ÀfaꞋa 14
14
Ntu̧ Ntsɔ̧̀ a Èkonìòm
1Pɔ̂l bɔ̂ Bànabasì e li nga a Èkonìòm ale, mènəè bê nguê mbɨ̀Ꞌɨ̀ è li ntse a Antìɔ̀k la. Bɔ li nyi a èbem lob Mbɔ̧ɔ̧mà ndàꞋ èngǎ̧ e kweelè tè Bèjuê nyaŋ nè bòt kà wu Bèjuê e zì mèntɨ̧ɨ̧ mɔb ane Yesò. 2Ka Bèjuê bu bɔ tu̧ ezə èngǎ̧ Mbɔ̧ɔ̧mà la e lute bòt kà wu Bèjuê tè ntsòkè ètsə bɔb bɔ tsiꞋi me pààbe bɔnyɨ ba bu. 3Bɔntu̧ Yesò bu e bɔ̂ ngɨ̀ ale ntsèkê abàꞋ və ane àfɨ̀Ꞌ à seè, me làꞋà ka bɔ̌, shua bòt bu ndɨ Mbɔ̧ɔ̧mà nàa nkɔ̀ŋkà àwɔb la. Mbɔ̧ɔ̧mà li mè ŋà àwɔb mètàŋ bɔ me nɨa ngɨ̀à tèwuute ènəê kà ye fɨ̀Ꞌ nɨa nyɨ̀Ꞌta mètàŋ tò mè ngɨ̀à ngɨŋa mènəè nɨa nyɨ̀Ꞌta nê ànəa bɔ làꞋà la wu nkûŋ. 4Ènɔ̧̂ bòt bu àpfəèà nɨ̧ yu la e ghàbtè èbà bebe, bòt ko e tɨ̧ɨ̧ akwene Bèjuê, èbeko e tɨ̧ɨ̧ akwene bɔntu̧ Yesò bu. 5Bɔ lɔ̀Ꞌɔ àfɨꞋa mbɔŋ, Bèjuê bɔ̂ bɔɔjuŋ ayɔɔ yɔb nè bòt kà wu Bèjuê e làŋkè nê bɔ̀ ghɨ̧̀ɨ̧̀nè bɔntu̧ Yesò bu ntèmte awɔb ane àti. 6Bɔntu̧ bu e me ghɨ̀ tê ndzə ànəa ngaa ndùùlà ngà àwɔb àlaꞋ a Lȩ̀konià a èbem èpfəè bu è wu Lislà nè Debì là, fɔ̀ɔ̀le a èdzìꞋ bu a ngèt èpfəè nɨ̧ ngaa la. 7Bɔ gha abot ale, me tsɔ̀te Ntu̧ Ntsɔ̧̀ Yesò.
Ntu̧ Ntsɔ̧̀ a Lislà nè Debì
8Wòt kǒ li ngu a Lislà èka tò e ŋɔꞋte la. Mbɨ̀Ꞌɨ̀ bɔ̀ le bi atò la, tà me ŋɔ̧̀ɔ̧̀mè ŋɔ̧ɔ̧me, kà li mè ghȩ̀ȩ̀ne àtatsi. 9È li ngu ane àli ako tà wu a si tà tsekè me yute Ntu̧ Ntsɔ̧̀ yu Pɔ̂l tsɔ̀tà la. Pɔ̂l ye nê, betsiꞋa tà zì èntɨ̧ɨ̧ vi ane Yesò tè tà bə atò. Ale, tà tsìte àghɨ azi ane tò, 10mbɔ̂ ŋȩ nê, “LɔꞋɔ ntɨ̧ àtatsi.” Mbê wu bê nkȩ ndɔ̀Ꞌ a si me ghȩ̀ȩ̀ne.
