Hechos 4
4
Icuytʉjcomgau Pedro mit Juan
1Pedro mit Juan imucotscapnajate ayé jayajwat, mingau mam je'jat judíujat ipa̱nijat, mit ayé jefe imanda̱tway soldajat templuni'cway, mit saduceujat. 2Je'jat awa'nigau ni'c Pedro mit Juan i-ajque's̈cajau nʉ'jcopac jayajwat mit inʉmgajau ni'c jutucta̱jcáj nu'pʉjʉn á̱nimajat as̈am Jesús ijutucta̱jc. 3Mit cʉs̈ i-actangau Pedro mit Juan, mit icomgau cuytujugum hasta jatu'c s̈ʉjw ni'c tsu'jito'ganu. 4Po mayo'c imaraugaway Dios ipalabra cupʉjcau. Mit it como cinco mil jayajwat jeme cupʉjcaway.
5Mit icus̈ʉwij jatu'c s̈ʉjw ni-apʉcmujcʉjʉu Jerusalén judíujat ijefejat, na'waywájat mit jeme i-ajque's̈capay ley. 6Mit jemey itsʉ̱́naj Anás mʉjpa̱nijna', mit Caifás, Juan, Alejandro mit nu'pʉjʉn mʉjpa̱nijat ifamiliajat. 7Mit imumingau Pedro mit Juan mit iyajcau es̈pu̱tum, mit i-ucyo'tcau:
—¿Pʉn is̈manda̱tcap? ¿Pʉn is̈moygau laj is̈ac-oytangawa'n tu'nijatway?
8Mit Espíritu Santu mʉgʉc itsʉ̱na Pedro ijo̱tni'c, mit inʉmgʉs̈au: Jefejat de ayʉ̱́j nʉ'jcopac mit na'waywájat Israelway, 9jinap is̈-ucyo'tcap ʉjtsat ni'c tʉnwatcajau oy tu'c jayau tu'nijway. Injawi-o'jcʉjʉp nat i-oytajn. 10Nu'pʉjʉn mijchat mit nu'pʉjʉn Israelway jayajwat ma jawiga ni'c oytanic itsʉ̱na ayʉ̱́j jayau mam is̈-e'pca ni'c ijtʉp poder Jesucristu Nazaretway. Ayé Jesús mijchat inyajcau cunu̱s̈ni'c mit Dios i-acjutucta̱c. 11Jesús as̈am ayé tsa' jeme ingawangaway mitʉcwatpayna'jat, po ayé tsa' it itajn pa iguitsʉmtsowa'n nu'pʉjʉn, ni'c Dios i-oyninʉm iway. 12Mit nejʉmay jatu'c jayau ca-oyap nas̈salva̱tcap. Solo Dios iyac Jesús pa nas̈salva̱tcáj, mit ca-itp nepʉn en ayʉ̱́j mundu jeme oyámpay nas̈salva̱tcap.
13Igui-ís̈caj ni'c capʉ̱tcap Pedro mit Juan, mit iguijáwigaj ni'c igajatcap mayo'c noc ne caje' mʉjninʉmijcatway, je'jat nigu-épigʉjʉu mit nimoygʉjʉu cuenta ni'c imuyo'ygau Jesús. 14Mit igui-ís̈caj ni'c ayé jayau jeme oytanway tenap mit je'jat, ca-oyawu iguinʉmga neti. 15Mit imanda̱tcau Pedro mit Juan ma pichinga mam itsʉ̱nga apʉcmuguijcat, mit cʉs̈ judíujat ijefejat je'jatu ni-acochigʉjʉu, 16inʉmgau:
—¿Ti nawatcáj mit ayʉ̱́j jayajwat? Ni'c iyacs̈ta'cway iwatcau tu'c milagru mʉjway, mit nu'pʉjʉn jeme tsʉ̱ngapay Jerusalén ijawigap, mit ʉjtsat ca-oyap nas̈nʉmga ni'c ca̱j. 17Mit pa nʉ'jcopac jayajwat maganʉmdacyo'yga más lo que inʉmgapay ayʉ̱́j jayajwat, janga nache'cta̱jca mʉgʉc pa magaja-ajque's̈caja nepʉn lo que inʉmway Jesús. 18Mit iya̱s̈cau ma minga Pedro mit Juan mam ayé jefejat itsʉ̱nga, mit imanda̱tcau ni'c nepʉn magaja-ajque's̈caja lo que inʉmway Jesús.
19Mit cʉs̈ Pedro mit Juan inʉmgajau:
—Oy pi pensa̱tca jʉmay más iwa'náj Dios, tʉjayaumaygawa'n mijchat o tʉs̈jayaumaygawa'n Dios. 20Ni'c itp ti tʉs̈nʉmgawa'n lo que tʉn-is̈caway mit tʉnmaraugaway.
