Luk 24

1Lăp 'brưch hơdah til pơgê năr mônh, lu drŏ-kăn ei chĕp ba pơgang 'bâu phu mă đêl lu sư hơmet lê̆ noh na năm tơ bơsat. 2Lu sư 'bôh 'măng tơmo mă klơ̆p bơsat noh tơpơih boih. 3Na lu sư mơ̆t lăng lăm bơsat ei 'bôh jua kơ atâu Yêsu. 4Lu sư 'bôh tơdrong noh na lu sư sơleng kơ đon. Lăp pă 'biơ̆ kơ 'nei 'bôh blư hloi kơ 'bar 'nu linh jang 'lơ̆ng dơ̆ng jê̆ lu sư. Bre sư hrŭk ao kok rang hơdah. 5Lu drŏ-kăn ei hli dêh tơpă na lu sư bon tơ teh. Na bre linh jang 'lơ̆ng ei khan kơ lu sư thoi âu: “Yua kơ kiơ iĕm chă bơngai arih tơ anih đe lôch? 6Sư ưh pă oei tơ âu boih yua kơ Sư iung arih đơ̆ng lôch boih. Na iĕm hăm 'blŏk kơ tơdrong Sư bơtho iĕm tơ dêh Galilê ki ưh? 7Sư khan đe gô jao Sư Kon Bơngai kơ lu bơngai yoch, na lu sư gô pơlôch Sư tơ 'long pơglang. Mă-lei kơtĕch pêng năr Sư gô iung arih dơ̆ng.”

8Na lu sư 'blŏk hơdơ̆r kơ nơ̆r Yêsu bơtho thoi noh ki.

9Na lu sư hơloh brŏk roi dôm tơdrong noh kơ lu mơjĭt-mônh 'nu bơngai pơhrăm păng Yêsu hăm đĭ kơ lu bôl sư mơ̆n. 10Lu bơngai drŏ-kăn mă 'bôh tơdrong noh hei, anăn lu sư Mari đơ̆ng Pơlei Mađơla, Jôanna, hăm Mari mĕ bre Jôsê hăm Yakơ; păng kư̆m đei lu bơngai drŏ-kăn nai dơ̆ng mơ̆n kiơ̆ lu sư.

11Mă-lei lu bơngai pơhrăm păng Yêsu ngêh kơ lu drŏ-kăn ei hơlĕnh đĕch, na lu sư ưh kơ lui. 12Mă-lei Pêtrôs iung kơdâu năm tơ bơsat. Sư kŭp nger lăng tơ lăm bơsat ei, sư 'bôh che kok đêl đe lôm akâu Yêsu oei 'bơ̆t ei, mă-lei ưh kơ 'bôh akâu Yêsu ôh. Na sư brŏk tơ hnam tơtĭnh lăng sơleng kơ đon.

'Bar 'nu bơngai tơ'bơ̆p Yêsu rok trong

13Kơplah năr ei đei 'bar 'nu bôl lu sư năm tơ Pơlei Emmaut. Đơ̆ng Pơlei Jêrusalem truh tơ pơlei 'nei dang mơjĭt-mônh kơsô̆. 14Kơplah bre sư oei năm rok trong bre sư pơma dơnuh rah gah tơdrong Yêsu 'nao lôch, 15'bôh blư hloi kơ Yêsu yak hơdai bre sư. 16Mă-lei bre sư ưh kơ kơnăl kơ Yêsu ôh. 17Na Yêsu jet bre sư: “Kơplah biĕm yak rok trong hei biĕm pơma dơnuh tơdrong kiơ?” Na bre sư bơngoi, dơ̆ng hloi. 18Na gah minh 'nu, anăn sư Klôpaih, tơl Yêsu thoi âu: “Dôm lu kon pơlei Jêrusalem hăm lu bơngai tơmoi oei tơ ei, lu sư băt đĭ tôm tơdrong truh tơ Pơlei Jêrusalem brei mơsơ̆, na pă Ih đĕch dah kiơ bơngai tơmoi wih đơ̆ng noh boih ră mă-lei tam băt kơ tơdrong noh?”

19Na Yêsu jet dơ̆ng: “Tơdrong kiơ kih?”

