Лукара йибкьыд Шадды Хабар 5
5
ГьӀасас джус хаӀаӀр даъасды мутагьӀлимер адыргара
1Сада ГьӀаса Геннисаретдид уьреде лузур ай илсанашды йыкьӀа ана, джуула тиниъ Аллагьара рухьура ад чӀел илсанашыы ливкьа ваъара. 2ГьӀасас кьӀваб геми къирхыда лузур гьабгура. Балугъмар халкьабише, гемимаа гъаъ йидкьыр, чилбыр силгъара ай. 3Сабыйды гемиди аӀчӀур (гьа Симанды геми виъий), ГьӀасара гьа цӀам къирхыдаа хырыда кал йивигас вылцӀара. Джу араа гъаъ эдемиер хӀар даъара каӀбчӀура. 4Бегьем йишир, рухьура Симанда:
– Йивига геми хырыда кал. Кияъ чилбыр.
5– МагьӀалим, – рухьура Симана, – е вышед йаӀквшир аа сыджыкьӀыр киере ай чилбыр, амма шешин агырдиш. Йидж Ва рухьунахъун, маа киеси.
6Гьааса гьаъара гьабише – хьели халкьара чилбыр тикетке йикисдухъунды балугъмар. 7Мибише ти гемидыы гъад юлдашешихда хылабыр лийир, тимбыр сес ваьара куьмгуьс. Тимбыр йидкьыр, гьабише кьӀваӀбси геми балгъура гьааса ацӀаъара, тимбыр араа саъ китӀесды кал руъумаа. 8Гьа кар гьагуйне, Симан ГьӀасад улихьде кьвакьымыы сибхьура, рухьура:
– Джан Иесси! Изды бейдаа тиниъ йиш! Зак гунаабыр кид и!
9-10Симаныс ки, джухьван гибишис ки – гьабишик Зеведийды духре Якьуб на Янан ки кий – гичӀ йывхӀыр ай мисед балгъуд гъӀырч гьувгуйне.
Амма ГьӀасара рухьура Симанда:
– ГичӀ мываъ! Мидыыла хъуъ ва илсанар ягъмиш даъаси.
11Геми хьидиклаа гъаъ кехъеэпӀир, гьабыр сиене ГьӀасахда хъуна дыхьыри, Гьанийды мутагьӀлимерне.
ГьӀаса на джузанды
12Сада ГьӀаса ай са шегьерди. Джузан йишир, сиене джан йыхӀынмыра ацӀыд са эдеми йиркьыри. ГьӀаса гьагуйне, гьа Минийды улихьде кьвакьымыы сирхьур, рухьура:
– Гьай джан Иесси! Вас йигара йишихьна, Вадаа зас даваа ваъас йикиси! Вадаа зас са чараа!
13Хыл хьуъ гьыъыр, ГьӀаса кийкьара минийк, рухьура:
– Зас йигара! Темиз хъиш!
14Гьааса гьухьур мадана йыхӀымбыр саъ сихъидхьури тинийыыла. ГьӀасара гьанийде «гьалысна ихтилат маъ» рухьура йишидиклаа:
– Рых дибиред бегеде. Гьа вахда гакъыхь. Хьели Мыса-пайгъампарара гьухьуд садакьа вияъ вы хъишидыхъаъ, йидж ки гьа сиенебишис гьагвасна.
15Амма ГьӀасаклаады ихтилатбыр баладире бала руъурай, халкь кӀабал кӀабална вуруъурай Минийихда хъавацус на джухьды ядлымыс даваа ваъас. 16ГьӀаса Выдж кид-кине текды джигима йыхьыр, гьади дугьӀабыр кьыле гьаъарай.
ГьӀасахда йедед эдеми хылаала аъ йихире
17Сада, ГьӀасара хӀар даъара ади, гьанийихда хъадабцудбишик кий фарисейер не Диндид магьӀалимер, Галилеядид не, Иудеядид не Иерусалимдид сиене мукъӀмаады. Гьанийхьван ай едебыр хъадаъади магьӀлим вуруъуд Аллагьад кьуувет.
18Кут-кьутӀ йишир ад са эдеми хана дуруъура Минийхда илсанар. Мибыр чалыш дуруъура аъ хала йыгыр, гьа ГьӀасад улихьде сихьис. 19Амма илсанашды арыдаа хьуъ ГьӀасад халыхда аӀгъӀаӀчӀус джишир, мибише эзерли лаъ къавыы леръир, кӀараметӀ ачых гьыъыр, къаваа саъ ГьӀасад гъилабырмыда силгара кьулаа гъана. 20ГьӀасас мибишды инаамишвалды гьувгуйне, рухьура Гьание эзерлиеде:
– Вак кид гунаабыр вас багъыш гьаъара.