21Mit cʉs̈ iguiche'ctá̱jcaj mʉgʉc i-acjo'nganuw ni'c igapa̱tcawu nat iguicastiga̱tcawa'n. Judíujat ijefejat más ipʉ̱tcau nʉ'jcopac jayajwat, ni'c nu'pʉjʉn ayé jayajwat i-oyninʉmgau Dios ni'c we'n iguijat ayé jayau cú̱s̈uway. 22Ni'c iguijat tu'c mʉjway milagru, ni'c ayé jayau jeme oytanway ijtʉu más de cuarenta s̈iwit.
Cupʉcpajyat i-ora̱tcajap Dios
23Mit igui-acjo'ngaj Pedro mit Juan, je'jat nʉs̈cau pa mam itsʉ̱nga icumpajlat mit i-ampiugajau nu'pʉjʉn lo que iguinʉmgajaway judíujat imʉjpa̱nijat mit na'waywájat. 24Iguimáraugaj we'n, nu'pʉjʉjnat i-ora̱tcajau Dios, inʉmgajau:
—Señor, mi̱ inmanda̱tp nu'pʉjʉn, mi̱j ayé miDios jeme inwatway tsajp, na̱s̈ mit lama̱t mit nu'pʉjʉn lo que itpay jem. 25Mi̱ inmozo David inactunʉm wename:
¿Tini'c itsuguinwátca jayajwat?
mit ¿tini'c jayajwat iguipensa̱tca cosa ca-ojyatway?
26Ayé rejyat ayʉ̱́j mundujway ca's̈ʉ'jcau,
mit ayé manda̱tpajyat ni-apʉcmujcʉjʉu,
contra el Señor Dios mit contra ayé Cristu icupi̱way Dios.
27’Mit siguia̱t igui-ora̱tcaja Dios, inʉmgau: Señor, iyacs̈ta'cway ni-apʉcmujcʉjʉu en ayʉ̱́j nʉ'jcopac contra Jesús inway oyway jeme incupi̱way. Ni-apʉcmujcʉjʉu Herodes mit Poncio Pilato, mit pe'ta̱majyat mit jayajwat Israelway. 28Mi̱ inyʉm desde ámbanu ni'c we'n iguiwatcawa'n ayé maljayajwat, mit jemni'c ijajt we'n, ni'c itp ti icumplia̱twa'n lo que inyʉmway. 29Señor, e'pnaj nat tʉs̈che'cta̱jcap, mit ʉjtsat mi̱ is̈mozojat, majyigac tʉgapʉ̱́tca tʉs̈nʉmgajawa'n impalabra. 30Mi̱ inaguep poder. Ac-oytangʉs̈ jayajwat, wat milagrujat mit acnigu-epigʉ́s̈ʉ nu'pʉjʉn jayajwat. Wat we'n pa ma e'pca ni'c ijtʉp poder Jesús inway oyway. We'n iguinʉ́mgajaj Dios.
31Mit cʉs̈ i-orá̱tcaj, yʉgʉn ayé na̱s̈ mam itsʉ̱ngaj apʉcmuguijcat, mit Dios imoygʉs̈ Espíritu Santu pa nu'pʉjʉn je'jat, mit cʉs̈ je'jat capʉ̱tcawu iguinʉ́mgaja Dios ipalabra.
Cupʉcpajyat tsʉ̱ngau en acuerdu
32Mit ayé jayajwat jeme cupʉjcaway tsʉ̱ngau en acuerdu, mit nepʉn igaguarda̱tu neti pa je'yu, po nu'pʉjʉn itcʉjʉu icosajat pareju entre nu'pʉjʉjnat. 33Mit Dios imoygʉs̈ may poder apóstojlat, mit we'n i-actujawigau jayajwat ni'c el Señor Jesús jutucta̱c, mit Dios imoygʉs̈ may favor pa nu'pʉjʉn ayé cupʉcpajyat. 34Mit nepʉn catsʉ̱nawu nesita̱tic entre ayé hermanujat, ni'c nu'pʉjʉn jeme itcʉjʉway na̱s̈at o tʉjcat ito'ctʉgʉygau, mit imumingau itumi̱jnat de ayé biejnat ito'jcaway, 35mit iyajcau itumi̱jnat mam itsʉ̱nga apóstojlat, mit je'jat i-acpas̈angau ayé tumi̱n pa cada jayau nesita̱ticway. 36Wejpu'n it tu'c jayau inʉ'jyway José, mit apóstojlat inʉ'jymoygau Bernabé, ayé inʉmo'jcʉp tu'c jayau iconsola̱tpay jayajwat. Ayé jayau pichin Leví ifamiliani'c, mit ye'c Chiprejway na̱s̈. 37Mit ayé jayau ijtʉu tu'c na̱s̈, mit ito'ctʉgʉy, mit imumin ayé tumi̱n, mit i-entrega̱tcʉs̈au apóstojlat.
હાલમાં પસંદ કરેલ:
Hechos 4: PSNT
Highlight
શેર કરો
નકલ કરો
Want to have your highlights saved across all your devices? Sign up or sign in
Nuevo Testamento en Popoluca de Sayula © Sociedad Bíblica de México, [1969].
