŋ murek iŋge tojulin ko kayupök lo momora i ŋinu pirit kulu, a iŋge todiŋdyö ŋutu jore parik. A ŋutu suluje luŋgu kajujumuk ti Yesu a Kristianijin Antlokia yu.
27A i ŋinu diŋit a kulye nebijin poŋdi Yerusalema yu tojo Antlokia.
28 #
Kon 21.10
A lele lose karin kanyit a Agabo ŋine ki a keŋ keju ko riŋit na Mulökötyo Loke adi dyaŋ duma mo kata i kak ’bukuluŋ, a kine kulya ’diri iŋge kona i diŋit na gwoŋdi Kalaudio a kasaranit nu. 29Nyena a kajujumuk iŋge ruk gwegwe ’ya lwökisi, gwoso nagon ŋutu liŋ geleŋ geleŋ bubulöri na, anyen ko tu paraki ’e luŋasirik kase lo yubbo kulo lo gwon Yudaya yu kulu. 30a lepeŋat iŋge koŋdya sona, a sunyukiŋdye temejik ti kayupok kine lwökisi i könin lo Barnaba se ko Saula.
હાલમાં પસંદ કરેલ:
Konesi 11: BBE
Highlight
શેર કરો
નકલ કરો
Want to have your highlights saved across all your devices? Sign up or sign in
Bari Bible © United Bible Societies, 1979.
