Baɗitari 26
26
Ishaku Ku Thlandər Aka Abimelek
1Tsuwa akwa saka ndaga mi laga ku təri akwa tsəɗi nda, zum ka mi na hara akwa sakar Ibrahim. Antə Ishaku ku təra mwari ahar Gerar adzə Abimelek na kuthlir Filistiya. 2Antə MTHLAKU ku ncantə kərni aka Ishaku ka pəla alari, “Ga aɗiya ləghəi akwa Masar wa, amma ka gə ra ndzəndzi akwa tsəɗi tə I ata pəla ala ga. 3Ndzi tsu akwa tsəɗi ngəni katagu, tsuwa I ata ndzi adzə nga, kəi vədza ala gə barka. Kamnyar I ata hamta shanga tsəɗiyayeri ngəni ala gə ka kəkayeri ar nga, kəi nghyaɓəla alkawal tə I kətə ka kahyel aka baba' nga Ibrahim. 4I ata hara ka kəkayeri ar ngə sə ndzi hang apa sasəlkayeri na amtazi, kəi hamta ala ɗa shanga tsəɗiyayeri ngəni. Tsuwa atar kəkayeri ar nga, antə shanga mjir duniya ata wutə barka. 5I ata hara ala ga apani kamnyar tə Ibrahim na baba' nga ku nu su tə I pəla alari, ka shanga suayeri tə I bara ka tsa hara, ka shanga tsawayeri arna.”
6Apani antə Ishaku ku ndzəndzi akwa Gerar. 7Sakatə mjir Gerar yu ni ata kəra Rubeka na mwalankiɗa abbər, “Ngəni mwalankiri Ya?” Antə tsa pəla ala ɗa, “Awa, tsa ngkwarma'na.” Kamnyar tə tsa akwa thlivər pəla abbər, “Tsa mwalankiya.” Kamnyar tsa akwa dzama abbər nuhum mjir di ni asə tsi ni kamnyar Rubeka, təng tə ɓzərngkwa ni dakwi tə mda abara ka wula ni. 8Sakatə Ishaku ku ɗarndzi anda. Antə vir laga Abimelek na kuthlir Filistiya ku haɓəla kəmari akwa windau, ka wutə Ishaku akwa gyali ka fəfahə Rubeka. 9Antə Abimelek kəga Ishaku ka pəla alari, “Azha ngkwa ni mwalankiri kwang! Kaha, kamnyar mi tə gə pəla abbər tsa ngkwarma' ngə nə ri?” Antə Ishaku pəla alari, “I akwa dzama abbər ma I aɗi hara apani wa nuhum I asə mta kamnyar ni.”
10Antə Abimelek ku pəla, “Ngəni man su tə gə hara ala yeru nə ri? Ai, ata ndzi kasəla ka mdə laga akwa nca mjirna ni pi ka mwalankiri ni. Tsuwa ma su apani an hara sakani ga ku ndəkərəngkər ala yeru biku.” 11Antə Abimelek ku mnya aka shanga mji abbər, “Kəlara mdə na ku tsəkwar mdə ngəni, wala mwalarni, mda ata tsi ni.”
12Antə Ishaku ku thləka akwa tsəɗi nda, ka wutə sur fakəu hang ka duna tsu məva nda. MTHLAKU ku vədza alari barka, 13antə tsa ku ndzi mdər gəna. Shanga surni ku ləkəma ka jakjaka har tə tsa ndzi mdə na ka gəna hang ka duna. 14Tsa ka bəriyayeri hang ar təma ka thla, ka mjir kutakəyirni dlama dlama, har tə mjir Filistiya ni ləkwa səlkər ni. 15Akwa saka ndaga tsuwa, mjir Filistiya ku shiktə shanga jiɓayeri natə buɗayeri ar Ibrahim lamta sakatə baba'ni Ibrahim tsu ka mpikə ni.
16Antə Abimelek pəla aka Ishaku, “Təra kazhar ala yeru tsəɗiyir yeru, kamnyar gə ka duna swaiswai ta yeru.”
