मत्ती 8
8
कुष्ठबीद लादेब मीत्या तम् क्यूरेब
मर्कूस १:४०-४५; लूका ५:१२-१६
1येशू गङ्दे मो तल्लमेस्ये ङूजे ङ्ये-ङ्ये मीहुल केन् रदे। 2कुष्ठबीद लादेब मीत्या येशू ट्याने रदेबे ङूजे खूम्ने पूजी चोदेबे येरे यदे, “ओ प्रभु, नदे ङैने तम्चीम्मेस्ये मन्लो, ङैजे बीद तम् क्यूप्पीय।”
3येशूदे ला तान्तीदेबे ङूने छूत्दे मेस्ये यदे, “न तम् क्यूप्पस्य मन ख्यङ्।” यबीतीक्ने ङूजे बीद तम् क्यूरी। 4#लेवी 14:1-32होर्दे येशूदे ङूने यदे, “सूनेये अन्-स्योल्लाची। तर प्र, न रङ्सेने पूस्र्या-ट्याने तम्ब, मेस्ये मोशाजे आज्ञा अनुसार भेटी चेर्ती, होर्दे मीयूजे लागि न तम्क्यूरेब प्रमाण क्यूस्स्य।”
कप्तानजे विश्वास
लूका ७:१-१०
5येशू कफर्नहुम यब सहरने क्योयीब ङूट्याने रोमीयूजे कप्तान त्या रदेबे बिन्ती चीत्देबे यदे, 6“ओ प्रभु, ङैजे त्वो ला तोप् स्येब बीददे थला पर्दीदेबे कीम्ने सोरो छरङ् प्रेन्न ख्यङ्।”
7येशूदे ङूने यदे, “ङ रदेबे ङूने तम् चीम्मीय।”
8तर कप्तानदे यदे, “ओ प्रभु, ङैजे कीम्ने स्वागत चेब लायकजे ङ त्वो। तर नदे वचन त्या येमीलो ङैजे त्वो तम् क्यूप्पीय। 9चेनेयलो ङैये हुकुम चील्लेबयूजे नङ्ने ख्यङ्, होर्दे ङैजे नङ्नेये सिपाईयू ख्यङ्। ङैदे त्याने ‘प्र’ यीय, होर्दे ङू प्रीय, मेस्ये सूजोबने ‘ख’ यीय, होर्दे हम्ब रीय। ङैजे त्वोने ‘येरे ची’ यीय, होर्दे ङूदे हम्ब चीक्क्य।”
10कप्तानजे पो ङ्यीन्देबे येशू हार्मन्दीदे, मेस्ये ङूजे ङ्ये-ङ्येदे रेनब मीयूने यदे, “तम्दम्ने, ङ नमयूने यीय, “अन्छ्वासेमेजे केन् विश्वास चेब मी इस्राएलनेये अन्तू। 11#लूका 13:29ङ नमयूने यीय, पूर्व मेस्ये पश्चिमदे कूम मीयू रीय, मेस्ये स्वर्गजे राज्यने अब्राहाम, इसहाक, याकूबप्रे भात्यार् चने टूङ्क्य। 12#मत्ती 22:13; 25:30; लूका 13:28तर राज्यजे मीयू फीजे मून्दूङ्ने छाबीय, हैयाने मीयू ङूय मेस्ये स गीटीटी चीक्क्य।”
13होर्दे येशूदे कप्तानने यदे, ‘प्र, कर विश्वास नदे चे ख्य, नने होरने क्यूस्स्य।” होर्दे हम्ब कप्तानजे त्वो हन्छ्वाबने तम् क्यूरी।
नवयू तम्क्यूरेब
मर्कूस १:२९-३४; लूका ४:३८-४१
14पत्रुसजे कीम्ने येशू रमेस्ये ङूदे पत्रुसजे य्वामी छोवतप्दे अमीन् क्यूत्देबे फोल्नब तङ्दे। 15येशूदे ङूजे ला छूत्दे मेस्ये छोवतप्दे ङूने क्यापीदे होर्दे ङू लङ्देबे येशूजे सेवा चीत्दे।
16नूस्यूङ्लाबे येशू ट्याने थमयूदे छेत् लादीकब कूम मीयूने रेत्दे। येशूदे रङ्से वचनदे छेत्यूने योम्बीदे मेस्ये नवयू कोला ख्य हम्बयू क्वानेने तम् चीम्मीदे। 17#यशैया 53:4यशैया अगमवक्तादे येयेब पो पूरा क्यूरने येरे क्यूत्दे,
“ङीनजे न-छयू मेस्ये बीदयू ङू रङ्सेदेने प्लेगीदे।”
येशूजे ङ्ये-ङ्ये प्रब फा पर्देब लू
