ÀfaꞋa 15
15
Àbù̧ù̧tè yu a Jèlusalèm la
1Bòt ko e li ndɔ̀Ꞌɔ àlaꞋ a Jùdià nkɨ̀Ꞌɨ̂ a Antìɔ̀k me nyɨꞋte bɔnyɨ ba ko bu nê, “Bɔ bakà naŋe wòt mbɨ̀Ꞌɨ̀ mbɨ̧te Musì tèa nyɨ̀Ꞌta la, Mbɔ̧ɔ̧mà kà nɨa ŋut ane wòt vi.” 2Pɔ̂l bɔ̂ Bànabasì e taꞋa kààne ànəê yaa mè ndzɔ̀ŋ bɔ̂ tò ba. Mbɨ̀Ꞌɨ̀ àyɔ̀ŋ yu a dzə a si la, bɔ làŋkè nê Pɔ̂l bɔ̂ Bànabasì nè èbeko nè bòt Yesò a Antìɔ̀k e gha a Jèlusalèm ndzè bɔntu̧ Yesò ko bu nè bɔɔjuŋ ayɔɔ bòt Yesò ane ànəa ngaa.
3Bòt chɔsì bu e nɨa awɔb ngà ntsaa alu̧. Mbɨ̀Ꞌɨ̀ bɔɔ ntsea àlaꞋ a Fònisìà nè Sàmalìà la, bɔ me shu bòt ndɨ bòt kà wu Bèjuê e kubte tê ntsìꞋi bòt Mbɔ̧ɔ̧mà la. ÀfɨꞋa bɔnyɨ bu bàgème e zə ntu̧ yaa la, ànəa ngaa a taꞋa bɔ̀ àwɔb. 4Bɔ ghà tê bɔ̀ nyi a Jèlusalèm, bòt chɔsì, nè bɔntu̧ tò, nè bɔɔjuŋ ayɔɔ bòt Yesò bu e sèè àwɔb. Bɔ bɔ̂ shu awɔb àghɨ àgème Mbɔ̧ɔ̧mà li ngɨ̀ bɔ ghɨ̀ la.
5Ka àbəꞋa bòt Yesò ko è wu bòt ènɔ̧̂ Bèfalèsiì la e lɔ̀Ꞌɔ a si nê, “Bɔ bɔ̂ ndɨ bɔ̀ɔ naŋe bòt bu kà wu Bèjuê la, bɔɔ mě me nɔ̀ŋe mbɨ̧te Musì.”
6Bɔɔjuŋ ayɔɔ bòt Yesò nè bɔntu̧ tò bu e bù̧ù̧te a si mbɨ̀Ꞌɨ̀ ebaãaãte èngǎ̧ mbɔŋ. 7Bɔ bù̧ù̧te a si ale, ndaꞋ ane àfɨ̀Ꞌ à seè, ka àtsə à ka wuê. Pità tseke tè ndɔ̀Ꞌ a si nê, “Bɔnyɨ bɔ̧, bɨ ko nê è li ngu te àfɨ̀Ꞌ àko Mbɔ̧ɔ̧mà e lȩ̀ am a kètsìà wɨ̧ nê è ntsɔ̀te Ntu̧ Ntsɔ̧̀ abua bòt kà wu Bèjuê mbɨ̀Ꞌɨ̀ bɔɔ zə e zì mèntɨ̧ɨ̧ mɔb ane Yesò. 8Mbɨ̀Ꞌɨ̀ àa ale la, Mbɔ̧ɔ̧mà wu tà ko èntɨ̧ɨ̧ waa waa la, nyɨꞋtè nê, betsiꞋa bòt kà wu Bèjuê e ko ndzì mèntɨ̧ɨ̧ mɔb ane Yesò mɨ̧̂. Tà lè nyɨꞋtè àyaa ane Fo Kèfə yu tà li ndzì ane yɔb wuê mbɨ̀Ꞌɨ̀ tà lè lɔ̂Ꞌ mbɨ̀ ŋa abua ya la. 9Tà li nyɨ̀Ꞌte nê ba tò ba e tsiꞋi àghɨ yeamɔꞋ, ndzòò mèntɨ̧ɨ̧ mɔb, ndɨ̀ wu bɔ zì mèntɨ̧ɨ̧ mɔb ane Yesò la. 10Ale, bɨ ghɨ̀ na ka me kɨ nyɔ̀Ꞌte a Mbɔ̧ɔ̧mà ezǐ àbòꞋà yaa a kɔ̧̀ bɔkatè Yesò bu à? Eyaa wu àbòꞋa bètǎt nyaꞋ ba, kò bàambɔŋ leꞋ e li è ka wuê ko eŋeꞋe ayùà la. 11A ntsě ale! Baa zì mèntɨ̧ɨ̧ ma ane Yesò, Mbɔ̧ɔ̧mà ghɨ̀ ba bɔ mèmpème wuê mbɨ̀Ꞌɨ̀ bɔ̀ɔ̀ba, nkàà ntsɔ̧̀ Yesò Lefɨ̀Ꞌ.”