Na bre sư khan: “Tơdrong Yêsu đơ̆ng Pơlei Nasaret, Sư bơngai pơtruh nơ̆r 'Bok Kei-Dei. 'Bok Kei-Dei ăn kơ Sư hơgei tơpă bơtho tơdrong 'Bok Kei-Dei păng ăn kơ Sư gơh pơm lơ tơdrong mơsêh mơyang mơ̆n. Na đĭ-đăng lu kon tơring tơrang wang ư-ang kơ Sư. 20Na lu 'bok soi tih bơ̆n păng lu đe kră pơgơ̆r lu bơ̆n jao Sư kơ 'bok tih Pilat athei pơlôch Sư. Na đơ̆ng noh lu sư pơ̆ng pơlôch lê̆ Sư tơ 'long pơglang. 21Nhôn ngêh kơ Sư wă ăn kơ dêh char Isơrael rơngei ră, mă-lei đe pơlôch Sư boih. Đei pêng năr kơ 'nâu boih Sư lôch. 22Na lu drŏ-kăn bôl nhôn, lu sư roi kơ nhôn tơdrong hlĭch. Pơgê hrôih hei lu sư năm tơ bơsat Yêsu, 23mă-lei lu sư chă lăng akâu Yêsu ră ưh kơ 'bôh ôh. Na lu sư brŏk roi kơ nhôn khan sư 'bôh linh jang 'lơ̆ng 'Bok Kei-Dei roi kơ lu sư khan Yêsu iung arih đơ̆ng lôch boih. 24Lu bôl nhôn nai, lu sư kư̆m kơdâu năm lăng tơ bơsat mơ̆n ră mă-lei ưh kơ 'bôh akâu Yêsu tơ lăm bơsat ei kư̆m thoi lĕ kơ lu đe drŏ-kăn noh roi hei mơ̆n. Lu sư kư̆m ưh kơ 'bôh Yêsu iung arih tơ yơ.”

25Na Yêsu khan kơ bre sư thoi âu: “Ơ lu bơngai kơhlôh, biĕm anat tơpă kơ lui dôm tơdrong lu bơngai mă pơtruh nơ̆r 'Bok Kei-Dei khan lê̆ hơdrol đơ̆ng sơ̆. 26Đe pơlôch 'Bok Krist thoi noh trŏ tơpă boih, na dang ei Sư iung arih wă tŏk tơ plĕnh ti pơgơ̆r.”

27Na đơ̆ng noh Yêsu tơblang kơ bre sư dôm tơdrong đơ̆ng sơ̆p hla bơar 'Bok Kei-Dei khan lê̆ hơdrol gah tơdrong Sư, mă đơ̆ng Môis mă truh tơ đĭ lu bơngai pơtruh nơ̆r 'Bok Kei-Dei sơ̆.

28Đơ̆ng noh lăp wă jê̆ truh tơ Pơlei Emmaut ră, na Yêsu nhen lĕ kơ wă yak tơ nai. 29Mă-lei bre noh pơtơm Sư khŏm khŏm khan: “Ih năm 'bĭch hơdai păng nhi 'biơ̆ wăi, yua kơ dang ei đĭ kơsơ̆ boih.” Na Yêsu chu bre sư. 30Na Sư tơoei hơdai păng bre sư wă sŏng sa. Na Yêsu iŏk 'bĕng mi krao khan bơnê kơ 'Bok Kei-Dei na phĕ asong kơ bre sư 'bĕng mi ei. 31Na 'bơ̆t ei bre sư 'nao kơnăl kơnăi kơ Yêsu. Lăp kơnăl na jua pă 'bôh hloi. 32Bre sư pơma dih băl khan: “Sư tơblang kơ ba tơdrong lăm sơ̆p hla bơar 'Bok Kei-Dei kơplah bơ̆n oei yak hơdai rok trong hei ba mah đơđŭk hiôk jơhngơ̆m hloi iih?”

33Đơ̆ng noh bre sư gruih iung brŏk tơ Pơlei Jêrusalem. Bre sư năm tơ lu mơjĭt-mônh 'nu bơngai pơhrăm păng Yêsu hăm lu bôl sư na 'bôh lu sư oei akŭm dih băl. 34Na lu bôl sư roi kơ bre sư khan: “Kră Yang bơ̆n Yêsu iung arih tơpă boih, Simôn 'nao 'bôh Sư hei.”

35Na bre sư kư̆m roi ăn kơ lu bôl sư gah tơdrong Kră Yang Yêsu yak hơdai bre sư kơplah rok trong hei mơ̆n, na bre sư kơnăl kơ Yêsu kơplah Sư oei phĕ 'bĕng mi.

