NGÛGÎ 5

Anania na Sabira baarongoa

1Muntû ûngî eetagwa Anania barî na mwekûrû wake, Sabira, beendia kîthaka kîao. 2Mwekûrû wake akîmenyaga, Anania aathûkia mbia imwe kîrî ira kîthaka kîaumire aiga irî cia gûtûmîra barî bonka, airîra atûmwa inu ingî.

3Petûrû amûûria, “Anania, i mbi îtûmîîte Saitaani aûyûra nkoro yakû? Ûkûrongoia Kîrundu Ûmûtheru. Kûrî mbia imwe cia kîthaka waigîîte ûgaitûmîra ûrî wenka. 4Mbere ya wendia kîthaka gîku kîraarî gîaku. Na ûgûkîendia mbia nwa ciaku iraarî. I kî îîndî n'ûntû ûrûthîîte ûûgû? T'antû warongoia, i Ngai.”

5Anania akwîgua mîgambo înu aagwa nthîgûrû, aakua. Muntû wonthe ûra eegagua mantû mamu naamakaga mûno. 6Nthaka ciaya cioga mwîrî wa Anania baumagarûkia, baathi bamûthika.

7Nyuma ya mathaa ta mathatû ûgu, mwekûrû wa Anania aaya gûku atûmwa baarî. Ataiyî bûra gwakarîkîîte. 8Petûrû amûûria, “Ingûkûûria, ino i cio mbia ira kîthaka kîenu kîraumire?”

Sabira amwîra, “Yîî, i cio.”

9Petûrû amûûria, “I kî n'ûntû bûrabangire kûgeria Kîrundu wa Mwathani? Makinya mamu ûkwîgua maayîîte i ma bara bauma kûthika mûkûrû waku. Kinya woû ibagûgûkamata bagakûthike.”

10Warîo, Sabira aagwa nthîgûrû magûrûûni ma Petûrû, aakua. Nthaka ira ciaya ciethîra arî ûmûkuû. Bamûkamata bamûruta nja, baathi bamûthika rûteere, waagu akubî na ara baarî bakûthika mwene. 11Eetîgîri bonthe na antû bonthe bakwîgua mantû mamu baamaka mûno.

Biama bira atûmwa baaringire na magegania mara boonaniirie

12Atûmwa baaringa biama biingî na boonania magegania maingî kîrî antû. Eetîgîri bonthe baarîîkanaga nyomba ya Ngai, rwembeani rwa Soromoni. 13Bara bangî batikîûmîîria beengîrana na bo amwe na kwîgua iboonaga baarî antû beega. 14Antû bangî, arûme na aka, bara beetîgiirie Mwathani boongeereka kîrî eetîgîri. 15N'ûntû bwa biama bira atûmwa baaringaga, antû baumagaragia aayie baao bakabakamata bakathi bakabamaamia mîgekaani kana mîkondorooni rûteere rwa barabara kaingo Petûrû akûrûkîîte kîrundu gîake kîringithia nwa bamwe. 16Na ikwarî na antû baingî mûno baayaga baumîîte taûni ira ciarî akubî na Njerusaremu bareeteete aayie na bara baarî na irundu biithûûku. Na bonthe boorua.

Atûmwa baathaîkwa nceera

17Mûthînjîri ûra mûnene wa Ngai na antû baake bonthe, *Asandukai, baatua kwîgua atûmwa rûriitho. 18Babagwatithia baingîrwa nceera. 19Îndî ûtugû bûbu mûraîka wa Mwathani aaya abarugûrîra. Abeera, 20“Îthiini nyomba ya Ngai bûtûmîîrie antû bûbeere mantû monthe ma mwoyo ûmûyerû.” 21Atûmwa baathîkîra ûgu mûraîka aabeerire, baaraûka nyomba ya Ngai baanjîîria kûrutana antû.

