Jɔ̌n 1
1
Èngǎ̧ Mèmpème
1Ngɔ̀ŋ li me bùꞋu, Èngǎ̧ wu e yaŋe wu. Èngǎ̧ mbɔŋ e li ngu bɔ̂ Mbɔ̧ɔ̧mà nɔ̂, Èngǎ̧ wu li ngu àzi Mbɔ̧ɔ̧mà. 2Ngɔ̀ŋ li me bùꞋu tà wu bɔ̂ Mbɔ̧ɔ̧mà.
3Mbɔ̧ɔ̧mà li ntsè ane tò ka ngɨ̀ èghɨ ègème. Àghɨa ko a mbê ntsě bɔ ghɨ̀ ka wu tòà tà li ngɨ̀ la. 4Tà wu wòt tàa ŋǎ ngule mèntsèke abua bòt, è ghɨ̀à bɔ bɔ èkaꞋà la. 5ÈkaꞋa mbɔŋ aà mbèꞋa a èbem ndzěm, ka ndzěm ka ko ndììmê.
6Mbɔ̧ɔ̧mà li ntsàà wantu̧ vi, èlen tò wu Jɔ̌n la, 7tà kɨ̀Ꞌɨ̂ shu bòt àghɨa ye ko ane ànəa wòt wu tà wu èkaꞋà la, mbɨ̀Ꞌɨ̀ bòt bàgème aa zə ezǐ mèntɨ̧ɨ̧ mɔb ane ŋut. 8Tòà zìambɔŋ li tà kà wu èkaꞋà ngaa ka mbɔ̂ ngua nkɨ̀Ꞌa e shu bòt wòt tà wu èkaꞋà mbɔŋ la. 9Ngule èkaꞋà wu àa mbaŋe waa waa la, wu wòt wu nkɨ̀Ꞌa a sitsǎꞋ la.
10Tòà wu, tà wu èngǎ̧ Mbɔ̧ɔ̧mà la, li ngu a sitsǎꞋ ka bòt sitsǎꞋ è ka ko atò, Mbɔ̧ɔ̧mà tsè ane tò ka ngɨ̀ sitsǎꞋ. 11Tà kɨꞋɨ abua bòt àlaꞋ yu è wù àyea tò la, bɔ̀ ka sèè atò. 12Ka bòt bàgème bɔ sèe atò, ndzì mèntɨ̧ɨ̧ mɔb ane èlen tò la, tà ghɨ̀ àwɔb bɔ tsiꞋi bɔ̧ Mbɔ̧ɔ̧mà. 13Ka bɔ me wu bɔ̧ Mbɔ̧ɔ̧mà ale, è kà wu wɔ̀bȩ̂ tà bi awɔb bɔ tsiꞋi àlo̧ atò la, è kà mê ngu wɔ̀bȩ̂ ka tà ghɨ̀ a wu ale la. Wu Mbɔ̧ɔ̧mà zìambɔŋ ka tà ghɨ̀à wɔb bɔ tsiꞋi bɔ̧ tò la.
14Èngǎ̧ wu e li ntsìꞋi wɔ̀bȩ̂, nkɨ̀Ꞌɨ̂ ntsèke ayɔɔ bòt, me nyɨꞋte èwuu ntsɔ̧̀ Mbɔ̧ɔ̧mà bɔ ane bòt la, mè nyɨ̀Ꞌta nkûŋ ane àghɨa Mbɔ̧ɔ̧mà wû yùà la. Ba ye ènɨ̧ tò. Eyaa wu ènɨ̧ wu Tǎt tò Mbɔ̧ɔ̧mà li ŋǎ abua tò mbɨ̀Ꞌɨ̀ ngule waã tà dzə abua tò la.
15Jɔ̌n lɔ̀Ꞌ shuê ànəa ye ye, mè nko ane tò la. Tà li ŋȩ nê, “Eyaa tòà wu e ndi ngua shuà, àfɨꞋa e ndi nê, ‘Wòt nkɨ̀Ꞌa akwene yaã la è tsè am, nkàà nê tà li ndzaŋe wu ka bɔɔ li e bi am la’.” 16Tà kɨꞋɨ ale me kɔ̀ŋkè bòt nyaŋ ngɨ̀à ba bɔ mèngùꞋte mu è dzə abua Mbɔ̧ɔ̧mà la a ngo̧ a ngò̧. 17È wu nè ànəê mbɨ̧te Mbɔ̧ɔ̧mà ko Mbɔ̧ɔ̧mà li ndzi a tèkitebu Musì ka tà ŋǎ abua bɔbȩ, è me wu èkɔŋ nè nkûŋ, ta tsaa a Yesò Klistò ka tà kɨ̀Ꞌɨ̂ nyɨ̀Ꞌte awa. 18Wòt kǒ tà li mè yea Mbɔ̧ɔ̧mà la ntsě. Wu ndàꞋà tòà wu tà wu àzi Mbɔ̧ɔ̧mà mè ngu a ngèt Mbɔ̧ɔ̧mà la ka tà ghɨ̂ bòt e ko atò la.
