Roukos 22

22 Ik.

1Orowa, Kamakush ani aye pandane sak pan marapto ehange ruwe ne. 2Aige, Kamui kora kenru esapane utara hemhem, kambi-nuye utara hemhem hemanda Shinuma raige ika hunara wa okai; awa, utara koishitoma nisa ruwe ne.

3Orowa, Satan anak ne nei tun ikashima wa niu tumugeta an Kariot kotan un guru ani aye Youdas onnaige ahun nisa ruwe ne. 4Aige, shinuma oman wa Kamui kora kenru esapane utara newa tumi-koro utara esapane utara tura, hemanda ki wa orota Yesu ekoshi eashkai ya koesanniyo ruwe ne. 5Orowa, nei utara anak ne yaikopuntek hine otta ichen kore kuni eitakamkire nisa ruwe ne. 6Awa, shinuma ramuoshma wa inne utara isam rapoketa Shinuma ekoshi kuni pirika pakihi hunara nisa ruwe ne na.

7Orowa, Kamakushbe yange kuni gusu an pandane sak pan toho ek. 8Awa, Shinuma Petros newa Yoannes payere hine otta ene itak-hi :— Ohi utara ibe kuni ne echi paye wa un gusu Kamakush marapto etokooiki yan, sekoro itak. 9Orota nei utara ene itak-hi :— Neita chi etokooiki kuni E ramu ya? ari itak. 10Orota Shinuma ene itak-hi :— Ingara, Machiya otta echi ahup chiki, wakka o sei op sei wa ek shine ainu echi etunangara kusu ne, nei guru, ahun chisei otta shinuma osh paye. 11Orowa, nei chisei kon nishpa otta ene itak yan :— Aokai otta Epakashnu guru ene ye-hi, Kuani Ku koikara utara tura no Kamakush marapto ibe kuni gusu an tumbu neita an ruwe he an? ani itak yan. 12Orowa, shinuma anak ne rikta an so akara wa an poro tumbu echi nukare: nei ita etokooiki yan, sekoro itak. 13Orowa, nei utara paye wa orota Shinuma ye korachi nukara: orowa, Kamakush marapto etokooiki nisa ruwe ne na.

14Orowa, pakihi ek chiki, Shinuma anak ne Apostoro un utara tura no rok nisa ruwe ne. 15Awa, nei utara otta Shinuma ene itak-hi :— Kuani anak ne ayairamshitnere etokota tan Kamakush marapto echi tura no Ku ibe rusui kashpa nisa ruwe ne: 16inambe gusu ne yakun, echi otta Ku ye, Kamui moshirʼotta auweomare pakno shomo nei ambe Ku ibe kusu ne na. 17Orowa, Shinuma itangi uk, aige, yaiiraige okere chiki ene itak-hi :— Tambe uk wa uwe-eimek yan: 18inambe gusu ne yakun, echi otta Ku ye, Kamui moshiri ek pakno tewa no poka hat pungara ibehe shomo Ku iku kusu ne gusu ne na. 19Orowa, Shinuma pantak uk wa yaiiraige okere chiki meshpa, orowa, nei utara otta kore wa ene itak-hi :— Tambe anak ne echi utara gusu akore ku netobake ne: En eshkarun kuni gusu tambe echi ki yan, ari itak. 20Orowa, kunne-ibe aokere ita nei no koracki itangi uk wa ene itak-hi :— Tan itangi anak ne echi utara gusu aohetu Ku hem otta an ashiri aeuitaknup ne ruwe ne. 21Koroka, ingara, En ekoshi guru koro teke En tura no set kashiketa an. 22Inambe gusu ne yakun, son no newa aesanniyo okere wa an korachi, Ainu Poho anak ne oman ruwe ne gusu ne na: koroka, orowa no aekoshi guru anak ne aeyaisambepokash humi! sekoro itak. 23Orowa, nei utara anak ne tan okaibe ki kusu ne guru inan guru ne ruwe he an? ani utashpa uwepekennu nisa ruwe ne.

