Luk 12
12
1Klaih kơ noh đei lơ rơbâu 'nu bơngai akŭm tơ Yêsu truh kơ lu sư mah tơhmĕt tơhmot dih băl. Na Yêsu pơma kơdrô̆ kơ lu bơngai pơhrăm păng Sư thoi âu: “Iĕm athei kơchăng kơ lu bơngai Pharisi hŏ yua kơ lu sư bơngai 'bơ̆r đak klak ŭnh. 2Mă-lei dôm tơdrong lu sư wă ôn hrĕp dang ei, đe gô 'bôh ning-mônh. 3Dôm tơdrong kon bơngai bơ̆n pơma kơdrô̆ dang ei thoi lĕ đe pơma lăm măng mu, mă-lei ning-mônh đe gô băt đĭ. Dôm tơdrong kon bơngai bơ̆n pơma lăm anih kơdrô̆ dang ei, ning-mônh đe gô pơma 'bơ̆r re đơ̆ng pra hnam, wă tơbăt kơ đĭ-đăng bơngai.
'Nĕ kơ hli kơ đe mă gơh pơlôch akâu đĕch
4“Ơ 'nhŏng oh, iĕm 'nĕ kơ hli kơ đe mă gơh pơlôch akâu iĕm đĕch. 5Iĕm athei hli kơ 'Bok Kei-Dei mă gơh pơlôch akâu iĕm păng gơh hơtat iĕm tơ dơnâu ŭnh. Minh 'nu 'Bok Kei-Dei đĕch iĕm athei hli yom.
6“Bơ̆n kư̆m băt sem rĕch tĕch reh dêh, pơđăm tŏ lăp 'bar hlak jên. Mă-lei 'Bok Kei-Dei kư̆m wei rong lu sư ưh kơ hiơt ôh. 7Mă sŏk bơ̆n 'Bok Kei-Dei kư̆m jô̆ băt tôm. Thoi noh na iĕm 'nĕ kơ hli. 'Bok Kei-Dei 'mêm kơ iĕm hloh kơ sư 'mêm kơ sem rĕch.
Bu lui kơ Yêsu athei roi kơ đe
8“Inh khan kơ iĕm tơpă, bu roi kơ đe khan sư lui kơ Inh, ning-mônh Inh Kon Bơngai kư̆m gô roi kơ lu linh jang 'lơ̆ng 'Bok Kei-Dei bơngai noh sư lui kơ Inh tơpă mơ̆n. 9Mă-lei bu hli kơ đe, mơlâu kơ đe na sư khan sư ưh kơ lui kơ Inh, Inh kư̆m gô roi kơ lu linh jang 'lơ̆ng 'Bok Kei-Dei bơngai noh ưh kơ lui kơ Inh.
10“Bu pơjăm Inh Kon Bơngai, 'Bok Kei-Dei kư̆m huay kơ jô̆ yo kơ sư ôh. Mă-lei bơngai bu pơma kơnê̆ kơ Yang Bơhngol 'Lơ̆ng, 'Bok Kei-Dei oei jô̆ khŏm khŏm.
11“Mưh đe rôp iĕm wă sek tơlang iĕm tơ hnam akŭm đe Juđê, dah pơjao iĕm kơ lu 'bok tih sek tơlang, lei iĕm 'nĕ mah tơchĕng kơ tơdrong iĕm wă pơma dŏng akâu iĕm kơdih 'bơ̆t anăp lu sư hŏ, 12yua kơ Yang Bơhngol 'Lơ̆ng gô tơgŭm iĕm kơplah iĕm wă pơma.”
'Bok mơdrŏng kơhlôh
13Đei minh 'nu oei lăm tŏk-bŏk đe tơpôl jet Yêsu: “Ơ 'Bok Thây, apinh Ih bơtho 'nhŏng inh wă kơ sư dô̆ asong inh tơmam 'bă nhi sơ̆.” 14Yêsu khan: “Ơ bơngai ah, bu ăn kơ Inh pơm kră sek tơlang wă dô̆ asong mŭk biĕm?”
15Yêsu pơma dơ̆ng kơ đĭ-đăng bơngai kiơ̆ ei: “Iĕm athei kơchăng kơdih 'nĕ kơ mah hăt kơ mŭk tơmam dêh. Arih chơt hiôk ưh kơ đơ̆ng mơdrŏng ôh.”
