LUKE 20
20
Jesuei Mantrang Heiyei Ngamrou Tlou Kngai
(Mt 21.23-27; Mk 11.27-33)
1Nungkhatnui Jesu'ne Pukhrumna Cheemwaira thimi rapnung marnopibine, lhangaiyei Pao ya shunthutbi louleiyeinung, Suipipu raple heirou Tloulamei upa rapne lhou'urpu raple pulne kartilbine, 2#Jn 2.18. heirou yane Jesu'nung wakyun, “Kanungei yunpilak, Nangne kounaksi mantrangne anakei lhou rapya touthutkuro? Nimanung hune neinung heinakei mantrangya pikhouwo?” 3Heirou Jesu'ne yanung loumallangkur, “Keinekhi nanungei tlou khat ngaithueise; loumallangthi. 4John'ne yui luppinei mane phakur heiri koureiyo? Dunpureiyo, nimanung tlaipang thimirei?” 5Heirouri yane khatle-khat yunrilnarou yeetrillura, “Kane koutoubi mallangserou? Kane, ‘Dunpurei’ toubi yunlanungri, ‘heiyanungri nane koutounei John'ya uklumpimako?’ toubi Ane louyunthurou. 6#Mt 14.5; Lk 7.29. Heiya kane ‘aiyeiri tlaipang thimirei kloume’ toubi yunlanungkhi bi heirou kartilbi klei thimi rapne kayari thlungne nangthurou youlei, ngamri John heiri Thimkhui khatme touri ya nammanekhi muchilei.” 7Heisi tounarouri yane atoubi mallangkur, “Aiyei heiri koulhangreiyo touri kari mumakkura.” 8Heirou Jesu'ne yanung kyun, “Keine kourei mantrangya loubine anakei lhou rapya toukurro touri nanung yunpimarou.”
Darkha Yekulla Lhouchur Thimirap Ngammei Yailim
(Mt 21.33-46; Mk 12.1-12)
9 #
Isa 5.1-7; Mt 25.14. Heirouri Jesu'ne thimi rapnung anakei yailim tlouya yunbine shunmatupikur, “Bongnung bi khatrou napawa khatne yekul khatra darkha yam linglhakhoubi, heirou ane yekul heiri lhouchur thimi rapnung piwurkhou, heitoubi ane cheem lakurkhoubi ram deiranung kheen lepnung chakur. 10Heirouri darkha heitrun luknanungei kheen hungtlungkur heirouri, ane lhouchur thimi raprei aiyei sirukkhi walounanung toubine aiyei shok napung khatya yai leinara heihilkur. Heiya lhouchur thimi rapne shok heiwaya lou'ummurbine, heirou aya koukhatkhi loumanthunmakne hutdingni louhilmallengkur. 11Heisi tounarouri ane hanuikhi shok napung khatya heiyilthu; heiya lhouchur thimi rapne ayakhi hanui lou'ummurthu, heitoubi rikraikhi piwurbi heirou anungkhi koukhatchakhi pithungmakne hilmallengkur. 12Heirouri hanuikhi ane khyumtam'tlung shok khatyakhi heiyilthu, heiwayari yane hee umthutdurbine heitoubi thlei khur yuknara khinglhakurpi. 13Heirouri yekul pu heiwane kyun, ‘Arouri keine kouya touserou ari? Keine keiyei ukningra malungamni khou Chanapawa heiwaya heiyillou dawa; heitoulanungri yane rikrai loukhrumpirou!’ 14Heiya lhouchur thimi rapne aya loumunarouri, yaitam khatle-khat yunrilkur, ‘Ari yekul puwaei Chanapawalei. Kane aya manbi hatlakase, heitoulanungri aiyei cheem-lou, yekul namyerwa heiri kane phathungrou!’ 15Heisi toubine yane ayakhi yekulkumra tangthutbi, heirou aya umhatkur. ‘Heiyanungri, yekul pu heine yanungei kou toupirouwo?’ ” toubi Jesu'ne kngai. 16#Pao 13.46; 18.6; 28.28. “Heiyanungri ane wabi lhouchur thimi rapya hatdurou, heitoubi yekul heiwari lhouchur thimi deinungei pilhakurou.” Heitoubi kyunya thimi rapne mayeknarou, heirou yane kyun, “Heinakri kouniroukhi toumakrou, koungameiyo toulanungri, heinakri Dunpune yamakrou!” 17#Laa 118.22-23; Pao 4.11; 1 Pt 2.6-7. Heirou Jesu'ne yaya thimanrebi shun, “Heiyanungri Khyingei Lailikra atoubi kyunri kouwo? ‘Cheemsa thimi rapne holthutdurkhou thlung heiri nam'rouwei lhangai shutlai thlung hoiyura.’ 18#Isa 8.14-15. Thlung heiyei doura kanelbaangbi karsikur thimi rapri hardane challurou; heirou thlung heine hukounak khatdei doura kalletbanganungri, a heiri rahui thukni nanphoprou.”
