JOHN 1

IKƆ Edi Uwem Nsinsi; Ukwɔrɔ Ikɔ John

(Mt 3.11,12; Mk 1.7,8; Lk 3.15-17)

1IKƆ okodu ke eritɔŋɔ, IKƆ okonyuŋ odu ye Abasi, IKƆ onyuŋ edi Abasi. 2Kpa Enye okodu ye Abasi ke eritɔŋɔ. 3Oto ke Enye ekenam kpukpru ŋkpɔ; ndien mitoho ke Enye, inamke ŋkpɔ baba kiet eke ekenamde. 4Uwem odu Enye ke idem; uwem oro onyuŋ edi uŋwana owo. 5Ndien uŋwana oro ayama ke ekim; ekim inyuŋ ikanke enye.

6Owo kiet okoto edi; Abasi osio enye ɔdɔŋ; enyiŋ esie ekere John. 7Enye ekedi nte ntiense, ete idi ntiense inɔ uŋwana oro, kpaŋ kpukpru owo enim ke akpanikɔ oto ke enye. 8Enye ikedige uŋwana oro, edi ekedi man edi ntiense ɔnɔ uŋwana oro. 9Ata uŋwana emi anamde enyin aŋwaŋa kpukpru owo okododuk ke ererimbot. 10Enye okodu ke ererimbot, enyuŋ enam ererimbot oto ke Enye, ndien ererimbot idiɔŋɔke Enye. 11Enye ekedi ke ebiet Esiemɔ, edi mmɔ emi edide iman Esiemɔ idarake Enye. 12Edi kpukpru owo eke edarade Enye, Enye ɔnɔ mmɔ unen ndikabare ndi nditɔ Abasi, kpa mmɔ emi ebuɔtde idem ke enyiŋ Esie; 13emi mimanake oto ke iyip, mme ke erinyime obukidem, mme ke erinyime owo, edi emana oto Abasi. 14Ndien IKƆ akabare edi obukidem onyuŋ oduŋ ye nnyin (nnyin inyuŋ ikut ubɔŋ Esie, utɔ ubɔŋ emi ikpɔŋ eyen ɔbɔde ke ubɔk ete) ɔyɔhɔ ye mfɔn ye akpanikɔ. 15John etie ntiense abaŋa. Enye, onyuŋ ofiori ete, Enye edi owo oro ŋketiŋde mbaŋa, nte Enye emi etienede mi ke edem akabare ebem mi iso, koro Enye ekebemde mi iso odu. 16Koro nnyin kpukpru ikɔbɔ mfɔn ikɔrɔ ke mfɔn oto ke uyɔhɔ Esie. 17Koro ekɔnɔ ibet ke ubɔk Moses; edi Jesus Christ akada mfɔn ye akpanikɔ edi. 18Akanam baba owo kiet ikwe Abasi; ikpoŋ-ikpɔŋ Eyen emi Abasi obonde, emi odude ke ikpanesit Ete, kpa Enye amayarare Abasi.

19Ndien emi edi ikɔ ntiense John, ke adaŋemi mme Jew emi etode ke Jerusalem esiode mme oku ye mme Levite edɔŋ ke ɔtɔ esie, ete ebup enye ete, Afo edi anie? 20Ndien enye etiŋ aŋwa-aŋwa, ikaŋke: enye etiŋ aŋwa-aŋwa, ete, Ndige Christ. 21Ekem mmɔ ebup enye ete, Edi anie ndien? Edi Elijah? Enye ete, Ndige. Nte edi prophet oro? Enye ɔbɔrɔ ete, Baba. 22Ntem ke mmɔ ete enye, Edidi anie naŋa? Sian nnyin, man nnyin imen ibɔrɔ isɔk mmɔ emi ekɔdɔŋde nnyin; onyime nso ndien abaŋa idemfo? 23Enye ete, Ami ndi uyo andifiori ke desert, ete, Eneŋere usuŋ Jehovah, kpa nte Isaiah prophet eketiŋde. 24Mme isuŋ oro eto ke otu mme Pharisee. 25Mmɔ edibup enye ndien ete, Nsinam afo onimde owo baptism naŋa, edieke afo mudige Christ, munyuŋ udige Elijah, munyuŋ udige prophet oro? 26John ɔbɔrɔ mmɔ ete, Ami nda mmɔŋ nnim owo baptism; edi owo emi mbufo midiɔŋɔke mmɔ ke ufɔt mbufo ada; 27edi Enye etiene mi ke edem, emi ami mmendotke nditat uruk ikpa-ukot Esie. 28Mme ŋkpɔ emi ewɔrɔ ke ŋkaŋ Jordan oko, emi John onimde baptism do.

