MATTHAI 15
15
Jesu’n lehkhagialtute leh Pharisaite a taina
1Huin Jerusalem khua a um lehkhagialtute leh Pharisaite Jesu kawmah a hung va, 2Bang diinga na nungjuite upate thugousiah a taleeh veu ahi viai? chih chu, an a neeh chiangun a khut uh a sil ngei sih uhi, a chi va. 3Hizongleh ama’n a dawng a, a kawmvah, Nangun zong bang diinga na thugousiah jiah va Pathian thupiah a taleeh na hi viai? 4Pathian in, Na nu leh na pa zah in, huleh, A nu leh a pa aha housia chu si jiang heh, a chi ngal a. 5Hizongleh nangun chu, Koipouh a nu aha a pa aha kawma, Keimah na hung phattuampihna diing photmah, Pathian kawma piah ahita, chi photmah in; 6A nu leh a pa a jah diing ahi sih a, a zalen diing hi, na chi va. Huchibangin na thugousiah jiahun Pathian thupiah bangmahlou na suaahsahta uhi. 7Nanguh milepchiahte aw, Isai in, na tungtaang thu uh ana soilawh kha ngeel hi. 8Hi mite’n a kam un ahung naih va, a muuh un ahung zahbawl uh; hizongleh a lungtang un ahung gamlaat uhi. 9Abang abang hileh amahun a thuhilhna va mihing thupiah a hilh jiahun, ahung be thawn uhi, ana chih chu, a chi a. 10Huin ama’n mipite a kou a, a kawmvah, Ngai unla, hesiam un; 11Kam a luut in mi a suniin sih; hizongleh kam a pawt in, hu ngei in mi a suniin hi, a chi a. 12Huin a nungjuite a hung va, a kawmah, Pharisaite’n hi thu a jah va a lunghih louh uh na he ei? a chi va. 13Hizongleh ama’n a dawng a, Kung chin ka Pa vaan a um suan louh chu bohkhiah in a um diing. 14Hite haw ngaihsah sih un; amahuh chu mittaw lamkaite ahi uhi. Mittaw in mittaw mah a pui inchu, kokhuuh ah a kekhawm diing uh, a chi a. 15Huin Peter in a dawng a, a kawmah, Hi tehkhinthu ka kawmvah hung hilh chianta’n, a chi a. 16Huin Jesu’n, Tutana nanguh zong heetsiamna beia um na hi u'maw? 17Kam a luut photmah gil sungah a luut a, huleh dailenna ah paihkhiah in a um chih, na theisiam nai sih u'maw? 18Hizongleh kama pawtte chu lungtang a kipana hung pawt ahi a, hute’n chu mi a suniin hi. 19Ajiahchu lungtang a kipatin ngaihtuahna giloute, tualthahnate, aangkawmnate, kingaihnate, guuhtaatnate, a tahlou heetpihnate, soisiatnate ahung pawt veu hi. 20Hute chu ahi mihing suniin; khut sil louha an neeh in mi a suniin sih, a chi hi.
Jentel numei tanu suhdamna
21Huin Jesu hu apatin a pawt a, Tura leh Sidon gam lamah a chiahta a. 22Huleh, ngai in, hu gam mah apatin Kana an numei khat ahung pawt a, kikou in a kawmah, Aw Lalpa, David Tapa, ka tungah zahngai in, ka tanu dawimatin a gim mahmah hi, a chi a. 23Hizongleh ama’n chu kam khat in zong a dawng sih hi. Huin a nungjuite a hung va, a kawmah, Amahnu hi sawlmang in; i nungah a kikoukou ngal a, a chi va. 24Ama’n a dawng a, Israel nam belaam mangte kawm loungal ah sawl ka hi sih, a chi a. 25Huin numeinu a hung a, Lalpa, hung panpih in, chi’n a bia a. 26Hizongleh ama’n a dawng a, tate tanghou laahsah a uite kawma piah a kilawm sih, a chi a. 27Huin amahnu’n, Lalpa, hihzaw ahi a, hizongleh uite’n zong a pu uh dohkaan apat tanghou them kia a ne saam uhi, a chi a. 28Huin Jesu’n a kawmah, Numei, na ginna thupi hina mai e; na deih bangtahin na tungah um heh, a chi a. Huchi’n a tanu chu hu hun ngei in a damta hi.
Mi tampi suhdam in a um uh
29Huleh Jesu chu hu apatin a chiah a, Galili tuipi kawm ahung tung a; huin taang ah a chiahtou a, huah a touta a. 30Huleh mipi nasatah, keengbaite, mittawte, haamthei loute, piangsualte, leh midang tampi hung pui in, a kawmah a hung va, amahuh chu Jesu keengbul ah a koih va, ama’n ana sudam chiat a. 31Huchia haamtheiloute hung haama, piangsualte hung hoiha, keengbaite keeng a hung pai leh, mittawte’n hung mu theita uh, chih a muh un, mipite’n thum ah a sa va; huchi'n Israelte Pathian chu a paahtawita uhi.
Saangli vaahna
32Huin Jesu’n a nungjuite a kawmah a kou a, Mipite tuin ka kawmah ni thum a umta va, neeh diing bangmah a neih louh jiahun, ka hehpih mahmah hi; huleh amahuh angawl in ka chiahsah nuam sih hi, huchilouin zaw lamkal ah a sawlsam kha diing uh, a chi a. 33Huin a nungjuite’n a kawmah, Mipi hizah tate vaahna thamzet tanghou hu zaatpi gamdai ah khoi apatin i mu diai? a chi va. 34Huin Jesu’n a kawmvah, tanghou beu bangzah na nei viai? a chi a. Huin amahun, Beu sagih leh nga neu tawmtakhat, a chi va. 35Huin ama’n mipi chu tual a tou diingin thu a pia a. 36Huin tanghou beu sagih leh ngate chu a la a, kipaahthu a soi a, a balkeeh a, nungjuite kawmah a pia a, huleh nungjuite’n mipite kawmah a pia uhi. 37Huleh a bawnun a ne va, a vah chiatta uh; huleh a neeh val uh anneng chu bawm sagih a luaahdim uhi. 38Huleh a nete chu numei naupang sim louhin, piching saang li ahi uhi. 39Huin mipite chu a sawlmang a, kuang ah a tuang a, Magdala gam lamah a hungta hi.
હાલમાં પસંદ કરેલ:
MATTHAI 15: SIMTBSI
Highlight
શેર કરો
નકલ કરો
Want to have your highlights saved across all your devices? Sign up or sign in
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.
