NGÛGÎ 6
6
Ateetheeria mûgwanja ba atûmwa
1Kagiitaani gaku eetîgîri bakûthi na mbere kwingîa, eetîgîri Angiriki na eetîgîri Aibirania îbaarî na îtheto. Angiriki baanung'unaga bakauga ntigwa ciao iteeyagwa ûteethio bwa kûgana irio bikîgaîwa kîra ntugû. 2Atûmwa babu îkûmi na baîrî beeta eetîgîri amwe bonthe. Babeera, “Gûtiagîrîte tûtiga gûtûmîîria kiugo kîa Ngai n'ûntû bwa kûgaa irio. 3Kwoogu, aruayia na aarayia, thuuraani antû arûme mûgwanja kîrî biû, bara bûkûmenya ibaûyûrîîtwe i Kîrundu Ûmûtheru na barî na ûûme bwingî. Antû babu mûgwanja i bo tûkaa ngûgî înu. 4Tiû tukeenenkanîra kûromba na kûruta ngûgî ya gûtûmîîria kiugo.”
5Eetîgîri bonthe baakeneera îthûgaanio rîru. Baathuura muntû eetagwa Stibini aarî na wîtîgio bûûnene mûno na aûyûrîîtwe i Kîrundu Ûmûtheru. Baacooka baathuura Piripû, Purokooras, Nikanoori, Timooni, Parimenas na Nikooraûs. (Nikooraûs aarî wa kuuma Antiokia, naagarûkîîte atuîka wa ndini ya kîîyaundi.) 6Antû babu bairwa mbere ya atûmwa. Atûmwa babarombera babaigîîrîîte njara.
7Kiugo kîa Ngai kîathi na mbere gûtamba, eetîgîri bongeereka mûno Njerusaremu. Na wana kinya *athînjîri ba Ngai baingî baagîa na wîtîgio.
Stibini aagwatwa
8Stibini aarî muntû aûyûrîîtwe n'ûtugi na inya. Naaringaga biama biinene na akoonania magegania maanene. 9Kûrî antû baaturagia Stibini mbaara. Antû babu baarî ba *sinagoogi yeetagwa ‘Sinagoogi ya bara bathaûre,’ na baumîîte Kureni, Aregicandiria, Sirîsia na Îcia. Antû babu ibaakararagia Stibini, 10îndî batikîmûkîria ûûme n'ûntû Stibini aaragia na ûûme bûûnene mûno, na inya ya Kîrundu Ûmûtheru. 11Antû babu baabangîra Stibini. Antû bamwe baakûûyîîra ûrongo bauga, “Tûreegiirue akîaria mantû maathûûku îgûrû rîa Musa na Ngai.”
12Beengîîra antû, akûrû, na aarimû ba watho baagwata Stibini bamwira kîrî akîama. 13Baareeta antû baatuîrîîra Stibini, bauga, “Muntû ûyû rîonthe agwetaga mantû maathûûku îgûrû rîa nyomba îno întheru ya Ngai na *watho bwa Musa. 14Tûreegiirue akiuga Yiesû ûyu wa kuuma Nasareethi akomborania nyomba îno ya Ngai na agarûre wîthîre bûra twaumaniirie na bu kîrî Musa!”
15Bara bonthe baarî gûku kîamaani nwaka boona ûthiû bwa Stibini bwagarûka. Baakara bamûkûnîrîîte meetho, boona bwakara ta bwa mûraîka.
હાલમાં પસંદ કરેલ:
NGÛGÎ 6: thk
Highlight
શેર કરો
નકલ કરો
Want to have your highlights saved across all your devices? Sign up or sign in
© 2019, Bible Translation and Literacy