11AfɨꞋa ènɔ̧̂ bòt bu e ye àghɨa Pɔ̂l è ghɨ̀ la, bɔ bùꞋ me ŋȩa shua ane ndɨ̧ yɔb bɔ̀ɔ bòt àlaꞋ a Lȩ̀konià nê, “Bèmbɔ̧ɔ̧mà e tsiꞋi chu a kètsìà wa mbɨ̀Ꞌɨ̀ bɔbȩ!” 12Mbɔ̂ ntsì èlen Bànabasì ane Ziyù #14:12 Ziyù li ngu nàmbəa nɨ̧ àpfəèà nɨ̧ Lislà. Ateko bɔ li ngua ntɔ èlen lu Ziyù la abua Bànabasì, ngu nê tà li ngu wòt nè àghema azi. è wu mbɔ̧ɔ̧mà kǒ la, ntsì è le Pɔ̂l ane Emès #14:12 Emès li ngu nàmbəa tàa ndàꞋà àdziꞋa Ziyù la. Ateko bɔ li ngua ntɔ èlen lu Emès la abua Pɔ̂l ndɨ̀ wu è wû wòt tà li ngua ndàꞋà la. nkàà nê tà lè wu wòt tàa ndàꞋà èngǎ̧ wu la. 13Ntsìà mèpɨ̧̀ lob mbɔ̧ɔ̧mà Ziyù yu mpɨ̀Ꞌne tò wu a ngèt àpfəèà nɨ̧ yu la, li nɨ bèlu̧ mpɔ̀ŋ, ndzì tèfəꞋte èyɨt ane yɔb nkɨ̀Ꞌɨ̂ èsele ètsələèꞋ wu bòt àa ntsèà la. Bɔ̂ ènɔ̧̂ wu e li ngua nkɨ tsǐ èpɨ̧̀ eŋa abua bɔntu̧ Yesò bu.
14Bànabasì bɔ̂ Pɔ̂l e zə àghɨa bɔ kɨ e ghɨ̌ la, ànəa ngaa a sàà awɔb tè bɔ saãaãtè ndǐ tɔb me ŋȩa ndùùlà nga a kètsìà ènɔ̧̂ bòt bu. 15Bɔ̀ gha abot bɔ biite bòt bu nê, “Bèshu̧ ba, bɨ ghɨ̀ na ka me ghɨ̀ èwuu ànəê yaa à? Ba wu bɔbȩ mbɨ̀Ꞌɨ̀ bɨ̀a mbɔŋ? Ba wu a si ŋàa nkɨ etsɔ̀te Ntu̧ Ntsɔ̧̀ Yesò abua yɨ̧, mbɨ̀Ꞌɨ̀ bɨa kubte ane ejuke ènəê baa, etsiꞋi me kùŋè wuê a Mbɔ̧ɔ̧mà yu̧ wu tà ghɨ̀ ègwet nè sitsǎꞋ, mè ngɨ̀ mèleb nè èghɨ ègème aa tèbèm la. 16È li ngu àfɨꞋa mbì, tà sà àlaꞋ ègème a me sààla nga a vi ne alu̧. 17Ka tà bɔ̂ me ghɨ̀ wuê èghɨ ntsɔ̧̀ nɨa nyɨ̀Ꞌta àlȩê nê yea və. Tàa ngɨ̀ tà shuke mbɨ̀ŋ a ègwet è chu, tà ghɨ̀ èghɨjɨ bɨ̧ e kɔꞋɔ àfɨꞋa bɨ̀a nkɨà la, tà ŋàa awɨ̧ èghɨjɨ mè ngɨ̀à mèntɨ̧ɨ̧ mɨ̧ lu̧a nè mèngùꞋte.” 18Bɔntu̧ Yesò bu e li mbàtê ndàꞋ èngà̧ wa ale, ka mbɔ̂ ntaꞋa eye ngoꞋ ka ngɨ̀ ènɔ̧̂ bòt bu e tseke kà tsì èpɨ̧̀ wu abua yɔb.