29Ke ndaŋ-nsiere John okut nte Jesus asaŋade ekpere enye, onyuŋ ɔdɔhɔ ete, Sese, Eyen-erɔŋ Abasi emi emende mme idiɔk-ŋkpɔ ererimbot efep. 30Emi edi Owo eke ndɔhɔde mbaŋa Enye nte, Owo etiene mi ke edem emi ɔwɔrɔde ebem mi iso; koro Enye ekebemde mi iso odu. 31Ami ŋkonyuŋ ndiɔŋɔke Enye; edi ŋkedi ndida mmɔŋ nnim baptism, man eyarare Enye enɔ Israel. 32John onyuŋ etie ntiense ete, Mma ŋkut Spirit nte otode ke enyɔŋ ɔsuhɔre nte ibiom odoro Enye ke idem. 33Ndien ŋkɔdiɔŋɔke Enye; edi Enye emi ɔkɔdɔŋde mi ete nda mmɔŋ nnim baptism ɔdɔhɔ mi ete, Owo eke edikutde nte Spirit ɔsuhɔrede odoro Enye ke idem edi Enye emi onimde owo baptism ke Edisana Spirit. 34Ami mma nnyuŋ ŋkut, nnyuŋ ntie ntiense nte, Emi edi Eyen Abasi.

35Ke edem usen ŋko John ada ye mbet esie iba, onyuŋ owuk enyin ese Jesus nte Enye asaŋade, 36onyuŋ ɔdɔhɔ ete, Sese, Eyen-erɔŋ Abasi! 37Ndien mbet mbiba oro ekop nte enye etiŋde ntem, enyuŋ edaha etiene Jesus. 38Ekem Jesus ɔwɔŋɔre okut nte mmɔ etienede onyuŋ obup mmɔ ete, Mbufo eyom nso? Mmɔ ete Enye, Rabbi, (oro ɔwɔrɔ ete, Andikpep) oduŋ ke mmɔŋ? Enye ete mmɔ, Edi edise. 39Ntem ke mmɔ eka ekekut ebiet eke Enye oduŋde, enyuŋ edu ye Enye usen oro; ekpere hour inaŋ ke uwem-eyo. 40Kiet ke otu owo mbiba oro ekopde nte John etiŋde enyuŋ etienede Jesus edi Andrew eyen-eka Simon Peter. 41Enye ebem iso okut eyen-eka esiemɔ Simon, onyuŋ ɔdɔhɔ enye ete, Nnyin imokut Messiah (oro ɔwɔrɔ ete, Christ). 42Ada enye edi ke ɔtɔ Jesus. Jesus owuk enyin ese enye, ete enye, Afo edi Simon, eyen John; edikot fi Cephas (oro ɔwɔrɔ ete, Peter).

43Ke ndaŋ-nsiere Jesus aduak ndidaha ŋka Galilee; ndien Enye okut Philip, onyuŋ ɔdɔhɔ enye ete, Tiene Mi. 44Philip oto ke Bethsaida, obio Andrew ye Peter. 45Philip okut Nathanael, onyuŋ ɔdɔhɔ enye ete, Nnyin imokut Enye, emi Moses ekewetde abaŋa Enye ke ibet, mme prophet ekonyuŋ ewetde ebaŋa, kpa Jesus eyen Joseph, emi otode ke Nazareth. 46Nathanael ete enye, Nte baba eti ŋkpɔ ekeme ndito ke Nazareth? Philip ete enye, Di dise. 47Jesus okut Nathanael nte asaŋade edi, onyuŋ abaŋa enye ete, Sese, ata eyen Israel, emi ŋkari miduhe enye ke esit. 48Nathanael ete Enye, Asaŋa didie ɔdiɔŋɔ mi? Jesus ɔbɔrɔ enye ete, Ke ini Philip mikokotke fi kaŋa, ke adaŋemi afo etiede ke idak eto fig, ŋkokut fi. 49Nathanael ɔbɔrɔ Enye ete, Rabbi, Afo edi Eyen Abasi; Afo edi Edidem Israel. 50Jesus ɔbɔrɔ enye ete, Ke emi ndɔhɔde fi nte, Ŋkokut fi ke idak eto fig, nte omonim ke akpanikɔ? Eyekut se ikponde ikan emi. 51Jesus onyuŋ ɔdɔhɔ enye ete, Ke akpanikɔ ke ndɔhɔ mbufo nte, Mbufo eyekut nte enyɔŋ ɔkibɔrede, ye nte mme angel Abasi edɔdɔk esɔsuhɔre edore Eyen Owo ke idem.

હાલમાં પસંદ કરેલ:

JOHN 1: ENA

Highlight

શેર કરો

નકલ કરો