LUKE 18
18
Trulmeiwi Khatle Pichar Pu Khatdei Ngamrou Yailim
1Heitoubi Jesu'ne Aiyei ruishik rapnung yailim tlou khat yunbine, yaya karyomne shunchabi heirou ukningra kanthritmakne leinanungei toubi shunmatupikur. 2Ane kyun, “Bongnung chaan khatrou khukarthil khatra pichar pu khat leikhou, a heine Dunpuyakhi chimak thimi, heitoubi thimi rapyakhi rikraimak pichar pu. 3Heirou khukarthil heitamrou napuiya trulmeiwi khatkhi leikhou, heirou trulmei heine napawa heiyei bira wabine, ‘Keile karhouril thimiya khlang lhakpilaklo,’ toubi shunchakur. 4Kheen kounakrou pichar pu heiwane aiyei tlouya loupimak; heiya hillouri aitam ningchakur, ‘Keine Dunpuya chimakya hoiyanungkhi heirou thimi rapbei maiya thibine rikrai mutmakanungkhi, 5trulmeiwi heine keiya karyomne markholbi leikur heinung'tlim, keine trulmeiwi heiyei chim kou'leileikhi thirouwa. Keine heiya toumakanungri, ane keileinara karyom wabine, keiya duine markholrou youlei, nimanung keiya hillou ane klal dayerkurkhi kya!’ ” 6Heirou Jesu'ne heisi yenkyun, “Chimmak pichar puei kyun heiwaya khalthilak. 7Arouri, Dunpune Aiyei thimi rapne Airouwei masa-nunghang naimakne trungpinanungei buchanarou chimya thibi pichar toupimakrouko? Ane yaya trungpimakrouko? 8Keine nanungei tanghakne yunpilei, ane yai kning hilthungne khnotni pichar loutoupirou. Heiya thimiyei Chanapawane yongeinung tlaipangra uklum thimirap pharouko?”
Lhangai Karsa Khatle Heirou Khulruithou Thimi Khatdei Ngamrou Yailim
9Jesu'ne yaitamyei lhangaiya malungambi heirou thimi deiyari koukhi lhou hoipimak thimi rapnung anakei yailim tlouya yunpikur. 10“Bongnung chaan khatrou bi khatra napawa napung-khnine Pukhrumna Cheemra shuncharou pulne polhak: napung khatri Lhangai karsa thimi, heirou khatpari khulrui thou thimi. 11Heirouri Lhangai karsa napawa heine aitam mayungbi Dunpunung shunchakur, ‘Dunpu, keine Neiya mathanglei, keiri thimi deinakne khram tangmak, kyun ningmakhi toumak, nimanung miyei nu-chayakhi lalmak. Heirou keine Neiya mathanglei, touri keiri bi arou klei khulrui thou thiminak nimakme. 12Keiri hapta khatrou tlaini khnini chamaimakne kngei, heitoubi keiyei lalkhi machaei chiptamkhi neinung makatlei.’ 13Heiya khulrui thou thimi heiwari tlatnara mayungbine, aiyei mitkhi nungthou lhangra mangalthut'ngammakne, heiya aiyei malungpakra umbine shunchakur, ‘Dunpu, borh keiya bei kringpilaklo!’ 14‘Keine nanungei kyunri,’ Jesu'ne kyun, ‘Lhangai karsa napawa nimakne, khulrui thou thimi heiwari Dunpuei bomra chim thimi khat khoine mshing sherchokur, heitoubi ane cheemra shaalkur. Ngamri hukhatne aitamya tangyerkni hoiyanungri ukning marnim hoirou da, heirou hukhatne ukning marnim thimi hoiyanungri aya tangyerpirou.’ ”
Jesu'ne Douwa Rapya Phor Pikur
(Mt 19.13-15; Mk 10.13-16)
15 #
Mt 18.3. Thimi thane yaiyei douwacha rapya Jesuei leinara heiruiheibi, heirou Aya yaidoura Aiyei hut theryernanung wachangkur. Heirou ruishik rapne yaya loumunarou, yane lousamkur. 16Heiya Jesu'ne douwa rapya Aiyei leinara heiunglhakbi Ane kyun, “Douwarap heiri Keinungei wachangasu, heirou yayari lou-mankanpimak, ngamri Dunpuei Krungram heiri yanaknungei. 17Atoubi Keiyei kyunya malumpimak! Huhune douwa rapnakne Dunpuei Krungramya loulhakmak thimi heiri kouniroukhi bi heirou changmakrou.”