Ntu̧ Jɔ̌n ndzìà èdzî li ntsɔ̀tè la
(Mat 3:1-12; Mk 1:1-8; Lk 3:1-18)
19È li ngu àfɨ̀Ꞌ àko, bɔɔjuŋ Bèjuê a Jèlusalèm e tsàà bèntsìà mèpɨ̧̀ Mbɔ̧ɔ̧mà, nè bòt àndǎ̧ Levì nê, bɔ̀ kɨꞋɨ mbììte a Jɔ̌n nê tà wu wà leꞋ. 20Bɔ biite ale Jɔ̌n ka tu̧ làꞋa, tà bê ntsɔ̀Ꞌte shu awɔb nê, ye ntsě Fɔ̧̀ wu Mbɔ̧ɔ̧mà li ndzɔꞋ etsàà la.
21Tà làꞋ ale, bɔ mè mbììte nê, “Tè à wu wàà? À wu Èlȩjà?”
Jɔ̌n bɨ̀ɨ̀lè èngǎ̧ wɔb nê, “ÀwɔꞋ e ntsě tòà.”
Bɔ mè mbììte atò nê, “Tè à wu ndàꞋàtɔŋ Mbɔ̧ɔ̧mà wu bɔ̀ɔ nchɨ̀Ꞌà la à?”
Tà nê “ÀwɔꞋ.”
22Bɔ mè nê, “Ale shua wa wòt à wu wùà la, mbɨ̀Ꞌɨ̀ baa ghǎ ko eŋa àbɨ̀t abua bòt bu bɔ yaã ntsàà àwa la. Tè à wu wàà?”
23Tà bɨ̀ɨ̀lè nê, “E ngu àtɔŋ wòt kǒ ŋȩ̀a a èbem àbâ àlaꞋ àyuube shua nê bɨ̀ nèète alu̧ Lefɨ̀Ꞌ è tɨ̧ɨ̧ ndɨŋndɨ̀ŋ mbɨ̀Ꞌɨ̀ ndàꞋàtɔŋ Mbɔ̧ɔ̧mà, Àsayà li shu la.”
24Bòt bu bɔ li ntsàà bɔntu̧ baa la li ngu Bèfalèsiì. 25Bɔ mè mbììte a Jɔ̌n nê, “À bakà wu Fɔ̧̀ wu Mbɔ̧ɔ̧mà li ndzɔꞋ etsàà la, mbakà wu Èlȩjà mè mbakà wu ndàꞋàtɔŋ Mbɔ̧ɔ̧mà, ghǎ a ghɨ̀ ka à me zǐ bòt a èdzî à?”
26Jɔ̌n tsɔꞋɔ èngǎ̧ wɔb nê “Maà ndzìà bòt a èdzî, ka wòt kǒ nàà və tà tɨ̧ɨ̧ a kètsìà wɨ̧ ka bɨ̀ ka zîꞋ nko wòt tà wû wùà la. 27Tà wu wòt wu nkɨ̀Ꞌa akwene yaã la. E mbakà lem nkùꞋ wòt tàa yàa mèliꞋ gubte tò la.”
28Èghɨ baa ègème e li ngɨ a Betanì, agua èdzî Jodàn, adzìꞋ yu Jɔ̌n li ngua ndzìà bòt a èdzî la.
Wanjɨ̀ Mbɔ̧ɔ̧mà
29ÈtsəꞋ e tsi Jɔ̌n ye a Yesò nkɨ̀Ꞌa ekwene ane tò la, nê “Bɨ̀ ye Wanjɨ̀ Mbɔ̧ɔ̧mà wu tàa tsì mènəè kàbɔ̀ŋ bòt ngɔ̀ŋ la. 30Eyaa wu tòà wu e ndi shu nê, wòt kǒ nàà kɨꞋɨ akwene yaã tà tsè am la, nkàà nê bɔ li me bi am tà yaŋe wu la. 31E ndi me làꞋ ale, è nka ko atò mɨ̧̂, mbɔ̂ me kɨꞋɨ ezǐ bòt Izəèlȩê a èdzî ale ngua nkɨà mbɨ̀Ꞌɨ̀ bɔɔ ko wòt tà wu wùà la.”
32Jɔ̌n làꞋ ndɨ ye li ndze la nê, “E ndi ndzě Fo Mbɔ̧ɔ̧mà e chu a ègwet mbɨ̀Ꞌɨ̀ baba ntɨ̧ɨ̧ ane tò la. 33E ndi e nka lem nko atò, tè Mbɔ̧ɔ̧mà wu tà ntsàà am nê è nkɨ̀Ꞌɨ̂ ndzì bòt a èdzî la shu abua am nê, ‘Wòt à ye Fo Kèfə èchua ègwet ntɨ̧ɨ̧ ane tò la, à ko nê wu tòà wu tàa tsiꞋi me ŋa bòt Fo Kèfə la’. 34Mâ ye, mè me kɨ e shu awɨ̧ nê eyaa wu Waã Mbɔ̧ɔ̧mà.”
