Matthai 4
4
Zingsuv Pasupaliy Angna
(Mar 1:12-13; Luk 4:1-13)
1Cakhutaa Zingsuv ca Setaa ta pasupaliy riypata Thlaapa ta ruochung luo kha a sikhyi. 2Zingsuv ca ning sawliy hne zuo sawliy chung sa uv te a nang a diy hringhruo. 3Pasupaliytuv ca a vaw te, “Khazing Saacapaa hmisi ta na cuo kieca hingpa alung zaw hing viechuo ta pali tie,” a ta. 4Cuorasala Zingsuv ta, “Caapathepa na a ri,
‘Cawsaapa hing sa ta dyi hring'a vyi,
cuorasala Khazing ta a ripa bie tana a hring aa,’” a ta.
5Cakhutaata Setaa ta Zingsuv kha khypuv pathepa biena-ing a daw lie kha chi te, 6“Khazing Saacapaa ta na cuo kieca hingpa taahingta a thawpathla tie, tahematapakieca Caapathepa ta,
‘Khazing ta nama cuo hing ta
a avuoming naw pi'a yite,
iema ta ama kuv ta ca cawchue'a yite,
alung lie na phyi a phaw'a vaciy, a ta kha,’” a ta.
7Zingsuv ta, “Caapathepa ta, ‘Na Byipaapa na Khazing kha va dyapasya kha,’ a ta,’” tapata a palie.
8Cakhutaata Setaa ta Zingsuv kha a suosapa tluocung luo kiekhyi te chuelyi pena bangkhuo hne a rungnaana bangkhuo kha a pahmung sa. 9Setaa ta, “A bung la inaa bie cakieca hingpa bangkhuo hing ica pi aa,” a ta. 10Zingsuv ta, “Setaa, cakuo buo! Caapathepa ta,
‘Na Byipaapa Khazing kha abie la,
ama re dyi kha va hrie tie,’ a ta pakha,” a ta.
11Cakhutaata setaa ta pya se te, avuoming ta sungkha ta a zuv yite ama za mangsang.
Zingsuv Galilee Lie Rehrie A Pathu
(Mar 1:14-15; Luk 4:14-15)
12Zingsuv ca Johan na ama patuv tapa kha a thyi tiyta Galilee luo kha a si. 13Ama ca Nazareth kha thuse te Zebulun hne Naftali pe, riyliy kielie a awpa Kapernaum khy lie kha a aw. 14Hinghaahingta a tue napa ca profet Isaiah ta,
15“Zebulun hne Naftali ruo,
Riyliy luopuv kie, Jordan cavaa huesuo,
Jentail ming ruo Galilee—
16Zingna chunglie a awpa cawsaa zaw ta,
khena lepuv kha ama hmung aa.
Thiyna ruo ningdiy rawlie a awpa tie cunglie,
khena ca a kya luo tli,” a za tapa kha
a tlingna riypatana a cuo.
17Capa cuo taacata Zingsuv ta, “Nama suena kha a ngiepachiy tie ung, tahematapakieca vuoruo pena na a ngie tli!” tapata phungri hruo a pathu.
Zingsuv Ta Ziytuv Taapa Tie A U Yi
(Mar 1:16-20; Luk 5:1-11)
18Zingsuv ca Galilee riyliy kielie a cakuole pata, Simon (Piter ama tapuopa) hne a nuta Andru riyliy lie asue ama vaa nguoluopa kha a hmung yi, tahematapakieca iema ca ngaavaapa tana ama cuo. 19Zingsuv ta, “Kama hing na ziy tie ung, cawsaa a patuvpa tana ica tue'a yi,” a ta. 20Amaa sue kha thuse paluo yite ama kha ama ziy.
21Capa hmang taacata a va cakuo vie pata a hrangpa uvcanu pahning, Zebedi saacapaapa Jeim hne a nuta Johan kha ama paa Zebedi hneta sawkawpalaw chunglie amaa sue ama thyi nguoluo pa khata hmung yite a u yi. Zingsuv ta ku yite, 22ama sawkawpalaw hne ama paa kha thuse paluo yite ama kha ama ziy.
Zingsuv Ta A Pacuv Yi, A Chang Yi, A Patluo Sa Yi
(Luk 6:17-19)
23Zingsuv ca Galilee ruochung bangkhuo kha tlaw te, apungna-ing lie kha a pacuv yi, vuoruo pena thuophaabie kha chang yite pasanapa phangphang a angpa tie kha a patluo sa yi. 24Cacuonakawta a thuohlaa ca Siria ruochung ting khata pathuo te, a pasapa bangkhuo kha ama'a luo ama vya chiykhyi, pasana phangphang ta a pasapa tie, khuevuo ta a tuepa tie, siy te a thiychiethepa tie, hne a pakyapa tie bangkhuo kha a patluo sa diy yi. 25Galilee, Dekhapolis, Jerusalem, Judea, hne Jordan cavaa huesuo luo ruo taata cawsaa hluvpuv khata ama ca ama ziy.
હાલમાં પસંદ કરેલ:
Matthai 4: LNT1
Highlight
શેર કરો
નકલ કરો
Want to have your highlights saved across all your devices? Sign up or sign in
New Testament in Chin Lautu © Bible Society of Myanmar, 2015.
