1. Mose 21
21
Isaak woat jebuaren
1Un de Har dreid sikj no Sara, aus hee jesajcht haud, un de Har deed Sara, aus hee jerät haud. 2Un Sara wort schwanga un jebua däm Abraham eenen Sän en sienem Ella, to bestemde Tiet, von dee Gott am jesajcht haud. 3Un Abraham jeef sienem Sän, dee am jebuaren wort, däm Sara am jebua, däm Nomen Isaak. 4Un Abraham beschneet sienen Sän aus hee acht Doag oolt wia, aus Gott am befoolen haud. 5Un Abraham wia 100 Joa oolt, aus am sien Sän Isaak jebuaren wort. 6Un Sara säd: Gott haft mie een Lache reedjemoakt; jiedra, dee daut hieet, woat met mie lachen. 7Un see säd: Wäa haud Abraham jesajcht: Sara jeft äare Säns Brost! Dan ekj ha am eenen Sän jebuaren en sienem Ella.
Hagar un Ismael motten wajchgonen
8Un daut Kjint woss un wort aufjewant; un Abraham muak een grootet Mol aun däm Dach, doa Isaak aufjewant wort.
9Un Sara sach Hagar äarem Sän, de Ägipterin, däm see Abraham jebuaren haud, spottend. 10Un see säd to Abraham: Joag dise Deenstmejal un äarem Sän wajch; dan de Sän von de Deenstmejal saul nich oawen met mienem Sän, met Isaak! 11Un de Sach wia sea Iebel en Abraham siene Uagen om sienem Sän sien wellen. 12Oba Gott säd to Abraham: Lot daut nich iebel sennen en diene Uagen wäajen däm Jung un wäajen diene Deenstmejal; waut emma Sara to die sajcht, hia opp äare Stemm; dan en Isaak saul die een Somen jenant woaren. 13Doch, uk däm Sän von de Deenstmejal woa ekj to eene Nazion moaken, wiels hee dien Somen es.
14Un Abraham stunt tiedich Zemorjes opp, un hee neem Broot un eenen Schlauch Wota un jeef daut de Hagar, endäm hee daut opp äare Schulren läd; un hee jeef ar däm Jung un leet ar von sikj. Un see jinkj han un errd omhäa enne Wieste von Beerscheba. 15Un aus daut Wota em Schlauch utjinkj, doa leet see daut Kjint unja eenen Struck; 16un see jinkj han un sad sikj jäajenäwa, eenen Boagenschoss wiet, dan see säd: Daut ekj daut stoawen vom Kjint nich see! Un see sad sikj jäajenäwa un hoof äare Stemm un hield. 17Un Gott hieed de Stemm vom Jung. Un de Enjel Gottes roopt de Hagar vom Himmel too un säd to ar: Waut es die, Hagar? Forcht die nich! Dan Gott haft oppe Stemm vom Jung jehieet, doa, wua hee es; 18Kjikj opp, nemm däm Jung un fot am aune Haunt, dan ekj well am to eene groote Nazion moaken. 19Un Gott muak ar de Uagen op, un see sach eenen Wotaborm; un see jinkj han un feld däm Schlauch met Wota un drenkjt däm Jung. 20Un Gott wia met däm Jung, un hee woss heraun; un hee wond enne Wieste un wort een Boagenjäaja. 21Un hee wond enne Wieste Paran, un siene Mutta neem am eene Fru ut däm Ägiptenlaunt.
Abraham schloot eenen Bunt met Abimelech
22Un daut passieed to dee selje Tiet, doa räd Abimelech un Pikol, sien Häabowaschta, too Abraham un säd: Gott es met die en aulem, waut du deist. 23Soo schwia mie hia bie Gott, daut du noch aun mie noch aun mienem Sän noch aun miene Grootkjinja ontru haundlen woascht! No de Jnod, dee ekj die erwiesen ha, saust du aun mie doonen un aun däm Launt, en däm du die opphelst. 24Un Abraham säd: Ekj well schwieren. 25Un Abraham stald Abimelech too Räd wäajen eenen Wotaborm, däm Abimelech siene Kjnajchts met Jewault jenomen hauden. 26Un Abimelech säd: Ekj weet nich, wäa daut jedonen haft; du hast mie daut nich berecht, noch ha ekj doavon jehieet bat vondoag. 27Doa neem Abraham Kjlienvee un Rinda un jeef an Abimelech, un see schlooten beid eenen Bunt. 28Un Abraham stald säwen junge Schop utte Häad oppoat. 29Un Abimelech säd to Abraham: Waut sellen dise säwen junge Schop, dee du oppoat jestalt hast? 30Un hee säd: De säwen junge Schop saust du von miene Haunt aunnämen, doamet daut mie toom Zeichnis es, daut ekj disem Borm jegroft ha. 31Doahäa nant maun disem Uat Beerscheba, wiels see beid doa jeschwuaren ha. 32Soo schlooten see eenen Bunt en Beerscheba. Un Abimelech muak sikj opp un Pikol, sien Häabowaschta, un see jinjen en daut Launt de Filista trigj.
33Un Abraham plaunt eene Tamariske en Beerscheba un roopt doa däm Nomen Gottes, däm eewjen Gott, aun. 34Un Abraham hild sikj eene lange Tiet em Launt de Filista opp.
હાલમાં પસંદ કરેલ:
1. Mose 21: PBJHF
Highlight
શેર કરો
નકલ કરો
Want to have your highlights saved across all your devices? Sign up or sign in
© SW-Radio e.V.