Bɔkatè mbì Yesò
35ÈtsəꞋ e li ntsi, Jɔ̌n mè ntɨ̧ɨ̧ abot, bɔ̂ bɔkatè bi babe, 36ndzě a Yesò ngȩ̀ȩ̀nà ntsèà la nê, “Bɨ̀ ye Wanjɨ̀ Mbɔ̧ɔ̧mà.”
37Mbɨ̀Ꞌɨ̀ bɔkatè tò bu babe e zə ànəa mbɔŋ la, bɔ bê sa atò nkuŋa Yesò. 38Yesò ghèble avi, ndzèà wɔb nkùŋà vi la, mbììte awɔb nê, Bɨ̀ kɨa ghàà? Bɔ bɨ̀ɨ̀lè nê, “Labȩ̀”, (ngua shua nê, nyɨꞋtà) “Àa ntsèka nèŋàà?”
39Tà nê, “Bɨ̀ kɨꞋɨ ndze.”
Ale, bɔ gha bɔ̂ tò ba, ndzè àdziꞋa tàa ntsèka la. È li me wu àfɨ̀Ꞌ yaa è tsìꞋa ngà mbɔ̀ŋè nyèm tekwì àfɨꞋa nèngû̧, ale bɔ ghà mpàâ àliabȩ a mbɔŋ ntsèke bɔ̂ tò ba.
40Wòt kǒ ane bɔkatè bu babe tà li nkuŋa Yesò, àfɨꞋa tà zə ndɨ Jɔ̌n làꞋà la, li ngu Andùlù wanyɨ Simùn wu èlen tò ko wu Pità la. 41Ale, tà bê ngà nkɨ wanyɨ vi Simùn shu abua tò nê, “Ba yea Klistò, #1:41 Klistò ane ndɨ̧ Glɨ̂k wu Mèzayà. Fɔ̧̀ wu Mbɔ̧ɔ̧mà li ndzɔꞋ etsàà la.” 42Tà nɨa Simùn nkɨ̀Ꞌɨ̂ abua Yesò.
Yesò lɔ̀kè àvi ndzě atò nê, “Bɔɔ ntɔ awê ane Simùn waã Jɔ̌n. Èlen lê aa tsiꞋi Sefàs.” (Sefàs wua shua nê Pità. Lə Pità è wu èwu.)
Yesò tɔa Filìb bɔ̂ Nàtanìà
43ÈtsəꞋ e tsi Yesò me taŋke eghǎ a Galìlî, ndzě wòt kǒ èlen tò wu Filìb la shu abua tò nê “KɨꞋɨ nkùŋè am.”
44Filìb li ndzə a Bèsedà, è wu àpfəè yu Andùlù bɔ̂ Pità e dzəè la. 45Filìb ghà ndzea Nàtanìà shu abua tò nê, “Ba ye wòt wu Musì li shɨ ànəa tò a èbem àkatè mbɨ̧tsə la, ye wu bèndàꞋàtɔŋ Mbɔ̧ɔ̧mà è lè shɨ ayɔb mɨ̧̂ la. Tà wu Yesò, waã Jòsêb, wòt Nazàlet.”
46Nàtanìà bììte atò nê. “Tè betsiꞋa ngule àghɨa ntsɔ̧̀ àko a dzə a Nazàlet?”
Filìb shu abua tò nê, “KɨꞋɨ ngà ndze àwɔ̀ mbɔŋ.”
47ÀfɨꞋa Yesò yea Nàtanìà nkɨ̀Ꞌa la, tà nê, “Bɨ̀ ye ngule wòt Izəèlȩê, kà ye ànəa fɨte ane zi!”
48Nàtanìà bììte atò nê “À ghɨ̀ na ka nko am à?”
Yesò bɨ̀ɨ̀lè nê, “Filìb yaã me laꞋ nê yea ntɔ awê àfɨ̀Ꞌ yu à wu a èten àyɨt a fik la ale, e ndzaŋe ye awê.”
49Nàtanìà nê, “NyɨꞋtà, à wu Waã Mbɔ̧ɔ̧mà! À wu Fɔ̧̀ bòt Izəèlȩê!”
50Yesò bɨ̀ɨ̀lè nê, “Tè à bê mbɨ̧̀ɨ̧̀na ànəê yaa na mâ laꞋnê mâ yaã ndzè àwê a èten àyɨt a fik la à? À bèle taꞋa eye èghɨ e tsè è baa la!” 51Yesò mè shu abua tò nê “TsiꞋ è shua wê ane nkûŋ nê, àa ye ègwet e ghaꞋa bɔntu̧ Mbɔ̧ɔ̧mà e me ghȩ̀ȩ̀na nchua ndzea Waã Wòt mè nkɔ̀Ꞌa ngà la.”
હાલમાં પસંદ કરેલ:
Jɔ̌n 1: mnf
Highlight
શેર કરો
નકલ કરો
Want to have your highlights saved across all your devices? Sign up or sign in
© 2006, Cameroon Association for Bible Translation and Literacy