लूका ९:५७-६२
18येशूदे रङ्सेजे ती-छो मीहुल केन् तङ्देबे ङूदे रङ्से स्यूस्स्यायूने यदे, ङीन तालजे तीप्ल्या प्रे। 19येशूट्याने पन्डे त्या रदेबे यदे, “गुरु ज्यू, न केने प्रीय, ङैये ने ङ्ये-ङ्येने रीय।”
20येशूदे ङूने यदे, “ओवजे टूङब भोङ् क्यूक्क्य मेस्ये मूने स्यूनब ययूजे चङ् क्यूक्क्य, तर मीजे चजे लागि ट ङ्येलब नेत्याये त्वो।”
21येशूजे सूजो स्यूस्स्यायू नङ्ने सूजोत्याबदे यदे, “प्रभु, खूम् ङैजे पजे मूर्दा पोप्पने प्रस्ये पीन्।”
22तर येशूदे ङूने यदे, “नब ङैजे ङ्ये-ङ्ये ख, मूर्दादेने ङूजे रङ्से मूर्दा पोप्स्य।”
येशूदे हून्डने थम्दीपीदे
मर्कूस ४:३५-४१; लूका ८:२२-२५
23येशू डुङ्गाने टङ्येदे स्यूस्स्यायूये ङूजे ङ्ये-ङ्येने गीलीदे। 24तालने थाने अम्प्रेल्लाबे-त्याफेने केन् हून्ड रदे, मेस्ये क्यू छल्दे डुङ्गा उप्केमेदे। हन्छ्वाब येशू ङ्यूम्म्या प्रेन ख्य। 25स्यूस्स्यायू रदेबे येशूने लङ्देबे येरे यदे, “प्रभु जूक्तीमी! ङीनयू नाश क्यूप्प मल्गीदी।”
26येशूदे थमयूने यदे, “नमयू चेने फ’ खै नमयूजे विश्वास?” होर्दे येशू लङ्देबे हून्ड मेस्ये क्यूजे छालने फ्राचीदे, मेस्ये हून्ड चेलाबे थम्दीयी।
27हम्ब मीयू हार्मन्दीदे यदे “अम्ब कर खल्जे मी टोङ् चेनेयलो उन्दू मेस्ये तालदेये ङूदे यब पो ङ्यीन टोङ्।”
छेत् लादीकब मी ङ्ही
मर्कूस ५:१-२०; लूका ८:२६-३९
28कन्छ्वाब येशू तीप्ल्यादे गदरिनीयूजे मुलुकने फ्योरदे, हन्छ्वाब छेत् लादेब मी ङ्ही तूर्सदे योङ्रदेबे ङूने तूदे। थमयू सोरोफत्या ख्य, होरेक्यूत्देबे हम्ब लम्दे सूत्याये र प्र क्यूर अन्ख्व ख्य। 29थमयूदे येरे यदेबे पारा पूत्दे, “ओ परमेश्वरजे च, ङीयूप्रे नैजे चेकाम? ङीजे न्याय चेब बील अन्क्यूट्टबने न ङीयूने छरङ् पीनने अयाने रऔ?”
30थमयू यली छीत्या चीन्तङ्ने पायूजे बगल त्या चेनख्य। 31छेत्यूदे येशूने येरे यदेबे बिन्ती चीत्दे, “कादेये ङीयूने नदे योम्बीदे यलो, हम्ब पाजे बगल नङ्ने क्योबस्येपीन्।”
32मेस्ये येशूदे छेत्यूने यदे, “योङ्ब।” होर्दे थमयू योङ्देबे पायू नङ्ने क्योइ, मेस्ये पाजे बगल टक्कने पैदे मो-तली मेस्ये क्यूने क्योइदेबे सीइ। 33पा छब मीयू सहरतेले छ्योङ्गीदे, मेस्ये थमयूदे तङब साप्ता पोयू मेस्ये हम्ब छेत् लादीकबयूने च-च क्यूत्दे यब पो मीयूने स्योम्मीदे। 34होर्दे सहरजे मीयू क्वाने लङ्रदेबे येशूने त्वने हूर्रदे, मेस्ये मीयूदे येशूने तूदेबे थमयूजे नेदे प्र यदेबे ङूने बिन्ती चीत्दे।
હાલમાં પસંદ કરેલ:
मत्ती 8: सर् कबुल
Highlight
શેર કરો
નકલ કરો
Want to have your highlights saved across all your devices? Sign up or sign in
Ghale New Testament © Nepal Bible Society, 2011.
