Луԛа 24

Иса жь мьрьне рʼадьбә

(Мәтта 28:1-10; Марԛос 16:1-8; Йуһʼәнна 20:1-10)

1Рʼожа йәкшәме сьбәһе зу, ԝан кʼӧлфәта бьһарәтед һазьркьри һьлдан чунә сәр тʼьрбе. 2Ле ԝана кәвьр жь бәр тʼьрбе һолкьри дит. 3Гава кʼәтьнә һьндӧрʼ, щьнйазе Хӧдан Иса нәдитьн. 4Гава әԝана һе бона ве йәке мәтʼәлмайи мабун, ньшкева дӧ мәри бь кʼьнще нурани ль бәр ԝан сәкьнин. 5У гава кʼӧлфәт жь тьрса кʼәтьнә сәр рʼуйе хԝә, ԝан мәрьва ԝанрʼа гот: «Һун чьма ль Йе сах нава мьрийада дьгәрʼьн? 6Әԝ нә ль вьр ә, Әԝ жь мьрьне рʼабуйә. Биньнә бира хԝә, кӧ чахе һе Щәлиледа бу, чь ԝәрʼа гот: 7‹Гәрәке Кӧрʼе Мерьв бькʼәвә дәсте мәрьвед нәрʼаст, бе хачкьрьне у рʼожа сьсийа жь мьрьне рʼабә›». 8У ԝана готьна Иса бир анин 9у жь тʼьрбе вәгәрʼийан, әва йәка һәр йанздәһа у һʼәмуйед майинрʼа готьн. 10Йед кӧ шандийарʼа готьн, әвана бун: Мәрйәма Мәждәлани, Йоһана у Мәрйәма дийа Аԛуб, бь тʼәви һьнәкед майин. 11Шандийава чаԝа готьнәкә пʼучʼ хӧйа бу у ԝана кʼӧлфәт баԝәр нәкьрьн. 12Ле Пәтрус рʼабу бәрбь тʼьрбе бәзи, ԛуз бу ньһерʼи, тʼәне кʼәфәне Ԝи ԝьр бу у мәтʼәлмайи чу, дьфькьри гәло чаԝа бу.

Ль сәр Рʼийа Әмԝасе

(Марԛос 16:12-13)

13Ԝе рʼоже дӧ шагьрт дьчунә гӧндәки, кӧ жь Оршәлиме донздәһ километьри дур бу, наве ԝи Әмԝас бу. 14Ԝана бь һәврʼа бона һәр тьште ԛәԝьми хәбәр дьдан. 15У гава әԝана нав һәвда хәбәр дьдан у дьшеԝьрин, Иса Хԝәха жи незики ԝан бу, тʼәви ԝан чу. 16Ле чʼәʼвед ԝан гьрти бун, кӧ Ԝи нас нәкьн. 17Иса ԝанрʼа гот: «Һун ве рʼейеда чь һәврʼа хәбәр дьдьн?» Әԝана мәʼдәкьри сәкьнин#24:17 Нав һьнәк дәстньвисарада аһа йә: «Һун ве рʼейеда чь һәврʼа хәбәр дьдьн у мәʼдәкьри нә?» . 18Йәки жь ԝан, кӧ наве ԝи Клепас бу, ле вәгәрʼанд у гот: «Әԝ чаԝа жь Оршәлиме тʼәне Тә нәбьһистийә кӧ ван рʼожед пашьнда ԝьр чь ԛәԝьмийә?» 19Әԝи жь ԝан пьрси у гот: «Чь буйә?» Ԝана ле вәгәрʼанд готе: «Бона Исайе Ньсрәте, кӧ Әԝ бь әʼмәл у хәбәред Хԝә ль бәр Хԝәде у тʼәмамийа мьләт пʼехәмбәрәки зор бу 20у чаԝа сәрәкед кʼаһина у сәрԝеред мә нәмамийа кӧштьна Ԝи кьрьн, хач кьрьн. 21Әм ԝе гӧмане бун кӧ Әԝи ԝе Исраеле аза бькьра. Ԝәки дьн жи әва рʼожа сьсийа йә, кӧ әв тьшт бунә. 22Ле чәнд кʼӧлфәтед нав мәда жи әм әʼщебмайи кьрьн. Әԝана сьбәһе зу чубунә сәр тʼьрбе 23у щьнйазе Ԝи ль ԝьр нәдитьбун, вәгәрʼийан һатьн мәрʼа готьн, кӧ: ‹Мә мьлйакʼәт дитьн, мәрʼа готьн, кӧ Әԝ сах ә›. 24У жь мә һьнәк жи чунә сәр тʼьрбе, чаԝа кӧ ԝан кʼӧлфәта готьбу, ӧса бу, ле Әԝ нәдитьн». 25Һьнге Әԝи ԝанрʼа гот: «Һәй инсанед бе фькьр, һун чьԛаси гьран һʼәму готьнед пʼехәмбәра баԝәр дькьн? 26Нә гәрәке Мәсиһ щәфа бькʼьшанда у бькʼәта рʼумәта Хԝә?» 27У Ԝи дәстпекьр жь Муса у һʼәму пʼехәмбәра, чь кӧ ԝан кʼьтебада бона Ԝи ньвисар бун, ԝанарʼа шьровәкьрьн.

