Yone 6

Wali agali dewaoreme tomo no karula penego ogo

(Madiu 14.13-21; Maga 6.30-44; Lugu 9.10-17)

1Ani lalu Yasu ibu iba Galili doma edeyagi pene. Iba Galili mini mende Taiberiasa. 2Ibugua wali agali warago bo winiru mo dabi halu agalime nabiagane ale dewa biyago hondowa wali agali dewaoreme ibu piyagoha haruru pene. 3Yasu ibunaga talima piagaru heba hari mbira heagoria iraga ho berene. 4Bolangua Halu Penegonaga tomo nolene tu kaware wini.#Yo 2.13 5Wali agali dewaore ibiyaru hondowa Yasuhanda Pilibihondo lalu, O ibiraruni tomo karulape nelo iname tomo agua mimi̱yadabe, lene.#Md 14.14; Mg 6.34; Lg 9.12 6Ibugua tomo agua mule manda buwa Pilibi ba hondole lene.

7Pilibihanda ladai bialu lalu, Kina handari kirame (200) tomo yolo bu mirimayaguabi bibahende no karula napolebira, lene.

8Yasunaga talima piaga Saimono Pida hamene Anduruhanda lalu, 9Igiri mbirame ladi ale mini balime mberedi hirini duriabi wena kirabi heneago nde ina tidini gibi kamago nakarulapeda, lene.#2 Kin 4.43

10Ani layagola Yasuhanda lalu, Wali agali bibahende birai hadaba ladaba, layagola tani bayale heagoria birai hene. Agali hangu daga lowa daosini duria (5,000) hene. 11Birai heagola Yasuhanda mberedi biago yamuwa ibu Abahondo ka̱i̱ lowa wali agali birayaru milo talebu tahene. Wenabi ani dege talebu muwa no karulapeore mini. 12No karula pialu ibira hayaru ibugua ibunaga talima piaga biaruhondo lalu, Mbira waholigo bibahende mo mogo bidaba, lene. 13Tigua mo mogo biai howa mberedi duria biaru nalu ibira hayaru nu homberia (12) hono to̱lene.

14Wali agali biarume Yasuhanda agalime nabiagane ale biyago hondowa tini laga laga bialu lalu, Ngode Datagaliwabe Mana Latagi Haga Mbirali dindini ibulebira lo harimago ibuoreda, lene.#Pig 49.10; Man 18.15-18; Md 11.3; Yo 1.21; 2.11; 4.19; 4.25; 5.46 15Tigua bi degeme, Yasu í̱ handame haga kini ha, lalu ibu mo yaraga hole heago hondowa ibu hari heagoha ha do hole ibuni hangu pene.#Md 14.23; Yo 18.36

Yasu ibani ibinigo ogo

(Madiu 14.22-23; Maga 6.45-52)

16Ne̱ lanini Yasunaga talima piaga biaru ti ibaha dalipe halu 17iba taluni biralu Kabaniama pole pene. Pialu hearia Yasu naibi heaore dege aruma hene. 18Aruma howa puyabu timbuni pulalu ibiyagome iba mo yaribu bini. 19Ti iba talu tanguima piyadagoni lunaga magi kilomida duria waragaria agima pialu hearia Yasu ibani ibalu iba talu biago kaware ibiyaria de hendene. Hondowa ti gi timbuniore hene. 20Gi hayagola ibugua tihondo lalu, I̱ kogonigo gi nahalimu, lene. 21Ani layago hale howa iba taluha ibilo turu howa gi yamini. Ani biyaore ti polebiyagoria anda pene.

Wali agalime Yasu hai binigo ogo

22Egerebalene wali agali iba timbuni doma edeyagi paliyarume manda bialu hearia, Abe iba talu mbiraore hangu wiyagoria ibunaga talima piaga biaru piyadagua Yasu ibuni napiyagoda, manda bini. 23Ani manda bu hearia iba talu maru Taiberiasa howa Anduane Homogohanda ka̱i̱ lowa ti tomo karulape nayagoria kaware anda ibini.#Yo 6.11 24Tigua Yasubi ibunaga talima piaga biarubi nahe piai hayiyago hondowa iba talu urunini biralu Kabaniamaha Yasu hai bima pene.

Holene gahengeore mberedi I̱ ko, Yasuhanda lenego ogo

25Tigua Yasu iba timbuni doma orayagi hearia handa walia howa ibuhondo lalu, Lawai haga-o í̱ ogoria angi íbu haribe, lene.

26Ani layagola Yasuhanda ladai bialu lalu, Tíhondo heneneore laro. I̱ hai bima ibirimigo i̱na agalime nabiagane ale birugo hondowa ndo ibirimi. Tomo mo karula pirugola haruore narimigo manda buwa ibirimi, lene.#Yo 6.11-12 27Ani lowa lalu, Ereba hagane tomonaga biabe nabialu halimu. Haabobo holene tomo Agali Hole Ibiyagome ngulebirago tomo ogoni mule biabe bialu halimu. Aba Ngode Datagaliwabehanda ibu ani helo loma bia ho heleda, lene.#Md 3.17; Lg 3.22; Yo 1.33; 4.14; 6.48-58; Ab 2.22; 2 Pi 1.17

28Ani layago hale howa tigua ibuhondo lalu, Iname Ngode Datagaliwabehanda hame ledadagua buluma̱ya agua bibehebe, lene.

