JOHAN 5
5
Jisu Le Zi ka Temi Nme Thyü Ngwakeshü
1Tsüsika Judanyu Nga tilo ntsin Jisu le Jerusalem nyu gun. 2Tson-o Jerusalem nyu Tanyü Chwida khoka ka pvün thyü kenjü Ibrinyu khwen ki Bethzatha tsekethyü zi nme le bin. 3Lo ka tsünyu tsü a-yhükeponyu, phayhonyu,terothonyu, lo keho gwakemvunyu kechon le tsünyu tsü zhü bin hü, anyugun le zü le nnu chwikeryü khwen bin hü. 4Kechamvule tsangge jolonyu nme le tsüryüo zi nyu zü bokenu shü hü, lo zü bokenu keshü sika kehonyu le zü nyu yülo kerigü le a-ge keho lihi le bin-e gwalo la la tse hü. 5Lo tsükatsü chen shenryüo tetse kehonyu nme le tsünyu zhü hü.
6Jisu le tsügü le zhü kebin hyulo,lo a-le kethon ki tson hüla kethyü shalo njüo a-ka, “Nle gwalo nyü bin nle?”
7Kehogü le a-ka, “Kedagü, zü le nnu chwikeryü ka, temi nme-e azen gü zi nyu keshü min ndi; lo ale yü kezhü ka kechanyu le a mhundyü ki yü lala tse hünyo.”
8Jisu le a-ka, “Solo njüo nzhü sen-o tsonchülo.” 9Lo tsoshü ntsin temi tsügü le gwalo njüo a-zhü kethyü khi sen-o tinla.
Lo tsüle Sabbath jon nyü, 10tsügenyu Judanyu dan le gwalo kelagü ka, “Nthu Sabbath, lo nle nzhü sen kehü hile tejvü mvu.”
11Ai a-le anyugun ka, “Athyü ngwa keshü gü le a-ka nzhü sen-o tsonchü lo,” tson shü le.
12Anyugun le, “Nzhü sen-o tsonchülo, tse nka kezo gü le segü la” tson-o a-ketso.
13Ai a-le a-thyü ngwa keshü gü le segü yo tsü shamvu; temi kechon le tsü ka bin kethyü genyu lo Jisu le rani sen-o kecha ki tinla kethyü genyu.
14Tsüselo Jisu le Kershvuka nyu a-hyulo-o a-ka, “Hire, nle gwalo laso, gwamvu kvu kethyü le nge ryülo kenshvu genyu mu sinni nya gwünlo.”
15Temi gü le gü a-thyü ngwa keshü gü tsü le Jisu tsekethyü pe Judanyu ka zoshü. 16Tsontsin Jisu le Sabbath nyü tha tsü thyükeshü genyu Judanyu dan le a-nkhin sola. 17Lo Jisu le anyugun ka, “Apvü le ntsokae tha thyü bin, tsügenyu ako thathyü bin nyo.”
18Tsontsin a-le Sabbath jon gwünrho kethyü ntimvule Sunggigü le a-pvü letseo a-le Sunggigü tsülaki tse kehü genyu, Judanyu le tsügenyu Jisu dushvula titse zokvulo la.
Nyugü Kekvu
19Tsügenyu Jisu le anyugun ka, “Ale hagun ka zo tsentsü shüti, Nyugü le A-pvü thakethyü hyu kemvu we thame thyü loho. Apvü le tha lihi-e thyü kehü tsühontse Nyugü ko tsühontse hünyo. 20Kechamvule Pvügü le Nyugü so kehü genyu, lo a-le thyükehü aphu pe a-hi kehü genyu lo hagun no hagun dunthyülo nrün genyu a-le tsünye kegon nduntho keda dan me pe a hishü ti. 21Lo Pvü le kesinyu thyü nrhünlo kehü hontse, Nyugüe a-kendonyu thyü nrhünlo ti. 22Tsügenyu Pvü le temi nme-e ketso mvutse ketso nrün khipe Nyugü ben ka shü laso. 23Kechamvule temi lihigüe Pvügü shwen kehü hontseo tsüdan no Nyugü ko shwenlo titse kethyü genyu; lo lihigüe Nyugü sohü kemvu we a-nikeshü Pvügü ko so hü mvu.
