Mata 6
6
Matapla lakəl aŋa mazlak à azlaməna kuɗa
1“Baŋa kaɗahaw dziriga kà, kaɗahawwaŋ kà huma yewdi aŋa azladza aw. Baŋa kiya uwaga kaɗahawwaŋ kà, kadàɓəzaw masik la slaka Baba aŋkul uwana la zagəla aw.”
2“Baŋa asa à ka mav sili à masla kuɗa anik kà, kahama kà dza à ahəŋ dàŋ kà mavàl aw, bokuba uwana azlaməna magolla dza taɗehəŋ la azlagày madəv kuɗa la aku, ŋgaha la azlamakalapa tetəvi la ama aw. Taɗehəŋ kiya uwaga kà, kà azladza aŋa mazləɓ atà. La dziriga gəpəh à akul, atà kà taɓəz masik aŋatà tsewwa adagay. 3Ama kak kà, baŋa kav sili à masla kuɗa kà, ɗahà uwaga la kiya uwanay: Amiyaka bà slawda aŋak nekwa gà babay kà, asəl uwaga aw, 4kà mavày aŋak aŋa magay masəlay gà aw. Say Baba aŋak, uwana la zagəla la afik, la uwana asəl tatak uwaga pəra, ŋgaha masla adàwulla à ka ala məŋga aya.”
Matapla lakəl aŋa madəv kuɗa
(Luka 11.2-4)
5“Baŋa kadəvaw kuɗa kà, kaɗahawwaŋ bokuba aŋa azlaməna magolla dza aw: Kà uwana atà kà, asa à atà madəv kuɗa kà la slaka matsizlla ala la azlagày madəv kuɗa la aku, ŋgaha la azlamakalapa tetəvi la ama kà azladza gesina aŋa manəŋ atà. La dziriga gəpəh à akul: Atà kà, taɓə̀z masik aŋatà, tsewwa adagay. 6Ama kak kà, baŋa asa à ka madəv kuɗa kà, hàd à gày, tsàk à vok à ama, ŋgaha də̀v kuɗa à Baba aŋak, uwana la zagəla la afik, ŋgaha Baba aŋak uwana asəl uwana kaɗehəŋ la ləv aŋak la tsəh, adav à ka masik aŋak.”
7“Baŋa kadəvaw kuɗa kà, katsalahaw azlagay deydayga à gay pəra, bokuba aŋa azladza uwana tasəl Zəzagəla aw, aw, tadzugw kà la mavats gay wadza wadzaga uwaga kà, ‘Zəzagəla adàtsəɓ à anu sləm’, tagoɗ. 8Kaɗahawwaŋ kiya uwaga aw, kà uwana Baba aŋkul uwana la zagəla la afik asəl tatak uwana kanavaw kuɗa aŋha dagay uwarà, à mok uwana kadanavawal dadàŋ aw. 9Aganay tetəvi aŋa madəv kuɗa:
Baba gami uwana la zagəla la afik.
Ɗahàŋ kà azladza gesina tazləɓa sləm aŋak tsikaslaga.
10Makoray aŋak atsà à waŋ.
Mawoyəŋ aŋak apaka vok la vəɗah,
Bokuba uwana la zagəla.
11Và à anu tatak may, uwana asla à anu lakana.
12Bàs à anu mawisiga uwana məɗehəŋ gesina,
Bokuba uwana məbasaŋ à azladza uwana taɗahà à anu mawisiga à vok babay suwaŋ.
13Tə̀fà à anu kà seteni aŋa mapapat anu, kà anu aŋa masak à madiŋal gel à vok aw,
Ama tə̀fà à anu la ahàl aŋa seteni.” ((Kà uwana makoray, maslay ŋgaha la mazləɓay kà la ahàl aŋak aŋa tsəràh à awtày. Amen!))
14“Baŋa kabasawwaŋ à azladza anik uwana taɗahàkulla mawisiga à vok, Baba aŋkul uwana la zagəla la afik adàbasakulaŋ suwaŋ. 15Ama baŋa kabasawwaŋ à azladza anik uwana taɗahàkulla mawisiga à vok aw kà, Baba aŋkul uwana la zagəla adàbasakulla mawisiga aŋkul uwana kaɗahàwwàŋ suwaŋ aw.”
Matapla lakəl aŋa makəs nəlay
16“Baŋa kakəsaw nəlay kà, pə̀hàwla huɗ adi aŋkul ala, ùzlə̀ɗaw kà kiya aŋa azlaməna magolla dza uwanay taɗehəŋ aw: Atà kà, taɓəɗla huɗ adi, kà azladza gesina aŋa masəlay kà atà la nəlay la abà. 17Ama kak kà, baŋa kakəs nəlay kà, pàl adi aŋak lela, wàz gel aŋak à uda, 18kà azladza aŋa masəlay kà kak la nəlay la abà aw. Say pəra kà Baba aŋak uwana la slaka mahaɗ vok à ahəŋ gà la zagəla, la uwana asəlay pəra, ŋgaha Baba aŋak uwana anəŋa uwana kaɗehəŋ adàvà à ka masik aŋak.”