24Orowa, nei utara tumugeta inan guru iyotta pasep 25ne ruwe, sekorʼan sakayo hopuni, orowa, nei utara otta Shinuma ene itak-hi :— Oya un utara shikkashima utara anak ne koro utara enishpane ruwe ne, orowa, nei utara gusu mondum koro utara anak ne pirikare ki utara ani aye ruwe ne. 26Koroka, echi utara anak ne nei no okai shomo ne: koroka, echi tumugeta iyotta pase guru anak ne iyotta poniune guru nei no an yan; orowa, esapane guru anak ne yaishieiwangere guru nei no an yan. 27Inan guru iyotta pase guru ne ya? ibe gusu rok guru bene ne ya? otta yaishieiwangere guru hene ne ya? Ibe gusu rok guru iyotta pase shomo ne ya? Koroka, Kuani anak ne echi tumugeta an wa yaishieiwangere guru korachi Ku ne ruwe ne. 28Koroka, echi utara anak ne a en koramnukara rapoketa En tura no okai utara echi ne. 29Orowa, Ku goro michi anak ne Moshiri En ashikkasmimare korachi, Kuani ne yakka moshiri echi shikkashimare ash ruwe ne; 30echi utara Ku goro moshiri otta an set otta ibe hemhem ki, iku hemhem ki kuni gusu ne; orowa, echi utara anak ne araset kata echi rok wa Israeru un tu ikiri ikashima wan ikiri no an utara koipishi kusu ne na. 31Simon, Simon, ingara, komungi mui akara korachi Satan anak ne e akore wa e mui kara kuni ne koramkon nisa ruwe ne; 32koroka, e koro eishokor-i anak ne iteki nin kuni ne, eani gusu inonno-itak Ku ki nisa ruwe ne; orowa, eani anak ne kanna hoshipi wa an ita e koro ainu uiriwak tumashnure yan, sekoro itak. 33Orota, shinuma ene itak-hi :— Utarapa, upakashnu chisei otta hene, rai-i otta hene Aokai tura no ku oman kuni ku etokooiki wa an. 34Orowa, Shinuma ene itak-hi :— Petros, e otta Ku ye, Eani anak ne re shuine En eamkiri katu eshina pakno, tanto niwatori chikap hau koro shomoki kusu ne.

35Orowa, nei utara otta Yesu ene itak-hi :— Kani o pukuru hene, pusaru hene, keire hene isam no echi payere ash ita nep ka eikohayep okai ya? sekoro itak. 36Orowa, nep ne yakka shomo, ani nei utara ye. Orota Shinuma ene itak-hi :— Koroka, tane anak kani o pukuru koro guru nei ambe uk, shui, pusaru ne yakka koro yan: orowa, kani o pukuru koro shomoki guru anak ne koro mipihi eiyok wa emush hok yan. 37Inambe gusu ne yakun, echi otta Ku ye :— Tap chieshinnuye wa an orushpe En otta auweomare kusu ne ap :— Orowa, Shinuma anak ne kashpaotte otereke utara tura akoesanniyo nisa ruwe ne na: inambe gusu ne yakun, En gusu an okaibe aokere kusu ne, sekoro itak. 38Orowa, nei utara ene itak-hi :— Utarapa, ingara, teda tu emush an ruwe ne, sekoro itak, pakno ne ruwe ne, ani Shinuma nei utara otta ye nisa ruwe ne na.

39Orowa, Shinuma soine wa ramma korachi Kanran-ush nupuri otta oman; orowa, koikara utara nei osh 40paye nisa ruwe ne na. Awa, nei ushiketa an wa nei utara otta ene itak-hi :— Echi utara iteki akoramnukara kuni ne inonno-itak ki yan, sekoro itak. 41Orowa, Shinuma nei utara orowa no shuma yapkin no pakno an wa kokkaea hine inonno-itak ki wa ene itak-hi :— 42Michi, Aokai ramuoshma yakun, tan itangi En orowa no oyakta ande wa En kore: koroka, Ku rengaine gusu shomo ne wa E rengaine ki wa en kore, ari itak. 43Orowa, kando wano Kamui uitekbe anukara wa Shinuma tumashnure nisa ruwe ne. 44Aige, Shinuma ikoni wa naa shiyuppa no inonno-itak ki: awa, sange poppe wakka shiri kata hachiri, aine, hem num korachi ne ruwe ne. 45Orowa, inonno-itak orowa hopuni wa koikara utara orota ek, aige, nei utara ramusarak gusu mokoro wa okai shiri nukara, awa, orota ene itak-hi :— 46Hemanda gusu echi mokoro ya? Hopumba wa iteki echi akoramnukara kuni ne inonno-itak yan, ani itak.

