Yoana 5
5
Omurwae naosibwa kwitanga rya Betesida
1Wejire ebyo byawa, nigabao amarya ga Bayaudi. Yesu narinya mu Yerusalemi. 2Mbe mu Yerusalemi kwirango rinu ryatogwaga Rya Jina:ma, ririko ritanga, rinu ryatogwaga mu Cieburania, Betesida, ririo na biyumba bita:nu. 3Mwibyo bama:magamo ecise ca barwae, baofu na barema na bakombo:rike. 5Ariga ario omu:nu arwae, amarire myaka makumi gasatu neta:nu nesatu (38). 6Yesu wejire amurora oyo ama:mire, namenya ati aramarire siku nyafu, namubu: sya ati, ?Owenda kuba muanga? 7Omurwae namuindura ati, Mukaruka, nitana mu:nu wa kuntu:ra mwitanga anu amanji agaseruka, nawe anu anye eni:jira, oundi kaba antangatiye okwikamo. 8Yesu namubwira ati, Imuka, witwike bima:miro byao, uribate. 9Aonao naba muanga ne:twika ebima:miro, naribata. Nawe orusiku urwo rwariga rwa isabato.
10Mbe Abayaudi nibamubwira oyo aosibwe ati, Rero ni sabato, kuganyisye okwitwika ebima:miro byao. 11Omwene nabaindura ati, Unu amosya niwe ambwira ati, Witwike ebima:miro byao, uribate. 12Niba-mubu:sya, Omu:nu uyo niga unu akubwira ati, Witwike ebima:miro byao, uribate. 13Nawe unu aorere ariga atamumenyere kutyo ari, okuba Yesu ariga e:so:keeyo okuba aba:nu banu bariga bari ao bariga ba:fu. 14Wejire ebyo bwawa, Yesu namusanga mu yekaru, namubwira ati, Rora wabee muanga. Utarija kukaya rindi, wasiga kugwirwa omusango mubibi muno. 15Omu:nu uyo nagenda, nabwira Abayaudi ati, Yesu niwe amosisye. 16Mbe Abayaudi nikwo bakorere nibamunya:sya Yesu, okuba akoree ebyo ku sabato. 17Nawe Yesu nabaindura ati, Rata kakora kukinga woryanu, nanye one enikora. 18Mbe Abayaudi nikwo bakorere nibeyongesya okuyenja obwenge okumwita, okuba atanyamuye isabato era, nawe atogere Nyamuanga esemwene, ne:riŋanya na Nyamuanga.
19Mbe Yesu naindura nababwira ati, Ni cimari cimari enibabwira ati, Omwana atakutura enyere era okukora eci:nu, ataroree kwisemwene nakora, okuba binu kakora byone, Omwana one nibyo kakora. 20Okuba Rata endere Omwana, kamweresya byone binu kakora Omwene. Ka arimweresya emirimu eminene kukira ejo, korereki emwe murugu:re. 21Okuba Rata kutyo kasu:rura abafu:ye nabayana obuanga, nikwo kutyo Omwana one kabayana obuanga bo:ne banu kenda okuyana. 22Okuba Rata atakuramura omu:nu nawe ayae Omwana okuramura kwone, 23Korereki bo:ne bayanega Omwana ecibaro, rwa kutyo abayana Rata ecibaro. Unu atakuyana Omwana ecibaro, atakuyana ecibaro Rata unu amutumire. 24Ni cimari cimari, enibabwira ati, Unu kongwa omusango gwani ne:kirisya unu antumire, ari no buanga bunu butakuwao, amwi atari:ja mu ntambara, nawe aso:kere mu kufwa kukinga mu buanga.
25Ni cimari cimari enibabwira ati, Omwanya ogu:ja na wori one gurio runu abafu:ye runu baryungwa riraka ryo Mwana wa Nyamuanga, na banu bariryungwa bariba baanga. 26Okuba rwa Rata kutyo arimo buanga, nikwo kutyo amuyae Omwana one okubamo obuanga. 27Amuyae obuinga bwo kuramura, kwo kuba niwe Omwana wo mu:nu.
Okusu:ka kwa be kisi no kwa be bibi:bi
(Kuswer. 20:4-6, 11-15)
28Mwasiga kurugu:ra eco, okuba omwanya ogu:ja runu bo:ne banu bari mu fwa runu baryungwa riraka ryae, nibaso:kamo. 29Banu bakoraga ebye kisi barisu:kira mu buanga, na banu bakoraga ebibi:bi barisu:kira mu ntambara. 30Anye nitakutura kukora ci:nu kubwani era. Rwa kutyo enungwa, nikwo kutyo eniramura, no kuramura kwani kwimire, kwo kuba nitakuyenja binu enenda anye, tari unu antumire binu kenda. 31Nikeyaika ebyani omwene, okwaika kwani kutari kwa cimari. 32Ariwo oundi unu ka:ika ebyani, nanye nimenyere ati, ebyani binu kaika ni bya cimari.
Ebyo kwima ku Yesu
(1) Ebya Yoana Omubatija
33Emwe mwatumiye Yoana aba:nu, omwene na:ika bya cimari. 34Nawe anye nitakwikirisya okwaika kwo mu:nu, nawe ena:ika binu korereki mukisibwe. 35Oyo ariga itara inu eyaka ni:se:ka:na, nemwe mwendere okukondererwa obweru bwae mwanya muto:to.
(2) Ebye bikorwa byae
36Nawe okwaika kunu niri nakwo ni kukuru kukira okwa Yoana. Okuba emirimu jinu Rata anae okuku:misya, emirimu ejene nijo enikora nijo ejinyimako ati, Rata niwe antumire.
(3) Ebya Esemwene
37Na Rata unu antumire, Oyo niwe kanyimako. Mucariga kungwa oburaka bwae na katyari, nakabee kurora orususo rwae, 38Amwi mutana cigambo cae cinu ci:kae mwimwe, kwo kuba Oyo antumire mutakumwikirisya.
(4) Ebya binu byandikirwe
(Lk. 24:27, 44-46)
39Omuyenja mu binu byandikirwe, okuba omwiganirisya ati, mwibyo muri na obuanga bunu butakuwao. Ebyo nibyo ebinyimako anye. 40Ke:nu mutakwenda ku:ja kwanye mube no buanga. 41Nitakwikirisya ecibaro ca ba:nu. 42Nawe nibamenyere emwe ati, okwenda kwa Nyamuanga kutabarimo. 43Anye ne:jire mwisi:na rya Rata, nawe mutakunkuma. Oundi ariba:ja mwisi:na ryae omwene, oyo murimukuma. 44Emwe omutura kutiki okwikirisya, nimwenda okuyabwa ecibaro emwe abene era, nimurema okuyenja ecibaro cinu eciso:ka ku Nyamuanga oumwi era. 45Mute:ganirisya ati, anye enibabu:ra ku Rata. Ariwo unu kababu:ra, niwe Musa unu omwiikanya. 46Kumba mu:ja mwikirisisye Musa, nanye one mwakanyikirisisye, okuba anyandikiye ebyani. 47?Nawe mukarema okwikirisya oyo binu andikire, muri:kirisya kutiki ebigambo byani?
હાલમાં પસંદ કરેલ:
Yoana 5: KIJ1960
Highlight
શેર કરો
નકલ કરો
Want to have your highlights saved across all your devices? Sign up or sign in
Kijita New Testament © The British and Foreign Bible Society and The Bible Society of Tanzania, 1960.