Khulrui Kanei Ngamrou Tlou Kngai
(Mt 22.15-22; Mk 12.13-17)
19 #
Lk 19.47. Tloulam marnopi pu raple heirou Suipi pu rapne yakantlangbi Jesu'ya bi heirou mannanungei wairangkur, ngamri Jesuei yunthutkur yailimei tlourap heiri yanungei karhananung hoiyurame toubi yane mukur, heiya yane thimi rapya chiwurnei ngamrou Ayari manchangmak. 20Heitounei ngamrou yane tlakcha khat thiphabi heirou yane thimi thaya neekbine, lhangai thiminak karsayerkur, heitoubi yaya watyilbi, heirou Jesu'ne tlou yunyeinung Aya mannanungei tlou ngaikyer, heitoulanungri yane Aya manbine, Lhou'ur laa'ur thimi rapbei hutra heirou Romia phringki puei hutra pilhaknanungei wairangkur. 21#Jn 3.2. Malhetkur thimi rapne Jesu'nung kyun, “Marnopi pu, Neiyei kyun, heirou shunmatupi tlourap namma heiri chimthilme touri kanekhi mulei. Nangri tlaipang thimiyei mairungya thibine lhou toumakme toukhi kane mulei; heiya tlaipang thiminung Dunpuei kningri kouwo tounei ngammei chimya kanungei shunpilak. 22Kanung yunpilak, touri kane Rome'yei Krungnung kaiyei khulrui pinarou kaiyei Tloulamra karharouri koutoubi leilei; nimanung karhamakrouko?” 23Heiya Jesu'ne yai ukning karkitdei tlou kngai heiya munarouri Ane yanung loushun, 24“Keinungei tuypik mraocha khat mutpilak. Heitoubi mayekhoubi klei heiri huwo touri Keine thiyeise?” Heirouri yane, “Romia Krungeime,” toubi loumallangkur. 25#Rom 13.7; Lk 23.2. Heisi tounarou Jesu'ne kyun, “Heiyanungri lhangaiya, Rome Krungnung pibomthuk khulrui heiri anungei pilaka, heitoubi Dunpunung pibomthuk heiri Dunpunung pilaka.” 26Bi heirou thimi rapbei maibongra Aiyei yunkur tloulhangrap heiyei ngamni yane Aya manchangmakurthu; heinungchumri yanung Aiyei loumallangpikur tlou heirouwei yari beimakne ngakurbi koutlou khatkhi yunmakne rie'leikur.
