Луԛа 23

Иса ль бәр Пилато

(Мәтта 27:1-2, 11-14; Марԛос 15:1-5; Йуһʼәнна 18:28-38)

1У тʼәмамийа әʼлаләта ԝан рʼабу, Иса бьрьнә щәм Пилато. 2У дәст бь хәйбе кьрьн готьн: «Мә Әв мәрьва дит кӧ мьләте мә дьхальфинә у нә жи дьһелә кӧ хәрщ бьдьнә Ԛәйсәр. Бона Хԝә жи дьбежә: ‹Әз Мәсиһ Пʼадша мә›». 3Пилато жь Ԝи пьрси у готе: «Тӧ йи пʼадше щьһуйа?» Әԝи ле вәгәрʼанд у готе: «Тә бь дәве хԝә гот». 4Пилато сәрәкед кʼаһина у әʼлаләтерʼа гот: «Әз тʼӧ нәһәԛийе Ви мәрьвида набиньм». 5Ле әԝана сәр йа хԝә ман у готьн: «Әви мәрьви нава тʼәмамийа Щьһустане, жь Щәлиле дәстпекьри һʼәта вьра, щьмәʼт бь һинкьрьна Хԝәва тʼәвиһәв кьрийә».

Иса ль бәр Һеродәс

6Гава Пилато бона Щәлиле бьһист, пьрси: «Әв мәрьва жь Щәлиле йә?» 7Гава пе һʼәсийа, кӧ Әԝ бьн һʼӧкӧме Һеродәсда йә, Әԝ шандә щәм Һеродәс, кӧ әԝ жи ԝан рʼожада һатьбу Оршәлиме. 8Гава Һеродәс чʼәʼв Иса кʼәт, гәләки ша бу. Әԝи һе зува дьхԝәст кӧ Әԝ бьдита, чьмки әԝи гәләк тьшт бона Ԝи бьһистьбун у һʼьзрәта Ԝи бу, кӧ кʼәрәмәтәке бь дәсте Ԝи бьбинә. 9Һеродәс гәләк пьрс данә Ԝи, ле Иса щаба тʼӧ пьрсе нәда. 10Сәрәкед кʼаһина у ԛанунзана жи сәкьнибун у гәләки давитьнә Ԝи. 11Һеродәс жи бь әскәред хԝәва Әԝ беԛәдьр кьр, пе кʼәнийан, паше кʼьнще рʼәԝш да ле кьрьне, диса пашда шандә щәм Пилато. 12Ԝе рʼоже Пилато у Һеродәс ль һәв һатьн, чьмки пешийе нава ԝанда дьжмьнати һәбу.

Диԝанеда һʼӧкӧме кӧштьне ль сәр Иса дәрдьхьн

(Мәтта 27:15-26; Марԛос 15:6-15; Йуһʼәнна 18:39–19:16)

13Пилато гази сәрәкед кʼаһина, сәрԝера у щьмәʼте кьр, 14ԝанрʼа гот: «Ԝә Әв мәрьва ани щәм мьн, чаԝа Йәки щьмәʼте дьхальфинә. Аԝа мьн ль бәр ԝә һәр тьшт жь Ԝи пьрси, ле жь ԝан хьрабийед кӧ һун гьли дькьн, мьн тʼӧ тьшт ль сәр Ви мәрьви нәдит. 15У нә жи Һеродәс дит, ләма жи ԝи Әԝ ль сәр мәда вәгәрʼанд. Әви тьштәки ӧса нәкьрийә кӧ бе кӧштьне. 16Әзе Ԝи бьдьмә бәр ԛамчийа у бәрʼдьм»#23:16 Нав һьнәк дәстньвисарада рʼеза 17-а жи һәйә: «Аԝа әʼсәйи лазьм бу Пилато щәжьнеда гьртик ԝанрʼа бәрʼда». . 18Ле тʼәмамийа әʼлаләте бь һәврʼа кьрә ԛирʼин у гот: «Ԝи ль рʼубари дьне нәһелә! Барабас бона мә бәрʼдә!» 19Барабас йәки бона сәрһьлдане у меркӧштьна бажерда буйи һатьбу гьртьне. 20Пилато диса дәстпекьр хәбәр да, чьмки ԝи дьхԝәст кӧ Иса бьда бәрʼдане. 21Ле ԝана һе дькьрә ԛирʼин у дьгот: «Хач кә! Әԝи хач кә!» 22Әԝи щара сьсийа ԝанрʼа гот: «Әви чь хьраби кьрийә? Мьн ль сәр Ви нәһәԛи нәдит кӧ Әԝ бе кӧштьне. Әз Ԝи бьдьмә бәр ԛамчийа у бәрʼдьм». 23Ле әԝана бь дәнге бьльнд сәр йа хԝә бун у дьхԝәстьн кӧ Әԝ бе хачкьрьне. Сәԝта ԝан сәркʼәт. 24Пилато ԛьрара хԝә да, кӧ бь хԝәстьна ԝан бә. 25Анәгори хԝәстьна ԝан, йе кӧ бона сәрһьлдане у меркӧштьне кәледа бу, бәрʼда. Ле Иса һьштә сәр хԝәстьна дьле ԝан.

