Мәтта 18
18
Кʼи йә йе һәри мәзьн?
(Марԛос 9:33-37; Луԛа 9:46-48)
1Ԝи чахи шагьрт һатьнә щәм Иса у готьне: «Ль нав Пʼадшатийа Әʼзманада кʼи йә йе һәри мәзьн?» 2Иса зарʼокәк гази щәм Хԝә кьр, әԝ нав ԝанда да сәкьнандьне 3у гот: «Әз рʼаст ԝәрʼа дьбежьм, һәгәр һун вәнәгәрʼьн у нәбьнә мина зарʼока, һун тʼӧ щар накʼәвьнә Пʼадшатийа Әʼзмана. 4Аԝа кʼи кӧ мина ве зарʼоке хԝә бьчʼук кә, әԝ ә йе һәри мәзьн Пʼадшатийа Әʼзманада. 5У кʼи кӧ зарʼокәкә аһа бь наве Мьн ԛәбул кә, әԝ Мьн ԛәбул дькә.
Жьрʼедәрхьстьн
(Марԛос 9:42-48; Луԛа 17:1-2)
6Ле кʼи кӧ жь ван бьчʼука йәки, йе кӧ баԝәрийа хԝә Мьн тинә жь рʼе дәрхә, ԝирʼа һе ԛәнщ ә, ԝәки бәрашәк стуйе ԝива бе гьредане у бьне бәʼреда бьхәньԛә. 7Ԝәй ль дьнйайе, бона әԝед кӧ мәрьва жь рʼе дәрдьхьн. Набә кӧ әԝ тьшт нәбьн, ле ԝәй ль ԝи кӧ мәрьв бь ԝи жь рʼе дькʼәвьн.
8Һәгәр дәсте тә йан ньге тә, тә жь рʼе дәрхә, ԝи жекә у жь хԝә бавежә. Бона тә һе ԛәнщ ә кӧ тӧ ԛоп йан сәԛәт бькʼәви жийине, нә кӧ дӧ дәст йан дӧ ньгед тә һәбьн у бейи авитьне нава агьре һʼәта-һʼәтайе. 9У һәгәр чʼәʼве тә, тә жь рʼе дәрдьхә, ԝи дәрхә у бавежә. Бона тә һе ԛәнщ ә кӧ тӧ бь чʼәʼвәки бькʼәви жийине, нә кӧ бь дӧ чʼәʼва бейи авитьне нава агьре доже.
Мәсәла пәза ӧндабуйи
(Луԛа 15:3-7)
10Һаш жь хԝә һәбьн кӧ һун жь ван бьчʼука йәки беһӧрмәт нәкьн, чьмки Әз ԝәрʼа дьбежьм, кӧ мьлйакʼәтед ԝан ль әʼзмана тʼьме рʼуйе Баве Мьни әʼзмана дьбиньн. 11Кӧрʼе Мерьв һат кӧ йе ӧндабуйи бьгәрʼә у хьлаз кә#18:11 Нав дәстньвисаред һәрә ԛәнщда рʼеза 11-а тʼӧнә. . 12Һун чаԝа тʼәхмин дькьн? Һәгәр сәд пәзед мәрьвәки һәбьн у йәк жь ԝан ӧнда бә, әԝе нод нәһа нәһелә чʼийа-банийа у нәчә кӧ йа ӧндабуйи бьгәрʼә? 13Ле гава бьбинә, әз рʼаст ԝәрʼа дьбежьм, әԝе бона ԝе һе гәләки ша бә, нә кӧ бона нод нәһед дьнә кӧ ӧнда нәбунә. 14Ӧса жи Баве ԝәйи#18:14 Нав һьнәк дәстньвисарада дәԝса «ԝә» «Мьн» һәйә. әʼзмана нахԝазә кӧ жь ван бьчʼука йәк ӧнда бә.
Бьре кӧ гӧнә дькә
(Луԛа 17:3)
15Һәгәр бьре тә нәһәԛийе ль тә#18:15 Нав һьнәк дәстньвисарада «ль тә» тʼӧнә. бькә, гава тӧ у әԝ тʼәне нә, ԝи ширәт кә. Һәгәр әԝи гӧһдарийа тә кьр, иди тә бьре хԝә ԛазьнщ кьр. 16Ле һәгәр гӧһдарийа тә нәкьр, йәки йан дӧдӧйед дьн жи тʼәви хԝә һьлдә, ԝәки: ‹Бь дәве дӧ йан се шәʼда һәр тьшт избат бә›#18:16 Ԛануна Дӧщари 19:15. . 17Ле һәгәр әԝи гӧһдарийа ԝан жи нәкьр, щьвинерʼа бежә. У һәгәр гӧһдарийа щьвине жи нәкьр, бьра әԝ бона тә бьбә мина пʼутпʼарьст у хәрщгьра.