12Pità làꞋa ale ènɔ̧̂ bòt bu e buŋ ntsiꞋi me yute ndɨ Pɔ̂l bɔ̂ Bànabasì e shua tèwuute ènəê kà ye fɨ̀Ꞌ bɔ̂ mènəè ngɨŋa Mbɔ̧ɔ̧mà eŋa wɔb mètàŋ bɔ ghɨ̀ a kètsìà bòt kà wu Bèjuê la. 13ÀfɨꞋa bɔ paa èngǎ̧ wɔb la, Jimsì lɔ̀Ꞌɔ a si nê, “Bɔnyɨ bɔ̧, bɨ̀ yute èwɔ̧ ne èngà̧. 14Simùn bê nyɨ̀Ꞌte awɨ̧ ndɨ Mbɔ̧ɔ̧mà li mbɨ̀ ndȩ̀ bòt ayɔɔ bòt kà wu Bèjuê ane bòt bi, nɨŋ nyɨ̀Ꞌte nê, yeà nkɔ̀ŋkà àwɔb bàgème la. 15Àyaa a bê mbù̧ù̧mè nè èngǎ̧ wu bèndàꞋàtɔŋ Mbɔ̧ɔ̧mà e li ndàꞋ la. ÈdziꞋ èkatè Mbɔ̧ɔ̧mà e laꞋnê,
16‘Mbɔ̧ɔ̧mà è laꞋnê,
naa li me wu àfɨ̀Ꞌ àko, maa kua akwèn,
mvəè lob Fɔ̧̀ Dàbid yu è li mbùà la.
Maa li mbɔ̧ èdziꞋ bu e bɨɨ la,
mè ndɔ̀kè yùà.
17A wu ale, mbɨ̀Ꞌɨ̀ bòt sitsǎꞋ ŋàa bàgème aa kùŋè
Mbɔ̧ɔ̧mà, bòt kà wu Bèjuê bu mâ tɔ awɔb nê
bɔ̀ kɨꞋɨ ngu bòt bɔ̧ la.
18Eyaa wu ànəa Mbɔ̧ɔ̧mà li shu
mè ngɨ̀ bòt e ko tê àfɨꞋa mbì la.’ ”
19Jimsì mè nê, “È wu nè mmɔ̌, ko ba bakà ŋa ngoꞋ abua bòt kà wu Bèjuê bu bɔ gheble tê ntsìꞋi bòt Mbɔ̧ɔ̧mà la. 20Ba wu eshɨ wuê àkatè eŋa abua yɔb nê, bɔ̀ ka tsi njɨ̀ èghɨ bɔ nɨŋ ntsì èpɨ̧̀ la, nkàà nê wu èbɨꞋte èghɨ; bɔ̀ ka tsi nɔ̀ŋkè nè bèzi kà wu e bɔb; bɔ̀ ka tsi nkwèle nyà̧ bɔ tɨ̀ŋè la, kò njɨ̀ àlo̧ leꞋ. 21Ngu nê ebuꞋu te àlia mbì bɔ taꞋa wua ntɔ mbɨ̧te Musì a èbem lobte Mbɔ̧ɔ̧mà àliapfəè Bèjuê àgème mè mbèla ntɔ wuê tùà a èpfəè nɨ̧ ègème.”
Àkatè abua bòt Yesò bu kà wu Bèjuê la
22AfɨꞋa mbɔŋ, bɔntu̧ bu nè bòt chɔsì bàgème, fɔ̀ɔ̀lè ne bɔɔjuŋ ayɔɔ ayɔb, e làŋkè nê, bɔ̀ tsi bòt ko ayɔɔ ayɔb ntù̧ àwɔb a Antìɔ̀k bɔ̂ Pɔ̂l ba nè Bànabasì. Bɔ li ndȩ a Judàs wu bɔ̀ le wua ntɔ nê Bàsabàs la, nè Sȩlàs è wu bòt bɔnyɨ ba e li ngua ntsènà nkùkta wɔb la. 23Bɔ li ntsàà àkatè yaa abua yɔb nê,
Bàa bòt Yesò nè bɔɔjuŋ ayɔɔ aya nè bɔntu̧ tò, aà ntsàꞋtà
awɨ̧ bɨ̀a bòt Yesò bu bɨ̀ wu bɔnyɨ ba a Antìɔ̀k, nè Silìà, nè
Sìlisìà kà wu Bèjuê la.