16Klaih kơ noh sư khan kơ đe thoi âu wă pơtih gia kơ tơdrong 'noh hei: “Minh 'nu bơngai đei mir să, trŏ bơyan 'ba, sư đei 'ba lơ tơpă. 17Na tơ'ngla sư tơchĕng kơdih khan: ‘Inh wă pơm thoi yơ kih, anih mong 'ba ưh kơ mah thoi âu?’ 18Sư khan: ‘Inh wă yuih pơk 'ba inh so âu, na pơm ming plơ̆ng mă tih hloh dơ̆ng. Klaih kơ noh na inh tah akŭm đĭ-đăng mŭk tơmam păng 'ba inh. 19Lăp inh pơm đang boih, inh wă khan kơ inh kơdih thoi âu: Inh đei mŭk drăm lơ wă 'măn lê̆ kơ đunh sơnăm. Inh pơdơh bĕ, sŏng sa nhă đak phĭ mah rơkah rơkai, hiôk boih inh.’ 20Mă-lei 'Bok Kei-Dei khan kơ bơngai ei: ‘Ơ bơngai kơhlôh, măng kơnh boih Inh wă iŏk Bơhngol ih, đơ̆ng noh na ih lôch hloi măng kơnh. Mŭk tơmam ih wă ăn ngôi kơ đe iŏk đĕch.’ ”
21Kră Yang Yêsu khan dơ̆ng thoi âu: “Tơdrong âu wă pơtih gia kơ dôm lu bơngai hăt kơ mŭk tơmam ala teh, ưh kơ wă tơchĕng gah tơdrong 'Bok Kei-Dei.”
Mă tôm tơdrong gô mơ̆ng kơ 'Bok Kei-Dei đĕch
22Na Yêsu khan kơ lu bơngai pơhrăm păng Sư: “Yua kơ thoi noh na Inh wă khan kơ iĕm: 'Nĕ tơchĕng gah tơmam sŏng sa, 'nĕ kơ tơchĕng kơ hơbĕn ao hrŭk. 23'Bok Kei-Dei gơh pơjing iĕm arih, Sư kư̆m băt ăn kơ iĕm tơmam sa mơ̆n, Sư kư̆m băt ăn kơ iĕm hơbĕn ao hrŭk mơ̆n. 24Iĕm lăng sem ak, sư ưh kơ đei pơtăm 'ba, ưh kơ đei kĕch 'măn lê̆ tơ pơk ôh, mă-lei 'Bok Kei-Dei kư̆m oei hiĕm 'me sư mơ̆n. Pơma kiơ kơ iĕm, 'Bok Kei-Dei 'mêm kơ iĕm hloh kơ lu sem păr tơpă. 25Iĕm tơchĕng dêh gah tơdrong arih, mă iĕm nŏng tơchĕng dang yơ gah tơdrong arih noh ră, kư̆m ưh kơ đei yua tơgŭm iĕm arih đunh 'biơ̆ hơya minh năr ôh. 26Tơ̆ng iĕm nŏng kơ tơchĕng dang noh ră mă-lei ưh kơ tơgŭm iĕm arih đunh 'biơ̆ hơya minh năr, lei iĕm mah nŏng kơ kiơ kơ tơchĕng gah tơdrong nai dơ̆ng. 27Iĕm lăng lu pơkao 'nhĕt tơ bri brah. Sư ưh kơ bơ̆jang, sư ưh kơ tanh sĭt hơbĕn ao sư kơdih ôh, mă-lei bơ̆n lăng sư 'lơ̆ng dêh. Inh khan kơ iĕm tơpă, pơtao Sôlômôn sơ̆ sư mơdrŏng tih tơpă mă-lei hơbĕn ao sư ưh kơ mah 'lơ̆ng tơ̆l dang pơkao 'nhĕt bri brah ôh. 28Tơdrong lui iĕm rơdu dêh. Iĕm kuă kơ kiơ tơchĕng kơ lu pơkao 'nhĕt bri brah, sư 'bônh kơ hơlŭng, klaih hơlŭng đe soh hŭt lê̆ lăm ŭnh. Mă-lei 'Bok Kei-Dei kư̆m ăn kơ sư 'lơ̆ng dang noh, pơma kiơ kơ iĕm kon bơngai kăl hloh kơ sư, 'Bok Kei-Dei gô ăn kơ iĕm hơbĕn ao tơpă.
29“Iĕm 'nĕ pă tơchĕng khan: Bơ̆n wă sa kiơ, nhă kiơ? Iĕm 'nĕ kơ mah hăt kơ tơdrong noh. 30Lu bơngai nai mă ưh kơ lui, lu sư tơchĕng kơ tơdrong noh ling-lang. Mă-lei 'Bă bơ̆n kư̆m băt boih dôm tơdrong lu iĕm kăl yua, Sư gô tơgŭm iĕm tơpă. 31Thoi noh iĕm athei ăn kơ Sư pơgơ̆r iĕm hơdrol 'mơ̆i na đơ̆ng noh Sư gô tơgŭm iĕm tôm tơmam iĕm kăl yua.