47Shinuma naa itak an rapoketa, ingarʼan, inne utara okai, orowa, nei tun ikashima wa niu tumuge un Youdas ani aye shine ainu, nei utara kotchaot oman; shinuma anak ne chopchopsekara gusu Yesu otta ehange no ek nisa ruwe ne. 48Koroka, otta Yesu ene itak-hi :— Youdas, chopchopsekara ambe ani Ainu Poho e ekoshi ya? sekoro itak. 49Orowa, Shinuma okari wa okai utara anak ne hetuku kusu ne ap nukara chiki, ene itak-hi :— Utarapa, emush ani chi shirikik kusu ne ya? ani itak. 50Nei shinen anak ne Kamui kora kenru esapane guru koro uitek guru shirikik wa koro shimon kisara oattuye nisa ruwe ne. 51Koroka, Yesu ese wa ene itak-hi :— Te pakno ramuoshma yan: orowa, Shinuma nei kisara tomooshma wa iwangere nisa ruwe ne. 52Orowa, Yesu anak ne epokba gusu araki Kamui kora kenru esapane utara newa epungine utara newa ekashi utara otta ene itak-hi :— Emush hemhem, shirikik kuwa hemhem koro wa ikka guru kishima kuni korachi echi araki shiri? 53Kuani kesto echi tura no Kamui kora kenru ta Ku an ita anak ne En kishima kuni shomo echi ki: koroka, tambe anak ne echi koro pakihi ne, kunne-i kiroro ne ruwe ne.

54Orowa, utara anak ne Shinuma kishima hine tura wa paye, aige, Kamui kora kenru esapane guru koro chisei orun ahup nisa ruwe ne. Koroka, Petros anak ne ukattuima no nei osh ek. 55Awa, utara anak ne tumbu upshotta abe are wa utura chiki, Petros ne yakka nei utara tumugeta a nisa ruwe ne. 56Orowa, shine uitekmat anak ne shinuma abe pekere otta a shiri nukara chiki, orun irammakaka ingara wa :— Tan guru ne yakka Shinuma tura no an guru ne, ari itak. 57Koroka, shinuma eshina wa ene itak-hi :— Shiwentep, kuani nei guru ku eamkiri shomoki, ani itak. 58Orowa, naa pon no shiran koro naa shinen shinuma nukara, aige, ene itak-hi :— Eani ne yakka nei utara un shinen e ne ruwe ne, ani itak. Koroka, Petros ene itak-hi :— Ainu, kuani anak shomo, ani itak. 59Naa shine pakihi okaketa anak ne moshima an naa shinen utumashi shomoki no ye wa ene itak-hi :— Son no newa tan guru anak ne Shinuma tura no an guru ne: shinuma Gariraya un guru ne ruwe ne gusu ne na, sekoro itak. 60Koroka, Petros ene itak-hi :— Ainu, hemanda e ye ya ku eramushkare, ani itak. Orowa nani, naa itak an rapoketa niwatori chikap hau kon nisa ruwe ne na. 61Orowa, Utarapa hosari wa Petros orun ingara. Awa, Petros anak ne — Tanto, niwatori chikap hau koro etokota, eani re shuine En eshina kusu ne, ani an itak ani orota Utarapa ye itak eshkarun nisa ruwe ne. 62Aige, shinuma soine wa poron no chish nisa, ruwe ne na.

63Orowa, shikkashima utara anak ne Shinuma eoya-itak hemhem ki, shirikik hemhem ki nisa ruwe ne. 64Samata, shiki kamure hine otta uwepekennu wa ene itak-hi :— Uweingara yan; E shirikik guru inambe ne ruwe he an? ani itak. 65Orowa, inne moshima okaibe ki wa Shinuma orun koatcha wa wen no ye nisa ruwe ne na.

66Orowa, tokap-to ne koro anak ne utara koro uwekari un ekashi ikiri, samata Kamui kora kenru esapane utara, kambi-nuye utara hene uwekarapa; awa, koro ukoramkoro utara orun Shinuma tura wa ene itak-hi :— 67Aokai anak ne Kiristo ne chiki un nure yan, sekoro itak. Koroka, nei utara otta Shinuma ene itak-hi :— Echi nure ash yakka eishokoro shomoki: 68samata, Kuani echi otta Ku nu yakka echi ese itak ki shomoki kusu ne. 69Koroka, tewa no, Ainu Poho anak ne Kamui kiroro un shimon tek samata a kusu ne na, sekoro itak. 70Orowa, obitta no nei okai utara anak ne :— Yakun, Aokai anak ne Kamui Poho E ne ruwe he an? ani itak. Orota Shinuma ene itak-hi :— Kuani Shinuma ne, ani echi ye, sekoro itak. 71Orowa, nei utara ene itak-hi :— Hemanda gusu naa paweteshu-i chi kon rusui ya? Chi utara yaikota anak ne Shinuma yaikota koro paro wano chi nu nisa ruwe ne gusu ne na, sekoro itak

હાલમાં પસંદ કરેલ:

Roukos 22: AINU

Highlight

શેર કરો

નકલ કરો