Mathayo 7
7
1Duɔka ye luk, kɛlke we bi ya luk. 2Luŋ ye we luk, yeneka bene we ya luk: ku alem ye we them, yeneka bene we ya thɛm. 3Yeŋo ye ŋɛm riɔɔr ne wanmuuth nyin, ku cii luc ŋem ne yinyin? 4Ku yeŋo yook yin wanmuuth, Wu ne ɣan miit riɔɔr bei ne yinyin; ku ŋem luc ke tɔ ne yinyin? 5Yin e dudhum, kɔn luc nyaai ne yinyin, yeneka bin yin apiath ba riɔɔr nyaai ne wanmuuth nyin.
6Duɔka jɔk ye yiɛn kelajik, ku duɔka margaritikuɔn ye cuat ne kuɔl nhiim, kɛleke bikke dum ne kecok, ku bik retki we.
7Yaka thiec, ku kabi ya yiɛn we; yaka kor, ku kabak ya yok; yaka teŋ, ku kabi ya liɛp we. 8Raan ebɛn ye thiec ee kap; ran ye kor ee yok; ku ran ye teŋ, aye liɛp en. 9Yeŋa de week, ne ŋɛle wende ye ne cuin, ke yin kuur? 10ka na lim riŋ, ke yin keroor? 11Yen na nyiɛcka gɛm de kapiath enɔŋ mithkuɔn, we kɔc rac, ke Wuɔrduɔn tɔ nhial ye kepiɛth yinde gam keek kek kɔc ye ye ŋal? 12Yen ke dɛ ebɛn ke nɔŋ we piɔth bi kɔc ya luɔi week, yene yaka luɔi keek eya. Yenekee loŋ ku wel ke nebi.
13Yaka lɔ thin ne thoŋ thi. Thok ee dit, ku dhol ee kueeth, ye lɔ ne riaakic, ku juaac ee wat ne ye leer thin. 14Thok ee thui, ku dhol ee kuur, ye lɔ ne piiric, ku kalik keeka ye yok thin.
15We ya nyiɛn ne nebii ye we dhoom, ye bɛn enɔŋ week e ke ceŋ biɔŋ ke amɛl; ku cik wath ne biɔk thin yiki baŋbaar. 16Aabakke ya nyic ne luɔk ye kek luɔk. Ye kɔc abiɛi lɔ yok ne kuɔɔth yic, ku ŋaap ne thilic? 17Yen tiim piath kedhia aaye luɔk ne luɔk piɛthden, ku lok tiim rac ne luɔk rɛɛcden. 18Tim piath aci luɔk arac ye leu, ku tim rac aci luɔk apiath ye leu. 19Tiim kedhia tiim cie luɔk apiath aayeke yep ku cuɛte ke mɛɛc. 20Yen aabakke ya nyic ne luɔk ye kek luɔk. 21Acie raan ebɛn ran ye ɣa yɔɔk, Ye Bɛny, Bɛny, yene bi lɔ ne ceŋ de Nhialicic. Ee ran ye piɔn de Awa tɔ Nhial loi. 22Juaac abi ɣa yɔɔk ne yekole, Ye Bɛny, Bɛny, kenku ya weet ne rinku, ku ciecku jak rac ne rinku, ku yuku kadit loi ne rinku? 23Ku kaba dhuɔk keek, Ya we cake kɔn nyic; jalka, we ye kerac loi. 24Yen raan ebɛn ran ye keewelcieke piŋ, ku yee ke loi, abi ciɛt ran nyic kaŋ, ci ɣonde buth ne kuur nom. 25Go deŋ tuɛny, ku bɔ aboor, ku put yom, ku yiɛɛki yeɣone; go cuɔk yuɛɛk, ne ke cene ye wɛc ne kuuric. 26Ku raan ebɛn ran ye keewelcieke piŋ, ku ci ke ye loi, abi ciɛt ran ci bel, ci ɣonde buth ne liɛt nom. 27Go deŋ tuɛny, ku bɔ aboor, ku put yom, ku yiɛɛki yeɣone. Go yuik, ku ye yuikde ke thiekic.
28Na ci Yecu keewelke thol ne luɛl, ke duut gɛi ne weetde. 29Aayeke wɛɛt ci toŋ nɔŋ riɛr, ku cii cit dugɛɛrken.
હાલમાં પસંદ કરેલ:
Mathayo 7: LEKJOT
Highlight
શેર કરો
નકલ કરો
Want to have your highlights saved across all your devices? Sign up or sign in
© British and Foreign Bible Society 1940, 2017
Lek Jot de Jecu Kritho 1940 વિષે વધુ શીખો
