Zhaŋe 1

Gha ta ghena

1Ma te gha ta pɛtɛa wəshi ne, nahe Ghena ta Shala kenza shɛ. Nahe Ghena kese le Shala ba'a nahe Ghena kese kaShala. 2Se ta gha ta wəshi ne, nahe Ghena kese le Shala. 3Nahe Shala kemenete pɛtɛa wəshi le Ghena. Wəsə shɛ kemenete geva keɗema le Ghena we. 4Mbe Ghena shɛ nza mpi. Mpia shɛ nde se kawaŋe kaŋa mbeli. 5Kaɓele waŋe hwa ŋkwesle, ama kehərəte ŋkɛ ŋkwesle we. 6Nahe Shala keghweneke kwete wəndə nya nza sləa ŋkɛ kaZhaŋe. 7Nahe ŋkɛ kese kala negha fete, kezha nza kande negha fete yitea waŋe, yitea yɛ waŋea shɛ mbeli laka gheŋkɛ. 8Kenza Zhaŋe kawaŋea shɛ ŋkɛ le ghəa ŋkɛ we, ama nahe ŋkɛ kenza kande negha fete yitea waŋe. 9Nahe Ghena kese kawaŋe nya kaganda, nya kesawa te hɛɗi ba'a nya kewaŋe mbeli pɛtɛ.

10Nahe Ghena kese te hɛɗi lema, le Ghena pate hɛɗi Shala. Ama keɗepete ŋkɛ mbeli nyi te hɛɗi we. 11Nahe Ghena kese kadzehwa hwelefe ta ŋkɛ, ama kekemaneve ŋkɛ hwelefe ta ŋkɛ we. 12Ama nahe kweci mbeli kekemaneve Ghena bake bake dzeve ba'a keyɛte ŋkɛ. Nahe nde kendeke nda hweŋkwa ke hɛ kanza kaŋwalea Shala. 13Kezhɛrenji hɛ kaŋwalea Shala laka mimi, laka ɗe ta geva keɗema laka ɗe ta wəndə ŋelɛ we, ama laka Shala.

14Pa Ghena zhɛrenyɛ kawəndə ba'a nzanyɛ hwa gheɓəmə. Nahe gheɓəmə kenakɛ zləvəa ŋkɛ, zləvə nya kemave Wəzege kwetɛ va Yita. 15Nahe Zhaŋe keneghate fete yite, ma ke zlapete: «Gheŋkɛ wəndə nya gezete ŋayɛ ghena 'ya te ghəa ŋkɛ, ma 'ya sha gheyɛ: Nahe wəndə nya ketese kwetere wəmbəa ɗa kenza kwele ma ke 'ya, kwa nza ŋkɛ nahe ŋkɛ kenzahwe nza mpelɛa ke 'ya.» 16Nahe gheɓəmə pɛtɛ kekemave ŋa ɓəmə bela ta mcɛləa zlaɓa ta ŋkɛ, nahe gheɓəmə kemave ŋkɛ kadzeghə kadzeghə. 17Nahe Shala keghweneke ɓəmə wəshi mahalegə laka Moyize. Ama nahe gheɓəmə kekemave zlaɓa ba'a kaganda laka Yɛsə Kriste. 18Wəndə shɛ kegha kanakɛ Shala we. Ama nahe Wəzege kwetɛ nya kaShala ba'a nya kenza le Yita kencɛte ɓəmə Shala.