24Ba zə nê bòt ko e li ndzə ayɔɔ aya kà ba tu̧u̧ awɔb nkɨ̀Ꞌɨ̂ ndàꞋà èbɨꞋte mèngǎ̧ kǒ nɨŋ ntsòkè mèntɨ̧ɨ̧ mɨ̧. 25Ale, baa tsèke a si, ndàŋkè bàgème nê, bà lȩ̀ bòt babe è ntsà bɔ̀ kɨꞋɨ nkwène ane yɨ̧. Bòt ngaa e ghȩ̀ȩ̀nè ne ngule bɔnyɨ ba Bànabasì bɔ̂ Pɔ̂l, 26wu bɔ ŋa ènyit yɔb ane àfaꞋa Yesò Klistò Lefɨ̀Ꞌ wa la. 27Ale, ba tsàa a Judàs bɔ̂ Sȩlàs nê bɔ̀ kɨꞋɨ shu awɨ̧ bɔ̀ɔmbɔŋ mèngà̧ maa ba shɨ a si la. 28Ba Fo Kèfə ba e kwaꞋtè nê, bà ka nɔ̀ŋè àbòꞋà ko tsa àtsə ayɨ̧, kà wu mbɨ̧ tàa wòt Yesò ègème e bɔ̂ ndɨ tàa me nɔ̀ŋè la. 29Bɨ̀ ka tsi njɨ̀ èghɨ bɔ nɨŋ ntsì èpɨ̧̀ la. Bɨ̀ ka tsi nkwèle nyà̧ bɔ tɨ̀ŋè la. Bɨ kà mè ntsi njɨ̀ àlo̧. Bɨ̀ ka me nɔ̀ŋkè ne bèzi kà wu èbɨ̧. Bɨ paŋà mbɨ̧ tàa ntsɔ̧̀, ko bɨa taꞋa mě ètsə a èbem èngǎ̧ Mbɔ̧ɔ̧mà.
Bɨ̀ tseke ntsɔ̧̀ bà tsiꞋi àfɨ̀Ꞌ àko.
30Bɔ tsàà bɔntu̧ bu, bɔ gha a Antìɔ̀k, èfète bòt Yesò bàgème adzìꞋ yeamɔꞋ, ŋǎ àkatè yu abua yɔb. 31Bòt ngaa e tɔ, ntàꞋa wùꞋtè àwɔb nkàà nkɨ̀àte ntsɔ̧̀ tu bɔ zə a èbèm la. 32Judàs bɔ̂ Sȩlàs wu bɔ̀ le wu bèndàꞋàtɔŋ Mbɔ̧ɔ̧mà bɔ̀ɔ mbɔŋ la e li ntàꞋa làꞋà mèngǎ̧ nɨŋ nkààtè bɔnyɨ ba bu. 33ÀfɨꞋa bɔ tseke nyaŋ abàꞋ və la, bɔnyɨ ba bu e làꞋnè àwɔb nè èntɨ̧ɨ̧ wɔb wemɔ̀Ꞌ nê, bɔ̀ wèna abua bòt bu bɔ li ntsàà àwɔb la. 34[Ka Sȩlàs è tsèke avi wuê abàꞋ və.] 35Pɔ̂l bɔ̂ Bànabasì e li nyaꞋa ntsèke a Antìɔ̀k, bɔ̂ bòt ko nyaŋ e me làꞋa mè nyɨ̀Ꞌta èngǎ̧ Lefɨ̀Ꞌ.
Pɔ̂l bɔ̂ Bànabasì e sàbtè
36Àfɨ̀Ꞌ àko a li me tsě, Pɔ̂l shu abua Bànabasì nê, “Ghɨa bà wèna mù èpfəè nɨ̧ bu ègème ba li ntsè ndàꞋà èngǎ̧ Mbɔ̧ɔ̧mà la, ndzě ndɨ bɔnyɨ ba bu àa la.” 37Tà shu ale, Bànabasì è bɨ̧ɨ̧nè mbɔ̂ me kɨ nê bɔ̀ nɨ a Jɔ̌n Mak, 38ka Pɔ̂l kwàꞋtè nê, a bakà bɔ̂ŋ nê bɔ̀ nɨ atò, ngu ndɨ̀ wu tà li sà àwɔb a Pàmfilìà nkua akwèn, tà kà lem ntsèke bɔ̂ tò ba aa paa àfàꞋ yu nɔ̂ la. 39Àyɔ̀ŋ kekweelè a lɔ̀Ꞌɔ a kètsìà awɔb adù̧ ànəa mbɔŋ tè bɔ sàbtè. Bànabasì nɨ a Mak bɔ̂ tò e nyi a èbem ànkànuꞋ ngà nè àlaꞋ a Sȩplùs. 40Pɔ̂l bɔ̂ nɨ a Sȩlàs, bɔnyɨ ba bu e zì àwɔb a tèkitebu Mbɔ̧ɔ̧mà, bɔ bɔ̂ sà abot. 41Pɔ̂l ba e lɔ̀Ꞌ ale, ntsè èlaꞋ Silìà nè Sìlisìà me ghȩ̀ȩ̀na ndɔ̀ktà bèchɔsì bu.
Tɔ̀màtià ghà bɔ̀ Pɔ̂l nè Sȩlàs
હાલમાં પસંદ કરેલ:
ÀfaꞋa 15: mnf
Highlight
શેર કરો
નકલ કરો
Want to have your highlights saved across all your devices? Sign up or sign in
© 2006, Cameroon Association for Bible Translation and Literacy