29Yasuhanda ladai bialu lalu, Ibugua pu layagola ibiyagohondo mini mbiraore wulene ogoni Ngode Datagaliwabehanda hamelo ka, lene.#1 Yo 3.23

30Ani layagola tigua ibuhondo lalu, Í̱na agalime nabiagane ale bialu iname hondowa í̱hondo mini mbiraore wuluma̱ya agi buleberebe. Í̱na biabe agi buleberebe.#Har 16.4; 16.15; Dag 11.7-9; Neh 9.15; Iba 78.24; Md 12.38; 16.1; Mg 8.11; Yo 2.18; 1 Ko 1.22; 10.3 31Ina mamali dindi ko wali agali nahagaha howa mena nalu hene. Ogoni binigo Anduane Homogonaga mbugani lo ngago ogo, Ibugua ti nelo mberedi dahuliya tawe mini, lalu gilibu nga, lene.

32Ani layagola Yasuhanda lalu, Tíhondo heneneore laro. Mosesehanda tíhondo mberedi ngiyago dahuliya tawe ndo. I̱ Aba ibugua dege mberedi dahuliya taweore ngiaga ka. 33Mberedi Ngode Datagaliwabehanda ngiaga ogoni dahuliya andaga howa dalinigo kago ibugua wali agali dindini karuhondo holene gahengeore mialu kago Ngode Datagaliwabenaga mberedi ogoniore, lene.

34Tigua ibuhondo lalu, Anduane-o í̱na mberedi ogoni ina ngiaabo habe, lene.#Yo 4.14-15; 6.48-58; 7.37

35Ani layagola Yasuhanda tihondo lalu, Holene gahengeore mberedi i̱ni kogoni. I̱ koria ibaabo halu karu garibi nale holebira. I̱hondo mini mbiraore wialu karu iba lone noa naholebira.#Yo 4.14; 6.48-58

36Anigo tígua i̱ de hondowa i̱hondo mini mbiraore nawi kami lalu langirugoni.#Yo 6.26; 6.64; 20.29 37I̱ Abahanda i̱hondo ngiraru bibahende ibalu i̱ kogo haho tago holebira. I̱ koria ibiraru mbira i̱na wara tagi naholeberogo#Md 11.28; Yo 10.28-29; 17.6-8; 2 Ti 2.19; 1 Yo 2.19 38irane i̱ dahuliya andaga howa ibuwa i̱ni hame ledodagua bule ndo. I̱ pu layago ibugua hame ledadagua bule ibiru.#Md 26.39; Yo 4.34; 5.30 39I̱ pu layago ibugua i̱na buliya hamelo kago ogo. I̱hondo ngiraru mbira i̱na yu wa nahe hamaro bulene horo harangi bibahende mo heya hai holiya hamelo ka.#Yo 10.28-29; 17.12; 18.9 40I̱ Abahanda hamelo kago ogo. Igini i̱ de hondowa i̱hondo mini mbiraore wialu karume haabobo holene mo yai helo hamelo ka. Hamaro bulene horongi haabobo holene yu karu i̱na mo heya hai holebero, lene.#Yo 3.15; 6.27; 6.47; 6.54; 11.24

Yu agali tini laga laga binigo ogo

41Ibugua lalu, Mberedi dahuliya andaga howa dalinigo i̱ ko, layago hale howa Yu agali tini bi gimigomo lalu, 42Ibu ai howa lalu kabe. Ibu Yosebe igini Yasu ndodabe. Ibu ai̱ya abala ina manda bidamagoni. Ibugua lalu, Dahuliya andaga howa dalinigo i̱ ko, lalu kago irane agibe, lowa laga laga bini.#Md 13.55; Mg 6.3; Lg 4.22

43Ani layagola Yasuhanda tihondo lalu, Tíni dege dege bi gimigomo lalu kamigo wahadaba. 44I̱ Abahanda i̱ pu layago ibugua mbirali haru naibiyagua ibuni hangu howa i̱ koria naibabehe. I̱ Abahanda i̱ koria haru ibirago hamaro bulene horo harangi ibu i̱na mo heya holebero.#Yo 6.65 45Ngode Datagaliwabe mana latagi haga henerume gilibu winigo ogo, Ngode Datagaliwabehanda wali agali bibahende lawai holebira, lalu gilibu wini. Abahanda ani lawai harago hale howa lomanda biraru bibahende i̱ koria ibaga.#Ais 54.13; Yar 31.34; Mai 4.2; Hi 8.10 46Mbiralime Aba de hendene lalu ndo laro. Aba de hendene mbirali ibu hangu Ngode Datagaliwabe kagoria howa daliyago ibugua Aba de hendene ka.#Md 11.27; Lg 10.22; Yo 1.18 47I̱na tíhondo heneneore laro. Ngode Datagaliwabehondo mini mbiraore wu kagome haabobo holene yu ka.#Yo 3.15-18; 3.36; 6.40 48Holene gahenge mberedi i̱ ko.#Yo 6.31-35; 6.58 49Tí mamalime dindi ko yobi wali agali nahaga wiagoria howa mena nalu henego ti haabo nahe homene. 50Ai dahuliya andaga howa daliyago mberedi ogoni mbiralime nayagua ibu nahomolebira. 51Holenenaga mberedi dahuliya andaga howa dalinigo i̱ kogoni. Mberedi ogoni mbiralime nayagua ibu haabo holebira. Mberedi i̱na nguleberogo o i̱naga tingini. Dindi bibahendeni karume holene gahenge yilo i̱na i̱naga tingini mulebero, lene.#Yo 3.13; Hi 10.5; 10.10

