INṬANNA 9
9
Noa kuoma Pathien thuthlung
1Chun, Pathienin Noa le a naupasalhai chu mal a sâwm a, an kuomah, “Chi tamtak inthlain hung pung unla, hnuoi hi hluo sip ro.
2Nangni ṭîna le pawisakna hnuoia sa tinrêng le chunglêng vate tinrêngin nei an ta; chuonghai le hnuoia bawkinvâka lâwn po po le, tuipuia nga po pohai chu, in kuta pêk an ni vawng tah.
3Thilhring chângthei tinrênghai chu in ta dingin fâk ding nîng an ta; thlai hring ka pêk ang cheu khan iengkim ka pêk vawng cheu.
4 #
Lev 7.26-27; 17.10-14; Dt 12.16-23 Amiruokchu, sa a hringna (a thisen) pumin in fâk ding a ni nawh.
5Chun, in thisen, in hringna phuba chu la ngei ngei ka tih; sa tinrêng chunga chun lâng ka tih, mihriem kuoma inthawk khawmin, mi tin an unauhaia inthawk chun, mihriem hringna phuba chu la seng ka tih.
6Tukhawm mihriem thisen insuotu chu mihriem vêkin ama thisen chu an insuo ve ding a nih: Pathienin ama angpuiin mihriem a siem si a.
7Chun, nangni chu chi tamtak inthlain hung pung ro; hnuoia hin nau tamtak nei unla, a chunga hin hung pung ro,” a ta.
8Chun, Pathienin Noa le a kuoma um a naupasalhai kuoma chun,
9“Ngai ta u, keima ngeiin in kuoma le in hnunga in thlahai kuoma khawm ka thuthlung chu ka sukdet a nih;
10in kuoma thilhring tinrêng um, in umpui vate dâm, ran dâm, ramsa tinrêng kuoma dâm khawm; lawnga inthawka hung suok po po, hnuoia sa tinrêng kuoma chen khawm.
11In kuomah ka thuthlung chu ka sukdet a; tisa po po tuilêta sukbohmangin um ta naw ni hai a, hnuoi sukse dingin tui lêt nâwk ta naw bawk a tih,” tiin a hril a.
12Chun, Pathien bawkin, “Hi hi kei le nangni le in kuoma thilsiem hringna nei tinrêng umhai kâra, suon tâwp lova um peihai ta dingin, ka thuthlung inchikna chu a nih.
13Sûmah ka sumrisâng kân zâmtir a, chu chu kei le hnuoi inkâra thuthlung inchikna ding nîng a tih.
14Chun, hieng hi nîng a ta, hnuoi chunga sûm kân zâmtirin sumrisâng chu sûma chun inlang a ta,
15kei le nangni le tisa po po laia thilsiem hringna nei tinrêng inkâra ka thuthlung hi hre zing ka tih. Chuongchun, tui chu tisa po po sukbohmang dingin hung lêt nâwk ta naw nih.
16Chun, sumrisâng chu sûmah inzâm hlak a ta; chuongchun, Pathien le hnuoi chunga tisa um po po laia thilsiem hringna nei tinrêng inkârah kumkhaw thuthlung um chu ka hriet zing theina dingin en hlak ka tih,” a ta.
17Chun, Pathien bawkin, Noa kuoma chun, “Chu chu kei le hnuoi chunga tisa um po po inkâra thuthlung sukdetna inchikna a nih,” a ti bawk a.
Noa le a naupasalhai
18Chun, Noa naupasal lawnga inthawka suokhai chu Sem, Ham, le Japheth an nih: Ham chu Kanaan pa a nih.
19Chuonghai pathum chu Noa naupasalhai an na: chuonghaia inthawka suokhai chun hnuoi po po hi an dâp zo tah a nih.
20Noa chu hnuoi inlettu hmasatak a ni a, Grêp huon a siem a,
21uoin chu a dâwn a, ân rui a: chuongchun, a puon inah puon bovin a zâl a.
22Chun, Ham, Kanaan pa chun a pa saruokna chu a hmu a, tuola a unauhai pahni chu a hril a.
23Chuongchun, Sem le Japheth chun puon an lâk a, liengkoa inzâwnin hnungtâwlin an fe a, an pa saruokna chu an inkhum ta a; naw dang tieng an ngha a, an pa saruokna chu an hmu naw a.
24Noa chu a uoin inrui chu a hung har a, a naupasal naupang takin a chunga a thawzie chu a hung hriet ta a.
25Chuongchun,
“Kanaan chu ṭawngsephurin um raw se;
A unauhai siehlawhai siehlaw nîng a tih,” a ta.
26“Lalpa, Sem Pathien chu inpâkin um raw se.
Kanaan chu Sem siehlawin um raw se
27Pathienin Japheth chu suklien sienla,
Sem puon inhaiah um raw se;
Kanaan chu a siehlawin um raw se,”
a ti bawk a.
28Chun, Noa chu tuilêt hnung chun kum za thum sâwmnga a dam a.
29Noa dam sûng po po chu kum za kuo le sâwmnga a na; chun a thi ta a.
હાલમાં પસંદ કરેલ:
INṬANNA 9: HMOVBSI
Highlight
શેર કરો
નકલ કરો
Want to have your highlights saved across all your devices? Sign up or sign in
Hmar OV (Re-edited) Bible (Millennium) - Pathien Lekhabu Inthieng
Copyright © Bible Society of India, 2016.
Used by permission. All rights reserved worldwide.