Tơmam tơ plĕnh kăl hloh tơmam tơ teh
32“Ơ lu 'nhŏng oh, iĕm bơngai kơtuei ră, mă-lei iĕm 'nĕ kơ hli, yua kơ 'Bă bơ̆n 'Bok Kei-Dei wă ăn kơ iĕm gơh pơgơ̆r đe ning-mônh. 33Tĕch tơmam iĕm na tơgŭm lu bơngai dơnuh hin, na iĕm gô đei jên mă huay kơ hiong hiach oei 'măn lê̆ kơ iĕm tơ plĕnh ti. Tơ ei ưh kơ đei bơngai bu mă gơh tơtông iŏk dơ̆ng ôh. Tơ ei mua kư̆m ưh kơ gơh reh ngơ̆r tơmam iĕm mơ̆n. 34Dah iĕm đei mŭk tơmam tơ plĕnh ti, jơhngơ̆m đon iĕm kư̆m tơchĕng tơ noh mơ̆n. Dah iĕm đei mŭk tơmam tơ teh âu, jơhngơ̆m đon iĕm kư̆m tơchĕng tơ teh âu mơ̆n.
Bơ̆n athei kơchăng ling-lang, Yêsu wă jur dơ̆ng
35“Iĕm athei kơchăng ling-lang thoi lĕ bơngai oei chang gô đe truh kơmăng. Sư đĭ hrŭk hơmet hơbĕn ao boih. Ŭnh kơđeng sư oei khơ̆ng. 36Iĕm athei kơchăng thoi lĕ lu đĭch đam kơchăng kơ yŏng sư wih đơ̆ng sŏng sa đơ̆ng hnam đe et pơkong, na lăp sư dơdŭ 'măng lu sư pơih kơ sư hloi. 37Dôm lu đĭch đam mă oei kral gô yŏng sư, ưh kơ tep, na yŏng sư 'mêm tơpă. Inh khan kơ iĕm tơpă, yŏng sư kơdih kư̆m gô awih ăn kơ lu đĭch đam sư tơmam sa dơ̆ng mơ̆n. 38Dah yŏng sư wih kơplah tŏk-bŏk măng dah kơplah leng gong, mă-lei lu sư oei kral gô, na yŏng sư bơnê kơ lu sư tơpă. 39Iĕm athei kơchăng hli kơ thoi bơngai âu: Bơngai âu sư ưh kơ kơchăng kơ đe wă tơtông tơmam sư. Lăp đe tơtông tơmam sư boih na sư khan: ‘Ô, ăn dah băt kơ đe wă tơtông tơmam inh măng hei, lei inh kral kơchăng kuă ăn lu sư bŏk tơnăr hnam inh ôh.’ 40Na iĕm athei kơchăng 'nĕ kơ thoi bơngai noh, hli kơ Inh Kon Bơngai wă jur tơ iĕm dơ̆ng kơplah iĕm ưh kơ lêng ê.”
Bơ̆n athei jang tơnăp kiơ̆ thoi Yŏng bơ̆n pơkă
41Na Pêtrôs khan: “Ơ 'Bok, Ih pơtih gia noh kơ nhôn đĕch dah Ih pơtih gia noh kơ đĭ-đăng bơngai?”
42Na Kră Yang Yêsu khan: “Bơngai đĭch, sư athei jang tơnăp kiơ̆ thoi yŏng sư pơkă, na yŏng sư lăp đon. Na yŏng sư pơjao ăn kơ sư pơm kai wei-lăng lu buăl sư dơ̆ng, na mưh trŏ kơ jơ sŏng sa na sư chă asong kơ lu buăl sư tơmam sa. 43Lăp yŏng lu sư wih 'bôh bơngai kai mă đêl sư pơjao athei wei-lăng lu đĭch đam sư noh jang kiơ̆ kơ sư pơkă, na sư bơnê. Thoi noh na bơngai kai, jơhngơ̆m sư hiôk tơpă. 44Inh khan kơ iĕm tơpă, yŏng sư gô ăn kơ sư wei-lăng đĭ-đăng mŭk tơmam yŏng sư hloi. 45Mă-lei dah bơngai kai noh tơchĕng lăm to sư kơdih khan: Yŏng inh wă wih oei đunh, na bơngai kai noh chă tôn teh lu bôl buăl sư mă drŏ-nglo drŏ-kăn, na sư sa et tơ̆p suai, 46na yŏng sư gô wih kơplah sư ưh kơ kơchăng, tabơla haih pă tam boih. Na yŏng sư gô phak pơlôch sư, ăn kơ sư oei hơdai hăm dôm lu bơngai pơm ưh kơ tơpăt.
