Mt 3

Ɨnû ɨmbə̀ʼ ə Jɔ̌n we nɨ nyaʼə nàʼ mɨnib

(Mk 1.1-8; Lk 3.1-18; Jn 1.19-28)

1À nyaʼa ənɨ ə nyùmə̀ we, Jɔ̌n we nɨ nyaʼə nàʼ mɨnib nyaʼa wò ɨŋga ɨbad rɨkwàʼi we rɨ ə Jùdeyà. Wɨ̀ nyaʼa pè kɔ gha ɨŋgam Ŋwiə̀ 2ni, “Mbə̀ beŋ tə fîŋ, ɨmbə̀ʼ ɨghəm nɨ ənû ɨfɔ̀n rɨkaŋ ə fə tiinɨ.” 3Jɔ̌n wɔ̂ yɨə wə̀d we nɨ wə̀d ɨ̀kə̀n Ŋwìə̀ Aizayà nyaʼa ghǎ ɨmbə̀ʼ əməd ni,

“Wə̀d mɔʼɔ wɨə kyeŋ ɨŋga ɨbad rɨkwàʼi ghàə̀ ni,

'Mbə̀ tekɨ ɨnə̂njɨ̀ əmbɨ Ə̀nùŋɨ̀sɨg.

Mbə̀ ghɨ̀ mɨnə̂njɨ̀ məd mbɨ təm!'”

4Mbɨ nyaʼa tekɨ ngywɨ̌ rɨ Jɔ̌n ənɨ ə nyôŋ rɨ kàmel. #3.4Kàmel yɨə nyam kyeŋ mɔʼɔ mbɨ ɨkun ənjìm. Zɨ̀ mei ɨŋga ɨbad rɨkwàʼi. Bə̂d mbɨə kɔʼɔ bə̀ beʼ ɨghɨ ɨgun. Wɨ̀ nyaʼə kòd ɨ̀kɔ̀bɨ̀ gôb ənɨ i ɨkyerɨ. Ɨghɨjɨg məd yɨə nyaʼə ŋgwèmɨ mbɨ ə ju nɨ mbɨ nyaʼa kəʼ rɨŋga bǔʼ. 5Bə̂d mɨ̀nɔnɔʼ rɨ ə Jèrusalèm, rɨŋga Jùdeyà jìm bə̀ fɔrɨ rɨŋga ɨsɨ jìm mbe nɨ nyaʼa kad ɨgyɨ̂ Jodàn nyaʼə wò əsɨ məd. 6Ɨ mbɨə nyaʼə pè benə mbə ɨnû rɨbɔ̀ŋ, əne wɨ̀ nyaʼa nàʼ mɨnib əmbɨ mɨ̀mə̌d ɨŋga ɨgyɨ̀ Jodàn.

7Àyɨə ənɨ wɨ̀ nyaʼa zə mɨ̀Farisiî nɔnɔʼ mbɨ mɨ̀Sadusiî nɔnɔʼ nɨ nyaʼə yeʼe ni wɨ̀ naʼ mɨnib əmbɨ mɨ̀mə̌d, wɨ̀ nyaʼa ghà əmbɨ mɨ̀mə̌d ni, “Mbə yɨə jɔ tɨ rɨbɔ̀ŋ! À kɨə we patɨ əwən ni mbə̀ norə tɨ ənɨ ə ŋgəʼ ze nɨə yeʼe ə? 8Mbə̀ ghɨ ɨnû mbe nɨ chwiə ni mbə fə bèŋ tə fîŋ. 9Tɨ mbə̀ kɔndɨ əwən ni mbə fə jwɨ̀ rəŋgəʼ àmei ɨchî nɨ mbə̀ə ghàə̀ mbənə mbənə ni, 'Tɨ̀ yɨə bɔn tɨ ənɨ əghaŋ ə Abràham!' Mə ghà ɨ nən ni Ŋwìə̀ we tɨ̀ wɨ̀ nɨŋ əti zɔ̂ bèŋ ənɨ ə bɔn Abràham. 10Ka àbei rɨ̀nîn, Ŋwìə̀ fə boŋ jam ɨban ɨghaŋ ɨzed. Əne wɨ̀ bɨrɨ wad ɨzed jìm mbe nɨ chəi mbɨ kɔ rɨtam chɔ̀m màʼ ɨŋga ɨwid.

11“Mə wɨə nàʼ mɨnib ɨ nən ɨ chwi ni mbə fə bèŋ tə fîŋ, àyɨə wə̀d we nɨə yeʼe ənɨ mɨ njìm ə dabə chè əmɨ. Mɨ rɨka kùʼ əmɨ nɨ beʼ ɨtabɨ məd. Məd bɨrɨ cha Əzwî ə Zeŋɨ bə̀ chà ɨwid ɨgwɨ nən. 12Əsɔ twi rɨ̀kwè fə sɨ i ɨkye əbɔ məd nɨ kyeŋ ɨjɔd rəbɔʼ kywɨ̀. Wɨ̀ mɨ kyèŋ, wɨ̀ bɨrɨ fetɨ ti kywɨ̀ chà ɨŋga ŋgə̌n, sɨ tɔ̀n ɨjɔd ɨŋga ɨwid rɨ nìmə.”

Yeso nyaʼa nɨŋ mɨnib

(Mk 1.9-11; Lk 3.21-22)

13À nyaʼa ənɨ ə nyùmə̀ we, Yeso nyaʼa nɔ̀ʼ rɨ ə Galiliî wò əsɨ Jɔ̌n ənɨ wɨ̀ nyaʼa ɨgyɨ̂ Jodàn. Wɨ̀ nyaʼa wò ni wɨ̀ naʼ mɨnib ɨ bɔ. 14Jɔ̌n nyaʼa kə̀b ni njɨ tə bən əməd, əne wɨ̀ nyaʼa ghà ni, “À yɨ àwɔ̀ kəʼ berɨ naʼ mɨnib ɨ num. À sɨ wɨrɨ yeʼe əsɨ num ɨmbə̀ʼ ə yè ə?”

15Yeso nyaʼa wììrɨ̀ ɨ bɔ ni, “Sɨ zɨə yeʼ əne tɨ̀nîn, ɨmbə̀ʼ ɨghəm nɨ zɨə kùʼ ni tɨ̀ ghɨ ɨnû jìm ɨchî nɨ Ŋwìə̀ kəbɨ.” Ənɨ wɨ̀ nyaʼa ghà əne, Jɔ̌n nyaʼa zu benɨ, əne nàʼ mɨnib ɨ bɔ.

16Ənɨ Yeso nyaʼa fə nɨŋ mɨnib, wɨ̀ nyaʼa jwɨ̀ rɨŋga ɨgyɨ̀ we. Àmei əwu əwən, ɨkaŋ nyaʼa fìʼə̀, əne wɨ̀ nyaʼa zə Əzwî ə Ŋwiə̀ nɨ nyaʼə swiʼə yeʼe ɨgwɨ ɨghabɨ tə̀bə̀ŋə pè naŋ ɨgwɨ məd. 17Gɨ̂ nyaʼa ghàm rɨkaŋ ghà ni, “Wɔ̂ yɨ mɨ Wan nɨ mə̀ ghaʼi kwàʼ rɨŋgəʼ, mɨ fîŋ ə bɔ̀ŋ əku ɨmbə̀ʼ əməd.”

હાલમાં પસંદ કરેલ:

Mt 3: mgo

Highlight

શેર કરો

નકલ કરો