KUZOYA 3
3
Kughwa kwa mdamu
1Idana choka erekoghe na mikalo kuchumba nyamandu rose ra isakenyi oreribonyereghe BWANA Mlungu. Nayo ikamzera muka, “Kedi Mlungu waghambie wei msakeja matunda gha midi yose iko mbuwenyi?”#Wuf. 12.9; 20.2 2Muka ukaizera choka, “Dadima kuja matunda gha midi yose iko mbuwenyi; 3ela matunda gha mudi ghuko ghadi na ghadi ya mbuwa, Mlungu wadizerie, ‘Msakeja matunda gharo hata msakeghiadada mchefwa.’” 4Ela choka ikamzera muka, “Ndemchaafwa kungi, 5ela ni angu Mlungu uichi mkaja matunda gharo, meso ghenyu ghichafunukuka, nenyo muchakaia sa Mlungu wemanya mecha na mawiwi.”
6Niko muka iji wawona angu mudi ugho ghwaboie kwa vindo, ghwaghokie mesonyi, na sena ghwakundikie kwa kumredia mundu kumanya, ukawaya matunda gharo ukaja, ukamneka na mumi wake wori, nao ukaja. 7Nao meso ghawo ghikafunukuka, wikatambua angu weeka duu, wikakudungia malemba gha mtini, na kukuboisira weni shuke.
8Nao luma lwa kenyi wikasikira Mlungu ukisela andenyi mbuwenyi, uo mundu na mkake wikakuvisa andenyi midinyi, wisakewonwa ni Mlungu. 9BWANA Mlungu ukammbanga uo mundu ukighamba, “Koko hao?” 10Nao ukatumbulia, “Naasikira kukicha andenyi mbuwenyi, niko naobua ngakuvisa, angu neeka duu.” 11Nao BWANA Mlungu ukamzera, “Nani wakughoria wei kooka duu? Welee, kwaaja ghuja mudi nerekukanieghe kusakeghuja?” 12Uja mundu ukaghamba, “Uhu muka koreninekieghe ukaieghe andwamweri nani, nuo wanineka matunda gha ugho mudi, nani ngaja.” 13BWANA Mlungu ukamzera muka, “Kwaki kwabonya huwu?” Muka ukatumbulia, “Ni choka yanikalia nani ngaja.”#2 Wakor. 11.3; 1 Tim. 2.14
Mlungu kureda kutanya
14BWANA Mlungu ukaizera choka,
“Kwa kukaia kwabonya ilagho iji,
kwawasirwa njowe oho kuchumba mfugho rose,
na nyamandu ra isakenyi rose.
Kwa kifu chako kuchaghenda,
na teri kuchaija matuku ghose gha irangi jako.
15Nichawika wumaiza aghadi yako na uo muka,
na aghadi ya kivalwa chako na kivalwa chake.
Uo uchachibara chongo chako,
na oho kuchamluma ghimbe yake.”#Wuf. 12.17
16Nao ukamzera muka,
“Nichaghuchuria wasi ghwako ngelo ya kuva wana,
na oho kuchava wana kwa kuwawa elaima sena,
bea yako ichakaia kwa mumi wako,
nao uchakubonyera nguma.”
17Nao ukamzera Adamu,
“Kwa kukaia kwasikira malagho gha mkako,
kukaja matunda gha ghuja mudi nerekukanieghe kusakeja,
ndoe yawasirwa njowe kwa wundu ghwako,
kwa wasi kuchaja mavalo ghake,
matuku ghose gha irangi jako.#Waeb. 6.8
18Ndoe ichabusa masaka na minjwa,
na oho kuchaja mavalo gha mbuwa.
19Kwa marughudia gha wushu ghwako kuchaja vindo,
hata kwawuya ndoenyi andu korefunyiroghe.
Angu ko teri oho, na terinyi kuchawuya.”
20Nao Adamu ukamneka muka wake irina ukammbanga Hawa, kwa kukaia uo nuo mae wa wadamu wose. 21BWANA Mlungu ukawiboisira Adamu na mkake marwao gha mrongo, ukawirusha.
Adamu na Hawa kufunywa mbuwenyi
22Nao BWANA Mlungu ukaghamba, “Ola uhu mundu wakaia sa umu odu kwa kumanya mecha na mawiwi. Lindienyi usecheghorua mkonu ghwake na kuwaya matunda gha mudi ghwa irangi wori na kuja, uchedua moyo kwa kala na kala.”#Wuf. 22.14 23Kwa huwo Mlungu ukamfunya mbuwenyi ya Edeni, uilime ndoe kwa iyo orebonyereghe. 24Nao ukammbinga uo mundu, ukawika makerubi chia ra mashariki ra iyo mbuwa ya Edeni, na lufu luakagha modo lukakaia lukimara ii chia na ii chia kuilindia chia evikia ugho mudi ghwa irangi.
હાલમાં પસંદ કરેલ:
KUZOYA 3: TAITA
Highlight
શેર કરો
નકલ કરો
Want to have your highlights saved across all your devices? Sign up or sign in
©Bible Society of Kenya, 1997
All rights reserved.