21Диндид магьӀалимеше не фарисейеше йикӀиклаана фикир ваъара: «Ене выдж вышди, гьа чӀелбыр гьухьур, Йинчыы гьӀаси йикис? Гунаабыр Йинчыыла гъайри гьалдаа и багъыш гьаъас руъуд?»
22ГьӀасара, гьабише ваъад фикирдиклаа хабар ана, рухьура гьабишде:
23– Гьис вахӀде гьаасад фикирбыр а? Шыв хьус рагьӀат и: «Гунаабыр багъыш гьаъара» име, «Луза рых?» 24МиссагьӀат ваӀс гьагуси, илсанашды Духарыхда ад кьуувет гунаабыр багъыш гьаъас руъуд накьудыы. – За рухьура вада, – сулкара Гьа кут-кьутӀ йишинийхда, – лаъ луза, лехъеш вы гъад кьул, хъирхьа хала!
25Сиенебишис гьабгура-гьабгура ти гьаади мадана лухъузур, лаӀхъӀаӀшур кьул ки, Йинчихьде шукур ваъара хала сухъулкара. 26Сиенебыр мат дишир гедылгара. ГичӀ йывхӀыр, Йинчихьде шукур ваъара, рухьура гьабише:
– Гъиигъа ес гьӀаджайиб йишири.
ГьӀасара Левийехда джухьван сес ваъара
27ГьӀаса гьадыыла хъуъ хъӀаархӀыри. Гьанийс «Левий» хьур налуг сытӀа гьаъад эдеми гьагури, джуды йера сукьур ад, ГьӀасара рухьура минийде:
– Захда хъуна йыкьа!
28Ти ки, сиене хьуъ хаагъур, руъура Минийхда хъуна.
29Левийе, джуды хала илсанар сес вьъыр, эккед люъун-рагъынбыр гьаъара ГьӀаса бадаана. Мийманашик кий балад кире сытӀа гьаъад на мадды илсанар. 30Фарисейеше не Диндид магьӀалимеше рухьурай, хъӀаӀл беъэре, Гьанийды мутагьӀлимешде:
– Гьис ваӀ кире сытӀа гьаъабишихьван на мадды лак-лукахьван са устӀулахда сыкьӀыр а?
31– Сагъдыбишис диш джерахӀ йигад, едебишис и, – джываб хъывылцӀара ГьӀасара. – 32Зы Йинчыы уджагълиер суьдке даъас йиркьыр ад диш, гунаа кибыр суьдке даъас хьур йиъи.
Сив харкьадикляады ихтилат
33Гьа гедеэне тимбише рухьура Гьанийде:
– ЯхӀйе-пайгъампарад мутагьӀлимер кид-кине сив халкьад на дугьӀабыр гьаъадбыр диъи, фарисейешдыбыр ки, са выдыбыр диъи улере не рагъара ад!
34Амма ГьӀасара рухьура гьабишде:
– ВаӀдаа даватак язна киди йыкьамаъ мийманашде сив хакьас выс йикисиме? 35Амма йыкьаси йыгъ, ваӀдаа язна хӀаӀаӀшур ад, гьа гедеэне, гьа йыгъырма, сив ки хакьаси.
36ГьӀасара гьабишис мисед ихтилат гьаъара:
– ЦӀинды валгыклаа зул куувулкьадиш, «йисдыдис кӀукӀал ваъас» хьур, дишди цӀинды ки чӀир йикиси, йисдыдис ки цӀинды парчидиклаады кӀукӀал кивикасдиш. 37ЦӀинды чахыр аъадиш йисды хирчиди, дишди сур гьаъаси цӀинды чахырара йисды хирче – чахыр ки саъ саӀчӀуси, хирче ки сур йикиси. 38ЦӀинды чахыр цӀинды хирчиди ыъыхь! 39Йисды чахыр рагъыдбишиклаа гьалысна цӀинды чахыр йигара йикисдиш, гьание рухьура: «Йисды йыха и».
હાલમાં પસંદ કરેલ:
Лукара йибкьыд Шадды Хабар 5: RUT
Highlight
શેર કરો
નકલ કરો
Want to have your highlights saved across all your devices? Sign up or sign in
© Библие мадды чӀилмыы хъывгад Институтара, 2004