19Bèjuê ko e li ndɔ̀Ꞌ a Antìɔ̀k wu a Pìsidìà la, nè Èkonìòm nkɨ̀Ꞌɨ̂ ntsòkè àtsəa bòt bu, bɔ temte a Pɔ̂l ane àti, səŋne atò nɨŋ ndzə àpfəèà nɨ̧ yu ntanda nê tà pfə tê ndɔ̀Ꞌ. 20Ka àfɨꞋa bòt Yesò e bu̧u̧te a mbɨ̧̀ tò ntsàꞋte a Mbɔ̧ɔ̧mà la, tà bê ndɔ̀Ꞌ a si, ngwènè a pfəè və. ÈtsəꞋ e sàꞋà ntsi, bɔ̂ Bànabasì e ghà àwɔb a Debì.
Bɔntu̧ Yesò e wènè a Antìɔ̀k wu a Silìà la
21Pɔ̂l bɔ̂ Bànabasì e li ntsɔ̀tè Ntu̧ Ntsɔ̧̀ yu a Debì tè bòt nyaŋ e tsiꞋi bɔkatè Yesò. Bɔ lɔꞋɔ abot nkua akwèn nga a Lislà, ndɔ̀Ꞌ nga a Èkonìòm, mbɔ̂ ntsè nga a Antìɔ̀k è wu a Pìsidìà la. 22Ngà ale, me ghȩ̀ȩ̀ne a èdziꞋ baa ègème, ndɔ̀ktà mèntɨ̧ɨ̧ bɔkatè Yesò nê bɔ̀ me nɨ èngǎ̧ tò nɨa ngà wuê nè mbì. Bɔ ghɨ̀ bɔ nê, “Ba bɔ̂ ndɨ bàa taꞋa eye ngoꞋ ka enyi Kèfɔ̧̀ Mbɔ̧ɔ̧mà la.” 23AdzìꞋ àgème bɔ ghà la, bɔ yɔꞋɔ bɔɔjuŋ àtsəa bòt chɔsì bu. Bɔ ghɨ̀ ale, bɔ tsaꞋte a Mbɔ̧ɔ̧mà kà jɨ èghɨjɨ mbɔ̂ ndzì bòt mbɔŋ a tèkitebu Yesò wu bɔ zì mèntɨ̧ɨ̧ mɔb ane tò la. 24Mbɨ̀Ꞌɨ̀ bɔ ghȩ̀ȩ̀ne àbâ àlaꞋ a Pìsidìà tè ndɔ̀Ꞌ la, bɔ gha a Pàmfilìà. 25Bɔ li ndàꞋà èngǎ̧ Mbɔ̧ɔ̧mà a Pegà nchu nga a Àtalìà.
26Bɔ̀ lɔ̀Ꞌɔ abot, bɔ nyi a èbem ànkànuꞋ ngwènè a Antìɔ̀k, è wù àdziꞋa bɔ̀ le zi awɔb a tèkitebu Mbɔ̧ɔ̧mà nê tà baabe awɔb bɔ̀ gha ngɨ̀ àfàꞋ yaa bɔ wu anè mpààtâ la. 27ÀfɨꞋa bɔ nyi a Antìɔ̀k la, bɔ fetè bòt chɔsì bàgème adzìꞋ yeamɔꞋ. Mbɔ̂ shu awɔb ndɨ Mbɔ̧ɔ̧mà li ngɨ̀ nè nɔ̀b a lèghȩ̀ȩ̀nè wu la, mè shu awɔb ndɨ Mbɔ̧ɔ̧mà ghaꞋa alu̧ tè bòt kà wu Bèjuê e zì mèntɨ̧ɨ̧ mɔb ane Yesò la. 28Bɔ̂ bɔkatè Yesò bu e ntsèke abàꞋ və ane àfɨ̀Ꞌ à seè.
હાલમાં પસંદ કરેલ:
ÀfaꞋa 14: mnf
Highlight
શેર કરો
નકલ કરો
Want to have your highlights saved across all your devices? Sign up or sign in
© 2006, Cameroon Association for Bible Translation and Literacy