28Гава незики ԝи гӧнде кӧ дьчуне бун, Әԝи ӧса да кʼьфше, йанчийә Әԝ дьчә щики дур. 29Ле ԝана зор ль Ԝи кьр у гот: «Ишәв ль щәм мә бьминә, чьмки евар ә, рʼо чуйә ава». У Әԝ чу һьндӧрʼ, кӧ ль щәм ԝан бьминә. 30Ле гава Әԝ тʼәви ԝан сәр сьфре рʼуньшт, нан һьлда, шькьрийа Хԝә жь Хԝәде ани, кәркьр да ԝан. 31Һьнге чʼәʼвед ԝан вәбун, Әԝ нас кьрьн у Әԝ бәр чʼәʼве ԝан бәтавәбу. 32Ԝана һәврʼа гот: «Ләма, гава Әԝи рʼеда мәрʼа хәбәр дьда у ньвисар мәрʼа шьровәдькьрьн, агьр дьле мә дькʼәт». 33Әԝ ԝе гаве рʼабун вәгәрʼийанә Оршәлиме у һәр йанздәһ тʼәви йед майин щьвийайи дитьн, 34готьн: «Рʼасти Хӧдан сах буйә у Шьмһʼунва хӧйа буйә!» 35Паше ԝан һәр дӧйа гьли кьр, кӧ чаԝа рʼеда рʼасти Ԝи һатьн у чахе Ԝи нан кәркьр, Әԝ нас кьрьн.

Иса Хԝә нишани шагьртед Хԝә дькә

(Мәтта 28:16-20; Марԛос 16:14-18; Йуһʼәнна 20:19-23; Кʼаред Шандийа 1:6-8)

36Ԝана һе бона ве йәке хәбәр дьда, Иса нава ԝанда сәкьни у ԝанрʼа гот: «Әʼдьлайи ԝәрʼа». 37Әԝана жь тьрса бьздийан у ԝан тʼьре хәйаләки дьбиньн. 38Ле Әԝи ԝанрʼа гот: «Һун чьма шашмайи манә у дӧдьли нә? 39Аԝа ль дәст у пʼийед Мьн бьньһерʼьн, кӧ Әз Хԝәха мә. У дәсте хԝә бьдьнә Мьн у бьбиньн, чьмки гошт у һәстуйед рʼӧһʼ тʼӧнәнә, чаԝа кӧ һун дьбиньн йед Мьн һәнә». 40Гава әв йәк гот, дәст у пʼийед Хԝә нишани ԝан кьрьн. 41У һе жь шабуна баԝәр нәдькьрьн, һʼәйр-һʼӧжмәкʼар мабун, Әԝи ԝанрʼа гот: «Ԛәт тьштәки хԝарьне ль щәм ԝә һәйә?» 42Ԝана чити мәʼсийе пьжанди да Ԝи#24:42 Нав һьнәк дәстньвисарада әв жи һәйә: «У мьртʼоха һьнгьв». . 43Әԝи һьлда ль бәр чʼәʼве ԝан хԝар 44у ԝанарʼа гот: «Әв бун әԝ готьнед кӧ гава Әз тʼәви ԝә бум, Мьн ԝәрʼа готьбун: ‹Гәрәке һәр тьштед кӧ бона Мьн Ԛануна Муса, ньвисаред пʼехәмбәра у Зәбурада ньвисар бун бьһатана сери›». 45Һьнге фәʼме ԝан вәкьр, кӧ ньвисара фәʼм бькьн. 46У ԝанрʼа гот: «Аԝа ньвисар ә, кӧ Мәсиһ гәрәке щәфа бькʼьшинә у рʼожа сьсийа жь мьрьне рʼабә 47у жь Оршәлиме гьрти бь наве Ԝи тʼобәйи у бахшандьна гӧна нав һʼәму мьләтада ԝе бе даннасинкьрьне. 48У һун ьн шәʼдед ван һʼәму тьшта. 49У ва Әзе созе Баве Хԝә ԝәрʼа бьшиньм. Оршәлимеда бьминьн, һʼәта һун ԛәԝате жь жор бьстиньн».

Жорһьлатьна Иса

(Марԛос 16:19-20; Кʼаред Шандийа 1:9-11)

50У әԝ һʼәта Бәйтанйайе бьрьн, дәсте Хԝә бьльнд кьр, дӧа ԝан кьр. 51У һе дӧа дькьр, жь ԝан ԛәтийа, бәрбь әʼзмен һатә һьлатьне. 52Шагьрта жи сәре хԝә бәр Ԝи дани, бь әшԛ у ша вәгәрʼийанә Оршәлиме. 53У һәр гав пʼарьстгәһеда бун, пәсьне Хԝәде дьдан.

હાલમાં પસંદ કરેલ:

Луԛа 24: KmrNTC

Highlight

શેર કરો

નકલ કરો