Kuyamba 17
17
Kugwatiwa kwakhanda lachimuna, chilatizo chachibvano
1Abhuramu paakhana magole makumi pfemba napfemba (99), Chawuta adabziwonesa kwayiye nkuti, “Ndine Mulungu, Nyamphambvu zentse, teyela njila zangu, khala wakulungama. 2Nin'zachita chibvano changu pakati payine nayiwe, nin'zakuwandisani kwene-kwene.” 3Pamwepo Abhuramu adakotamisa nkhope yake, Mulungu nkuti kwayiye, 4wona, ndikuchita chibvano ichi nayiwe lelo, iwe un'zawa apayi wamishowo mizinji. 5#Alo 4:17Un'zachemelewa lini nadzina lakuti Abhuramu pomwe, koma un'zachemelewa kuti Abhurahamu, pakuti ndaakukuchita apayi wamishowo mizinji. 6Nin'zakupasa wana azinji kwene-kwene, m'badwe wako un'zakhala mishowo mizinji, anango wawo an'zakhala mazimambo.
7 #
Luk 1:55
Nin'zachita chibvano changu pakati payine nayiwe, nakum'badwe un'zabwela pambuyo pako, pakuti nichibvano chin'khala kufika lini nalini. Ine nin'zakhala Mulungu wako mpaka kum'badwe wako wentse um'bwela. 8#Mab 7:5Nakutenepo nin'zakupasa dziko lentse la Kenani, lawukukhala ninga mulendo, nin'zalipeleka kwayiwe nakum'badwe wako un'zabwela. Dziko la Kenani lin'zakhala nthaka yawo kufika lini nalini, pamwepo ine nin'zakhala Mulungu wawo.
9Mulungu adati kwa Abhurahamu, “Iwe pabodzi nam'badwe un'zabwela unfunika kuchengeta chibvano changu nayiwe. 10#Mab 7:8; Alo 4:11Ichi ndicho chibvano changu chawunfunika kuteyeza pakati payine nayiwe nam'badwe wako um'bwela. Mwamuna wentse pakati panu anfunika kuzagwatiwa khanda lachimuna. 11Munfunika kugwatiwa panyama khanda lachimuna, chikhale chilatizo chachibvano changu pakati payine nayimwe. 12Mwana wentse wachimuna aninga wafikisa ntsiku sele pakati panu ngaagwatiwe khanda lachimuna, mwamuna wentse kum'badwe wanu, aninga abaliwa munyumba yanu, panango wakuguliwa namasheleni kuchoka kwawachilendo ali lini wam'badwe wanu. 13Wentse adabadwa munyumba mwako nawentse adaguliwa namasheleni anfunika kugwatiwa khanda lachimuna. Nakutenepo chibvano changu chin'khala munyama yako, chibvano chinsaya kumala. 14Mwamuna wentse ansaya kugwatiwa nyama yakhanda lake lachimuna an'zachosewa pakati pawanthu wake, pakuti aninga waphwanya chibvano changu.”
15Mulungu adati kwa Abhurahamu, “Sarayi nkazi wako leka kumuchemela nadzina lakuti Sarayi, kuyambila lelo waakuchemelewa kuti Sara. 16Nin'zamudalisa achikubalila mwana wachimuna, nin'zamudalisa, iye an'zawa amayi wamishowo yawanthu, mwayiye mun'zachoka mazimambo.”
17Abhurahamu adakotamisa nkhope yake nkuyamba kuseka, iye nkuti chamuntima, “Munthu ana magole dzana (100) angabale mwana? Sara angabale mwana iye wawa namagole makumi pfemba?” (90) 18Abhurahamu adati kwa Mulungu, “Ninga mwandochita kuti Ishimayeli adye nthaka yangu!”
19Koma Mulungu adati, “Nee, Sara nkazi wako an'zakubalila mwana wachimuna wawun'zapasa dzina lakuti Isaki.#17:19 bzinilewa kuti kuseka Nin'zachita chibvano changu nayiye, chibvano changu nayiye chakufika lini nalini nakum'badwe wake umbwela. 20Koma nkhani ya Ishimayeli ndayibva, iye nin'zamudalisa ndichichita kuti abalane awande, an'zakhala kholo laanemwanamambo khumi naawili, nin'zamuchita nshowo ukulu. 21Koma nin'zachita chibvano namwana wako Isaki, mwana wawun'zabaliliwa na Sara gole lamangwana panthawe ibodzi-bodzi ino.” 22Mulungu paadamala kulewa-lewa na Abhurahamu, adayenda.
23Pamwepo Abhurahamu adatola mwana wake Ishimayeli naalanda wamunyumba mwake, waadagula namasheleni, amuna wentse wamunyumba mwa Abhurahamu, adaagwata nyama yakhanda lachimuna ntsiku imweyo, kuteyeza bzikhadalewedwa na Mulungu. 24Abhurahamu paadagwatiwa nyama yakhanda lachimuna akhana magole makumi pfemba napfemba (99). 25Mwana wake Ishimayeli akhana magole khumi namatatu (13) paadagwatiwa nyama yakhanda lake lachimuna. 26Ntsiku imweyo Abhurahamu namwana wake Ishimayeli adagwatiwa nyama yakhanda lachimuna, 27naamuna wentse wamunyumba mwake, awo adabadwa munyumba mwake, naawo waadagula namasheleni kwawachilendo, adagwatiwambo nyama yakhanda lachimuna.
હાલમાં પસંદ કરેલ:
Kuyamba 17: KUNDA
Highlight
શેર કરો
નકલ કરો
Want to have your highlights saved across all your devices? Sign up or sign in
Bhaibheri reChikunda © Bible Society of Zimbabwe