LUKE 21

Enɔ Emi Ebe Akpa Ɔnɔde

(Mk 12.41-44)

1JESUS emenere enyin okut nte mbon inyene esinde enɔ mmɔ ke usin-etibe. 2Enye onyuŋ okut ubuene ebe-akpa kiet nte esinde ŋkpri ɔkudɔk iba ke esit. 3Ndien Enye ete, Ke akpanikɔ ke ndɔhɔ mbufo nte, Ebe-akpa emi ama esin okuk akan kpukpru mmɔ: 4koro kpukpru mmɔ ekesiode ŋkpɔ ke nyɔhɔ-nsuhɔ mmɔ esin ke etibe: edi ke unana esie enye osio kpukpru se enye akpadade odu uwem ɔnɔ.

5Ekem ke ini ndusuk owo etiŋde ebaŋa temple, adaŋa nte ekadade ediye itiat ye enɔ-ekɔm ebana enye, 6Enye ɔdɔhɔ mmɔ ete, Ama edi mme ŋkpɔ emi mbufo ekutde mi, mme usen eyedi eke midikpɔŋke itiat kiet ke enyɔŋ itiat efen, eke mididorokere enye iduɔk. 7Ndien mmɔ ebup Enye ete, Andikpep, ini ewe ke mme ŋkpɔ emi edidi? nso idinyuŋ idi idiɔŋɔ ke ini ŋkpɔ emi eyomde ndiwɔrɔ? 8Edi Enye ɔdɔhɔ ete, Ekpeme mbak edinam mbufo ewaha ekpɔŋ usuŋ: koro ediwak owo eyedi ke enyiŋ Mi, ete, Ami ndi Enye: ŋko, Ini ke ekpere. Ekutiene mmɔ. 9Edi ke ini mbufo edikopde ebaŋa ekɔŋ ye ndutime, ekudikhe: koro mme ŋkpɔ emi enyene ndibem iso ŋwɔrɔ; edi utit idige kaŋa.

10Ekem Enye ɔdɔhɔ mmɔ ete, Idut eyedaha aŋwana ye idut, obio edidem kiet eyenyuŋ adaha aŋwana ye obio edidem efen: 11ikpɔ unyek-isɔŋ eyedu; akaŋ ye mme idiɔk udɔŋɔ eyenyuŋ edu ke nsio-nsio ebiet; ŋkpɔ ndik ye ikpɔ idiɔŋɔ eyenyuŋ ewut idem ke ikpa enyɔŋ. 12Edi ke ini kpukpru ŋkpɔ emi miwɔrɔke kaŋa, mmɔ eyemum mbufo, enyuŋ ebine ndinam mbufo idiɔk, enyuŋ eyak mbufo esin ke ubɔk mme synagogue, enyuŋ esin mbufo ke ufɔk ŋkpɔkɔbi, enyuŋ eda mbufo eka ke iso ndidem ye mme andikara kabaŋa enyiŋ Mi. 13Emi eyekabare edi ntiense ɔnɔ mbufo. 14Mmɔdo ebiere ke esit mbufo ete mme imɔ idibemke iso ikere nte mme imɔ idibɔrɔde: 15koro Ami nyenɔ mbufo inua ikɔ ye eti ibuot, eke kpukpru mme asua mbufo midikemeke ndikaŋ mme ndineni. 16Edi kpa mme ete ye mme eka ye nditɔ-ete ye iman ye mme ufan eyeda mbufo ekayak enɔ; eyenyuŋ enam ewot ndusuk mbufo. 17Ndien kpukpru owo eyesua mbufo kabaŋa enyiŋ Mi. 18Edi baba idet kiet ke ibuot mbufo iditakke. 19Edida erime ime ke ukut ebɔ ukpɔŋ mbufo eda enyene.

Jesus Etiŋ Abaŋa Ŋwure Jerusalem

(Mt 24.15-21; Mk 13.14-19)

20 Edi ke adaŋemi mbufo edikutde nte mbon-ekɔŋ ekande Jerusalem ekuk, efiɔk ndien ete, ŋwure esie ke ekpere. 21Ke ini oro yak mmɔ eke edude ke Judae efeŋe eka ikpɔ obot; yak mmɔ eke edude ke esit obio ewɔŋɔ enyɔŋ; yak mmɔ eke edude ke iŋwaŋ ekunyuŋ eduk obio. 22Koro mme usen emi edidide ini usiene, man kpukpru se ekewetde osu. 23Mbɔm mmɔ emi eyomode ye mmɔ emi enɔde nditɔ eba ke mme usen oro; koro akwa mbaba eyesim isɔŋ, iyaresit eyenyuŋ odoro mbio-obio emi ke idem. 24Ndien mmɔ eyeduɔŋɔ ke iso ofut, eyenyuŋ etaŋ mmɔ nte mbuot-ekɔŋ eka ke kpukpru mme idut; ndien mme Gentile eyedigi Jerusalem ke ikpat, tutu ini mme Gentile ɔyɔhɔ. 25Ndien mme idiɔŋɔ eyedu ke utin ye ɔfiɔŋ ye ntantafiɔŋ; eritimere-esit eyenyuŋ omum mme idut isɔŋ, oto ke nnanenyin abaŋa eriyomo emi inyaŋ ye mbufut eyomode; 26idem eyeyemere owo oto ke ndik ye erikama enyin nse mme ŋkpɔ eke ediwɔrɔde enɔ ekondo: koro eyenyeŋe mme odudu ikpa-enyɔŋ. 27Adaŋoro ndien eyekut Eyen Owo odorode ke obubit enyɔŋ edi ye odudu ye akwa ubɔŋ. 28Edi ke ini mme ŋkpɔ emi etɔŋɔde ndiwɔrɔ, emenere enyin ke enyɔŋ, enyuŋ emenere ibuot mbufo ke enyɔŋ, koro erifak mbufo ke asaŋa ekpere.

29Ndien Enye otop ŋke ɔnɔ mmɔ ete, Ese eto fig ye kpukpru eto; ke ini mmɔ esiahade ikɔŋ, 30mbufo ekut enyuŋ efiɔk ke idem mbufo ikpɔŋ ete ndaeyo ke ekpere. 31Kpasuk ntre mbufo ŋko, ke ini mbufo ekutde nte mme ŋkpɔ emi etibede, efiɔk ete Ubɔŋ Abasi ke ekpere. 32Ke akpanikɔ ke ndɔhɔ mbufo nte, Emana emi idibehe tutu kpukpru ŋkpɔ emi ewɔrɔ esu. 33Enyɔŋ ye isɔŋ eyebe efep: edi ikɔ Mi idibehe ifep.

34 Edi ekpeme idem mbufo, mbak uyuhɔ udia ye mmin ye ekikere uwem emi edinam esit mbufo odobi, ndien usen oro edibuat mbufo nte ekpɔ; 35koro usen oro eyesim kpukpru mmɔ emi eduŋde ke iso isɔŋ. 36Edi mbufo etaba idap kpukpru ini, enyuŋ ekpe ubɔk, man mbufo ekpekeme ndibɔhɔ kpukpru ŋkpɔ oro ediwɔrɔde, nnyuŋ nda ke iso Eyen Owo.

37Ndien Enye ekekpep mmɔ ŋkpɔ ke temple ke uwemeyo; edi ke okoneyo Enye ɔwɔrɔ akadaŋ ke obot emi ekerede Obot Olive. 38Ndien kpukpru owo ebak etiene Enye ke temple ke usenubɔk, ete ikop ikɔ Esie.

હાલમાં પસંદ કરેલ:

LUKE 21: ENA

Highlight

શેર કરો

નકલ કરો