18Әз рʼаст ԝәрʼа дьбежьм, чь кӧ һун сәр әʼрде гьредьн, ль әʼзмен жи ԝе гьредайи бә у чь кӧ һун ль сәр әʼрде вәкьн, ль әʼзмен жи ԝе вәкьри бә.
19Диса Әз рʼаст ԝәрʼа дьбежьм, һәгәр дӧдӧ жь ԝә ль сәр әʼрде бь тʼьфаԛ бона тьштәки дӧа бькьн у бьхԝазьн, Баве Мьни әʼзмана ԝе бьдә ԝә. 20Чьмки кʼидәре дӧ йан се мәрьв бь наве Мьн бьщьвьн, Әз ль ԝьр нава ԝанда мә».
Мәсәла бона бахшандьн у нәбахшандьне
21Һьнге Пәтрус незики Ԝи бу у готе: «Хӧдан. Гава бьре мьн нәһәԛийе ль мьн бькә, гәрәке әз чәнд щара бьбахшиньме, һʼәта һʼәфт щара?» 22Иса готә ԝи: «Әз набежьмә тә һʼәта һʼәфт щара, ле һʼәта һʼәфте щара һʼәфт#18:22 Аһа жи те фәʼмкьрьне: «Һʼәфте у һʼәфт». . 23Чьмки Пʼадшатийа Әʼзмана мина ве йәке йә: Пʼадшаки хԝәст тʼәви хӧламед хԝә һәԛ-һʼәсабе хԝә рʼаст кә. 24Гава дәст бь һʼәсаба кьр, йәк анинә щәм ԝи, кӧ дәһә һʼәзар тәланти#18:24 Ԛимәте тәлантәки һәԛе пʼаләки панздәһ сала зедәтьр бу. дәйндаре ԝи бу. 25Ле чьмки нькарьбу дәйне хԝә бьда, хԝәйе ԝи әʼмьр кьр, кӧ әԝ, жьна ԝи, зарʼед ԝи у һʼәму һәбука ԝи бенә фьротане, кӧ дәйне ԝи бе дайине. 26Һьнге хӧлам дәвәрʼуйа чу ньге ԝи, лава же кьр у гот: ‹Ль мьн сәбьр кә. Әзе һʼәму жи ль тә вәгәрʼиньм›. 27Гӧне хԝәйе ԝи ль ԝи һат, әԝ бәрʼда у дәйне ԝи жи бахшанде.
28Ле чахе әԝ хӧлам дәркʼәт, рʼасти хӧлам-һәваләки хԝә һат кӧ сәд зиви#18:28 Ԛимәте зивәки ԝәкә рʼожхәбатәкә пʼала бу. дәйндаре ԝи бу, дәст кьрә хәнәԛе у готе: ‹Тӧ чьԛаси дәйндаре мьн и бьдә!› 29Һьнге һәвале хӧлам хԝә авитә ньге ԝи, же лава кьр у готе: ‹Ль мьн сәбьр кә. Әзе ль тә вәгәрʼиньм›. 30Ле әԝи гӧһ нәда ԝи, чу әԝ авитә кәле, һʼәта кӧ әԝ дәйне хԝә бьдә. 31Чахе хӧлам-һәвалед ԝийә дьн әв йәк дитьн, гәләки бәр хԝә кʼәтьн у чун хԝәйе хԝәрʼа тьштед кӧ ԛәԝьмибу гьли кьрьн. 32Һьнге ахайе ԝи гази ԝи кьр у готе: ‹Хӧламе хьраб! Мьн һʼәму дәйне тә бахшандә тә, бона ԝе йәке кӧ тә лава жь мьн кьр. 33Ле жь тә нәдькʼәт кӧ тӧ жи ль хӧлам-һәвале хԝә бьһатайи рʼәʼме чаԝа кӧ әз тә һатьмә рʼәʼме?› 34У ахайе ԝи һерс кʼәт, әԝ да дәсте зӧлмдаред кәле, һʼәта кӧ һʼәму дәйне хԝә вәгәрʼинә. 35Ӧса жи Баве Мьни Әʼзмана ԝе ль сәре ԝә һәр йәки бькә, һәгәр һун бь дьл нәбахшиньнә бьре хԝә».
હાલમાં પસંદ કરેલ:
Мәтта 18: KmrNTC
Highlight
શેર કરો
નકલ કરો
Want to have your highlights saved across all your devices? Sign up or sign in
© Институт перевода Библии, 2000, 2011
