Yoana 11
11
Okusu:rurwa kwa Lajaro
1Mbe, ariga:rio mu:nu arwae, niwe Lajaro wende Betania, mu musi gunu bariga be:kae Maryamu no muyara we:ja:bo Marita. 2Niwe Maryamu oyo abambagire Ratabugenyi amafuta, namusinga ebigere byae na jifwiri jae, niwe ariga:ri no mundurume Lajaro unu ariga arwae. 3Mbe abayara babo nibamutumira omu:nu, niba:ika ati, Ratabugenyi, mbe unu wendere arwae. 4Nawe Yesu wejire ongwa, na:ika ati, Oburwae bunu butari bwa kumwita, nawe ni bwa kukusya Nyamuanga, Omwana wa Nyamuanga abe na rikusyo kurwobwo.
5Nawe Yesu ariga endere Marita, no muyara we:ja:bo na Lajaro. 6Mbe ejire ongwa ati arwae, nasuba no:sao siku ibiri anu ariga:ri. 7Niwo nabwira abe:igisibwa bae ati, Cisubeyo Ebuyaudi rindi. 8Abe:igisibwa nibamubwira ati, Rabbi woriwori Abayaudi bariga nibenda okukurasa na mabui. ?Ka niyo usube uje? 9Yesu naindura ati, ?Jisaa ja mu mwisi jitari ikumi ne:biri? Omu:nu akaribata mu mwisi, atakwiku:jura, okuba karora obweru bwa i:si inu. 10Nawe omu:nu akaribata mu ngeta, ke:ku:jura, okuba obweru butamurimo. 11Ejire amara okwaika kutyo niwo nababwira ati, Omusa:ni weswe Lajaro aongee, nawe enija okumurafya. 12Mbe abe:igisibwa nibamubwira ati, Ratabugenyi, araba aongee kaja okuora. 13Nawe Yesu a:ikire ku kufwa kwae, nawe abene nibe:ganirisya ati ka:ika kuongera:ra ntiro. 14Mbe Yesu niwo nababwirira abweru ati, Lajaro afu:ye. 15Nanye enikonderwa kurwemwe okuba nariga nitariyo, korereki mwikirisye. Nawe cimuje:ko. 16Mbe Tomaso, unu katogwa Didumo, nabwira abe:igisibwa be:ja:bo ati, Eswe one cigende, cifwire aamwi nage.
17Mbe Yesu ejire akinga, nasanga amarire siku ina mu:fwa. 18Nawe Betania yariga yei na Yerusalemi uti mairi ibiri. 19Abayaudi ba:fu bariga be:jire ku Marita na Maryamu okubasi:ri:sya kurwo mundurume webwe. 20Mbe Marita wejire ongwa ati, Yesu ka:ja, nagenda okumuramira, nawe Maryamu nasigara mu nyumba. 21Mbe Marita nabwira Yesu ati, Ratabugenyi, kumba wariga uri anu, omundurume wani atakafu:ye. 22Nawe woryanu one, nimenyere ati jo:ne jinu urasabwa Nyamuanga, Nyamuanga kakuyana. 23Yesu namubwira ati, Omundurume wao kaja okusu:ka. 24Marita namubwira ati, Nimenyere ati, arisu:kira ku busu:ko bwo rusiku rwa ku bute:ro. 25Yesu namubwira ati, Anye nanye obusu:ko no buanga. Unu ke:kirisya anye, nakabee afu:ye ariba muanga, 26No mu:nu muanga unu ke:kirisya anye atarifwa kajanende na kajanende. ?We:kirisya eco? 27Namubwira ati, Yee, Ratabugenyi. Anye ne:kirisisye ati, awe na:we Kristo, Omwana na Nyamuanga, unu ka:ja mu:si.
28Wejire amara okwaika kutyo, nagenda nabirikira Maryamu muyara we:ja:bo bwitebe, na:ika ati, Omwiigisya e:jire, kakubirikira. 29Omwene one ejire ongwa, ne:muka bwangu namuja:ko. 30Yesu ariga acari kukinga mu musi, nawe ariga acari anu Marita amusangire. 31Mbe Abayaudi banu bariga banage mu nyumba nibamusi:ri:sya, wejire barora Maryamu e:mereguru bwangu no kuuruka, nibamuru:ba, mbetogera ati kagenda ku:fwa aja okuririra eyo.