Hinarei Ringthutnei Ngamrou Tlou Kngai
(Mt 22.23-33; Mk 12.18-27)
27 #
Pao 4.1-2; 23.6-10. Heirouri thimine hiwurnarei ringthutmarou toubi kyun thimi Sadducee rapne Jesuei leinara wabine tlou kngai, 28#Khn 25.5. “Marnopi Pu, Moses'ne Tloulamya atoubi mayekhoulei: ‘Napawa khatne nu loukhoubi chanao pomkhoumakne hiyura, heirou aiyei naowane hanui loubi, aiyei teinung'tlim chanao pomyerthungrou da.’ 29Heitoubi bongnung chaan khatrou pukkanthrin teinao napung-eni leikhou; heitoubi upawane nu loukhoubi chanao pukkhoumakne hikur. 30Heisi tounarouri napuiya heiwiri aiyei thangei naowane louthungthu, 31heirouri hanui aiyei thangei naowane louthungthu. Heinakrimne ya teinao napung'eni reknung thukkur- ya namma hukhi chanao pomkhoumakne hiwurchiya 32Hilluirouri, napuiya heiwikhi hiyura. 33Arouri, hikur thimi rapne katringthut tlainirouri, napuiya heiwiri huinu hoirouyoulei? Yateinao napung-enine aya yainu khoine loukhou.” 34Heirou Jesu'ne yanung loumallangkur, “Angtu chaanyei chanao rapne nulou-shaldunril; 35heiya hiwurbi ringthutnungei chaanya phabomthuk thimi rapri nukhi lourilmarou-shaalkhi dunrilmarou. 36Kouweiyo toulanungri, yari hinaimarou, ngamri ya rapri Thangring rapnakne hoirouwa, ngamri ya rapri Dunpuei Chanaorap hoiyura, heirou yari hiwurnarei ringthutkur chanaorap hoiyura. 37Heitoubi Moses'nekhi chimne mutpikhou touri hikur thimi rapri ringthutthurou. Heeng nburra mei kaangnei ngamrou mayekhounarakhi ane Dunpuei ngamrou yunkhoulei, ‘Abraham, Isaac heirou Jacobei Dunpu’. 38Ari khring Dunpu, Khiyei Dunpu nimak, heitounei ngamrou Anungei thimi namyerwane ringthutthurou.” 39Heirou Tloulamei marnopi pu rapne kanthoubi kyun, “Marnopi pu, neiyei tlou'mallangkur heiso beimakne lhangaiya.” 40Heirouri yane hanui kallengne tlou ngaingammakura.
Messiah'yei Ngamrou Tlou Kngai
(Mt 22.41-46; Mk 12.35-37)
41Heiya Jesu'ne yanung kngai, “Koutoubine Christa'ri David'yei shullamrei yenraan yu-chame toubi ung yarouwo? 42Ngamri David ahaknekhi Laa lailikra atoubi yunlei, ‘Puni keiyei Punung shun: 43Keine nangle karhouril thimi rapya neiyei ho makhana hoiyerbongyenri Keiyei thya lhangra louommalo.’ 44Heisitoubi David'nekhi Ayari Pu toubine ungpilei; heiyanungri koutoubi Ane David'yei yu-cha hoirouwo?”
Jesu'ne Tloulam Marnopi Pu Rapya Tlousherkur
(Mt 23.1-36; Mk 12.38-40)
45Thimirap nammane Aiyei shuntlou heiwaya ningbi leiyeinung, heirou Ane Aiyei ruishik rapnung kyun, 46“Tloulamei marnopipu rapya nane mukheine thithunglak, yari keithilla thimi chungna tlakra linglik chulya nachabine, karwaichayeinung, thimi rapya yanung chouni rikrai khrumyerkniso; heitoubi yari Pukhrumna Cheem rilla omyeinungkhi, heirou yamakul markhulna birakhi, heirou tulpung-chaakpung thukkeinungkhi miyei maibongra omna bi chounara omniso; 47yari tlakchaya thiphabine trulmei rapya heirou yaiyei cheemrei dunbi klei lal rapya marhotbine kutloukniso; heitoubi shunchayeinungkhi tlouchuiya chungne sherbine khyaangne buchaya mutkniso! Heiya yanungeiri nam'rouwei duine klu tanti leiheirou!”
હાલમાં પસંદ કરેલ:
LUKE 20: MARIBSI
Highlight
શેર કરો
નકલ કરો
Want to have your highlights saved across all your devices? Sign up or sign in
Maring Naga Bible - KHYINGEI PU'TLOU
Copyright © 2013 by The Bible Society of India
Used by permission. All rights reserved worldwide.