Ləmana dziriga la zagəla
(Luka 12.33-34)
19“Kahamaw ləmana à gudəŋ uwanay la vok aw, kà uwana mamən akəsay, marzaw akəsay, azlaməna à gəl bay tazləlay, tazəɓay. 20Ama hàmàw ləmana aŋkul kà à zagəla à afik, la abatà mamən la marzaw akəsay aw, azlaməna à gel bay taslala vok aŋa mazləlay kà mazəɓay aw. 21Kà uwana la slaka uwana ləmana aŋak la abatà, la abatà ləv aŋak la abatà, suwaŋ.”
Uɗaka aŋa vok
(Luka 11.34-36)
22“Yewdi kà uɗaka aŋa vok: Baŋa yewdi aŋak kà wurwur kà, vok aŋak gesina kà uɗaka; 23ama baŋa yewdi aŋak la ɗuvats kà, vok aŋak gesina la mələs la abà. Baŋa uɗaka uwana la kak la abà mələs gà, mələs uwaga adàgay taɓaɗamma kaykay.”
Zəzagəla ŋgaha sili
(Luka 16.13)
24“Dza aslala kà atsəp à azlaməŋga à huma à gay səla aw: Adàpəseway anik, ŋgaha adakəs gay aŋa anik, aɗah dziriga à anik, ŋgaha adàkweska anik. Kaslawwalla vok kà matsəp Zəzagəla à huma la sili aw.”
Maf madzugway à Zəzagəla à afik
(Luka 12.22-31)
25“Kà uwaga à uwana gəpəh à akul: Kafàw gəl à ahəŋ kà tatak may la tatak masay uwana kanawkuɗa aŋha, kà madzadzarla kà vok aw, baməraka lakəl aŋa lukut uwana asa à akul kà aŋa matsokw à vok aŋkul, sifa kà aɗuwa tatak may, ŋgaha ma vok babay kà aɗuwa lukut aw takay? 26Nərə̀zàw azlaɗiyaŋ uwana tahoyay la zagəla tsi: Tasləkay ŋgaha tatsəɗay tatak babay aw, taham tatak à vəɗa à abà babay aw, ama Baba aŋkul uwana la zagəla la afik adzadzar atà. Iyay zla, akul ma kaɗuwwaŋ azlaɗiyaŋ aw takay? 27Uwa la tataka aŋkul la abà aslala vok aŋa maziŋ à mavay aŋa sifa aŋha à adi amiya ŋuv la aslasl à gəl aŋha uwa?”
28“Ŋgaha ma, kà mana kafaw gel à ahəŋ kà lukut zlà ma? Akul nərə̀zàw madz à ahəŋ aŋa azlamawuratatay tsi: Taɗàh sləray aw, ŋgaha tavavəɗ lukut babay aw. 29Tsa baməraka Salomon la mazləɓay aŋha gesina kà, aɓəzà à lukut delga kiya mawuratatay uwaga aw.#1 Sufəl 10.4-7 30Zəzagəla adàw lukut à azlakəsaf uwana à vok la fəta bay lakana, tekeɗika lebəŋ kà tadàyakats à akàl à abà: ŋgaha ma azlayla kà vok aɗuwa à akul à vok ɗaɗuwa aŋatà babay aw takay? Akul kà madiŋal gel à vok à tsəh kà akul ala. 31Kiya uwaga kà, kafàwla kà gəl à ahəŋ la magoɗay: ‘Mana mədàzuway lebəŋ mi? Mana mədàsay mi? La mana mədàduw à vok mi?’, kagoɗaw aw! 32Uwaga kà, azlauwana tasəl Zəzagəla aw, la uwana tayàh tatak uwaga koksikoksi. Ama Baba aŋkul uwana la zagəla kà, asəl tatak uwana kanawkuɗa aŋha. 33Fàw gəl à ahəŋ dadàŋ teraŋa kà la makoray Zəzagəla, ŋgaha la madz à ahəŋ la sifa dziriga uwana la abanay anavay, ŋgaha Zəzagəla adàkəs akul à ahàl ala gesina uwana kayahaw. 34Kiya uwaga kà kafàwla kà gəl à ahəŋ kà aŋa lebəŋ aw: Kà uwana lebəŋ uwaga kà, masla la uwana adàf gəl à ahəŋ kà akul, kà uwana ŋgərpa uwana apəhla vok ala kəla mavakay kà aŋa mavakay uwaga pəra.”
હાલમાં પસંદ કરેલ:
Mata 6: mfh
Highlight
શેર કરો
નકલ કરો
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fgu.png&w=128&q=75)
Want to have your highlights saved across all your devices? Sign up or sign in
©2019, Wycliffe Bible Translators Inc. All rights reserve.