ILUKU 24
24
Owuleji Bwula Igu nya IJisọsị
(ịMatiyu 28:1-10; ịMakị 16:1-8; ịJọn 20:1-10)
1Lụka nya ewu-ụtụrụ gbegbegbe ẹnụ nya ịchọọchị, anyang ịwẹ kpa ida ichoru kwọkwọ ịlẹ kị nwụlanọ wuu hu ang kele ka iworu nya iJisọsị, kị ka ya wụ ogu nyamwụ ụ-ụwa. 2Ụka kị pwụ ụwa, ị yẹ jaabwọ ká ẹjwọ ọtụka-ọtụka ọlẹ kị ya tụ ọnụ nya ụgbẹyị nya iworu ọọwa ku rị hyọọ dụwa dodo. 3Ma, ụka kị jụ ka ẹpwụ nya iworu ọọwa lẹ, ị́ yẹ ogu nya Ọngọlahị iJisọsị ụ-ụwa kpong-kpong ka. 4Ịnyị, ụka ká anyang ịwẹ chị bwuu, gbu oje-oje, godayị rịrị ụ-ụwa chịng lẹ, ị chẹhị kaka yẹ alẹng angị imiiye ịhyẹ la ọ-mwaa i-ijata nyaa lẹlẹ. Angịịwa kụrụ ụma nya ịwụrụ ịlẹ kị juwa hụ́ myịrị-myịrị nya ịlẹhị-ịlẹhị. 5Ịnyị, ụka ká ejiri wu anyang ịwẹ bala uhi o-juwa jwaa lụmẹ, kị juwa ya ahị nyaa cheji lẹ, alẹng ịịwa a ya ẹla taa yẹkẹẹ, “Ịịyẹ a tị́ du kanụ jam tịtọ nya ọngọ hịhị ẹ-ẹpwụ nya angị gbugbu iliworu? 6IJisọsị á jam ẹ-ẹgẹlẹ kaka. Chajị, ọ wuleji bwula igu lẹ! Anụ kpịtịya mẹ! IJisọsị ayịdang ya jenu ịnyị i-ịGalili lụka kọ juwa la ọhịhị wẹẹ. 7Jaabwọ kọ byinu yẹkẹẹ, ụka nyị juwa warị kịị nyị ka pịrị ọwa Ọnyị nya ọngịnyị ehe ha ka ụbwọ nya alọhọbịrị pyii. Nyị ka gu ọwa iloo ba okoji. Ma, ọwa nyị tị ka wuleji la ẹnụtụrụ ọhata, myịmyị juwa hịhị pyii.”
8Ọọwa lẹ, anyang ịwẹ a kpịtịya nya ẹla oyaya nya iJisọsị ọọwa ịnyịlẹhị lẹlẹ. 9Ụka ká anyang ịwẹ nya tịrẹkpẹ bwu iworu kele ka epweji lẹ, ị tịrọnụ nya ẹlẹwẹ wuu, ya je angịjụgbẹyị nya iJisọsị angị iwo kụrụ ookpokpo bala angịnyị nya Ohe ihihi ịkịla wuu lẹlẹ. 10IMeri ọla ịMagịdala bala iJowana bala iMeri ịnịna nya iJemsi bala anyang ịkịla a ri angịlẹ kị tịrọnụ nya ẹla ọọwa ya je alẹrụ ọnyịịla nya iJisọsị ịwẹ lẹ. 11Ma, ụka ká alẹrụ ọnyịịla nya iJisọsị ịịwa wo ọnụ-ẹla ọtịrị-tịrị nya anyang ịwẹ lẹ, ọ laa lala ọnọọkịla lẹ, ịwa ayịdang á myị yẹkẹẹ, ẹla ọọwa nyị ri ịnyịlẹhị ka. 12Ụka ọọwa, iPita hu ang lụnyẹ-lụnyẹ kele ka iworu. Ọ chẹhị kpẹẹ kele ka iworu ọọwa. Ma, ọ́ tị yẹ ịngịngịhyẹ ụ-ụwa dala ịpwụ i-ju ogu eji kaka. Ọọwa lẹ, ọ lọọ ahịbwuu lụmẹ kaka kpoye lẹ, ọ rụ tịrẹkpẹ ka ẹpwa lẹlẹ.