Mûthînjîri ûra mûnene wa Ngai na antû baake beeta akîama na akûrû bonthe ba Isiraeri amwe. Rîru baatûmana atûmwa bagîîrwa nceera. 22Îndî acikaarî babu baatûmîîtwe bagîîra atûmwa, bagûkinya bataabeethîra nceera. Baacooka kîrî kîama. 23Bauga, “Tûthiire twethîra mîrango îrî îminge bwega mûno na akaria bakarîîtie. Tûkûrugûra twathûngîra ndeni gûtirî we tûreethîra ku!” 24*Athînjîri bara banene ba Ngai na mûnene wa akaria ba nyomba ya Ngai bakwîgua ûgu baarigicana mûno n'ûntû bataiyî bûra gwakarîkaga.

25Muntû ûmwe i rîo aayire abeera, “Antû bara bûrathaîkithîîtie barî nyomba ya Ngai. I ku barî bakîrutanaga antû.” 26Mûnene wa akaria ba nyomba ya Ngai aathi na antû baake, baaya na atûmwa. Bataatûmîra inya n'ûntû ibaakuthûkaga antû babaringanga na maiga.

27Bakûbareeta, atûmwa baarûngamua mbere ya akîama. Mûthînjîri ûra mûnene wa Ngai abaûria, 28“Anga tûtaabûkaaniirie twabwîra bûtikaarutane antû mantû ma muntû ûyû? Teeneeni îîndî bûra bûûyûrîîtie ûrutani bwenu Njerusaremu yonthe. Ka bûkwenda nthakame yake îtûcookera?”

29Petûrû na atûmwa bara bangî babeera, “Nwa mwanka twathîkîre Ngai bantû a twathîkîra muntû. 30Ngai wa biûyûûyû bietû naariûkiirie Yiesû ûra bwaûragithiirie na njîra ya kwamba mûtharabaani. 31Ngai aamwîtithiirie îgûrû amwaiga njaraani yake ya ûrîo, amûtuîkithia Mûnene na Mwonokia kaingo apa antû ba Isiraeri kaanya ga kwîrira na ga kûrekerwa meeyia maao. 32Tiû, atûmwa, na Kîrundu Ûmûtheru ûra Ngai eeyaga bara bamwathîkagira, tûrî akûûyî ba mantû mama.”

33Akîama babu bakwîgua ûgu baamuntwa i nkoro, beenda kûbaûraga. 34*Mûbarisai ûmwe, mûkîama, eetagwa Gamarieri aarûngama. Aarî mwarimû wa watho na naatîîyîîtwe mûno n'antû. Akûrûngama auga atûmwa barutwe nja aniini. 35Eera akîama babu bangî, “Antû ba Isiraeri, thûgaanîriani bwega ûntû bûbû bûkwenda kûrûtha antû baba. 36Kagiita kamwe ikwarî na muntû eetagwa Theunda. Eetuîte muntû wa gîtûmi, antû ta magana mana baatuîka athingati baake. Theunda akûûragwa, athingati baake bonthe ibaanyagaaraniirie. Na ûyu n'uu warî mûthia. 37Nyumaani ikwarî na muntû ûngî eetagwa Njundas kagiita kara antû baataragwa. Aarî wa kuuma Gariiri. Wana we aakuuyia kîrîndî kiingî gîa antû, gîatuîka athingati baake. Îndî wana we naûragirwe, athingati baake wana bo baanyagaarania. 38Kwoogu îîndî bûra nkwenda kûbwîra n'atî, tiganaani na antû baba. Ûkaaya kwîgua mworooto wao na ngûgî yao n'ya kîîmuntû, îkaathira. 39Îndî ûkeegua n'ya Ngai bûtiûmba kûbarigîîria bamîruta. Îmenyeereeni waûmba kwîgua i Ngai bûkûrûa n'we.”

40Akîama baathingata mataaro ma Gamarieri. Bauga atûmwa bathûngîre. Bakûthûngîra babaringithia ibooko. Babakaania babeera batikeere antû mantû ma Yiesû, rîru babarekia. 41Atûmwa bauma gûku bakeneete mûno n'ûntû bwa kwîgua boonirwe baagîrîte ba kûnyamaarua n'ûntû bwa riîtwa rîa Yiesû. 42Ntugû cionthe bataatiga kûrutana na gûtûmîîria gûku nyomba ya Ngai na mîciî ya antû atî, Yiesû n'we *Mesia.

હાલમાં પસંદ કરેલ:

NGÛGÎ 5: thk

Highlight

શેર કરો

નકલ કરો