Negha fete ta Zhaŋe Batiste

(MAT 3.1-12; MRK 1.1-8; LWK 3.1-18)

19Pa ka Zhəwif nyi mbe Zhɛrəzalɛm ghweneghe nda ka dzeghe Shala ba'a ka Lɛvi ke Zhaŋe, ma ke hɛ 'yɛwete ve: «Wa ŋkɛ na wa?» 20Kese Zhaŋe kawəfərə va hɛ we. Ama ma ke neghate kwa kema ta pɛtɛa mbeli: «Kenza 'ya kaMɛsi we.» 21Ma ke hɛ 'yɛwete ve: «Wa ŋkɛ na tsagha wa? Ɛli na na?» Ma ke Zhaŋe: «Ewə, gheŋkɛ 'ya we.» Ma ke hɛ shɛ: «Nde mɛ ŋkwa ta Shala na na?» Ma ke zhɛnete: «Ewə, gheŋkɛ 'ya we.» 22Tagha gɛ, ma ke hɛ shɛ: «Wa ŋkɛ na ke ghen'yɛ sha geze nda ke mbeli nyi keghweneke n'yɛ tsagha wa? Wa ŋkɛ na pa sha ghəa ŋa wa?» 23Ma ke Zhaŋe zhɛnete nda ke hɛ:

«'Ya ya kawəndə nya kezlape ghena te ɓerama:

hi nda mə hweŋkwa tiɗiɗi ke Mahwətə,

kala nya gezete Ɛzayi, nde mɛ ŋkwa.»

24Ka Fariziyɛn ya hwa mbeli nyi ghweneke mbeli sha Zhaŋe. 25Ma ke hɛ shɛ: «Nda kaɗema na kaMɛsi, kaƐli keɗema kande mɛ ŋkwa ta Shala ne, yitea wa mene nda batɛme na ke mbeli tsagha wa?» 26Ma ke Zhaŋe zhɛnete nda ke hɛ: «Ma 'ya ne, le yɛmə mene ŋayɛ batɛme 'ya. Ama kwete wəndə nya ɗepema yɛ ya hwa gheyɛ. 27Kase ŋkɛ kwetere wəmbəa ɗa. Kehi 'ya kanza ya kawəndə nya kepele zewe nyi mbe tsahwa ta ŋkɛ we.»

28Kwa Bɛtani menete geva wəshi nyi pɛtɛ, pelɛ kema ta hələa Zhəwrdɛŋe, te ŋkwa nya mene nda batɛme Zhaŋe ke mbeli.

Yɛsə ya kazhɛgwəa Shala

29Ma te hendɛ ta ŋkwa ne, pa Zhaŋe nakɛ Yɛsə kase shɛ, ma ke: «Wa nya Zhɛgwəa Shala nya kekele jaɗafa ta hɛɗi lema nya. 30Gheŋkɛ ya kawəndə nya gezete ŋayɛ 'ya, ma 'ya: Nahe wəndə nya kese kwetere wəmbəa ɗa kenza kwele ma ke 'ya, kwa nza ŋkɛ nahe ŋkɛ kenzahwe nza mpelɛa ke 'ya. 31Ma 'ya ne, keɗepete ŋkɛ 'ya we. Ama nahe 'ya kese kezha mene batɛme le yɛmə yitea ncɛ nda ŋkɛ ke ka Israyɛl.»

32Ma ke Zhaŋe neghate fete zhɛkwa: «Nahe 'ya kenakɛ Sefəa Shala kasawa pelɛ ghweme kala gheɗepe kanza kənə. 33Ma 'ya ne, keɗepete ŋkɛ 'ya we. Ama ma ke Shala nya keghweneke ɗa kamene batɛme le yɛmə sha 'ya: Katenewe Sefəa Shala na kasawa pelɛ ghweme kanza kənəa kwete wəndə. Gheŋkɛ nde temene nda batɛme ke mbeli le Sefəa Shala. 34Ma 'ya ne, nahe 'ya kenakɛ wəsəa shɛ ba'a kenza kande negha fete yite: Wəndəa shɛ ya kawəzege ta Shala.»