Хачкьрьна Иса

(Мәтта 27:31-44; Марԛос 15:21-32; Йуһʼәнна 19:17-27)

26У гава әскәра Әԝ данә пешийа хԝә бьрьн, йәки курени наве ԝи Шьмһʼун, кӧ жь кʼәԝшен дьһат, әԝ гьртьн у хач данинә сәр мьле ԝи, кӧ ль пәй Иса бьбә. 27У әʼлаләтәкә щьмәʼтейә гьран ль пәй Ԝи дьчу, ӧса жи кʼӧлфәтед кӧ шина Ԝи дькьрьн у дьгьрийан. 28Иса ль сәр ԝанда вәгәрʼийа у гот: «Ԛизед Оршәлиме! Сәр Мьнда нәгьрин, ле сәр хԝә у зарʼед хԝәда бьгьрин. 29Чьмки ва ԝе рʼоже бен кӧ ԝе бежьн: ‹Хԝәзи ль ԝан кʼӧлфәтед безӧрʼәт, кӧ зарʼ нәанинә у нәмежандьнә›#23:29 Аһа жи те фәʼмкьрьне: «Хԝәзи ль ԝан кʼӧлфәтед безӧрʼәт у ԝан бәтʼьна кӧ зарʼ нәанинә у ԝан бьстана кӧ нәмежандьнә». . 30Һьнге мәрьве дәстпекьн бежьн: ‹Чʼийано! Ль сәр мәда бькʼәвьн. Гьрно! Мә вәшерьн›#23:30 Һосейа 10:8. . 31Һәгәр сәре дара Тәрʼ аһа дькьн, ле һʼале дара һʼьшк ԝе чаԝа бә?»

32Дӧ мәрьвед нәһәԛ жи анин, кӧ Перʼа бенә кӧштьне. 33У гава гьһиштьнә ԝи щийе кӧ Ԛаф те готьн, ль ԝьр Әԝ хач кьрьн. У әԝед нәһәԛ жи йәк ль мьле рʼасте хач кьрьн у йәк жи ль мьле чʼәпе. 34Һьнге Иса гот: «Баво, бьбахшинә ван, чьмки ньзаньн чь дькьн». Сәр кʼьнщед Ԝи пʼәшк авитьн ԝәки нава хԝәда бәла кьн#23:34 Зәбур 22:18. . 35У щьмәʼт сәкьнибу дьньһерʼи. Сәрԝера жи ԛәрфе хԝә ль Ԝи дькьрьн у дьготьн: «Хәлԛ хьлаз кьрьн, дә бьра Хԝә жи хьлаз кә, һәгәр Әԝ ә Мәсиһ, бьжартийе Хԝәде». 36Әскәр жи ль Ԝи дькʼәнийан, пешда дьһатьн, сьркә дьдане 37у дьготьн: «Һәгәр Тӧ йи пʼадшайе щьһуйа, дә Хԝәха Хԝә хьлаз кә». 38У феза сәре Ԝи жи ньвисар бу#23:38 Нав һьнәк дәстньвисарада аһа йә: «У феза сәре Ԝи бь йунани, латини у ибрани ньвисар бу». , кӧ: «ӘВА ПʼАДШАЙЕ ЩЬҺУЙА ЙӘ».