IJisọsị Chị Ịlọmwụ Ehe Ụ-ụgbẹyị nya Ẹmayọsị
(ịMakị 16:12-13)
13La ẹnụtụrụ ọọwa-ọọwa, angị imiiye lẹpwarịrị nya angịjụgbẹyị nya iJisọsị ịhyẹ juwa jẹ ka epweji ochiche ọhẹ ọlẹ kị wụrụ Ẹmayọsị. Ẹmayọsị ọwẹ la ịmayịlị irwiye bwu iJerusalẹm. 14Angịịwa juwa kpa oja chajị nya ịngịịlẹ, kị họ wuu ẹ-ẹga nya iJisọsị ja ịnyịnyịịnyị ụ-ụgbẹyị. 15Ụka ká angịwẹ juwa kpa ẹla ọọwa ya da ọnụ wẹ awụlẹ ịnyịnyịịnyị lẹ, iJisọsị ayịdang a kele, juwa bajẹ taa ụ-ụgbẹyị ọọwa ịnyịnyị lẹlẹ. 16Ma, ụka kị yẹ iJisọsị lẹ, ị́ jẹ́ ká iJisọsị ayịdang a wẹ kpong-kpong ka. 17Ọọwa lẹ, iJisọsị a taa wo yẹkẹẹ, “Ụma nya oja ọlanyị, anụ tị́ wẹẹ ja ta awụlẹ ịịwẹ ịnyịnyịịnyị ụ-ụgbẹyị mẹ?” Ịnyị, ụka kị wo ẹla ọọwa lẹ, ị godayị chịng, juwa bwọ ayiiji nya ịlẹhị-ịlẹhị lẹlẹ. 18Ọọwa lẹ, ọngọhẹ nyaa ọlẹ kị wụrụ iKilopasị a wẹ byoo yẹkẹẹ, “Ayịbahị, ahụ ụbwọng a ri ọngga ám i-iJerusalẹm ọlẹ, du ká jẹ́ iru nya ang ịlẹ kị họ ụ-ụwa kpangjẹ kpong-kpong ka lẹ?”
19IJisọsị wẹ byaa yẹkẹẹ, “Ịịyẹ a tị́ ri ang ịịwa ene?” Angịwẹ wẹ byoo yẹkẹẹ, “Ẹla ọọwa ri chajị nya ọlẹng ọhẹ ọlẹ kị wụrụ iJisọsị ọla ịNasareti. Ọwa ayịdang ri ọlọmwụ nya Ohe Oluhye ọlẹ ká Ohe Oluhye ayịdang bala angịnyị ehe jọ́ọ lala ọngọlẹ ká ụkụrwọ ẹbyẹbyị ọhọhọ nyamwụ bala ẹla oyaya nyamwụ wuu la ọngịrị lụmẹ kaka kpoye. 20Ọọwa lẹ, alegbeju nya angịkiliya nya Ohe Oluhye bala alegbeju nya ịkọtụ ọtụka ọgụgụ nyahị ahị ala iJuu wuu a wọọ kpa kele kaka ju alegbeju ileje nya ala iRom ụ-ụbwọ lẹ, ị ya eje nya igu wọọ lẹ, ị kpọọ kele kaka gu iloo ba okoji lẹlẹ. 21Ma, ịnọ, ọwa ayịdang ahị wuu a la ẹhị ọrịrịị-rịrị gbe yẹkẹẹ, ọwa, Ohe Oluhye a du warị nyọka chịhị ahị ala Isirẹlụ wuu da lẹlẹ. Ịịwẹ, ala ịịwa a la lẹlẹ. Alẹ a dọmwụ ri ẹnụtụrụ ọhata nyọlẹ kị nwọọ wẹẹ lẹ. 22Ọgụgụ wuu ri ẹla ọlahịbwuu ọlẹ ká anyang ịhyẹ ịlẹpwụ nyahị warị kaka ya jehi. Anyang ịịwa chahị la ụtụrụ gbegbegbe kele ka iworu nya iJisọsị ọọwa. 23Ọọwa lẹ, ị yẹ ogu nyamwụ ụ-ụwa kaka lẹlẹ. Ịnyị, ị tịrẹkpẹ warị kaka ya jehi yẹkẹẹ, ịwa nyị dọmwụ yẹ alegu-ẹrụ nya Ohe Oluhye ịhyẹ a-arụrụ ụ-ụwa lẹ, nyị byi ịwa yẹkẹẹ, iJisọsị ọọwa nyị wuleji bwula igu juwa hịhị lẹ. 24Ụka ọọwa, angịhyẹ lẹpwụ nyahị kele ka iworu ọọwa lẹta nya ịlaa lẹ, ị yẹ ang wuu jaabwọ ká anyang ịwẹ ya ịnyịlẹhị. Ma, ịwa ayịdang á tị yẹ iJisọsị ẹ-ẹhị la ịlaa ka.”