Lu bơngai pơhrăm păng Sư 'bôh Yêsu iung arih

36Kơplah bre sư oei roi tơdrong noh hei ră 'bôh blư kơ Yêsu dơ̆ng hơdai lu sư. Na Yêsu khan: “Oei hiôk bĕ lu iĕm.”

37Lu sư kơdrăt hli tơrơ yua kơ lu sư ngêh kơ atâu.

38Na Yêsu khan kơ lu sư: “Kơlih kơ kiơ iĕm hli păng ưh kơ wă lui kơ Inh iung arih đơ̆ng lôch? 39Iĕm lăng rơka jơ̆ng ti Inh na iĕm kơnăl kơ Inh tơpă. Iĕm pel lăng akâu Inh wăi. Dah atâu ưh kơ đei akâu akar thoi Inh âu ôh.”

40Lăp Sư khan thoi noh na Sư tơ'bôh hloi kơ lu sư jơ̆ng ti Sư.

41Lu sư hiôk chơt tơpă, mă-lei kư̆m oei sơleng kơ đon 'biơ̆ mơ̆n yua kơ lu sư tam mă lui tơpă. Thoi noh na Yêsu jet lu sư: “Iĕm hăm đei tơmam sa tơ âu dah ưh?”

42Na lu sư ăn kơ Yêsu ka hlôi sĭn boih. 43Yêsu iŏk ka noh sa hloi 'bơ̆t anăp lu sư.

44Na Yêsu khan kơ lu sư: “Hơtai Inh oei hơdai păng iĕm ki Inh kư̆m roi kơ iĕm tơdrong Inh wă lôch iung arih dơ̆ng. Dôm tơdrong đe chih lăm sơ̆p hla bơar Môis, sơ̆p hla bơar lu bơngai pơtruh nơ̆r 'Bok Kei-Dei păng sơ̆p hla bơar Tơdrong Hơri Sơ̆ mă khan lê̆ hơdrol gah tơdrong Inh, dôm tơdrong noh bơ̆n gô 'bôh tơpă.”

45Đơ̆ng noh na Yêsu ăn kơ đon lu sư hlôh wao sơ̆p hla bơar 'Bok Kei-Dei. 46Yêsu khan kơ lu sư: “Tơdrong đe chih lê̆ hơdrol noh sơ̆ thoi âu: 'Bok Krist gô đei tơdrong pơmat-tat na lôch, kơtĕch pêng năr Sư iung arih dơ̆ng. 47Na đe gô bơtho đơ̆ng Pơlei Jêrusalem truh tơ jơ̆p kơ teh đak athei đĭ-đăng khŭl bơngai tơbral kơdih tơdrong yoch na 'Bok Kei-Dei gô pơklaih yoch lu sư, yua kơ Inh lôch tang lu sư. 48Lu iĕm 'bôh Inh iung arih đơ̆ng lôch hăm 'bôh dôm tơdrong Inh pơm đơ̆ng sơ̆, na wă kơ iĕm năm roi kơ đe tơdrong Inh dơ̆ng. 49Inh gô ăn kơ iĕm Yang Bơhngol 'Lơ̆ng kư̆m thoi lĕ 'Bă Inh pơkă wă ăn kơ iĕm mơ̆n. Mă-lei iĕm athei oei tơ Pơlei Jêrusalem khŏm khŏm tơ̆p mă 'bôh Yang Bơhngol 'Lơ̆ng đơ̆ng plĕnh jur tơ iĕm 'mơ̆i, na iĕm jing pran hăm nuih tơpă chă bơtho đe.”

Yêsu tŏk tơ plĕnh

50Klaih kơ noh Yêsu anhăk lu sư truh tơ Pơlei Bethani na Sư yơ̆r ti krao khan kơ 'Bok Kei-Dei athei tơgŭm lu sư. 51Na kơplah Sư oei krao khan kơ 'Bok Kei-Dei, na 'Bok Kei-Dei atŏk Sư tơ plĕnh achăng lê̆ lu sư. 52Na lu bơngai pơhrăm păng Sư ei sơtơ̆p kŭl-tăng kơkuh kơ Yêsu. Đơ̆ng noh lu sư brŏk hloi tơ Pơlei Jêrusalem. Jơhngơ̆m lu sư chơt hiôk tơpă. 53Lu sư oei lăm hnam akŭm 'Bok Kei-Dei tơm rim năr wă ư-ang kơ Sư.

હાલમાં પસંદ કરેલ:

Luk 24: bdq

Highlight

શેર કરો

નકલ કરો