32Mbe Maryamu wejire akinga anu Yesu ariga:ri namurora, nagwa ku maguru gae, namubwira ati, Ratabugenyi, kumba wariga uri anu, omundurume wani atakafu:ye. 33Mbe Yesu ejire amurora narira na Bayaudi banu ba:ja nage one nibarira, narumwa mu mwoyo, nawa omwoyo, 34Na:ika ati, ?Mwama:mutu:ra a:ki? Nibamubwira ati, Ratabugenyi, ija urore. 35Yesu narira. 36Mbe Abayaudi niba:ika ati, Rora kutyo ari amwendere! 37Nawe abandi kwabo nibabu:sya ati, ?Omu:nu unu e:guye ame:so go muofu, atakaturire okuingirira no:yo areme okufwa?
38Mbe wejire Yesu asuba okurumwa munda yae, nakinga ku:fwa. Yariga iri nsenga iteyweko ribui inguru. 39Yesu na:ika ati, Nimuso:syeo ribui. Marita, omuyara wabo omufu, namubwira ati, Ratabugenyi, wori aunyire okuba amarire siku ina. 40Yesu namubu:sya ati, ?Nitakubwiriye ati, Uke:kirisya ourora rikusyo rya Nyamuanga? 41Mbe nibaso:syao ribui. Yesu narore:rera inguru, na:ika ati, Rata enikusi:ma okuba wanyunguywe. 42Nanye namenyere ati, ounyungwa kusiku, nawe na:ika kurwa ecise cinu cinsingiye, korereki be:kirisye ati, na:we wantumire. 43Wejire amara okwaika kutyo, na:nikirisya inguru na buraka bunene ati, Lajaro, So:kamo u:je! 44Unu ariga afu:ye naso:kamo, asingire mu myenda amaguru na maboko, no busu bwae buboere ecitambara. Yesu na:ika ati, nimumusurumure, mumusige agende. 45Mbe aba:fu ku Bayaudi banu be:jire ku Maryamu, wejire barora kutyo akora, nibamwikirisya. 46Nawe abandi nibagenda ku Bafarisayo, nibababwira binu Yesu akora.
Abafarisayo nibaromera Yesu iniku
47Mbe abagabisi abakuru na Bafarisayo nibakora ecirwaji, niba:ika ati, ?Ecikora kutiki? Okuba omu:nu uyo kakora ebibarikisyo byafu. 48Araba cikamusiga kutyo era, bo:ne abaja okumwikirisya, na Barumi barija nibacisa:kura eca:ro ceswe na riyanga ryeswe. 49Nawe oumwi ku bene, niwe Kayafa, unu ariga mugabisi Omukuru mu mwaka ogwo, nababwira ati, Emwe mutana cinu mumenyere, 50Amwi mutakwiganirisya ati, kube:ire omu:nu umwi abafwire aba:nu, na riyanga ryone risige kubura. 51Ata:ikire eco mu bwenge bwae era, nawe okuba ariga mugabisi Omukuru mu mwaka ogwo, naraga ati Yesu kaja okufwira riyanga eryo. 52Nawe tari kurwa riyanga eryo ryenyere, nawe akofifye aamwi aba:na ba Nyamuanga banu banyarambukire. 53Mbe Okuso:kerera ku rusiku urwo nibarwaja okumwita.
54Mbe Yesu naremo:kusuba okuribatira abweru mu Bayaudi, nawe naso:kayo nagenda ku ca:ro ciri yei na ribara, mu musi ngutogwa Efuraimu, nabe:yo na be:igisibwa bae.
55Na Ipasaka ya Bayaudi yariga iri yei. Ba:fu nibaso:ka mu byaro nibarinya Yerusalemi, Ipasaka icari, korereki beesye. 56Mbe Yesu nibamuyenja, nibe:mere-guru mu yekaru niba:ika abe:ne:ra ati, ?Omwiganirisya kutiki? ?Ataku:ja ku marya? 57Nawe abagabisi abakuru na Bafarisayo bariga baragiriye ati, omu:nu akamenya anu ari, a:ike korereki bamugwate.
હાલમાં પસંદ કરેલ:
Yoana 11: KIJ1960
Highlight
શેર કરો
નકલ કરો
Want to have your highlights saved across all your devices? Sign up or sign in
Kijita New Testament © The British and Foreign Bible Society and The Bible Society of Tanzania, 1960.