25Ịnyị, iJisọsị a wẹ byaa yẹkẹẹ, “Anụ chakpa chị́ uchi bala ọ-la ọkịlẹtụ ọdịyọ-dịyọ lụmẹ. Ịnyị a du kanụ myị yẹkẹẹ, ala ịlẹ wuu ká alọmwụ nya Ohe Oluhye inyogo nyị ya, nyị́ ka họ jịra myị́ kpong-kpong ka lẹ. 26Ánụ́ jẹ́ kpong-kpong yẹkẹẹ, nyị baba ká ịKịrayịsị ọlẹ ká Ohe Oluhye nyị du warị nyị ka yẹ akama ịnyị, ene kịị nyị ka jụ ka ẹpwụ nya ogbo nyamwụ kpong-kpong ka?” 27Ịnyị lẹ, iJisọsị a juwa dọmwụ nya ọ-da ẹla nya Ohe Oluhye wụlẹ ya je angịwẹ rụ́ ịlọmwụ bwu ụka nya iMosisi gbee ju ka ụka nya alọmwụ nya Ohe Oluhye inyogo wuu lẹlẹ.
28Ọọwa lẹ, ị jẹ gbee kị ju epweji ọlẹ kị juwa jẹ ka, chwẹẹ lẹlẹ. Ma, iJisọsị tị họ lala ọwa nyaa juwa ka jẹ kpoye nya epweji ọọwa. 29Ma, angịịwa bịlẹ nya ịlẹhị-ịlẹhị byoo yẹkẹẹ, “Ayịbahị chuchuu, kẹwẹ kaka hyehe obyi tahị alẹ chẹẹ mẹ! Chajị obyi juwa hi lụmẹ lẹ!” Ọọwa lẹ, iJisọsị a yegiri baa kele lẹlẹ. 30Ụka kị hụhụ i-itebwuru nya ang oriri, ọ hu ịkaa lẹ, ọ ji Ohe Oluhye obe u-uhye nyamwụ lẹ, ọ gwoo ene haa lẹlẹ. 31Ọọwa lẹ, ahị nyaa a wụrụ hwoo lẹ, ị jẹ́ iJisọsị ogu datị ụ-ụwa lẹlẹ. Ọọwa lẹ, iJisọsị ayịdang a byi yịra-yịra ị-ịlahị nyaa wuu lẹlẹ. 32Ịnyị, ị juwa byi awụlẹ yẹkẹẹ, “Ịnọọ! Ya ịnyị, kam myị. Ụka ọlẹ kọ lẹẹ da etu nya ala ịlẹpwụ nya Ụpwụ Ịgọgọ wụlẹ ya jehi igbinọ lẹ, ọ chakpa gum chọọchọọ la ọngịrị-ọngịrị ẹ-ẹpwụ ọkịlẹtụ lụmẹ.”