17Antə Ishaku ku zhar vəi nda, ka mwari akwa mular Gerar ka fəli anda. 18Antə Ishaku jaktə fwaɓəla kuta jiɓayeri natə mdə la tsu akwa zamanər baba'ni Ibrahim, kamnyar tə mjir Filistiya ku shiktə ɗa aghəla mtər Ibrahim. Antə Ishaku jaktə vətə thləma jiɓayeri ni, tsu thləmayeri tə baba'ni vəta aka jiɓayeri antə tsa jaktə kəga ɗa kəgari. 19Amma sakatə buɗayeri ar Ishaku ku lamta jiɓə laga akwa mular ni, ka tsangkər aka yimi akwa hwi, 20antə mjir ɓəla na ahar Gerar ka mjir ɓəla na ar Ishaku ku nthləi beɗi ata kəra jiɓə ni akwa pəla abbər yimi ni arɗa. Antə Ishaku kəga thləma jiɓə ni Esek, kamnyar tə da ku beɗi ka tsa ata kər. 21Antə buɗayeri ar Ishaku ni jaktə lamta jiɓə damwa, antə beɗi jaktə thlata ata kər tsuwa. Antə Ishaku kəga thləma jiɓə ni Sitna, watau dawakur. 22Antə tsa sharardzi raka kazhar vəi nda ka lamta jiɓə damwa. Amma da aɗi beɗi ata kəra ngəni wa, antə tsa kəga thləma jiɓə ngəni Rehoboth, watau “bəbal na bau”, kamnyar tsa pəla, “Kulini MTHLAKU ku na ala yeru bəbal na ata mzhi yeru, antə yeru ata yatədzi akwa tsəɗi ni.”
23Aghəla tə tsa thlata anda antə tsa mwari ahar Beyersheba. 24Antə MTHLAKU ku ncantə kərni alari tsu vir nda aviri, ka pəla alari, “I an Hyelər baba' nga Ibrahim. Antə ga aɗiya thlivər wa, kamnyar I ata vəi duku ka ga. I ata vədzə barka ala ga, kəi hara ka kəkayeri ar ngə yatədzi hang, kamnyar buɗarna Ibrahim.” 25Antə Ishaku ku namtə bagaɗi ar hamta saɗaka anda, ka kəga thləma MTHLAKU akwa vəngkər səli. Anda tsuwa antə tsa nci tentərni. Tsuwa tsu anda antə buɗayeri arni jaktə lamta jiɓa damwa.
Ishaku Ka Abimelek Ku Hara Mnya Duku
26Aghəla nda antə Abimelek, ka Ahuzzath na mdər hamta alari sauri, ka Fikol na olər sojayeri arni, ku thlata ahar Gerar, ka mwari adzə Ishaku. 27Antə Ishaku pəla ala ɗa abbər, “Kamnyar mi tə giri si adzə ra kulini ri, təng tə giri aɗi akwa hir ra wa, har tə giri ku kədləmta ra kazhar tsəɗiyir giri?” 28Antə da pəla alari abbər, “Kulini yeru ku nggaɓəla ata bəbal abbər MTHLAKU ata vəi duku ka ga. An su na hara tə yeru pəla abbər kalkal ka mburu mnya duku, ka mburu mbwi alkawal akwa daɓwa mburu kəga ga, 29abbər ga aɗi ata hara su na ata dəkəi yeru wa, tsu apatə yeru aɗi hara su na ku dəkəi ngə wa. Tədəku yeru akwa hara ɓɗakkur ala ga, har ka vədza aka sakatə mburu ndəka akwa msərakur. Antə kulini MTHLAKU ku vədza ala gə barka.” 30Apani antə Ishaku ku ɗəmha ala ɗa susəmər kucali, antə da ku səma ka sa. 31Səɓəla ɗəpari antə da thlatə ɗəɗəpə mbing, ka mbwi alkawal na ka kahyel akwa daɓwa ɗa. Antə Ishaku ku pwarɓəla ɗa, antə da ndəkəmtadzi ka msərakur ka təra.
32Tsuwa tsu vir nda antə buɗayeri ar Ishaku si ka pəla alari ata kəra jiɓə tə da la ni abbər da ku wutə yimi. 33Antə tsa kəga thləma jiɓə ni Sheba. An su na hara tə har ba ashina thləma di ni Beyersheba.
34Sakatə Isuwa ku hara məva nfwarkumari, antə tsa kəl Yudith na ngkwar Beyeri, na mdər Hitti, ka jaktə kəl Basemath na ngkwar Elon na mdər Hitti. 35Antə mwanki ngəni ku səntə ɗəffə ɓzəɓza aka Ishaku ka Rubeka.
હાલમાં પસંદ કરેલ:
Baɗitari 26: KNB
Highlight
શેર કરો
નકલ કરો
Want to have your highlights saved across all your devices? Sign up or sign in
KAKAƊU NA ƁƊAKKARKARA © Typeset by the CAP Division of the Bible Society of Nigeria, 2014.