24“Ale hagun ka zo tsentsü shüti, temi lihigüe ajo nyülo njüo anikeshü gü tenyen kelo gü le kethonthen kerhün le binla so, lo tsü le temi nkhinla kehü kipon mvu le kesi nrhio kerhün nyu chwi laso. 25Ale hagun ka zo tsentsü shüti, kesinyu le Sunggigü Nyugü khwen sha loti, lo shakelonyu kerhün gwünkho le ryüzhü nyo, lo ntsokae tsüle ryü bin laso. 26Kechamvule Pvügü le kerhün le a-ge kebin hontse Nyugü ge ko bin lo tsekethyü hoshü laso.
27Lo a-le Temi Nyugü thyü kelo genyu ketso kethyü kekvu pe a-tsü laso. 28Hagun jo higü genyu hagun dunthyü nya, kechamvule sika nyu kebin nyu aphu a-khwen shalo ti. 29Tson-o kegwa thyü kehünyu le rhün-o kerhün nyu gun loti, lo gwakemvu thyü kehünyu le rhünni-o ketsokethyü bin nyu gunla nrün gwünkho le ryüzhü kela si genyu.
Jisu Jünkezo dan
30“Ale a npvü we thame thyülo ho, ale nyükelo hontse pe me ketso hü; lo ale a npvü akenyü thyü nyü mvule a nikeshü gü kenyü thyü kenyü genyu ale me ketso kethyü le a-zü.
31“Ale a npvü a jün zohü yatselo tsüle ketsin kemvu. 32A jünkezo kecha nme le bin nyo; lo a-le a-jün zo kehü jo tsü le a-ketsin tsekethyü ale shalo laso. 33Hagun le me nipe Johan kishü, a-le ketsin gü rüla zoshü laso. 34Tson-e a rüla kezo akenyü we temi ka nyu mvu; ai hagun no kenikelo hyulo titse kethyü genyu ale jo hi zohü nyo. 35Johan tsüle nben kebin lo ben kebin mah keben; lo hagun le gwüngwa nme ka we a-keben nyu hagun kenyü holo. 36Ai a rüla hyukelo we Johan ka hyukelo nyeki gonkvu, kechamvule Pvügü le ano thyü tishü lotseo khipe atsü keshü tho ale thyü keshü gü tsü le Pvügü le a nishü tse kethyü zoshü. 37Lo a nikeshü Pvügü le ajün zoshü, hagun we thame kae a-khwen shamvu, lo a-jojae hyumvu, 38lo a-le ajün zokeshü hagun we tsü hagun nyun nyu shüpvü hü mvu, kechamvule a-le nikeshü gü hagun le tsü tenyen hü kemvu genyu. 39Ketsin lesü ka hagun le kethonthen kerhün hyu loti tsekethyü genyu hagun le tsü rüchün-o tsü fü kü hünyo; lo tsü le a jün zo kehü dan le. 40Ai hagun le kerhün hyulo nrün füo aki ryü hümvu.
41“Ale temi mhundyü ka teshwen pvünyü mvu 42Ai hagun nyun nyu Sunggigü keso le hü mvu tsekethyü ale shabin nyo. 43Ale apvü zan sen-o ryü; lo hagun le a zenlo hümvu; kechanyu nme le a-npvü a-zan sen-o ryü yatselo, hagun le a-zenloti. 44Hagun Sunggigü kanyu chwikeryü teshwen pvü mvuo hagun le temi mhundyü ka teshwen pvü kenyü dan, hagun le nyu tsethyüo tenyenlo mon? 45Hagun ale Pvügü ka hagun nkhin kethyü rüchün nya; hagun kenkhin nme le bin nyo, lo tsüle Mosa. 46Lo hagun le Mosa tenyen yatselo, hagun le a tenyen ti kechamvule a-le a rüla thu keshü genyu. 47Lo hagun le a-le thu keshü tenyen hü mvulo, hagun le nyu tsethyüo ajo tenyenlo tila?”
હાલમાં પસંદ કરેલ:
JOHAN 5: REGSBSI
Highlight
શેર કરો
નકલ કરો
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