33Ọọwa lẹ, ị wuleji, yegiri tịrẹkpẹ rụ kele ka iJerusalẹm lẹlẹ. Ụka kị pwụ ụwa, ị yẹ angịjụgbẹyị angị iwo kụrụ ookpokpo bala angịkịla ịhyẹ ịlẹ kị juwa taa. 34Angị ịkịla ịịwa byi angị nya bwu Ẹmayọsị ịwẹ yẹkẹẹ, “Ọngọlahị wuleji bwula igu ịnyịlẹhị lẹ! Chajị, ọ mẹ ịlọmwụ jẹ ịSayịmọn lẹ!”
35Ọọwa lẹ, angị imiiye ịlẹ kị nya bwu epweji nya Ẹmayọsịị a tịrọnụ ya jaa wuu jaabwọ ká iJisọsị mẹ ịlọmwụ jáa ụ-ụgbẹyị kị jọ́ọ ogu datị ka, gbee ká Ọngọlahị iJisọsị gu ịkaa ene haa ri kpá ene lẹlẹ.
IJisọsị Chị Ịlọmwụ Ehe Mẹjẹ angịjụgbẹyị nyamwụ
(ịMatiyu 28:16-20; ịMakị 16:14-18; ịJọn 20:19-23; Ụkụrwọ nya Alẹrụ 1:6-8)
36Ịnyị, ụka ọlẹ ká angịjụgbẹyị nya iJisọsị ịwẹ juwa kpa ẹla ọọwa ọ-ọnụ ya wẹẹ lẹ, iJisọsị ayịdang a hi ehe ẹ-ẹpwarịrị nyaa gẹgịlẹgẹ lẹlẹ.
37Ma, ụka ọọwa, ejiri juwa waa, ị juwa juhi nya ịlẹhị-ịlẹhị ịnyịnyị. Chajị, ị me irya yẹkẹẹ, ebyabwọ nyaa wẹ kịịwa nyị wẹẹ wu lẹ. 38Ọọwa lẹ, iJisọsị a byaa yẹkẹẹ, “Ịịyẹ a tị́ du kanụ juwa gu ugbodu ene? Ịịyẹ a tị́ du kanụ juwa da ịwẹẹ ẹ-ẹpwụ ọkịlẹtụ nyanụ u-uhye nya ang ịlẹ kị họ jịra i-ijata nyanụ kpong-kpong? 39Anụ yẹ abwọ nyam bala ata nyam wẹ mẹ. Kanụ jẹ́ yẹkẹẹ, am ayịdang kpangga nyaa lẹẹ lẹ mẹ! Anụ dọmwụ kẹwẹ kaka yụbwọ nyanụ gum mẹ. Chajị olegu ọlẹ kị kaa wu ebyabwọ nyamwụ lẹ, ọ́ kaa ju ugbinyịrọ bala ukpunogu jaabwọ kanụ yẹ kaam ayịdang ju lẹẹ kpong-kpong ka.”
40Ụka ká iJisọsị ya ẹlẹwẹ jaa kpá wuu lẹ, ọ mẹ abwọ bala ata nyamwụ jẹ angịjụgbẹyị nyamwụ ụ-ụwa lẹlẹ. 41Ụka ọọwa, angịjụgbẹyị nyamwụ juwa chị ọkẹkẹnị ọtụka-ọtụka. Ma, jaabwọ kọ tị laa ẹbyẹbyị lụmẹ lẹ, ị juwa da ịwẹẹ wẹẹ. Ọọwa lẹ, iJisọsị a byaa yẹkẹẹ, “Anụ la ang oriri ọhẹ jam ẹ-ẹgẹlẹ kpong-kpong?” 42Ọọwa lẹ, ị kele kaka kpa iyenyi ọlẹ kị kpụ́kpụ kịla iJisọsị lẹ, 43ọ ye ri ị-ịlahị nya angịjụgbẹyị nyamwụ wuu lẹlẹ.
