Мәтта 8
8
Иса йәки жь кʼотибуне паԛьж дькә
(Марԛос 1:40-45; Луԛа 5:12-16)
1Паше Иса жь чʼийе һатә хԝаре, әʼлаләтәкә гьран да пәй Ԝи чу. 2Һьнге йәки кʼоти һат хԝә авитә бәр Ԝи у готе: «Хӧдан! Һәгәр бьхԝази, Тӧ дькари мьн паԛьж ки#8:2 Ль гора Ԛануна Муса мәрьвед кʼоти һʼәрам бун. Дәрһәԛа мәрьвед кʼотида ван сәрийа бьхуньн: Ԛануна Кʼаһинтийе 13-14. ».
3Иса дәсте Хԝә дьреж кьре ле кʼәт у готе: «Әз дьхԝазьм. Паԛьж бә!» У дәстхԝәда әԝ жь кʼотибуне паԛьж бу. 4Һьнге Иса жерʼа гот: «Бьньһерʼә, тʼӧ кәсирʼа тьштәки нәбежи, ле һәрʼә хԝә нишани кʼаһин кә у һʼәдийа кӧ Муса тʼәми дайә бьдә, ԝәки һʼәмуйарʼа бьбә шәʼдәти».
Иса хӧламе сәрсәдәки ԛәнщ дькә
(Луԛа 7:1-10; Йуһʼәнна 4:43-54)
5Гава Иса кʼәтә Кәфәрнаһуме, сәрсәдәк һатә щәм Ԝи, һиви же кьр у готе: 6«Хӧдан, хӧламе мьн шьлушәʼт малда пʼалдайә, гәләки щәфе дьбинә». 7Иса готә ԝи: «Әзе бем ԝи ԛәнщ кьм». 8Сәрсәд ле вәгәрʼанд у готе: «Хӧдан, әз нә һежа мә кӧ Тӧ бейи мала мьн. Ле тʼәне хәбәрәке бежә у хӧламе мьне бь ԝе хәбәре ԛәнщ бә. 9Әз хԝәха жи мәрьвәки бьн һʼӧкӧмда мә у бьн дәсте мьнда жи әскәр һәнә. Әз йәкирʼа дьбежьм: ‹Һәрʼә›, дьчә, йәки дьнрʼа дьбежьм: ‹Ԝәрә›, те у хӧламе хԝәрʼа дьбежьм: ‹Ви тьшти бькә›, дькә».
10Гава Иса әв йәк бьһист, зәндәгьрти ма у готә әԝед кӧ пәй ԝи дьчун: «Әз рʼаст ԝәрʼа дьбежьм, Исраеледа жи Мьн баԝәрикә аһа йәкида нәдитийә. 11Әз ԝәрʼа дьбежьм, кӧ гәләке жь рʼоһьлате у жь рʼоавайе бен у шайийа Пʼадшатийа Әʼзманада тʼәви Бьраһим, Исһаԛ у Аԛуб рʼунен, 12ле зарʼед Пʼадшатийе ԝе бенә авитьне тәʼрийа дәрва. Ль ԝьр ԝе бьбә гьри у чʼьркә-чʼьрка дьрана». 13Паше Иса сәрсәдрʼа гот: «Һәрʼә! Бьра ль гора баԝәрийа тә тәрʼа бә». У ԝе дәме хӧламе ԝи ԛәнщ бу.
Иса гәләк нәхԝәша ԛәнщ дькә
(Марԛос 1:29-34; Луԛа 4:38-41)
14Гава Иса һатә мала Пәтрус, хԝәсийа ԝи тʼайеда пʼалдайи дит. 15Әԝи дәсте Хԝә да дәсте ԝе у тʼайе же бәрʼда, рʼабу бәрдәсти Ԝирʼа кьр.
16Гава рʼо чу ава, гәләк щьнакʼәти анинә щәм Ԝи. Әԝи бь хәбәре рʼӧһʼед һʼәрам дәрхьстьн у һʼәму нәхԝәш ԛәнщ кьрьн. 17Әв аһа бу, кӧ әԝ готьна бь заре Ишайа пʼехәмбәр бе сери, кӧ ньвисар ә: «Әԝи нәхԝәшийед мә һьлдан у ешед мә бьрьн»#8:17 Ишайа 53:4. .