39Жь ԝан нәһәԛед дардакьри, йәки Иса беһӧрмәт дькьр у дьготе: «Тӧ нә Мәсиһ и? Дә мә хьлаз кә, Хԝә жи перʼа». 40Ле һәвале ԝи ле һьлат у гот: «Тӧ жь Хԝәде натьрси? Нә тӧ жи хут ԝи щәзайида йи? 41Әв һәԛе мә йә, кӧ әз у тӧ анәгори әʼмәлед хԝә дькʼьшиньн, ле Әви тʼӧ хьраби нәкьрийә». 42У Исарʼа гот: «Иса, мьн бир бини, гава Пʼадшатийа Хԝәва бейи#23:42 Нав һьнәк дәстньвисарада аһа йә: «Гава Тӧ бьгьһижи Пʼадшатийа Хԝә». ». 43Иса ԝирʼа гот: «Әз рʼаст тәрʼа дьбежьм, иро те тʼәви Мьн бӧһьштеда би».

Мьрьна Иса

(Мәтта 27:45-56; Марԛос 15:33-41; Йуһʼәнна 19:28-30)

44Гава нивро сьһʼәт незики донздәһа бу, тʼәмамийа әʼрде һʼәта сьһʼәта сьсийа бу тәʼри 45у рʼуйе рʼойе һатә гьртьне. Пʼәрʼда пʼарьстгәһе нивида бу дӧ тиша. 46У Иса бь дәнге бьльнд кьрә гази у гот: «Баво, рʼӧһʼе Хԝә дьдьмә дәсте Тә»#23:46 Зәбур 31:5. . У гава әв йәк гот, рʼӧһʼе Хԝә да. 47Сәрсәд әв тьште буйи кӧ дит, шькьри да Хԝәде у гот: «Рʼасти Әва мәрьвәки рʼаст бу». 48У тʼәмамийа әʼлаләте, кӧ ль ԝьр бона тʼәмаше щьвийайи бу, әв йәка дит, сингед хԝә дьхьстьн, пашда вәдьгәрʼийанә малед хԝә. 49Һʼәму насед Ԝи жи у әԝ кʼӧлфәтед кӧ жь Щәлиле һатьбун, дур сәкьни бун у әв тьшт дьдитьн.

Дәфьнкьрьна Иса

(Мәтта 27:57-61; Марԛос 15:42-47; Йуһʼәнна 19:38-42)

50Мәрьвәки ԛәнщи ширһʼәлал у әндәме щьвина гьрәгьра щьһуйа һәбу, наве ԝи Усьв. 51Әва жь бажаре Аримәтйа Щьһустане бу у хԝәха жи һивийа Пʼадшатийа Хԝәде бу. Әԝ тʼәви шеԝьр у кьрьна щьвина ԝан нәбьбу. 52Әԝ рʼабу чу щәм Пилато у щьнйазе Иса жь ԝи хԝәст. 53Щьнйаз жь хаче ани хԝаре, ԛәдәке кʼьтанида кʼәфән кьр у дани нав тʼьрба ԛәйеда кʼолайи, кӧ тʼӧ щар ԝеда кәсәк нәһатьбу данине. 54У әԝ рʼожа тʼьвдарәккьрьнеда бу у евара шәмийе дәстпедькьр. 55У әԝ кʼӧлфәтед кӧ жь Щәлиле тʼәви Иса һатьбун, әԝ жи пәй ԝи чун у әԝ тʼьрба кӧ чаԝа щьнйазе Ԝи теда һатә данине, дитьн. 56У пашда вәгәрʼийан, бьһарәт у рʼуне бинхԝәш һазьр кьрьн у анәгори тʼәмийа Ԛануне рʼожа шәмийе рʼьһʼәт бун.

હાલમાં પસંદ કરેલ:

Луԛа 23: KmrNTC

Highlight

શેર કરો

નકલ કરો