Yasuhanda, I̱naga tingini nalu kago haabobo holene yu ka, lenego ogo

52Ani layago hale howa Yu agalime keba howa tini dege dege laga laga bialu lalu, Agali ogonime ibunaga tingini ina nalimulo ngulebero lalu kago agua bialu ngulubadabe, lene.

53Ani layagola Yasuhanda lalu, I̱na tíhondo heneneore laro. Agali Hole Ibiyagonaga tinginibi daramabi nane kamiyagua tíha holene gahenge nawulebira.#Md 26.26-28 54I̱naga tinginibi daramabi nalu kago ibu haabobo holene yu kago ogoni ibu hamaro bulene horo harangi i̱na ibu mo heya holebero.#Yo 4.14; 6.27; 6.40; 6.63 55Tomo heneneore i̱naga tingini. Iba heneneore i̱naga darama. 56I̱naga tinginibi daramabi nalu kago ibu i̱ha ka. I̱ nde ibuha ko.#1 Yo 3.24; 4.15-16 57Aba holenehe kago ibugua i̱ pu layagola ibirugo ibu kagome i̱bi holenehe kogoni. Ogonidagua i̱ nalu kago ibu i̱ kogome ibubi holenehe holebira.#Yo 15.4-5; 1 Yo 3.24 58Mberedi ogoni dahuliya andaga howa dalini. Mberedi tí mamalime nalu howa homenego ogoni ale ndo. Mberedi ogoni áyu o larogoni mbiralime nayagua ibu haabo holebira, lene.

59Kabaniamani ngoai hagane andaha howa Yasuhanda mana lawai henego ogoni.

Pidahanda lalu, Haabobo holene bi í̱na dege yu ke, lenego ogo

60Yasuhanda ani layago hale howa wali agali ibu haruru piaga marume lalu, Bi ogoni larago haibioredago aiwa mo yulebirabe, lalu hene.

61Ti bi gimigomo lalu heago Yasu ibu minime manda buwa tihondo lalu, I̱na bi o larugoni hale howa tí genda howa wahalu poa kamibe. 62Agali Hole Ibiyago ala hayagoria hole iraga harago handarimiyagua agi manda buleberamibe.#Mg 16.19; Yo 3.13; Ab 1.9-11; Eb 4.8 63Ngode Datagaliwabe Dinini ibugua holene gahenge ngiagane. Wali agalinaga hongome habane nabulene nga. I̱na tíhondo bi langirugome holene gahenge ngiagane yalu Dinini ibaga.#2 Ko 3.6 64Anigo tí marume i̱hondo mini mbiraore nawi kami, lene. Yasu ibugua ibuhondo mini mbiraore nawulebirarubi ibu nde lolebiragobi piganengi howa manda biai ho howa bi ani lene.#Yo 6.36; 13.11

65Ani lowa lalu, Irane ogoni manda buwanaga i̱na tíhondo lalu i̱ Abahanda mbirali ibu i̱ koria ibilo mo mitangi bia nahayagua ibuni hangume ibabe nahe holebira lalu langiru, lene.#Yo 6.44-45

66Yasu haruru piaga wali agali hearume bi ogoni layago hale howa dewame ibu haruru nape wahene. 67Ani biyagola Yasuhanda ibunaga talima piaga homberiali (12) biaruhondo lalu, Tíbi i̱ wahalu piai holeberamibe, lene.

68Ani layago hale howa Saimono Pidahanda ladai bialu lalu, Anduane Homogo-o ina ai karia poloma̱yabe. Haabobo holenenaga bi í̱na dege yu kego.#Md 16.16; Mg 8.29; Lg 9.20 69Í̱ Mbirali Baya Buruguleore henego Ngode Datagaliwabe karia howa íbu kego manda buwa iname í̱hondo mini mbiraore wu kamago, lene.#Md 14.33; Mg 1.24; Yo 1.49

70Yasuhanda tihondo ladai bialu lalu, I̱na tí homberiali dabarugo tí mbira dege dama kami, lene. 71Ibunaga talima piaga hombeane Saimono Isagariodo igini Yudasa henego ibugua nde lolebira manda buwa Yasuhanda ani lene.

હાલમાં પસંદ કરેલ:

Yone 6: HUI

Highlight

શેર કરો

નકલ કરો