Щабдарийа йед кӧ пәй Иса дьчьн
(Луԛа 9:57-62)
18Чахе Иса әʼлаләт дора Хԝә дит, әʼмьр ль шагьрта кьр кӧ һәрʼьнә ԝи бәри голе. 19Һьнге ԛанунзанәк незики Ԝи бу у готе: «Дәрсдар! Тӧ кʼӧда жи һәрʼи, әзе пәй Тә бем». 20Иса готә ԝи: «Рʼувийарʼа ԛӧл һәнә, тәйрәдед әʼзменрʼа жи һелин, ле бона Кӧрʼе Мерьв щик тʼӧнә кӧ сәре Хԝә ле дайнә».
21Шагьртәки Ԝи готе: «Хӧдан! Изьне бьдә мьн кӧ әз пешийе һәрʼьм баве хԝә дәфьн кьм». 22Ле Иса жерʼа гот: «Тӧ пәй Мьн ԝәрә. Бьра мьри мьрийе хԝә дәфьн кьн».
Иса фьртоне дьсәԛьрʼинә
(Марԛос 4:35-41; Луԛа 8:22-25)
23Гава Иса кʼәтә ԛәйьке, шагьртед Ԝи тʼәви Ԝи чун. 24Ньшкева фьртонәкә мәзьн ль голе рʼабу, ӧса кӧ ԛәйьк пелада ӧнда дьбу. Ле Әԝ рʼазайи бу. 25Һьнге шагьрт незики Ԝи бун, әԝ һʼьшйар кьрьн у готьне: «Хӧдан! Мә хьлаз кә! Әм ӧнда дьбьн!» 26Иса готә ԝан: «Чьма һун ӧса тьрсонәк ьн кембаԝәрно?» Ԝе дәме рʼабу ль байе у голе һьлат у һʼәму тьшт сәԛьрʼин. 27Мәрьвед тʼәви Ԝи әʼщебмайи ман у готьн: «Әв кʼи йә, кӧ ба у гол жи ельми Ԝи дьбьн?»
Иса дӧ щьнакʼәтийа ԛәнщ дькә
(Марԛос 5:1-20; Луԛа 8:26-39)
28Гава Иса дәрбази ԝи алийе тʼопрахед Гәрдарине бу, дӧ щьнакʼәти жь нав горʼьстана дәркʼәтьн у рʼасти Ԝи һатьн. Әԝ ӧса һар бун, кӧ кәсәк нькарьбу ԝе рʼерʼа дәрбаз буйа. 29Ԝана кьрә ԛирʼин у готьн: «Тӧ чь жь мә дьхԝази, Кӧрʼе Хԝәде? Жь ԝәхт зутьр һати щәфе бьди мә?» 30Жь ԝана ԝедатьр сурики бәразайи мәзьн дьчʼерийа. 31Щьна рʼәща жь Ԝи кьр у готьне: «Һәгәр Тӧ мә дәрдьхи, бьһелә әм һәрʼьн бькʼәвьнә нава сурийе бәраза». 32Әԝи готә ԝан: «Һәрʼьн!» Әԝ жи дәркʼәтьн чун кʼәтьнә нава бәраза у әԝ сури пева жорда рʼәви, хԝә жь кәнделда авитьнә голе у хәньԛин. 33Бәразван рʼәвин чунә бажер, чь кӧ һатьбу сәре щьнакʼәтийа готьн. 34Һьнге һʼәму мәрьвед бажер дәркʼәтьнә пешийа Иса у гава Әԝ дитьн, рʼәща жь Ԝи кьрьн кӧ жь әʼрде ԝан һәрʼә.
હાલમાં પસંદ કરેલ:
Мәтта 8: KmrNTC
Highlight
શેર કરો
નકલ કરો
Want to have your highlights saved across all your devices? Sign up or sign in
© Институт перевода Библии, 2000, 2011
