OHÚTU 7
7
Éŋkpɔ̄ nɛ̄hi le ɛcɛ yíífi
1Anɔ́ɔ Óndú ā da Unówa kahíníī, “Nyɔ̄ ipú ɔwū ā, awɔ mɛ́mla aíkonó kú ɔlɛ́ uwɔ. Ohígbū ka n le má ka awɔ ōfōōfū uwɔ wɛ ɔ̄cɛ nōo gē yá ɔdā nōo lɛ kpaakpa ipú odúúdú ɛcɛ ipéyī um eko nyā á. 2Lɛ ígwu kú aɛ́bɛ́ nēe le yēŋēē ā ɛpɛɛpa ɔbá mɛ́mla ɔnyā ɛga ahāapa kpó. Amáŋ a géē kpó ɔbá mɛ́mla ɔnyā ígwu ékpónú kú aɛ́bɛ́ nēé le yēŋēē ŋ́ mā ā. 3A kē ī kpó ígwu ɛpɛɛpa ɛga ahāapa kú aígbáanɔ, ɔbá mɛ́mla ɔnyā cɛ́ɛ́ kú ɛdɔ kú uwā kóō yēeyī ipú ɛcɛ ā kpɔ́. 4Ohígbū ka ɔmahāapa ŋmá ícɛ, n géē tū ɔwɔ ɛhɔ̄ gaá yā klá ɛcɛ. Ó ī yā ɛ̄cī ofɛpa, kwu otú mɛ́mla ɛnɔ. Ɔdā oyēeyī dóódu nɛ̄ n yá ā, kē géē je kpó yíífi ŋmá ipú ɛcɛ.” 5Unówa lɛ ɔdā dóódu nɛ̄ Ɔwɔicō da ɔ́ ā kpó yá.
6Unówa wɛ iháyí úlā ce ofigwó (600) eko nɛ̄ éŋkpɔ̄ nɛ̄hi ā cēenyi klá ɛcɛ ā. 7#Umát 24.38,39; Ulúk 17.27Unówa mɛ́mla ayí nū, mɛ́mla ɔnyā nū, mɛ́mla anyā ayí nū le pɛ́ ga ipú ɔwú ā, cɛ́ɛ́ kéē lɛ pɛ́ kwu ŋmá ipú ífi kú éŋkpɔ̄ o cēenyi nɛ̄hi ā. 8Anú mɛ́mla ɔbá mɛ́mla ɔnyā kú ɛdɔ ɛyɛ́ɛyɛ́yí kú aɛ́bɛ́ mɛ́mla aígbáanɔ nēe le yēŋēē mɛ́mla aɛ́nɛ̄ é le yēŋēē ŋ́ le pɛ́ ga ipú úgbéenyi á. 9Aɛ́bɛ́ ā ɛpɛɛpa, ɔbá mɛ́mla ɔnyā, le pɛ́ tá ipú úgbéenyi ā mɛ́mla Unówa, ɛ́gɛ́nɛ̄ Ɔwɔicō je ɔ́da lɛ ɔ́ ā. 10Anɔ́ɔ ɛ̄cī ɔ́mahāapa igbīhi ɛ̄nyā ā, éŋkpɔ̄ nɛ̄hi ā le cēnyi klá ɛcɛ á.
11 #
2 Upít 3.6
Eko nɛ̄ Unówa wɛ iháyí úlā ce ofigwó ā. Ipú ɛ̄cī igwáahāapa kú ɔyā ɛpa kú iháyí ɔ́ɔmā, enyi gbɔɔ́ ō ca klɛ́ɛcɛ ŋmá ɛbɛɛbɛ. Ɔkpáncō kē le nwūla ka ɔwɔ kóō yā 12Anɔ́ɔ ɔwɔ pɛ́ wāajɛ ŋmá ɔkpáncō tū ipú ɛcɛ bɛ̄ɛka ɔdā nēé nwūla ɔwɛ lɛ ɔ́ ā jāā gbō ɛ̄cī ofɛpa, kwu otú kwu ɛnɔ. 13Ɛ̄cī ɔ́ɔmā piíí ā, Unówa mla ɔnyā nū le pɛ́ tá ipú úgbéenyi ā, mla ayípɛ̄ ɔlɛ́ nū ɛtá ā, Ussɛ́m, Uhám, Ujáfɛ̄ti, mla anyā ūwā. 14Ɛdɔ kú aɛ́bɛ́ ɛyɛ́ɛyɛ́yí dóódu, ɛbɛ́ nēe yēeyī ā, ɛbɛ́ ɔlɛ́ mla ɛbɛ́ ipú ácí, ɛnɛ̄hi mla ɛnɛŋcɛ́, mɛ́mla ɛdɔ kú aígbáanɔ dóódu le pɛ́ ga ipú úgbéenyi mla Unówa. 15Ɔbá mla ɔnyā kú ɛdɔ kú ɛbɛ́ éyééye le pɛ́ tá ipú úgbéenyi ā mla Unówa. 16É kē pɛ́ ga ipú úgbéenyi ā ɔbá mla ɔnyā ɛ́gɛ́nɛ̄ Ɔwɔicō da Unówa ā. Anɔ́ɔ Ɔwɔicō lɛ ɔwɛ kú ɔwú ā gwū á.
17Éŋkpɔ̄ ā cēenyi ɛ̄cī ofɛpa, anɔ́ɔ éŋkpɔ̄ ā le nwuné nɛ̄hi, cɛ̄ lɛ úgbéenyi ā kóō má ceyī nū á. 18Éŋkpɔ̄ ā le ipú tū ɔ̄ fíyɛ́, anɔ́ɔ ɔwú ā ce eyī nū dēē á. 19Anɔ́ɔ éŋkpɔ̄ ā cēenyi jāā gbéeko nōó kwú aɛ́fu nɛ̄hi fíyɛ́ dúú, nēe bá ipú ɛcɛ ā í kpó mule á. 20Ó lɛ ipú, kwú aɛ́fu ā í mulɛ bɛ̄ɛka ikpó ofucɛhɔ̄ ā. 21Alɛɛcɛ dúúdú mɛ́mla aɛ́bɛ́, mɛ́mla aígbáanɔ mɛ́mla odúúdú aɔ́dā ō yēeyī nōo kē yɔ̄ ɛcɛ ā le pɛ́ gekwú. 22Ɔdā dóódu nōo yɔ̄ ajɛ, nōo gē fu owu kú oyēeyī ā le pɛ́ gekwú. 23Óndú ā le ɔ̄dā dóodu nēe yēeyī ā kpó yíífi ŋmá ipú kú ɛcɛ. Kwu alɛɛcɛ mɛ́mla aɛ́bɛ́ mɛ́mla aɔ́dā ō piyajɛ mɛ́mla aígbáanɔ nōo ī wu icō ā. Unówa ōfōōfūnū mɛ́mla ācɛ nēe bá mɛ́mla anú ipú úgbéenyi ā hile á. 24Éŋkpɔ̄ ā í tú wāajɛ ŋ́ jāā ɛ̄cī ofahāapa ce igwó.
હાલમાં પસંદ કરેલ:
OHÚTU 7: IFBCL
Highlight
શેર કરો
નકલ કરો
Want to have your highlights saved across all your devices? Sign up or sign in