Ka ghate ta ka təkwə təkwə Yɛsə

35Ma te hendɛ ta ŋkwa ne, nahe Zhaŋe kenza tagha zhɛkwa le ka təkwə təkwə ŋkɛ bake. 36Ma kwa nakɛ Yɛsə ŋkɛ kadzeghwa ne, ma ke Zhaŋe: «Wa nya Zhɛgwəa Shala nya gɛ!» 37Ma kwa fate ghena shɛhɛ ka təkwə təkwə Zhaŋe bake ne, ntəŋə hɛ kwetere wəmbəa Yɛsə. 38Pa Yɛsə zhɛrete geva, pa nakɛ hɛ katəkwə təkwə ŋkɛ hɛ, ma ke 'yɛwete va hɛ: «Wa yaghweze yɛ wa?» Ma ke hɛ shɛ: «Tema ŋkwa nya nza na te wa, Rabi?» Ma ghena nya mbe Rabi ne, Nde sleke ɗa. 39Ma ke zhɛnete nda ke hɛ: «Nde mə, katenewe yɛ.» Pa hɛ lə kanakɛ ŋkwa nya nza ŋkɛ te. Pa hɛ keɗaŋemte veci nya ketene yite. Nahe ŋkwa kenza kwa mtsa veci.

40Nahe Andrɛ, wəza meghekɛ Simon Piyɛre kenza hwa mbeli nyi bake nyi kefate ghena ta Zhaŋe ba'a ketəkwə təkwəte Yɛsə. 41Pa Andrɛ begeme le wəza meghekɛ Simon, ma ke shɛ: «Nahe n'yɛ kesləyi Mɛsi.» Ma ghena nya mbe Mɛsi ne, Kriste. 42Pa ŋkɛ begheghe ŋkɛ kalə sha Yɛsə. Dəkwə Yɛsə te Simon, ma ke shɛ: «Gha ya kaSimon, wəzege ta Zhaŋe, Kɛfas tenza sləa ŋa.» Ma ghena nya Kɛfas ne, Keleɓa.

Yɛsə kaheka yɛ Filipe le Natanayɛl

43Ma te hendɛ ta ŋkwa ne, pa Yɛsə tarete kadzawa Galilɛ. Pa ŋkɛ begeme le Filipe, ma ke shɛ: «Təkwə təkwə ɗa.» 44Nahe Filipe kenza kande Bɛtesayida, meleme nya se yɛ Andrɛ le Piyɛre mbe. 45Kwetere wəmbəa ŋkɛ, pa Filipe begeme le Natanayɛl. Ma ke shɛ: «Nahe ghen'yɛ kesləyi wəndə nya gezete Moyize te mbe palepa ta wəsə mahalegə. Nahe ka mɛ ŋkwa kegezete ghena te perə. Gheŋkɛ Yɛsə, wəzege ta Zhozɛf nya kande Nazarɛt.» 46Ma ke Natanayɛl shɛ: «Wəsə ganyɛ shɛ kasame kwa Nazarɛt na?» Ma ke Filipe shɛ: «Nde, katenewe na.»

47Ma kwa nakɛ Natanayɛl Yɛsə kase shɛ ne, ma ke te ghəa ŋkɛ: «Wa nya nde Israyɛl nya kaganda, nya ɗema mbəɗəkwə mbe nya gɛ!» 48Ma ke Natanayɛl shɛ: «Tema ɗepe ɗa na wa?» Ma ke Yɛsə zhɛnete nda: «Nahe 'ya kenakɛ ŋa vəa ŋkwa nya nza na yitea dasekwa, nda teheka ŋa Filipe.» 49Ma ke Natanayɛl shɛ: «Rabi, gha ya kaWəzege ta Shala, gha ya kameghea ka Israyɛl.» 50Ma ke Yɛsə shɛ: «Va nya gezete ŋa 'ya nahe 'ya kenakɛ ŋa yitea dasekwa yɛte na na? Katenewe wəshi nyi jama jama ma ke nyi na.» 51Ma ke ɓiyitsa: «Kaganda ne, ma 'ya sha gheyɛ: katenewe ŋkwa kedzeme ghweme teghwene ba'a ka ghwene ta Shala yɛ kadzeme ba'a kasawa kənəa Wəzege ta za.»

હાલમાં પસંદ કરેલ:

Zhaŋe 1: BEKDC12

Highlight

શેર કરો

નકલ કરો