44Ọọwa lẹ, iJisọsị a juwa kpaa ịtịya nya ang ọmẹjẹ nyamwụ lẹ, ọ byaa yẹkẹẹ, “M tị́ ya ala ịlẹ wuu dodehe jenu ene-ene, lụka kam jam tanụ yẹkẹẹ, ang myị́ ang ịlẹ wuu kị da ẹ-ẹpwụ nya Ụpwụ Ịgọgọ bwu ụka nya iMosisi bala alọmwụ inyogo nya Ohe Oluhye wuu bala ịlẹ kị da ụ-ụpwụ nya Eje Ọnyịịla nya iDevidi ka họ jịra wuu pyii.”
45Ọọwa lẹ, iJisọsị a wụrụ irya nya ọ-jẹ́ myịmyị ha angịjụgbẹyị nyamwụ ụ-ụwa, chajị kị ka kpa jẹ́ etu nya ala ịlẹ kị da wuu ẹ-ẹpwụ nya Ụpwụ Ịgọgọ lẹlẹ. 46Ịnyị, ọ byaa yẹkẹẹ, “Ẹla ọlẹ kị da ụ-Ụpwụ Ịgọgọ ene-ene tị́ yẹkẹẹ, nyị baba ká ịKịrayịsị ọọwa nyị ka yẹ akama pyii. Ma, ụka kịị nyị́ gbu kpá, nyị tị ka wuleji bwula igu la ẹnụtụrụ ọhata juwa hịhị myịmyị. 47Ọọwa lẹ, angịjụgbẹyị nya ịKịrayịsị a ka kpa ẹnyị nyamwụ ya ẹrụ ọnyịịla pyẹ, chajị nya irya ọyẹda nya angịnyị ehe bala ọhịnyọhi ịhọbịrị o-bwu ẹga nya Ohe Oluhye je alepwoja myị́ epwoja wuu pyii lẹlẹ. Ị ka dọmwụ nya ẹla nya Ohe Oluhye ọọwa oyaya bwu iJerusalẹm.” 48Ịnyị, iJisọsị a byaa yẹkẹẹ, “Lẹ, anụ angịjụgbẹyị nyam ịlẹ a ri alibeenu nya ang ịlẹ wuu lẹlẹ. 49Ma, anụ wo mẹ. M juwa ka ya Olegu Ịgọgọ nya Ohe Oluhye Adam ọlẹ kọ myị ọnụ du wanụ. Ma, anụ́-ụ hụ e-epweji nya iJerusalẹm ọlẹ pyii, gbee pwụ ụka ọlẹ ká Ohe Oluhye ka ya ọngịrị ọọwa du bwu epwoohe kaka chị kụrụụnụ ene mẹ.”
IJisọsị Rụ Ka Epwoohe Lahị-lahị
(ịMakị 16:19-20; Ụkụrwọ nya Alẹrụ 1:9-11)
50Ịnyị, iJisọsị a kpa angịjụgbẹyị nyamwụ rụ kpehe ba ịlọmwụ jẹ gbee kị pwụ epweji nya ịBẹtanị lẹ, ọ pyẹ abwọ nyamwụ dẹẹlẹẹ, juwa wahị kụrwaa ụ-ụwa lẹlẹ. 51Ụka kọ juwa kpa ahị ọọwa wa kụrwaa wẹẹ lẹ, ọ juwa yegiri rụ ka uhye-ọgba lahị-lahị hi aa, gbee kị ye Ọngọlahị iJisọsị kpa rụ kele ka epwoohe tịrẹm lẹlẹ. 52Ọọwa lẹ, angịjụgbẹyị nya iJisọsị a gbịgba họọ ụ-ụwa kpá lẹ, ị rụ bwu ụwa kele ka epweji nya iJerusalẹm, juwa chị ọkẹkẹnị ọtụka-ọtụka lẹlẹ. 53Ụka ọọwa, ị juwa kaa kele ka ube ịgọgọ ọtụka nya Ohe Oluhye nya ala iJuu, kaka gwogbo ha Ohe Oluhye ụ-ụwa ịnyịnyịịnyị lẹlẹ.
હાલમાં પસંદ કરેલ:
ILUKU 24: IBNO
Highlight
શેર કરો
નકલ કરો
Want to have your highlights saved across all your devices? Sign up or sign in
Igede Bible © The Bible Society of Nigeria, 2019.
