Мәтта 7
7
Һинкьрьна дәрһәԛа ломәкьрьнеда
(Луԛа 6:37-38, 41-42)
1Лома нәкьн, кӧ ломә ль ԝә нәбьн. 2Һун чь лома бькьн, әԝ ломә жи ԝе ль ԝә бьбьн у һун бь чь чапе бьпивьн, бь ԝе чапе жи ԝәрʼа ԝе бе пиване. 3Тӧ чьма ԛьршьке чʼәʼве бьре хԝәда дьбини, ле кʼеране чʼәʼве хԝәда набини? 4Йан жи чаԝа тӧ дькари бежи бьре хԝә: ‹Бьһелә кӧ әз ԛьршьк жь чʼәʼве тә дәрхьм›, ле ва йә кʼеран чʼәʼве тәда һәйә? 5Дӧрʼу! Пешийе кʼеране чʼәʼве хԝә дәрхә. Паше те ԛәнщ бьбини кӧ чаԝа ԛьршьк жь чʼәʼве бьре хԝә дәрхи.
6Тьште бӧһӧрти нәдьнә са у нә жи дӧрʼед хԝә бавежьнә бәр бәраза. Һәгәр на, бәразе ԝан бьн ньгед хԝәда пʼепәс кьн у сәйе жи вәгәрʼьн ԝә бьдьрʼиньн.
Бьхԝазьн, бьгәрʼьн, дәри хьн
(Луԛа 11:9-13)
7Бьхԝазьн һуне бьстиньн, бьгәрʼьн һуне бьбиньн, дәри хьн ԝе бәр ԝә вәбә. 8Чьмки кʼи кӧ дьхԝазә дьстинә, кʼи кӧ дьгәрʼә дьбинә у кʼи кӧ дәри дьхә бәр вәдьбә. 9Жь ԝә кʼижан ә әԝ мәрьв, кӧ кӧрʼе ԝи нан же бьхԝазә, әԝ кәвьр бьде? 10Йан жи мәʼси бьхԝазә, әԝ мәʼр бьде? 11Һун кӧ хьраб ьн, заньн тьштед ԛәнщ бьдьнә зарʼед хԝә, ле Баве ԝәйи Әʼзмана ԝе чьԛас тьштед ԛәнщ бьдә әԝед кӧ жь Ԝи дьхԝазьн.
Ԛануна зерʼ
12Һәр чь кӧ һун дьхԝазьн мәрьв бона ԝә бькьн, һун жи ӧса ԝанарʼа бькьн. Әв ә мәʼна һинкьрьна Ԛануне у пʼехәмбәра.
Дәре тәнг
(Луԛа 13:24)
13Дәре тәнгрʼа бькʼәвьнә һьндӧрʼ, чьмки фьрә йә әԝ дәри у бәр ә әԝ рʼийа кӧ дьбә бәрбь ӧндабуне у гәләк ьн әԝед кӧ ԝеда дьчьн. 14Ле гәләки тәнг ә әԝ дәри у зәʼмәт ә әԝ рʼийа кӧ дьбә бәрбь жийине у һьндьк ьн әԝед кӧ ԝе рʼейе дьбиньн.
Дар у бәре ԝе
(Луԛа 6:43-45)
15Һʼәвза хԝә жь пʼехәмбәред дәрәԝ бькьн. Әԝе бь пʼосте пез бенә щәм ԝә, ле һьндӧрʼва гӧред пʼәрʼани нә. 16Һуне ԝана жь бәред ԝан нас бькьн. Гәло кәсәк жь стьрийа тьрийа дьчьнә, йан жи жь дьрʼийа һежира? 17Дара ԛәнщ бәре ԛәнщ дьдә, ле дара хьраб бәре хьраб дьдә. 18Дара ԛәнщ нькарә бәре хьраб бьдә, нә жи дара хьраб дькарә бәре ԛәнщ бьдә. 19Һәр дара кӧ бәре ԛәнщ надә те бьрʼин у авитьне нава агьр. 20Аԝа һуне ԝана жь кьред ԝан нас бькьн.
Кʼи һежайи Пʼадшатийа Әʼзмана йә
(Луԛа 13:26-27)
21Нә кӧ әԝе Мьнрʼа дьбежә: ‹Хӧдан! Хӧдан!› ԝе бькʼәвә Пʼадшатийа Әʼзмана, ле әԝе бькʼәве, йе кӧ әʼмьре Баве Мьни Әʼзмана дьԛәдинә. 22Ԝе Рʼоже гәләке Мьнрʼа бежьн: ‹Хӧдан! Хӧдан! Нә мә бь наве Тә пʼехәмбәрти кьрьн у бь наве Тә щьн дәрхьстьн у бь наве Тә гәләк кʼәрәмәт кьрьн?› 23Һьнге Әзе ашкәрә ԝанрʼа бежьм: ‹Жь Мьн дур кʼәвьн, нәһәԛно! Мьн һун тʼӧ щар нас нәкьрьнә›.
Мала йе сәрԝахт у мала йе бефәʼм
(Луԛа 6:47-49)
24Аԝа кʼи кӧ ван готьнед Мьн дьбьһе у ԝан дьԛәдинә, әԝ мина мәрьвәки сәрԝахт ә, кӧ мала хԝә сәр кевьр чекьр. 25Баран бари, ба у лейи рʼабун, ԝе мале хьстьн, ле әԝ мал һьлнәшийа, чьмки һʼиме ԝе сәр кевьр бу. 26Ле кʼи кӧ ван готьнед Мьн дьбьһе у наԛәдинә, әԝ мина мәрьвәки бефәʼм ә, кӧ мала хԝә сәр ԛуме чекьр. 27Баран бари, ба у лейи рʼабун, ԝе мале хьстьн у әԝ мал һьлшийа, лап ԝеран бу чу».
Һʼӧкӧме Иса
28Гава Иса әв готьнед Хԝә сәр һәвда ани, әʼлаләт сәр һинкьрьна Ԝи зәндәгьрти ман, 29чьмки Әԝи мина йәки хԝәйиһʼӧкӧм әԝ һин дькьрьн, нә кӧ мина ԛанунзанед ԝан.
હાલમાં પસંદ કરેલ:
Мәтта 7: KmrNTC
Highlight
શેર કરો
નકલ કરો
Want to have your highlights saved across all your devices? Sign up or sign in
© Институт перевода Библии, 2000, 2011