47“Dôm lu đĭch đam mă băt kơ nơ̆r yŏng sư ată ră, mă-lei sư ưh kơ kơchăng păng ưh kơ pơm kiơ̆, na yŏng sư gô tôn teh sư kơtang tơpă. 48Dôm lu đĭch đam mă ưh kơ băt kơ nơ̆r yŏng sư ată, na ưh kơ pơm kiơ̆, yŏng sư kư̆m gô tôn teh mơ̆n, mă-lei lăp lăp 'biơ̆. Bơngai bu yŏng sư ăn jang tih hloh kơ đe, bơngai noh, dah sư ưh kơ chu, yŏng sư gô phak sư kơtang hloh kơ đe.
Kon bơngai tơklah dih băl yua kơ Yêsu jur tơ teh sơ̆
49“Dang ei Inh jur dang lĕ wă soh teh âu, na Inh ưh kơ hiôk tơ̆p truh ŭnh sa. 50Inh gô đei tơdrong lôch pơmat, na jơhngơ̆m Inh ưh kơ hiôk tơ̆p hloh kơ năr Inh 'nei 'mơ̆i na Inh hiôk. 51Iĕm 'nĕ tơchĕng Inh jur tơ teh âu na kon bơngai wă jing hiôk-hian hloi, ưh pă tơblah boih. Ưh ôh. Inh jur tơ teh âu na kon bơngai wă tơklah dih băl. 52Pơtih gia lăm minh pôm hnam dơnŏ pơđăm 'nu bơngai, đơ̆ng âu tơ anăp lu sư gô tơklah dih băl. Lu sư pêng 'nu ưh kơ lui kơ Inh gô areh kơ 'bar 'nu mă lui kơ Inh. 53Pơtih gia lu sư gô tơklah dih băl thoi âu: 'Bă sư mă ưh kơ lui kơ Inh gô areh kơ kon sư mă lui kơ Inh; phŏ kon sư ưh kơ lui kư̆m gô areh kơ 'bă sư mă lui. Mĕ sư mă ưh kơ lui gô areh kơ kon sư mă lui; phŏ kon sư ưh kơ lui gô areh kơ mĕ sư mă lui. Tơnei sư mă ưh kơ lui gô areh kơ mai sư yua kơ sư lui kơ Inh; phŏ mai sư mă ưh kơ lui gô areh kơ tơnei sư mă lui.”
Đe ưh kơ băt kơ 'Bok Kei-Dei wă pơgơ̆r dang ei
54Yêsu khan kơ lu bơngai tơpôl: “Lăp iĕm 'bôh hơmơ̆l đơ̆ng bơmơ̆t kial thu tơ hơlĕch, 'noh iĕm băt kơ wă jê̆ 'mi boih, na 'blep tơpă. 55Tơ̆ng iĕm 'bôh kial đơ̆ng gơal thu hơlơ̆k tơ yă-nơ̆m na iĕm băt kơ 'năr gô tŏ tơpă, na 'blep kiơ̆ ei tơpă. 56Ơ lu bơngai hơlĕnh, iĕm kơnăl kơ plĕnh wă 'mi dah 'năr wă tŏ ră, mă-lei liơ iĕm pơm ưh kơ băt kơ 'Bok Kei-Dei wă pơgơ̆r lu iĕm dang ei ră?
57“Liơ iĕm ưh kơ gơh tơchĕng kơdih wă kơ băt tơdrong trŏ, tơdrong glăi? 58Dah đe năm apinh tơmam đêl iĕm hre kơ đe, na iĕm jah pơđang tơdrong hre noh hloi, 'nĕ kơ gô sư anhăk iĕm tơ 'bok sek tơlang, hli kơ đe gô rôp tah iĕm tơ hnam phak. 59Inh khan kơ iĕm tơpă, đe oei phak iĕm khŏm khŏm 'mơ̆i, tơ̆p iĕm chu duh tôm 'mơ̆i, na đe tơlĕch tơlăi iĕm.”
Đĭ-đăng kon bơngai athei tơbral kơdih tơdrong yoch
હાલમાં પસંદ કરેલ:
Luk 12: bdq
Highlight
શેર કરો
નકલ કરો
Want to have your highlights saved across all your devices? Sign up or sign in
©Bahnar Bible Association. All rights reserved.
