मत्तायोस 7
7
नन्नारिन नेंवई नन्ना ही पत्त नू सिखाब'अना
(लूक 6:37,38,41,42)
1नीम नन्नारिन नेंवई अमा नना, होले नीम हूँ धर्मेस ती नेंवई मल नन्तार'ओर। 2एकासे नीम नन्नारिन नेंवई नन्दर अन्नेम नीम हूँ नेंवई नन्तार'ओर, अरा नीम एका जोखना ती जोख'ओर आ जोखना तिम निमा गे हूँ धर्मेस ती जोखतार'ओ।#मर 4:24
3नीन निंग्है ख़न्न ता चइलन मल थिथाब'अदय, लिकिन निंग्है भईसी ख़न्न ता कंटेन एन्देरगे ऎरदय? 4नीन निंग्है ख़न्न ता चइलन मल थिथाब'अदय अरा निंग्है भईसिन ब'अदय, अना भई, ऎन निंग्है ख़न्न ता कंटेन ओथ्र'ओन चि'ओन, एन्ने एन्देरगे ब'अदय? 5अना उतुरमाड़ू, मुन्द निंग्है ख़न्न ता चइलन ओथ्र'आ, होले नीन निंग्है भईसी ख़न्न ता कंटेन ओथ्र'आ गे फरीफरी ऎरा ओंगोय।
6एन्द्रा नेम्हा र'ई अदिन नेम्हा मलकर गे अमके चि'आ, आर अदिन तिर्ख़ोर नाबोर अरा आर निंग्है गने लड़ाई ननोर।
ने'आ, बेद्दा, ठोकठोकमब'आ
(लूक 11:9-13)
7धर्मेस ती ने'आ, होले निमा चीर'ओ, बेद्दा, होले निमा ख़क्ख्र'ओ, बलिन ठोकठोकमब'आ, होले धर्मेस ती निमा तिसगर'ओ। 8ईगेका नॆ ने'अनर आर ख़क्खनर, अरा नॆ बेद्दनर आर गे ख़क्ख्र'ई, अरा नॆ ठोकठोकमब'अनर आर गे तिसगर'ई। 9निंग्है नू एका ओर्तस एन्ने आल र'अदस का तंग्दस असमा ने'ओस होले आस गे पखनन चि'ओस? 10महले इंजो ने'ओस होले आस गे नेर्रेन चि'ओस का? 11अन्ने नीम मलदौ मनरकी निंग्है ख़द्द-ख़र्रर गे दौ जिनिसन चि'आ अख़दर होले, मेर्ख़ा बंगस तंग्है गुसते ने'उर गे बॆस आलॊन नेम्हा बॊलतन चि'ओस दिम।
12आलर एन्दरन निमन नना नीम बेद्ददर, अबड़न नीम आर गे नना। एन्देरगेका मूसासी पॆसका अरा धर्मेसी कत्था तिंगुर ही आनना ईदिम हवे।#लूक 6:31
सक्कुड़ अरा चकड़ बली
(लूक 13:24)
13सक्कुड़ बली ती मेर्ख़ा कोर'आ। चकड़ बली अरा चकड़ डहरे नरक गे कड़हाब'ई, अरा बग्गे आलर आ बली ती कोरनर। 14लिकिन उज्जना नू कोरना बली सक्कुड़ अरा डहरे कठिन र'ई, अरा जुक्किम आलर दिम अदिन ख़क्खनर।
मन्न अरा अदही ख़ंजपा
(लूक 6:43-45; 13:26,27)
15ठकवा धर्मेसी कत्था तिंगुर ती चिहुंक र'आ। आर ऎरना नू लुदऊ लेक्खा भेंडो ही बेसे निम्है गुसन बरनर। लिकिन आर मानिम नू चर्रना मॊख़ना हड़हा र'अनर। 16नीम आरिन आर ही ख़ंजपा गुट्ठी ती लख'ओर। एकासे का आलर अच्च-ख़ोप्पा गुट्ठी ती अंगुर महले नागफनी गुट्ठी ती डुम्बारी मल चोख़नर। 17एन्ने बने मन्न ठोस ख़ंजपा ख़ंज'ई, अरा पयहा मन्न पयहा ख़ंजपा ख़ंज'ई। 18अरा बने मन्न पयहा ख़ंजपा चि'आ पुल्ली, अरा पयहा मन्न ठोस ख़ंजपा चि'आ पुल्ली। 19औंगे एका मन्न ठोस ख़ंजपा मल ख़ंज'ई आद तार्रर'ई ती चिच्च नू सज्र'ई।#मत्ता 3:10; लूक 3:9 20एन्ने लेक्खा नीम ठकवा धर्मेसी कत्था तिंगुरिन आर ही नलख गुट्ठी ती चिन्ह'ओर।#मत्ता 12:33
21नॆ एंगन अना उर्बायो! अना उर्बायो! ब'अनर लेका आर मेर्ख़ा राजी नू मल कोर'ओर। नॆ एंग्है मेर्ख़ा बंगस ही मने लेक्खा नन्नर आरिम मेर्ख़ा राजी नू कोर'ओर। 22अउला अजम बग्गे आलर एंगन ब'ओर, ‘अना उर्बायो! अना उर्बायो! ऎम निंग्है नामे ती धर्मेसी कत्था तिंकम अरा निंग्है नामे ती नाद गुट्ठिन ओथ्रकम अरा निंग्है नामे ती बग्गे हैकट नलख नंजकम।’ 23होले ऎन आरिन फरीफरी तेंगोन ती आनोन, ‘ऎन निमन इकला हूँ बलकन, मलदौ ननू आलारो, एंग्है गुस्ते गुच्छर'आ।’#भज 6:8
लुरगर अरा बोया
(लूक 6:47-49)
24एका ओर्तर एंग्है इबड़ा कत्था कुट्ठिन मेन्नर ती अबड़न अन्नेम नन्नर, आर तंग्है एड़पन चचड़ी मइय्याँ कमचका लुरगर आलस लेक्खा र'अनर। 25अरा चॆंप पोस्सा अरा बहड़ी गुट्ठी बरचा अरा घटा गुट्ठी बरचा अरा आ एड़पा नू लग्गिया, लिकिन आद मल खत्रा, एन्देरगेका आद चचड़ी नू नेव कमचका रहचा। 26एका ओर्तर एंग्है इबड़ा कत्थन मेन्नर, लिकिन अबड़न अन्नेम मल नन्नर, आर तंग्है एड़पन चलकुर मइय्याँ कमचका बोयस लेक्खा र'अनर। 27अरा चॆंप पोस्सा अरा बहड़ी गुट्ठी बरचा अरा घटा गुट्ठी बरचा अरा आ एड़पा नू लग्गिया, ख़ने आद बिड्रिया ती धंस्रा ख़च्चिया।”
28येसुस इबड़ा कत्था गुट्ठिन तेंगा मुंजा ख़च्चियस ख़ने गोंहड़ा गुट्ठी आसी सिखाब'अनन मेंजा ती अनचकरा केरा। 29आस गा आर ही नॆग सिखाब'उर लेक्खा मला, लिकिन ओन्टा अदिया उइय्युस लेक्खा सिखाब'आलियस।#मर 1:22; लूक 4:32
હાલમાં પસંદ કરેલ:
मत्तायोस 7: KURUXBSI
Highlight
શેર કરો
નકલ કરો
Want to have your highlights saved across all your devices? Sign up or sign in
Kurux NT - पुना गच्छरना NT
Copyright © Bible Society of India, 2014.
Used by permission. All rights reserved worldwide.