Dun Napawa Khat
(Mt 19.16-30; Mk 10.17-31)
18 #
Lk 10.25. Heirou Jehudiyei ruipipu khatne Jesu'nung kngai, “Lhangai Marnopipu, keine klui naimak chaanya phananungei kou touserouwo?” 19Heirou Jesu'ne anung loushun, “Kounungei keiyari ‘lhangaiwa’ toubi ungkurrawo? Dunpu nimakne deiri lhangai hukhatkhi maklei. 20#Hoy 20.12-16; Khn 5.16-20; Rom 13.9; Jas 2.11. Nangne Chaylam rapya kmu heiwariya: ‘Minu-michaya thirmak; thimi hatmak; muchamak; thimi huyakhi klal theibaangpimak; neipui-neipaya rikrai khrumnalak.’ ” 21Heirou napawa heine loumallang, “Keine keidouwei waiyoubi Chaylamrap namyerwa heiri ngaakurla.” 22#Lk 12.33; Pao 2.45; 4.32. Jesu'ne heiwaya mayeknarou, Ane napawa heinung kyun, “Heiya neiyei tounungei kwat leileihui. Neiyei dunbi klei lal namtomma yorwurbi, heirou tuy heiri kanring thimi rapnung yerpiwurlaka, heitoulanungri Thangmunra neiyei lal marpeibi leirou; heitoubi Keihilla chanthunga.” 23Heiya napawa heine heitoubi kyun heiya mayeknarouri, aiyei lhawai beimakne lahwura, koungameiyo toulanungri a heiri beimakne dun thimi. 24#Mt 19.23-26; Mk 10.23-27. Heirou Jesu'ne Aiyei lhawai lahkur heiwaya muwurbi heirou Ane kyun, “Dun thimi rapne Dunpuei Krungramra changrouri beimakne luleinu! 25Heitoubi dun thimi rapne Dunpuei Krungramra changnung tlimri Utni phantrim khnara kalleikurni dui klai.” 26Heitoubi kyunya mayekthung thimi rapne kngai, “Heiyanungri huhune kalpiya phamanerou youlei?” 27#Kan 18.14; Job 42.2; Jer 32.17; Lk 1.37. Heirou Jesu'ne loumallang, “Tlaipang thimiyei touchangmak heiri Dunpuneri toumanelei.” 28#Mt 19.27-30; Mk 10.29-31; Lk 5.1-11. Heirouri Peter'ne kyun, “Thilak, kari kaiyei cheemya horkhouwurbine Neihilla chanthungkurra.” 29“Moi, heiwari chimlei,” toubi Jesu'ne yanung loushun, “heirou Keine nanung tanghakne yunpilei touri hukhatne Dunpuei Krung ramnung'tlim aiyei cheem, nimanung aiyei nu-charap, nimanung aiyei teinaorap, nimanung aiyei pui-pa rapya lakurkhoubine chanthung thimiri, 30angtuei tlaipang chaan aroukhi heitoubi hillei hungrou kyou klui naimak chaan heiroukhi marthumni phaheirou.”
Jesu'ne Khyumbui Tlungne Aiyei Hirouyounei Ngamrou Yunthutkhou
(Mt 20.17-19; Mk 10.32-34)
31 #
Lk 9.22,44-45; 17.25. Jesu'ne ruishik chiple-khniya ruimartleiloubi, heirou yanungei shunmatupikur, “Louningpilak, kane Jerusalem'ra kalei heitoubi bi heirou Thimiyei Chanapawaei ngamrou Thimkhui rapne mayethutkhou heirapya hungtlungyerou. 32Aya thimi dei rapbei hutra pithutdurbi, heirou yane Aya laonabi, rikrai pirou, heitoubi Aya matilkhi mthukphangrou. 33Yane Aya shungnikhi umphit touwurbine, heitoubi manyarhatrou; heiya khyumni tlungkur tlainirouri, A heiri ringthutthurou.” 34Heiya ruishik rapne kyun heiri kouweiyo touri mumakura; heiyei tlouri yanungeiri tloudum hoiyura, heirou yane Jesuei kyun tlou heiri kouwei ngammo toukhi mumakura.
Jesu'ne Bucha-Bu'kmai Mitdeo Napawa Khatya Raikyer
(Mt 20.29-34; Mk 10.46-52)
35 #
Mt 9.27-31; Mk 8.22; Jn 9.1-7. Jesu'ne Jericho khukarthil yenkarnakyeinung mitdeo napawa khatne lamruira ombine buphabi louklei. 36Heirou ane thimi rapbei lamtlaya loumayeknarou, “Kouweiyawo awaya?” toubine loungaithungkur. 37“Nazarethdei Jesu yenraalleime,” toubi thimi rapne anung louyunpi. 38Heisi tounarouri ane lou'ungraochakur, “David'yei Chanapawa, Jesu! Keiya bei kringpilaklo!” 39Heirouri maibongra louklei thimi rapne aya shammurbi, mulleiya toubi shunkur. Heiya ane duidui ungraobi kyun, “David'yei Chanapawa, keiya bei kringpilaklo!” 40Heirouri Jesu'ne mayungurbi heirou mitdeo napawa heiwaya Aiyei leinara heiruilhaknung shunkur. Heirou ane pongra wakarsilkur heirouri Jesu'ne anungei loukngai: 41“Keine neinung kouya touyerkniyo?” “Upawa, keiyei mitdeo awaya hanui waaryerpilaklo!” toubi ane loumallang. 42Heirou Jesu'ne anungei kyun, “Heiyanungri, neiyei mitdeo heiri warlakasu! Ngamri neiyei uklum heine lhangaiyerwurla.” 43Heirouri tallengne aiyei mitdeokur heiso mumanekur, heirouri ane Jesuei hilla chanthungbi Dunpuya mathangkur. Heitoubi thukkur lhou heiya muthungkur thimirap namyerne Dunpuya mathangkur.
હાલમાં પસંદ કરેલ:
LUKE 18: MARIBSI
Highlight
શેર કરો
નકલ કરો
Want to have your highlights saved across all your devices? Sign up or sign in
Maring Naga Bible - KHYINGEI PU'TLOU
Copyright © 2013 by The Bible Society of India
Used by permission. All rights reserved worldwide.
