Mat 3

Yohanes Kuni yo ɔkpɛkpɛ yɛ kusɔliɔ

1Ní ewe ala klɔ mɛ ɛ, Yohanes Kuni yo ɔkpɛkpɛɛ aba Yudea ɔyaya klɔ lɛ azɛɛpani Aya yɛ liboe le e. 2Apani si, “Mlekyi ní mlɔ ìna nɛ mɛ, lɛ ese linu si lifunu ne Kaʋaŋaa ketii pɔnɔ!” 3Yohanes yɛ onu ɔniliɛ klɔ su gi bɛpani i gani Aya yɛ oboedoplɛɛ Yesaya aʋa si:

“Ɔniɛ ɛɛkla Aya yɛ Liboe le ní ɔyaya klɔ si,

‘Mlalulɔ kudeo aplɛ akí Ɔkaɛ;

mlagyɔ kudeo akí yɛ atɔ aaga!’ ”

4Lɛ kposɔ sipi liwu Yohanes akpɛ, lɛ akɔ kagaplekpa ɔgɛmi akɔ anya yɛ kasɛa mɛ ɛ. Yɛ kiŋaŋaɛ kize akikli ni liŋwafu mɛ kìbu. 5Banima bɛdɔ ní Yerusalem ni Yudea ani Yɔdan onipe lo su gi bɛba yɛ klɔ. 6Lɛ bɛdra ba ina nɛ mɛ ɛ, xe akpɛ kuni aki ba ní Yɔdan onipe lo me e.

7Agi Yohanes amɔ Farisianɛ ma ni Zadukianɛ ma ní kisrɛsrɛ mɛ gi bɛzɛba yɛ klɔ si ɔkpɛ kuni ɔki ba ɛ, “eʋi ba si, mlɔ banama gi mlɔ etukpo la mɛ alɛ gaglaa ŋwisi bagblaga ʋa kinɛ ɛ, nyaŋwɛ asi mlɔ si mlese ní Aya yɛ kutuheheo gi kwitraba onu na a? 8Mlabitɛ eboa la gi aabasɛ si mlekyi ní mlɔ ina nɛ mɛ ɛ. 9Nite si mlakíbù si mlatani kuse ní kutuheheo onu xe mlɛkɔ lɛ si Abraham yɛ onu mlɔ ɔkatsitsi ye. Mɛɛsi mlɔ si Aya aatani akla ana na ya kukɔ bitɛ besoebi ki Abraham! 10Bɛkɔ kawɛa ɛtrɔ ní ise le igu ne aʋa kooko; nite si ose kakaa gi óyo esebi gbã ɛ, biate lo kɔŋwia kpɛ́ ní kifu yɛ mɛ. 11Makpɛ kuni aki mlɔ gi libasɛ si mlekyi ní mlɔ ina nɛ mɛ ɛ. Pɔ̀ ɛ, ɔniliɛ gi aaba ní mɛ kedea ɛ, yɛ kɔɔ aakpɛ kuni ki mlɔ ní Ɔfuɛfuɛ Dradra lɔ ani kifu. Yɛ emu asani mɛ kura, lɛ mégyeno gi maagbɔni yɛ afɔkpa ʋa kyɛ ɛ. 12Evu yɛ kitɛɛ gi atrákɔ ɛ pí amu na petee e. Atrákpɛ yɛ amu na likpɔ ní owle lo me, kɔ akpɛ itsɔ lɛ ni kifu monimoni ye me.”

Yohanes akpɛ kuni aki Yesu

13Ní lipoe lɛ klɔ mɛ ɛ, Yesu ádɔ Galilea lɛ aba Yohanes klɔ ní Yordan onipe lo kutu si tɔ Yohanes ɔkpɛ kuni yo ɔki yɛ. 14Pɔ̀ Yohanes apɛ si yitsi kude kí Yesu. Lɛ loso asi yɛ si, “Wɔ́ linu si wɔakpɛ kuni ki mɛ. Lɛ wɔ boŋu wɔba mɔ klɔ a?”

15Pɔ̀ Yesu ebu lɛ onu aki yɛ si, “Ki tɔ lize nite abla. Niteme si, kwiabitɛ Aya yɛ kupɛpɛɔ aʋa.” Liki si Yohanes adimɛ ɛ.

16Kyɔŋ gi Yohanes akpɛ kuni yo aki Yesu pɔ ɛ, Yesu azeedo ní kuni yo me ko e, lɛ lifunu ne lidra ɛ, lɛ amɔ Aya Ɔfuɛfuɛ nɔ gi eeple edɔ ŋwisi abronuma kinɛ ní yɛ aʋa ɛ. 17Lɛ ole ɔtɔ ɛpani dɔni lifunu ne si, “Mobi ye liɛ ya yɛ madimɛ nɔ yɛ liboe liku me aŋu u!”

હાલમાં પસંદ કરેલ:

Mat 3: avn

Highlight

શેર કરો

નકલ કરો